◀

2-я книга  Ездры

▶

Во второ́е же лѣ́то ца́р­ст­ва да́рiева проро́че­ст­вова Агге́й и заха́рiа сы́нъ а́ддовъ, проро́цы, ко Иуде́емъ, и́же во Иуде́и и во Иерусали́мѣ, и́менемъ Го́спода Бо́га Изра́илева къ ни́мъ.

Тогда́ ста́въ зорова́вель сы́нъ Салаѳiи́левъ и иису́съ сы́нъ Иоседе́ковъ, нача́ста созида́ти до́мъ Госпо́день, и́же во Иерусали́мѣ, су́щымъ съ ни́ми проро́комъ Госпо́днимъ помага́ющымъ и́мъ.

Въ то́ вре́мя прiи́де къ ни́мъ Сиси́н­нiй во­ево́да сирі́йскiй и Финикі́йскiй и саѳравуза́нъ и дру́зiе его́, и реко́ша и́мъ:

чі́имъ повелѣ́нiемъ вы́ до́мъ се́й созида́ете, и кро́въ се́й, и и́на вся́ соверша́ете? и кто́ су́ть стро­и́телiе, и́же сiя́ созида́ютъ,

И имѣ́ша благода́ть посѣще́нiя бы́в­шаго на плѣне́нiе от­ Го́спода старѣ́йшины Иуде́йстiи:

и не воз­брани́ша и́мъ созида́ти, до́ндеже воз­вѣсти́т­ся да́рiю о си́хъ и от­вѣща́но бу́детъ.

О́бразъ же посла́нiя, е́же писа́ша да́рiю и посла́ша: Сиси́н­нiй во­ево́да сирі́йскiй и Финикі́йскiй и саѳравуза́нъ и дру́зiе, и́же въ сирі́и и Финикі́и во­ево́ды, царю́ да́рiю ра́доватися:

вся́ зна́ема да бу́дутъ господи́ну на́­шему царю́, я́ко при­­ше́дше во страну́ Иуде́йску и в­ше́дше во Иерусали́мъ гра́дъ, обрѣто́хомъ от­ плѣне́нiя старѣ́йшинъ Иуде́йскихъ во Иерусали́мѣ гра́дѣ

созида́ющихъ до́мъ Го́споду вели́къ, но́въ от­ ка́меней те́саныхъ драги́хъ, полага́юще древа́ въ стѣна́хъ,

и дѣла́ та́ съ при­­лѣжа́нiемъ творя́т­ся, и преспѣва́етъ дѣ́ло въ рука́хъ и́хъ и во все́й сла́вѣ и при­­лѣжа́нiи соверша́ет­ся:

тогда́ вопроси́хомъ старѣ́йшинъ о́ныхъ, глаго́люще: чі́имъ повелѣ́нiемъ вы́ созида́ете до́мъ се́й и дѣла́ та́ основа́ете?

вопроси́хомъ у́бо и́хъ, да вѣ́домо сотвори́мъ тебѣ́ и напи́шемъ ти́ человѣ́къ предста́телей, и име́нъ писа́нiя испроси́хомъ от­ о́ныхъ предста́телей:

ті́и же от­вѣща́ша на́мъ, глаго́люще: мы́ есмы́ раби́ Го́спода, и́же сотвори́ не́бо и зе́млю,

и созида́­шеся се́й до́мъ пре́жде лѣ́тъ мно́гихъ от­ царя́ Изра́илева вели́каго и крѣ́пкаго, и соверши́ся,

и поне́же отцы́ на́ши прогнѣ́вав­ше согрѣши́ша къ Бо́гу Изра́илеву небе́сному, предаде́ и́хъ въ ру́ки навуходоно́сора царя́ Вавило́нскаго, царя́ Халде́йска,

до́мъ же то́й разори́в­ше сожго́ша и люді́й плѣни́ша въ Вавило́нъ:

въ пе́рвое же лѣ́то ца́р­ст­ву­ю­щу ки́ру царю́ надъ страно́ю Вавило́нскою, писа́ ца́рь ки́ръ до́мъ то́й созида́ти,

и свяще́н­ныя сосу́ды златы́я и сре́бряныя, и́хже изнесе́ навуходоно́соръ изъ до́му, и́же во Иерусали́мѣ, и поста́ви я́ во сво­е́мъ ка́пищи, па́ки изнесе́ та́ ки́ръ ца́рь от­ хра́ма, и́же въ Вавило́нѣ и предаде́ и́хъ зорова́велю и санавасса́ру во­ево́дѣ,

и повелѣ́но бы́сть ему́ от­нести́ вся́ сiя́ сосу́ды и воз­ложи́ти во хра́мъ, и́же во Иерусали́мѣ, и хра́мъ Госпо́день се́й созида́ти на мѣ́стѣ его́:

