и рече́: Госпо́дь от Сина́и прiи́де, и яви́ся от Сии́ра на́мъ, и приспѣ́ от горы́ Фара́ни, и прiи́де со тма́ми святы́хъ, одесну́ю Его́ а́нгели съ ни́мъ,

и пощадѣ́ лю́ди Своя́: и вси́ освяще́ннiи подъ рука́ми Твои́ми, и сі́и подъ Тобо́ю су́ть.

И прiя́ от слове́съ Его́ зако́нъ, его́же заповѣ́да на́мъ Моисе́й, наслѣ́дiе со́нму Иа́ковлю:

и бу́детъ въ Возлю́бленнѣмъ кня́зь, собра́вшымся князе́мъ людски́мъ ку́пно съ племены́ Изра́илевыми.

Да живе́тъ Руви́мъ, и да не у́мретъ, и Симео́нъ да бу́детъ мно́гъ число́мъ.

И сiе́ Иу́дѣ: услы́ши, Го́споди, гла́съ Иу́динъ и въ лю́ди его́ вни́ди: ру́цѣ его́ побо́рютъ по не́мъ, и помо́щникъ на враги́ его́ да бу́деши.

И Леві́ю рече́: дади́те Леві́ю явле́нная Его́, и и́стину Его́ му́жу преподо́бну, его́же искуси́ша Искуше́нiемъ, укори́ша его́ у воды́ Пререка́нiя:

глаго́ляй отцу́ своему́ и ма́тери свое́й: не ви́дѣхъ тебе́: и бра́тiи своея́ не позна́, и сыно́въ свои́хъ не увѣ́дѣ: сохрани́ словеса́ Твоя́ и завѣ́тъ Тво́й соблюде́:

явя́тъ оправда́нiя Твоя́ Иа́кову и зако́нъ Тво́й Изра́илю: возложа́тъ ѳимiа́мъ во гнѣ́вѣ Твое́мъ всегда́ на олта́рь Тво́й:

благослови́, Го́споди, крѣ́пость его́ и дѣла́ руку́ его́ прiими́: порази́ чресла́ воста́вшихъ на него́ враго́въ его́, и ненави́дящiи его́ да не воста́нутъ.

И Венiами́ну рече́: возлю́бленный Го́сподемъ упова́яй всели́тся [въ Не́мъ], и Бо́гъ осѣня́етъ его́ во вся́ дни́, и посредѣ́ ра́менъ Его́ почи́.

И Ио́сифови рече́: от благослове́нiя Госпо́дня земля́ его́, от красо́тъ небе́сныхъ и росы́, и от бе́зднъ исто́чниковъ ни́зу,

и во вре́мя плодо́въ со́лнечныхъ обраще́нiй, и от схожде́нiй ме́сячныхъ,

и от верха́ го́ръ нача́ла, и от верха́ холмо́въ вѣ́чныхъ,

и по вре́мени земли́ исполне́нiя: и прiя́тная Яви́вшемуся въ купинѣ́, да прiи́дутъ на главу́ Ио́сифу, и на версѣ́ просла́вивыйся въ бра́тiи.

Перворо́дный юнца́ добро́та его́, ро́зи единоро́га ро́зи его́: и́ми язы́ки избоде́тъ вку́пѣ да́же до кра́я земли́: сiя́ тмы́ Ефре́мовы, и сiя́ ты́сящи Манассі́ины.

И Завуло́ну рече́: возвесели́ся, Завуло́не, во исхо́дѣ твое́мъ, и Иссаха́ре, въ селе́нiихъ твои́хъ:

язы́ки потребя́тъ: и призове́те та́мо, и пожре́те та́мо же́ртву пра́вды: я́ко бога́тство морско́е воздои́тъ тя́, и ку́пли от язы́къ при мо́ри живу́щихъ.

И Га́ду рече́: благослове́нъ разширя́яй Га́да: я́ко ле́въ почи́, сокруши́вый мы́шцу и кня́зя:

и ви́дѣ нача́тки своя́, я́ко та́мо раздѣли́ся земля́, князе́й со́бранныхъ вку́пѣ съ нача́лники людски́ми: пра́вду Госпо́дь сотвори́ и су́дъ Сво́й со Изра́илемъ.

И Да́ну рече́: Да́нъ, ски́менъ льво́въ, и изско́читъ от Васа́на.

И Нефѳали́му рече́: Нефѳали́мъ насыще́нiе прiя́тныхъ, и да насы́тится благослове́нiемъ от Го́спода: мо́ре и ю́гъ наслѣ́дитъ.

И Аси́ру рече́: благослове́нъ от {па́че} ча́дъ Аси́ръ, и бу́детъ прiя́тенъ бра́тiи свое́й: омо́читъ въ еле́й но́гу свою́:

желѣ́зо и мѣ́дь сапо́гъ его́ бу́детъ, и а́ки дни́ твоя́ крѣ́пость твоя́.

Нѣ́сть я́коже Бо́гъ Возлю́бленнаго: восходя́й на небо помо́щникъ тво́й, и великолѣ́пый въ тве́рди:

и покры́етъ тя́ Бо́жiе нача́ло, и подъ крѣ́постiю мы́шцей вѣ́чныхъ: и отжене́тъ от лица́ твоего́ врага́, глаго́ля: да поги́бнеши:

и всели́тся Изра́иль упова́я еди́нъ на земли́ Иа́ковли въ винѣ́ и пшени́цѣ: и не́бо ему́ о́блачно росо́ю.

Блаже́нъ еси́, Изра́илю: кто́ подо́бенъ тебѣ́, лю́дiе спаса́емiи от Го́спода? Защи́титъ помо́щникъ тво́й, и ме́чь хвала́ твоя́: и солжу́тъ тебѣ́ врази́ твои́, и ты́ на вы́ю и́хъ насту́пиши.

Глава: