Скрыть
13:1
13:2
13:3
13:4
13:5
13:6
13:7
13:8
13:9
13:10
13:11
13:12
13:13
13:14
13:15
13:16
13:17
13:18
13:19
13:20
13:21
13:22
13:23
13:24
13:25
13:26
13:27
13:28
13:29
13:30
13:31
13:32
13:33
13:34
13:35
13:36
13:37
13:38
13:39
13:40
13:41
13:42
13:43
13:44
13:45
13:46
13:47
13:48
13:49
13:50
13:51
13:52
13:53
И слы́ша Си́монъ, я́ко собра́ три́фонъ си́лу мно́гу прiити́ въ зе́млю Иу́дину и сокруши́ти ю́,
и ви́дѣ лю́ди, я́ко су́ть въ стра́сѣ и тре́петѣ, и взы́де во Иерусали́мъ и собра́ лю́ди,
и увѣща́ и́хъ и рече́ и́мъ: вы́ вѣ́сте, ели́ка а́зъ и бра́тiя моя́ и до́мъ отца́ мо­его́ сотвори́хомъ и о зако́нѣхъ и о святы́хъ, и бра́ни и тѣсноты́, и́хже ви́дѣхомъ:
сего́ ра́ди погибо́ша бра́тiя моя́ вси́ ра́ди Изра́иля, и оста́хъ а́зъ еди́нъ:
и ны́нѣ не бу́ди ми́ пощади́ти души́ мо­ея́ во вся́ко вре́мя скорбе́й, не бо́ лу́чшiй е́смь бра́тiи мо­ея́:
оба́че от­мщу́ о язы́цѣ мо­е́мъ и о святы́хъ и о жена́хъ и ча́дѣхъ на́шихъ: я́ко собра́шася вси́ язы́цы сотре́ти на́съ вражды́ ра́ди.
И воз­горѣ́шася ду́хомъ лю́дiе вку́пѣ послу́шати слове́съ си́хъ
и от­вѣща́ша гла́сомъ ве́лiимъ, глаго́люще: ты́ еси́ во́ждь на́шъ вмѣ́сто Иу́ды и Ионаѳа́на бра́та тво­его́:
побори́ бра́нь на́шу, и вся́, ели́ка а́ще рече́ши на́мъ, сотвори́мъ.
И собра́ вся́ му́жы бра́н­ники и ускори́ соверши́ти вся́ стѣ́ны Иерусали́мскiя и утверди́ его́ о́крестъ:
и посла́ Ионаѳа́на сы́на Авессало́мова и съ ни́мъ си́лу дово́лную во Иоппі́ю, и изгна́ су́щихъ въ не́й и пребы́сть та́мо въ не́й.
И воз­дви́жеся три́фонъ от­ Птолемаи́ды съ си́лою ве́лiею вни́ти въ зе́млю Иу́дину, и Ионаѳа́нъ съ ни́мъ въ стра́жи.
Си́монъ же ополчи́ся во Ади́дѣ на лицы́ по́ля.
И позна́ три́фонъ, я́ко воста́ Си́монъ вмѣ́сто бра́та сво­его́ Ионаѳа́на и я́ко срази́тися съ ни́мъ хо́щетъ бра́нiю,
посла́ къ нему́ послы́ глаго́ля: сребра́ ра́ди, е́же до́лженъ бра́тъ тво́й Ионаѳа́нъ царю́, потре́бъ ра́ди, и́хже имѣ́яше, содержи́мъ его́:
и ны́нѣ посли́ сребра́ тала́нтовъ сто́ и два́ сы́на его́ въ зало́гъ, я́ко да не от­пуще́нъ от­сту́питъ от­ на́съ, и от­пу́стимъ его́.
И позна́ Си́монъ, я́ко ле́стiю глаго́лютъ къ нему́, и посла́ сребро́ и о́троки, да не когда́ вражду́ прiи́метъ ве́лiю от­ люді́й, глаго́лющихъ:
я́ко не посла́ ему́ сребра́ и отроко́въ, и поги́бе.
