И бу́детъ въ о́ньже де́нь пре́йдете Иорда́нъ на зе́млю, ю́же Госпо́дь Бо́гъ тво́й дае́тъ тебѣ́ во жре́бiй, и поста́виши себѣ́ ка́менiе вели́ко и обѣли́ши я́ мѣ́ломъ,

и напи́шеши на ка́менехъ тѣ́хъ вся́ словеса́ зако́на сего́, егда́ пре́йдете Иорда́нъ, егда́ вни́дете въ зе́млю, ю́же Госпо́дь Бо́гъ тво́й дае́тъ тебѣ́, зе́млю кипя́щую ме́домъ и млеко́мъ, я́коже рече́ Госпо́дь Бо́гъ оте́цъ твои́хъ тебѣ́.

И бу́детъ егда́ пре́йдете Иорда́нъ, да поста́вите ка́менiе сiе́, я́же а́зъ повелѣва́ю ва́мъ дне́сь, въ горѣ́ Гева́лъ, и побѣли́ши и́хъ мѣ́ломъ:

и да сози́ждеши та́мо олта́рь Го́сподеви Бо́гу твоему́, олта́рь от ка́менiя: да не возложи́ши на ни́хъ желѣ́за:

ка́менiемъ всецѣ́лымъ да сози́ждеши олта́рь Го́сподеви Бо́гу твоему́ и вознесе́ши на не́мъ всесожже́нiя Го́сподеви Бо́гу твоему́,

и пожре́ши же́ртву спасе́нiя: и я́си, и насы́тишися та́мо, и возвесели́шися предъ Го́сподемъ Бо́гомъ твои́мъ,

и напи́шеши на ка́менiихъ си́хъ ве́сь зако́нъ се́й я́вѣ зѣло́.

И глаго́ла Моисе́й и жерцы́ леви́ти всему́ Изра́илю, глаго́люще: молчи́ и слы́ши, Изра́илю, въ де́нь се́й ста́лся еси́ въ лю́ди Го́сподеви Бо́гу твоему́:

и да послу́шаеши гла́са Го́спода Бо́га твоего́, и да сотвори́ши вся́ за́повѣди Его́ и оправда́нiя Его́, я́же а́зъ заповѣ́даю тебѣ́ дне́сь.

И заповѣ́да Моисе́й лю́демъ въ то́й де́нь, глаго́ля:

сі́и да ста́нутъ благословля́ти лю́ди на горѣ́ Гаризи́нъ, преше́дше Иорда́нъ: Симео́нъ, Леві́й, Иу́да, Иссаха́ръ, Ио́сифъ и Венiами́нъ:

и сі́и да ста́нутъ на кля́тву на горѣ́ Гева́лъ: Руви́мъ, Га́дъ и Аси́ръ, Завуло́нъ, Да́нъ и Нефѳали́мъ.

И отвѣща́вше реку́тъ леви́ти всему́ Изра́илю гла́сомъ вели́кимъ:

про́клятъ человѣ́къ, и́же сотвори́тъ извая́нiе и слiя́нiе, ме́рзость Го́сподеви, дѣ́ло ру́къ худо́жника, и положи́тъ е́ въ сокрове́нiи. И отвѣща́вше вси́ лю́дiе реку́тъ: бу́ди.

Про́клятъ безче́стяй отца́ своего́ или́ ма́терь свою́. И реку́тъ вси́ лю́дiе: бу́ди.

Про́клятъ прелага́яй предѣ́лы бли́жняго своего́. И реку́тъ вси́ лю́дiе: бу́ди.

Про́клятъ прельща́яй слѣ́паго въ пути́. И реку́тъ вси́ лю́дiе: бу́ди.

Про́клятъ, и́же уклони́тъ су́дъ прише́лцу и сиротѣ́ и вдовѣ́. И реку́тъ вси́ лю́дiе: бу́ди.

Про́клятъ лежа́й съ жено́ю отца́ своего́, я́ко откры́лъ е́сть покрове́нiе отца́ своего́. И реку́тъ вси́ лю́дiе: бу́ди.

Про́клятъ лежа́й со вся́кимъ ското́мъ. И реку́тъ вси́ лю́дiе: бу́ди.

Про́клятъ лежа́й съ сестро́ю свое́ю, дще́рiю отца́ своего́ или́ дще́рiю ма́тере своея́. И реку́тъ вси́ лю́дiе: бу́ди.

Про́клятъ лежа́й съ те́щею свое́ю. И реку́тъ вси́ лю́дiе: бу́ди. Про́клятъ лежа́й съ сестро́ю жены́ своея́. И реку́тъ вси́ лю́дiе: бу́ди.

Про́клятъ бiя́й бли́жняго съ ле́стiю. И реку́тъ вси́ лю́дiе: бу́ди.

Про́клятъ, и́же во́зметъ да́ры порази́ти ду́шу кро́ве непови́нныя. И реку́тъ вси́ лю́дiе: бу́ди.

Про́клятъ вся́къ человѣ́къ, и́же не пребу́детъ во всѣ́хъ словесѣ́хъ зако́на сего́, е́же твори́ти я́. И реку́тъ вси́ лю́дiе: бу́ди.

Глава: