[Зач. 249Б.] благода́ть ва́мъ и ми́ръ от Бо́га Отца́ на́шего, и Го́спода Иису́са Христа́. Благодари́мъ Бо́га и Отца́ Го́спода на́шего Иису́са Христа́, всегда́ о ва́съ моля́щеся,

слы́шавше вѣ́ру ва́шу, я́же о Христѣ́ Иису́сѣ, и любо́вь, ю́же и́мате ко всѣ́мъ святы́мъ,

за упова́нiе отложе́нное ва́мъ на небесѣ́хъ, е́же пре́жде слы́шасте въ словеси́ и́стины благовѣствова́нiя,

су́щаго въ ва́съ, я́коже и во все́мъ мíрѣ: и е́сть плодоно́сно и расти́мо, я́коже и въ ва́съ, от него́же дне́ слы́шасте и разумѣ́сте благода́ть Бо́жiю во и́стинѣ:

я́коже и увѣ́дѣсте от Епафра́са, возлю́бленнаго сорабо́тника на́шего, и́же е́сть вѣ́ренъ о ва́съ служи́тель Христо́въ,

и́же и яви́ на́мъ ва́шу любо́вь въ ду́сѣ.

Сего́ ра́ди и мы́, от него́же дне́ слы́шахомъ, не престае́мъ о ва́съ моля́щеся и прося́ще, да испо́лнитеся въ ра́зумѣ во́ли Его́, во вся́цѣй прему́дрости и ра́зумѣ духо́внѣмъ,

я́ко ходи́ти ва́мъ досто́инѣ Бо́гу во вся́цѣмъ угожде́нiи [и] вся́цѣмъ дѣ́лѣ бла́зѣ, плодонося́ще и возраста́юще въ ра́зумѣ Бо́жiи,

вся́кою си́лою возмога́юще по держа́вѣ сла́вы Его́, во вся́цѣмъ терпѣ́нiи и долготерпѣ́нiи съ ра́достiю,

[Зач. 250.] благодаря́ще Бо́га и Отца́, призва́вшаго ва́съ въ прича́стiе наслѣ́дiя святы́хъ во свѣ́тѣ,

И́же изба́ви на́съ от вла́сти те́мныя и преста́ви въ Ца́рство Сы́на любве́ Своея́,

о Не́мже и́мамы избавле́нiе Кро́вiю Его́ и оставле́нiе грѣ́ховъ,

И́же е́сть о́бразъ Бо́га неви́димаго, перворожде́нъ всея́ тва́ри:

я́ко Тѣ́мъ создана́ бы́ша вся́ческая, я́же на небеси́ и я́же на земли́, ви́димая и неви́димая, а́ще престо́ли, а́ще госпо́дствiя, а́ще нача́ла, а́ще вла́сти: вся́ческая Тѣ́мъ и о Не́мъ созда́шася:

и То́й е́сть пре́жде всѣ́хъ, и вся́ческая въ Не́мъ состоя́тся.

[Зач. 251.] И То́й е́сть глава́ тѣ́лу Це́ркве, И́же е́сть нача́токъ, перворожде́нъ изъ ме́ртвыхъ, я́ко да бу́детъ во всѣ́хъ То́й пе́рвенствуя:

я́ко въ Не́мъ благоизво́ли всему́ исполне́нiю всели́тися,

и Тѣ́мъ примири́ти вся́ческая къ Себѣ́, умиротвори́въ Кро́вiю кре́ста́ Его́, чрезъ Него́, а́ще земна́я, а́ще ли небе́сная.

И ва́съ, иногда́ су́щихъ отчужде́нныхъ и враго́въ помышле́ньми въ дѣ́лѣхъ лука́выхъ,

ны́нѣ же примири́ въ тѣ́лѣ Пло́ти Его́ сме́ртiю Его́, предста́вити ва́съ святы́хъ и непоро́чныхъ и непови́нныхъ предъ Собо́ю,

а́ще у́бо пребыва́ете въ вѣ́рѣ основа́ни и тве́рди, и неподви́жими от упова́нiя благовѣствова́нiя, е́же слы́шасте, проповѣ́данное все́й тва́ри поднебе́снѣй, ему́же бы́хъ а́зъ Па́велъ служи́тель.

[Зач. 252.] Ны́нѣ ра́дуюся во страда́нiихъ мои́хъ о ва́съ, я́ко исполня́ю лише́нiе скорбе́й Христо́выхъ во пло́ти мое́й за Тѣ́ло Его́, е́же е́сть Це́рковь,

е́йже бы́хъ а́зъ служи́тель по смотре́нiю Бо́жiю, да́нному мнѣ́ въ ва́съ, испо́лнити сло́во Бо́жiе,

та́йну сокрове́нную от вѣ́къ и от родо́въ: ны́нѣ же яви́ся святы́мъ Его́,

И́мже восхотѣ́ Бо́гъ сказа́ти, ко́е бога́тство сла́вы та́йны сея́ во язы́цѣхъ, и́же е́сть Христо́съ въ ва́съ, упова́нiе сла́вы,

Его́же мы́ проповѣ́дуемъ, наказу́юще вся́каго человѣ́ка и уча́ще вся́цѣй прему́дрости, да предста́вимъ вся́каго человѣ́ка соверше́нна о Христѣ́ Иису́сѣ:

въ не́мже и тружда́юся и подвиза́юся по дѣ́йству Его́ дѣ́йствуемому во мнѣ́ си́лою.