И посла́ о́троки и сто́ тала́нтъ. И солга́ и не от­пусти́ Ионаѳа́на.
И по си́хъ прiи́де три́фонъ, да вни́детъ во страну́ и сотре́тъ ю́, и обы́де пу́ть, и́же веде́тъ во Адо́ру: а Си́монъ и по́лкъ его́ противо­идя́ше ему́ на вся́ко мѣ́сто, а́може идя́ше.
Су́щiи же от­ краегра́дiя посла́ша къ три́фону посло́въ понужда́ющихъ его́, да потщи́т­ся прiити́ къ ни́мъ пусты́нею и посла́ти и́мъ пи́щы.
И угото́ва три́фонъ вся́ ко́н­ники своя́, е́же прiити́ въ но́щь о́ную. и бѣ́ снѣ́гъ ве́лiй зѣло́, и не прiи́де снѣ́га ра́ди: и воста́ и отъи́де въ Галаади́тиду.
Егда́ же при­­бли́жися къ Васка́мѣ, уби́ Ионаѳа́на, и погребе́нъ бы́ти та́мо.
И воз­врати́ся три́фонъ и и́де въ зе́млю свою́.
И посла́ Си́монъ и взя́ ко́сти Ионаѳа́на бра́та сво­его́ и погребе́ я́ въ моди́нѣ гра́дѣ оте́цъ сво­и́хъ.
И пла́каша его́ ве́сь Изра́иль пла́чемъ ве́лiимъ и рыда́ху его́ дни́ мно́ги.
И созда́ Си́монъ надъ гро́бомъ отца́ сво­его́ и бра́тiй сво­и́хъ, и воз­несе́ его́ видѣ́нiемъ, ка́менiемъ те́санымъ созади́ и сопреди́,
и поста́ви на ни́хъ се́дмь пирами́дъ, еди́ну проти́ву еди́ноя, отцу́ и ма́тери и четы́ремъ бра́тiямъ:
и си́мъ сотвори́ огра́ды, и обложи́ столпы́ вели́кiя, и сотвори́ на столпѣ́хъ всеору́жiя въ па́мять вѣ́чную, и при­­ всеору́жiихъ корабли́ изва́ян­ныя, во е́же ви́димымъ бы́ти от­ всѣ́хъ пла́ва­ю­щихъ на мо́ри.
Се́й гро́бъ, его́же сотвори́ въ моди́нѣ, да́же до сего́ дне́.
Три́фонъ же хожда́­ше ле́стiю со Антiо́хомъ царе́мъ ю́нымъ, и уби́ его́,
и воцари́ся вмѣ́сто его́, и воз­ложи́ на ся́ дiади́му Асі́йскую, и сотвори́ я́зву вели́кую на земли́.
И созда́ Си́монъ тверды́ни иуде́йскiя, и огради́ столпа́ми высо́кими и стѣна́ми ве́лiими, и врата́ми и заво́рами, и положи́ пи́щы въ тверды́нехъ.
И избра́ Си́монъ му́жы и посла́ ко дими́трiю царю́, да сотвори́тъ ослабле́нiе странѣ́, я́ко вся́ дѣла́ три́фонова бѣ́ша хище́нiя.
И посла́ ему́ дими́трiй ца́рь по словесе́мъ си́мъ, и от­вѣща́ ему́, и написа́ ему́ еписто́лiю сицеву́:
ца́рь дими́трiй Си́мону архiере́ю и дру́гу царе́й и старѣ́йшинамъ и язы́ку Иуде́йску ра́доватися:
вѣне́цъ златы́й и пе́рстень, я́же посла́лъ еси́, воспрiя́хомъ, и гото́ви есмы́ сотвори́ти съ ва́ми ми́ръ вели́къ и писа́ти къ су́щымъ надъ да́ньми, е́же оста́вити ва́мъ да́ни:
и ели́ка уста́вихомъ ва́мъ, крѣ́пка су́ть, и тверды́ни, я́же созда́сте, да бу́дутъ ва́мъ:
от­пуща́емъ же невѣ́дѣнiя и согрѣше́нiя да́же до дне́шняго дне́, и вѣне́цъ, его́же до́лжни бы́сте, и а́ще ка́я ина́я да́нь бѣ́ во Иерусали́мѣ, ктому́ да не бу́дутъ дава́емая:
и а́ще нѣ́цыи уго́дни от­ ва́съ вписа́тися къ на́шымъ, да впи́шут­ся, и да бу́детъ между́ на́ми ми́ръ.