тогда́ санавасса́ръ о́ный при­­ше́дъ, положи́ основа́нiя до́му Госпо́дня, и́же во Иерусали́мѣ, и от­ о́наго да́же доны́нѣ зи́ждемый не прiя́ соверше́нiя:

ны́нѣ у́бо, а́ще уго́дно тебѣ́, О, царю́, да по­и́щет­ся въ ца́рскихъ книгохрани́лницахъ ки́ровыхъ [я́же въ Вавило́нѣ],

и а́ще обрѣ́тено бу́детъ съ повелѣ́нiемъ ки́ра царя́ бы́в­шее стро­е́нiе до́му Госпо́дня, и́же во Иерусали́мѣ, и су́дит­ся от­ господи́на царя́ на́­шего, да воз­вѣсти́т­ся о тѣ́хъ на́мъ.

Тогда́ ца́рь да́рiй повелѣ́ иска́ти въ ца́рскихъ книгохрани́лницахъ су́щихъ въ Вавило́нѣ, и обрѣ́тено бы́сть во еквата́нѣхъ, во гра́дѣ су́щемъ во странѣ́ миді́йстѣй, мѣ́сто еди́но [въ лѣтопи́сцѣ], въ не́мже напи́сана бя́ху сiя́:

въ лѣ́то пе́рвое ца́р­ст­ву­ю­щу ки́ру, ца́рь ки́ръ повелѣ́ до́мъ Госпо́день, и́же во Иерусали́мѣ, созида́ти, идѣ́же жря́ху огне́мъ непреста́н­нымъ,

его́же высота́ лако́тъ шестьдеся́тъ, широта́ лако́тъ шестьдеся́тъ, съ дома́ми ка́меней те́саныхъ треми́ и съ до́момъ древя́нымъ того́ мѣ́ста но́вымъ еди́нымъ, и расхо́ды дая́ти изъ до́му ки́ра царя́:

и свяще́н­ныя сосу́ды до́му Госпо́дня златы́я же и сре́бряны, и́хже взя́ навуходоно́соръ изъ до́му [Госпо́дня], и́же во Иерусали́мѣ, и от­несе́ въ Вавило́нъ, воз­врати́ти въ до́мъ, и́же во Иерусали́мѣ, идѣ́же бя́ху пре́жде, да поста́вят­ся та́мо.

Повелѣ́ же [ца́рь] при­­лѣжа́ти Сиси́н­нiю во­ево́дѣ сирі́йску и Финикі́йску и саѳравуза́ну и клевре́томъ его́ и учине́н­нымъ въ сирі́и и Финикі́и нача́лникомъ, да не при­­ступа́ютъ къ мѣ́сту, оста́вятъ же о́троку Госпо́дню зорова́велю, нача́лнику же Иуде́йскому, и старѣ́йшинамъ Иуде́йскимъ до́мъ Госпо́день о́ный созида́ти на мѣ́стѣ его́.

И а́зъ повелѣ́хъ вся́чески созида́ти и при­­лѣжа́ти, да помога́ютъ су́щымъ от­ плѣне́нiя Иуде́омъ, до́ндеже соверши́т­ся хра́мъ Госпо́день:

и от­ да́ни килисирі́йскiя и Финикі́йскiя при­­лѣ́жно собра́нiе дая́ти си́мъ человѣ́комъ на же́ртву Госпо́дню, зорова́велю епа́рху, на юнцы́ и овны́ и а́гнцы,

та́кожде и пшени́цу и со́ль, и вино́ и еле́й, всегда́ на вся́ко лѣ́то, я́коже свяще́н­ницы, и́же во Иерусали́мѣ, реку́тъ иждива́ти на вся́къ де́нь, безъ сомнѣ́нiя:

да при­­но́сят­ся воз­лiя́нiя вы́шнему Бо́гу за царя́ и о́троки его́, и да мо́лятъ за и́хъ живо́тъ:

и да воз­вѣсти́т­ся, ели́цы а́ще престу́пятъ что́ от­ предпи́сан­ныхъ или́ презря́тъ, да во́змет­ся дре́во от­ сво­и́хъ ему́, и на то́мъ да обѣ́сит­ся, имѣ́нiя же его́ царю́ при­­пи́шут­ся:

си́хъ ра́ди и Госпо́дь, его́же и́мя при­­зыва́ет­ся та́мо, да истреби́тъ вся́каго царя́ и язы́къ, и́же ру́ку свою́ простре́тъ воз­брани́ти, или́ озло́бити до́мъ Госпо́день о́ный, и́же во Иерусали́мѣ:

а́зъ ца́рь да́рiй повелѣ́хъ при­­лѣ́жно.