[Зач. 253.] Хощу́ у́бо ва́съ вѣ́дѣти, коли́къ по́двигъ и́мамъ о ва́съ и о су́щихъ въ Лаодикі́и и во Иерапо́ли, и ели́цы не ви́дѣша лица́ моего́ во пло́ти,

да утѣ́шатся сердца́ и́хъ, сне́мшихся въ любви́ и во вся́цѣмъ бога́тствѣ извѣще́нiя разу́ма, въ позна́нiе та́йны Бо́га и Отца́ и Христа́,

въ Не́мже су́ть вся́ сокро́вища прему́дрости и разу́ма сокрове́нна.

Сiе́ же глаго́лю, да никто́же ва́съ прельсти́тъ въ словопрѣ́нiи:

а́ще бо и пло́тiю отстою́, но ду́хомъ съ ва́ми е́смь, ра́дуяся и ви́дя ва́шъ чи́нъ и утвержде́нiе ва́шея вѣ́ры, я́же во Христа́.

Я́коже у́бо прiя́сте Христа́ Иису́са Го́спода, [та́кожде] въ Не́мъ ходи́те,

укорене́ни и назда́ни въ Не́мъ и извѣ́ствовани вѣ́рою, я́коже научи́стеся, избы́точествующе въ не́й благодаре́нiемъ.

[Зач. 254.] [Бра́тiе,] блюди́теся, да никто́же ва́съ бу́детъ прельща́я филосо́фiею и тще́тною ле́стiю, по преда́нiю человѣ́ческому, по стихі́амъ мíра, а не по Христѣ́:

я́ко въ То́мъ живе́тъ вся́ко исполне́нiе Божества́ тѣле́снѣ:

и да бу́дете въ Не́мъ испо́лнени, И́же е́сть глава́ вся́кому нача́лу и вла́сти:

о Не́мже и обрѣ́зани бы́сте обрѣ́занiемъ нерукотворе́ннымъ, въ совлече́нiи тѣ́ла грѣхо́внаго пло́ти, во обрѣ́занiи Христо́вѣ,

спогре́бшеся Ему́ креще́нiемъ: о Не́мже и совоста́сте вѣ́рою дѣ́йствiя Бо́га, Воскреси́вшаго Его́ изъ ме́ртвыхъ:

[Зач. 255.] и ва́съ, ме́ртвыхъ су́щихъ въ прегрѣше́нiихъ и въ необрѣ́занiи пло́ти ва́шея, сооживи́лъ е́сть съ Ни́мъ, дарова́въ на́мъ вся́ прегрѣше́нiя,

истреби́въ е́же на на́съ рукописа́нiе уче́ньми, е́же бѣ́ сопроти́вно на́мъ, и то́ взя́тъ от среды́, пригвозди́въ е́ на кре́стѣ́:

совле́къ нача́ла и вла́сти, изведе́ въ позо́ръ дерзнове́нiемъ, изобличи́въ и́хъ въ Себѣ́ {побѣди́въ и́хъ на Не́мъ}.

Да никто́же у́бо ва́съ осужда́етъ о яде́нiи, или́ о питiи́, или́ о ча́сти пра́здника, или́ о новоме́сячiихъ, или́ о суббо́тахъ:

я́же су́ть стѣ́нь гряду́щихъ, тѣ́ло же Христо́во.

Никто́же ва́съ да прельща́етъ изволе́ннымъ ему́ смиреному́дрiемъ и слу́жбою А́нгеловъ, я́же не увѣ́дѣ учя́, [[въ тѣ́хъ] ходя́], безъ ума́ {всу́е} дмя́ся от ума́ пло́ти своея́,

а не держя́ главы́, изъ нея́же все́ тѣ́ло, соста́вы и соу́зы пода́емо и сне́млемо, расти́тъ возраще́нiе Бо́жiе.

[Зач. 256.] А́ще у́бо умро́сте со Христо́мъ от стихі́й мíра, почто́ а́ки живу́ще въ мíрѣ стяза́етеся?

Не косни́ся, ниже́ вкуси́, ниже́ осяжи́:

я́же су́ть вся́ во истлѣ́нiе употребле́нiемъ, по за́повѣдемъ и уче́ниемъ человѣ́ческимъ:

я́же су́ть сло́во у́бо иму́ща прему́дрости въ самово́льнѣй слу́жбѣ и смиреному́дрiи и непощадѣ́нiи тѣ́ла, не въ че́сти ко́ей къ сы́тости пло́ти.