[Зач. 258.] Облецы́теся у́бо я́коже избра́ннiи Бо́жiи, святи и возлю́бленни, во утро́бы щедро́тъ, бла́гость, смиреному́дрiе, кро́тость и долготерпѣ́нiе,

прiе́млюще дру́гъ дру́га и проща́юще себѣ́, а́ще кто́ на кого́ и́мать порече́нiе: я́коже и Христо́съ прости́лъ е́сть ва́мъ, та́ко и вы́.

Надъ всѣ́ми же си́ми [стяжи́те] любо́вь, я́же е́сть соу́зъ соверше́нства:

и ми́ръ Бо́жiй да водворя́ется въ сердца́хъ ва́шихъ, въ о́ньже и зва́ни бы́сте во еди́номъ тѣ́лѣ: и благода́рни быва́йте.

Сло́во Христо́во да вселя́ется въ ва́съ бога́тно, во вся́кой прему́дрости: уча́ще и вразумля́юще себе́ самѣ́хъ во псалмѣ́хъ и пѣ́нiихъ и пѣ́снехъ духо́вныхъ, во благода́ти пою́ще въ сердца́хъ ва́шихъ Го́сподеви.

[Зач. 259.] И все́, е́же а́ще что́ творите́ сло́вомъ или́ дѣ́ломъ, вся́ во и́мя Го́спода Иису́са Христа́, благодаря́ще Бо́га и Отца́ Тѣ́мъ.

Жены́, повину́йтеся свои́мъ му́жемъ, я́коже подоба́етъ о Го́сподѣ.

Му́жiе, люби́те жены́ ва́шя, и не огорча́йтеся къ ни́мъ.

Ча́да, послу́шайте роди́телей [свои́хъ] во все́мъ: сiе́ бо уго́дно е́сть Го́сподеви.

Отцы́, не раздра́жайте ча́дъ ва́шихъ, да не уныва́ютъ.

Раби́, послу́шайте по всему́ плотски́хъ госпо́дiй [ва́шихъ], не предъ очи́ма то́чiю рабо́тающе а́ки человѣкоуго́дницы, но въ простотѣ́ се́рдца, боя́щеся Бо́га.

И вся́ко, е́же а́ще что́ творите́, от души́ дѣ́лайте, я́коже Го́споду, а не человѣ́комъ,

вѣ́дяще, я́ко от Го́спода прiи́мете воздая́нiе достоя́нiя: Го́споду бо Христу́ рабо́таете.

А оби́дяй воспрiи́метъ, е́же оби́дѣ: и нѣ́сть лица́ обинове́нiя.