Да не пожре́ши Го́сподеви Бо́гу твоему́ телца́ или́ овча́те, на не́мже е́сть поро́къ, вся́къ глаго́лъ зо́лъ: я́ко ме́рзость Го́сподеви Бо́гу твоему́ е́сть.

А́ще же обря́щется у тебе́ во еди́нѣмъ от градо́въ твои́хъ, я́же Госпо́дь Бо́гъ тво́й дае́тъ тебѣ́, му́жъ или́ жена́, и́же сотвори́тъ лука́вое предъ Го́сподемъ Бо́гомъ твои́мъ, преступи́ти завѣ́тъ Его́:

и ше́дше послу́жатъ бого́мъ ины́мъ и покло́нятся и́мъ, со́лнцу, или́ лунѣ́, или́ вся́кому я́же от красоты́ небе́сныя, и́хже не повелѣ́хъ тебѣ́:

и возвѣсти́тся тебѣ́, и взы́щеши зѣло́, и се́, и́стинно бы́сть сло́во, ме́рзость сотвори́ся сiя́ во Изра́или:

да изведе́ши человѣ́ка того́, или́ жену́ ту́, и́же сотвори́ша дѣ́ло зло́е сiе́, предъ две́ри, и побiе́те и́хъ ка́менiемъ, и да у́мрутъ.

При двою́ свидѣ́телехъ или́ при тре́хъ да у́мретъ: умира́яй да не у́мретъ при еди́нѣмъ свидѣ́тели:

и рука́ свидѣ́телей да бу́детъ на не́мъ въ пе́рвыхъ, умертви́ти его́, и рука́ всѣ́хъ люді́й по́слѣжде: и изми́те зло́е от ва́съ самѣ́хъ.

А́ще же неудоборѣши́мо сло́во у тебе́ въ судѣ́ между́ кро́вiю и кро́вiю, и между́ судо́мъ и судо́мъ, и между́ я́звою и я́звою, и между́ прѣ́нiемъ и прѣ́нiемъ, словеса́ су́дная въ градѣ́хъ твои́хъ, и воста́въ взы́деши на мѣ́сто, е́же избере́тъ Госпо́дь Бо́гъ тво́й призва́ти и́мя Его́ та́мо:

и прiи́деши къ жерце́мъ леви́томъ, и къ судiи́, и́же бу́детъ въ ты́я дни́, и взыска́вше возвѣстя́тъ тебѣ́ су́дъ:

и сотвори́ши по словеси́, е́же возвѣстя́тъ тебѣ́ от мѣ́ста, е́же избере́тъ Госпо́дь Бо́гъ тво́й призыва́ти и́мя Его́ та́мо, и да сохрани́ши зѣло́ твори́ти вся́, ели́ка законоположа́тся тебѣ́:

по зако́ну и по суду́, его́же реку́тъ тебѣ́, сотвори́ши, да не уклони́шися от словесе́, е́же извѣстя́тъ тебѣ́, ни на де́сно, ни на лѣ́во.

И человѣ́къ, и́же сотвори́тъ въ го́рдости, е́же не послу́шати жерца́ предстоя́щаго служи́ти во и́мя Го́спода Бо́га твоего́, или́ судiи́, и́же въ ты́я дни́ бу́детъ, да у́мретъ человѣ́къ то́й, и да и́змеши зло́е от Изра́иля:

и вси́ лю́дiе услы́шавше убоя́тся, и не бу́дутъ нече́ствовати ктому́.

А́ще же вни́деши въ зе́млю, ю́же Госпо́дь Бо́гъ тво́й дае́тъ тебѣ́ въ жре́бiй, и прiи́меши ю́, и всели́шися на не́й, и рече́ши: поста́влю кня́зя надъ собо́ю, я́коже и про́чiи язы́цы, и́же о́крестъ мене́:

поставля́я да поста́виши надъ собо́ю кня́зя, его́же избере́тъ Госпо́дь Бо́гъ тво́й, от бра́тiи твоея́ да поста́виши надъ собо́ю кня́зя, не возмо́жеши поста́вити надъ собо́ю кня́зя человѣ́ка чужда́го, я́ко не бра́тъ тво́й е́сть.

Оба́че да не умно́житъ себѣ́ ко́ней, ниже́ да возврати́тъ люді́й во Еги́петъ, я́ко да не умно́житъ себѣ́ ко́ней: Госпо́дь же рече́ ва́мъ: не приложи́те возврати́тися путе́мъ си́мъ ктому́:

и да не умно́житъ себѣ́ же́нъ, да не преврати́тся се́рдце его́: и сребра́ и зла́та да не умно́житъ себѣ́ зѣло́.

И бу́детъ егда́ ся́детъ на престо́лѣ вла́сти своея́, да напи́шетъ себѣ́ второзако́нiе сiе́ въ кни́зѣ от жерце́въ леви́товъ,

и бу́детъ съ ни́мъ, и да чте́тъ ю́ во вся́ дни́ житiя́ своего́, да научи́тся боя́тися Го́спода Бо́га своего́ и храни́ти вся́ за́повѣди сiя́ и оправда́нiя сiя́, твори́ти я́:

да не возвы́сится се́рдце его́ от бра́тiи его́, да не престу́питъ от за́повѣдiй ни на де́сно, ни на лѣ́во, я́ко да бу́детъ мно́га лѣ́та во вла́сти свое́й, то́й и сы́ны его́ съ ни́мъ, въ сынѣ́хъ Изра́илевыхъ.