Да не снѣ́си въ ню́ ква́снаго: се́дмь дні́й да я́си въ ню́ опрѣсно́ки, хлѣ́бъ озлобле́нiя, я́ко со тща́нiемъ изыдо́сте изъ Еги́пта, да помина́ете де́нь исхо́да ва́шего от земли́ Еги́петскiя вся́ дни́ житiя́ ва́шего:

да не яви́тся тебѣ́ ква́сно во всѣ́хъ предѣ́лѣхъ твои́хъ се́дмь дні́й, и да не преноществу́етъ от мя́съ, я́же пожре́ши въ ве́черъ въ пе́рвый де́нь, до у́трiя.

Не возмо́жеши жре́ти Па́схи ни въ еди́нѣмъ от градо́въ твои́хъ, я́же Госпо́дь Бо́гъ тво́й дае́тъ тебѣ́:

но то́кмо на мѣ́стѣ, е́же избере́тъ Госпо́дь Бо́гъ тво́й призыва́ти и́мя Его́ ту́, та́мо пожре́ши Па́сху въ ве́черъ при захожде́нiи со́лнца, во вре́мя въ не́же изше́лъ еси́ изъ земли́ Еги́петскiя:

и свари́ши, и испече́ши, и снѣ́си на мѣ́стѣ, идѣ́же избере́тъ Госпо́дь Бо́гъ тво́й: и возврати́шися зау́тра, и по́йдеши въ до́мъ тво́й.

Ше́сть дні́й да я́си опрѣсно́ки, въ седмы́й же де́нь исхо́дный пра́здникъ Го́сподеви Бо́гу твоему́: да не сотвори́ши въ не́мъ вся́каго дѣ́ла, кромѣ́ я́же су́ть души́.

Се́дмь седми́цъ всецѣ́лыхъ да сочте́ши себѣ́: въ нача́ло же твоего́ серпа́ на жа́тву начни́ исчисля́ти се́дмь седми́цъ,

и да сотвори́ши пра́здникъ седми́цъ Го́сподеви Бо́гу твоему́, я́коже рука́ твоя́ мо́жетъ, ели́ка да́стъ тебѣ́, я́коже благослови́ тя Госпо́дь Бо́гъ тво́й.

И возвесели́шися предъ Го́сподемъ Бо́гомъ твои́мъ ты́ и сы́нъ тво́й и дще́рь твоя́, и ра́бъ тво́й и раба́ твоя́, и леви́тъ и́же во градѣ́хъ твои́хъ, и пришле́цъ, и сирота́ и вдова́, я́же въ ва́съ, на мѣ́стѣ, идѣ́же избере́тъ Госпо́дь Бо́гъ тво́й призыва́ти и́мя Его́ та́мо:

и помяне́ши, я́ко ра́бъ бы́лъ еси́ [ты́] въ земли́ Еги́петстѣй, и сохрани́ши и сотвори́ши за́повѣди сiя́.

Пра́здникъ ку́щей да сотвори́ши себѣ́ се́дмь дні́й, егда́ собере́ши от ни́вы твоея́ и от точи́ла твоего́:

и да возвесели́шися въ пра́здницѣ твое́мъ ты́ и сы́нъ тво́й и дщи́ твоя́, ра́бъ тво́й и раба́ твоя́, и леви́тъ и пришле́цъ, и сирота́ и вдова́, я́же во градѣ́хъ твои́хъ:

се́дмь дні́й да пра́зднуеши Го́сподеви Бо́гу твоему́ на мѣ́стѣ, е́же избере́тъ Госпо́дь Бо́гъ тво́й призыва́ти и́мя Его́ та́мо: а́ще же благослови́тъ тя́ Госпо́дь Бо́гъ тво́й во всѣ́хъ плодѣ́хъ твои́хъ и во вся́комъ дѣ́лѣ ру́къ твои́хъ, и бу́деши веселя́ся.

Въ три́ времена́ лѣ́та да яви́тся вся́къ му́жескъ по́лъ предъ Го́сподемъ Бо́гомъ твои́мъ, на мѣ́стѣ, е́же избере́тъ Госпо́дь Бо́гъ тво́й: въ пра́здникъ опрѣсно́ковъ, и въ пра́здникъ седми́цъ, и въ пра́здникъ ку́щей: да не яви́шися предъ Го́сподемъ Бо́гомъ твои́мъ то́щь:

кі́йждо по си́лѣ ру́къ свои́хъ, по благослове́нiю Го́спода Бо́га твоего́, е́же даде́ тебѣ́.

Судiи́ и книго́чiи поста́виши себѣ́ во всѣ́хъ градѣ́хъ твои́хъ, я́же Госпо́дь Бо́гъ тво́й дае́тъ тебѣ́ по племена́мъ, и да су́дятъ лю́демъ су́дъ пра́ведный:

да не уклоня́тъ суда́, ниже́ позна́ютъ лице́, ниже́ да во́змутъ даро́въ: да́ры бо ослѣпля́ютъ о́чи му́дрыхъ и отме́щутъ словеса́ пра́ведныхъ.

Пра́веднѣ пра́ведное гони́те, да поживете́, и вше́дше наслѣ́дите зе́млю, ю́же Госпо́дь Бо́гъ тво́й дае́тъ ва́мъ.

Да не насади́ши себѣ́ дубра́вы: вся́каго дре́ва бли́зъ олтаря́ Го́спода Бо́га твоего́ да не сотвори́ши себѣ́,

да не поста́виши себѣ́ ка́пища, е́же возненави́дѣ Госпо́дь Бо́гъ тво́й.