[Зач. 70.] Возлю́бленнiи, не за́повѣдь но́ву пишу́ ва́мъ, но за́повѣдь ве́тху, ю́же имѣ́сте испе́рва. За́повѣдь ве́тха е́сть сло́во, е́же слы́шасте испе́рва.

Па́ки за́повѣдь но́ву пишу́ ва́мъ, е́же е́сть пои́стиннѣ въ Не́мъ и въ ва́съ: я́ко тма́ мимохо́дитъ и свѣ́тъ и́стинный се́й уже́ сiя́етъ.

Глаго́ляй себе́ во свѣ́тѣ бы́ти, а бра́та своего́ ненави́дяй, во тмѣ́ е́сть досе́лѣ.

Любя́й бра́та своего́ во свѣ́тѣ пребыва́етъ, и собла́зна въ не́мъ нѣ́сть.

А ненави́дяй бра́та своего́ во тмѣ́ е́сть, и во тмѣ́ хо́дитъ, и не вѣ́сть, ка́мо и́детъ, я́ко тма́ ослѣпи́ о́чи ему́.

Пишу́ ва́мъ, ча́дца, я́ко оставля́ются ва́мъ грѣси́ и́мене Его́ ра́ди.

Пишу́ ва́мъ, отцы́, я́ко позна́сте Безнача́лнаго. Пишу́ ва́мъ, ю́ноши, я́ко побѣди́сте лука́ваго. Пишу́ ва́мъ, дѣ́ти, я́ко позна́сте Отца́.

Писа́хъ ва́мъ, отцы́, я́ко позна́сте Иско́ннаго: писа́хъ ва́мъ, ю́ноши, я́ко крѣ́пцы есте́, и сло́во Бо́жiе въ ва́съ пребыва́етъ, и побѣди́сте лука́ваго.

Не люби́те мíра, ни я́же въ мíрѣ: а́ще кто́ лю́битъ мíръ, нѣ́сть любве́ О́тчи въ не́мъ:

я́ко все́, е́же въ мíрѣ, по́хоть плотска́я и по́хоть очи́ма и го́рдость жите́йская, нѣ́сть от Отца́, но от мíра сего́ е́сть.

И мíръ прехо́дитъ, и по́хоть его́, а творя́й во́лю Бо́жiю пребыва́етъ во вѣ́ки.

[Зач. 71.] Дѣ́ти, послѣ́дняя годи́на е́сть. И я́коже слы́шасте, я́ко анти́христъ гряде́тъ, и ны́нѣ анти́христи мно́зи бы́ша, от сего́ разумѣва́емъ, я́ко послѣ́днiй ча́съ е́сть.

От на́съ изыдо́ша, но не бѣ́ша от на́съ: а́ще бы от на́съ бы́ли, пребы́ли у́бо бы́ша съ на́ми: но да явя́тся, я́ко не су́ть вси́ от на́съ.

И вы́ пома́занiе и́мате от Свята́го, и вѣ́сте вся́.

Не писа́хъ ва́мъ, я́ко не вѣ́сте и́стины, но я́ко вѣ́сте ю́ и я́ко вся́ка лжа́ от и́стины нѣ́сть.

Кто́ е́сть лжи́вый, то́чiю отмета́яйся, я́ко Иису́съ нѣ́сть Христо́съ? Се́й е́сть анти́христъ, отмета́яйся Отца́ и Сы́на.

Вся́къ отмета́яйся Сы́на, ни Отца́ и́мать: а исповѣ́даяй Сы́на, и Отца́ и́мать.

Вы́ у́бо е́же слы́шасте испе́рва, въ ва́съ да пребыва́етъ: [и] а́ще въ ва́съ пребу́детъ, е́же испе́рва слы́шасте, и вы́ въ Сы́нѣ и Отцѣ́ пребу́дете.

И сiе́ е́сть обѣтова́нiе, е́же Са́мъ обѣща́ на́мъ, живо́тъ вѣ́чный.

Сiя́ писа́хъ ва́мъ о льстя́щихъ ва́съ.

И вы́ е́же пома́занiе прiя́сте от Него́, въ ва́съ пребыва́етъ, и не тре́буете, да кто́ учи́тъ вы́: но я́ко то́ са́мо пома́занiе учи́тъ вы́ о все́мъ, и и́стинно е́сть, и нѣ́сть ло́жно: и я́коже научи́ ва́съ, пребыва́йте въ не́мъ.

И ны́нѣ, ча́дца, пребыва́йте въ Не́мъ, да егда́ яви́тся, и́мамы дерзнове́нiе и не посрами́мся от Него́ въ прише́ствiи Его́.

А́ще вѣ́сте, я́ко пра́ведникъ е́сть, разумѣ́йте, я́ко вся́къ творя́й пра́вду от Него́ роди́ся.

Глава: