Вся́ за́повѣди, я́же а́зъ заповѣ́даю ва́мъ дне́сь, снабди́те твори́ти, да живете́, и умно́житеся, и вни́дете, и наслѣ́дите зе́млю благу́ю, е́юже кля́тся Госпо́дь Бо́гъ отце́мъ ва́шымъ.

И да помяне́ши ве́сь пу́ть, и́мже проведе́ тебе́ Госпо́дь Бо́гъ тво́й, сiе́ четыредеся́тое лѣ́то въ пусты́ни, да иску́ситъ тя́ и озло́битъ тя́, и уразумѣ́ются я́же въ се́рдцы твое́мъ, а́ще сохрани́ши за́повѣди Его́ или́ ни́.

И озло́би тя́, и гла́домъ замори́ тя, и напита́ тя ма́нною, ея́же ты́ не увѣ́дѣлъ еси́, ни отцы́ твои́: да возвѣсти́тъ тебѣ́, я́ко не о хлѣ́бѣ еди́нѣмъ жи́въ бу́детъ человѣ́къ, но о вся́комъ словеси́ исходя́щемъ изъ у́стъ Бо́жiихъ жи́въ бу́детъ человѣ́къ.

Ри́зы твоя́ не обетша́ша на тебѣ́: но́зѣ твои́ не язви́шася, се́, четы́редесять лѣ́тъ.

И уразумѣ́еши се́рдцемъ твои́мъ, я́ко и́мже о́бразомъ а́ще кі́й человѣ́къ нака́жетъ сы́на своего́, та́ко Госпо́дь Бо́гъ тво́й нака́жетъ тя́.

И сохрани́ши за́повѣди Го́спода Бо́га твоего́ ходи́ти въ путе́хъ Его́ и боя́тися Его́.

Госпо́дь бо Бо́гъ тво́й введе́тъ тя́ въ зе́млю благу́ю и мно́гу, идѣ́же водоте́чи во́дныя и исто́чники бе́здны исходя́щыя по поля́мъ и гора́мъ,

въ зе́млю пшени́цы и ячме́ня, [идѣ́же] виногра́ди, смо́кви и шипцы́, въ зе́млю ма́сличiя еле́а и ме́да:

въ зе́млю на не́йже не съ нището́ю снѣ́си хлѣ́бъ тво́й, и ничесого́ востре́буеши на не́й: въ зе́млю въ не́йже ка́менiе желѣ́зно, и от го́ръ ея́ ископа́еши мѣ́дь:

и я́сти бу́деши, и насы́тишися, и благослови́ши Го́спода Бо́га твоего́ на земли́ бла́зѣй, ю́же даде́ тебѣ́.

Вонми́ себѣ́, не забу́ди Го́спода Бо́га твоего́, е́же не сохрани́ти за́повѣди Его́ и судьбы́ и оправда́нiя Его́, ели́ка а́зъ заповѣ́даю тебѣ́ дне́сь:

да не когда́ яды́й и насы́тився, и до́мы добры́ согради́въ и всели́вся въ ня́,

и воло́мъ твои́мъ и овца́мъ твои́мъ умно́жившымся тебѣ́, сребру́ и зла́ту умно́жившымся тебѣ́, и всѣ́мъ, ели́ка тебѣ́ бу́дутъ, умно́жившымся тебѣ́,

вознесе́шися се́рдцемъ твои́мъ, и забу́деши Го́спода Бо́га твоего́, изве́дшаго тя́ изъ земли́ Еги́петскiя, изъ до́му рабо́ты:

прове́дшаго тя́ сквозѣ́ пусты́ню вели́кую и стра́шную о́ну, въ не́йже змiи́ угрыза́ющыя, и скорпі́и, и жа́жда, въ не́йже не бя́ше воды́: изве́дшаго тебѣ́ изъ ка́мене несѣко́ма исто́чникъ водны́й:

пита́вшаго тя́ ма́нною въ пусты́ни, ея́же не вѣ́дѣлъ еси́ ты́, ниже́ вѣ́дяху отцы́ твои́, да озло́битъ тя́ и да иску́ситъ тя́, и бла́го тебѣ́ сотвори́тъ на послѣ́докъ тво́й:

да не рече́ши въ се́рдцы твое́мъ: крѣ́пость моя́ и си́ла руки́ моея́ сотвори́ мнѣ́ си́лу вели́кую сiю́,

и помяне́ши Го́спода Бо́га твоего́, я́ко То́й даде́ тебѣ́ крѣ́пость, е́же сотвори́ти си́лу, и да уста́витъ завѣ́тъ Сво́й, и́мже кля́тся отце́мъ твои́мъ, я́коже дне́сь.

И бу́детъ а́ще забве́нiемъ забу́деши Го́спода Бо́га твоего́, и по́йдеши вслѣ́дъ бого́въ ины́хъ, и послу́жиши и́мъ, и поклони́шися и́мъ, засвидѣ́телствую ва́мъ дне́сь небесе́мъ и земле́ю, я́ко па́губою поги́бнете:

я́коже и про́чiи язы́цы, я́же Госпо́дь Бо́гъ погубля́етъ от лица́ ва́шего, та́ко поги́бнете, зане́же не послу́шасте гла́са Го́спода Бо́га ва́шего.