Лѣ́та сто́ седмьдеся́таго отъ­я́то бы́сть и́го язы́ческое от­ Изра́иля,
и нача́ша лю́дiе Изра́илевы писа́ти въ писа́нiихъ и въ совѣща́нiихъ: лѣ́та пе́рваго при­­ Си́монѣ архiере́и вели́цѣмъ и во́инѣ и вожди́ Иуде́йстѣмъ.
Во дне́хъ о́нѣхъ прiи́де Си́монъ въ Га́зу и окружи́ ю́ полка́ми, и сотвори́ миха́ны и при­­бли́жися ко гра́ду, и изби́ сто́лпъ еди́нъ и взя́.
И вскача́ху во гра́дъ и́же бя́ху въ миха́нѣ, и бы́сть смяте́нiе ве́лiе въ гра́дѣ.
И взыдо́ша и́же бѣ́ху во гра́дѣ съ жена́ми и ча́ды на стѣ́ну, расте́рзаны иму́ще ри́зы своя́, и возопи́ша гла́сомъ ве́лiимъ, моля́ще Си́мона десни́цу и́мъ да́ти,
и реко́ша: не сотвори́ на́мъ по лука́в­ст­вомъ на́шымъ, но по ми́лости тво­е́й.
И уми́лостивися и́мъ Си́монъ, не во­ева́ и́хъ, и изгна́ и́хъ от­ гра́да: и очи́сти до́мы, въ ни́хже бя́ху и́доли, и та́ко вни́де въ о́нь съ пѣ́сньми благословя́ Го́спода:
и изве́рже изъ него́ вся́кую нечистоту́, и всели́ въ не́мъ му́жы, и́же зако́нъ творя́тъ, и утверди́ его́, и сотвори́ себѣ́ въ не́мъ обита́нiе.
Су́щымъ же от­ краегра́дiя во Иерусали́мѣ воз­браня́шеся исходи́ти и входи́ти во страну́, и купова́ти и продава́ти: и взалка́ша зѣло́, и мно́зи от­ ни́хъ гла́домъ погибо́ша.
И возопи́ша къ Си́мону десни́цу прiя́ти, и даде́ и́мъ, и изгна́ и́хъ от­ту́ду и очи́сти краегра́дiе от­ оскверне́нiй.
И вни́де въ не́ въ два́десять тре́тiй де́нь втора́го ме́сяца, лѣ́та сто́ се́дмьдесятъ пе́рваго съ хвале́нiемъ и ва́iями, и въ гу́слехъ и кимва́лѣхъ и сопѣ́лехъ, и въ пѣ́снехъ и пѣ́нiихъ, я́ко сокруши́ся вра́гъ ве́лiй от­ Изра́иля.
И уста́ви на вся́кое лѣ́то провожда́ти де́нь то́й съ весе́лiемъ, и утверди́ го́ру святи́лища, я́же бли́зъ краегра́дiя, и всели́ся ту́ са́мъ и и́же съ ни́мъ.
И ви́дѣ Си́монъ Иоа́н­на сы́на сво­его́, я́ко му́жъ е́сть, и поста́ви его́ вожда́ си́лъ всѣ́хъ, и всели́ся въ газа́рѣхъ.
Копировать текст Копировать ссылку Толкования стиха
Библ. энциклопедия Библейский словарь Словарь библ. образов
Цитата из Библии каждое утро в Telegram.
Наш канал: https://t.me/azbible