Азбука веры » Би́блия » Е́здры 2-я » гл.3

Е́здры 2-я, Глава 3

Толкования

Толкования главы

Толковая Библия А.П. Лопухина

3:1

3:2

3:3

3:4

3:5

3:6

3:7

3:8

3:9

3:10

3:11

3:12

3:13

3:14

3:15

3:16

3:17

3:18

3:19

3:20

3:21

3:22

3:23

3:24

Церковнослав. (рус. дореф.)

Языки

И воцари́вся да́рiй сотвори́ ве́черю вели́ку всѣ́мъ, и́же подъ ни́мъ, и всѣ́мъ, и́же от до́му ро́да его́, и всѣ́мъ вельмо́жамъ ми́дскимъ и пе́рсскимъ,

и всѣ́мъ сатра́помъ, и намѣ́стникомъ, и воево́дамъ, и́же подъ ни́мъ от инді́и да́же до еѳiо́пiи на сто́ два́десять се́дмь воево́дствъ.

И егда́ ядо́ша и пи́ша, и насы́тившеся возврати́шася, тогда́ да́рiй ца́рь вни́де въ ло́жницу свою́, и поспа́ и возбуди́ся.

Тогда́ трiе́ ю́ноши тѣле́снiи стра́жы, и́же стрежа́ху тѣ́ло царе́во, реко́ша дру́гъ ко дру́гу:

рце́мъ кі́йждо от на́съ еди́но сло́во: и и́же превозмо́жетъ, и его́же яви́тся сло́во мудрѣ́йше друга́го, да́стъ ему́ ца́рь да́рiй да́ры вели́кiя и по́чести вели́кiя,

и порфи́рою одѣ́янъ бу́детъ, и во зла́тѣ пи́ти и на зла́тѣ спа́ти, и колесни́цу златоу́здну, и кида́ръ виссо́нный, и гри́вну о́крестъ вы́и,

и вторы́й ся́детъ по да́рiи ра́ди прему́дрости своея́, и сро́дникъ да́рiевъ нарече́тся.

И тогда́ написа́вше кі́йждо свое́ сло́во запеча́таша и подложи́ша подъ возгла́вiе да́рiа царя́, ⁹и реко́ша:^–

^–егда́ воста́нетъ ца́рь, даду́тъ ему́ писа́нiе, и его́же разсу́дитъ ца́рь и три́ вельмо́жи пе́рсстiи, я́ко сло́во его́ мудрѣ́йше е́сть, тому́ да да́стся побѣ́да, я́коже пи́сано е́сть,

Еди́нъ написа́: сильнѣ́е е́сть вино́,

Другі́й написа́: сильнѣ́е е́сть ца́рь.

Тре́тiй написа́: сильнѣ́е су́ть жены́, па́че же всѣ́хъ побѣжда́етъ и́стина.

Егда́ же воста́ ца́рь, взе́мше писа́нiя да́ша ему́, и прочте́.

И посла́въ созва́ всѣ́хъ вельмо́жей пе́рсскихъ и ми́дскихъ и сатра́повъ, и воево́дъ и намѣ́стниковъ и ипа́товъ,

и сѣ́де въ совѣ́тнѣй пала́тѣ, и прочте́но бы́сть писа́нiе предъ ни́ми.

И рече́: призови́те ю́ношъ, и ті́и извѣстя́тъ словеса́ своя́. И при́звани бы́ша и внидо́ша.

И рече́ и́мъ: возвѣсти́те на́мъ о тѣ́хъ, я́же пи́сана су́ть. И нача́ пе́рвый, и́же глаго́ла о крѣ́пости вина́, ¹⁸и рече́ си́це:^–

^–О, му́жiе, ко́ль премога́етъ вино́! всѣ́хъ человѣ́къ пiю́щихъ его́ прельща́етъ:

у́мъ царе́въ и си́раго твори́тъ у́мъ еди́нъ, и раба́ и свобо́днаго, и убо́гаго и бога́таго,

и вся́къ у́мъ превраща́етъ въ безстра́шiе и весе́лiе, и не па́мятуетъ вся́кiя печа́ли и вся́каго до́лга:

и вся́ сердца́ сотворя́етъ бога́та, и не па́мятуетъ царя́, ниже́ вельмо́жи, и вся́ по тала́нтомъ глаго́лати твори́тъ:

и не па́мятуютъ, егда́ пiю́тъ, угожда́ти друго́мъ и бра́тiи, и не мно́го пото́мъ извлача́тъ мечы́:

и егда́ от вина́ воста́нутъ, не по́мнятъ, я́же сотвори́ша:

О, му́жiе не премога́етъ ли вино́, е́же та́ко понужда́етъ твори́ти? И умолча́ глаго́лавый си́це.