Въ лѣ́то пе́рвое ки́ра царя́ пе́рсскаго, да испо́лнится сло́во Госпо́дне от у́стъ иеремі́иныхъ, воздви́же Госпо́дь ду́хъ ки́ра царя́ пе́рсскаго, и повелѣ́ проповѣ́дати во все́мъ ца́рствiи свое́мъ, и писа́ньми, глаго́ля:

сiя́ глаго́летъ ки́ръ ца́рь пе́рсскiй: вся́ ца́рства земна́я даде́ мнѣ́ Госпо́дь Бо́гъ небе́сный, и то́й повелѣ́ ми, да сози́жду ему́ до́мъ во Иерусали́мѣ, и́же во Иуде́и:

кто́ въ ва́съ от всѣ́хъ люді́й его́? и бу́детъ Бо́гъ его́ съ ни́мъ, и да взы́детъ во Иерусали́мъ, и́же во Иуде́и, и да сози́ждетъ до́мъ Бо́гу Изра́илеву, то́й е́сть Бо́гъ, и́же во Иерусали́мѣ:

и вся́къ оста́вшiйся от всѣ́хъ мѣ́стъ, идѣ́же то́й обита́етъ, и да помо́гутъ ему́ му́жiе от мѣ́ста его́ сребро́мъ и зла́томъ, и сосу́ды и скоты́, съ доброво́льными обѣща́нiи [принесу́тъ] въ це́рковь Бо́жiю, я́же во Иерусали́мѣ.

И воста́ша кня́зи оте́чествъ Иу́диныхъ и Венiами́нихъ и свяще́нницы и леви́ти, и вси́, и́мже воздви́же Бо́гъ ду́хъ и́хъ, да взы́дутъ созида́нiю це́ркве Госпо́дни, я́же во Иерусали́мѣ:

и вси́, и́же бя́ху о́крестъ, помого́ша рука́мъ и́хъ сосу́ды сре́брбяными, зла́томъ, потре́бными, и скота́ми, и драги́ми вещми́, кромѣ́ доброво́льных.

И ца́рь ки́ръ изнесе́ сосу́ды це́ркве Госпо́дни, и́хже взя́ Навуходоно́соръ изъ Иерусали́ма и положи́ ты́я въ це́ркви бо́га своего́:

изнесе́ же ты́я ки́ръ ца́рь пе́рсскiй руко́ю Миѳрида́та гасвари́нова, и сочте́ ты́я сасавасса́ру кня́зю Иуде́йску.

И сiе́ число́ и́хъ: умыва́лницъ златы́хъ три́десять, умыва́лницъ же сре́бряныхъ ты́сяща, ноже́й два́десять де́вять,

и ча́шъ златы́хъ три́десять, и сре́бряныхъ двойны́хъ четы́реста де́сять, и сосу́довъ ины́хъ ты́сяща:

всѣ́хъ сосу́довъ златы́хъ и сре́бряныхъ пя́ть ты́сящъ и четы́реста, вся́ взя́ съ собо́ю сасавасса́ръ от преселе́нiя Вавило́нскаго во Иерусали́мъ.

По си́хъ же словесѣ́хъ, въ ца́рство Артаксе́ркса царя́ пе́рсскаго, взы́де Е́здра сы́нъ саре́а, сы́на азарі́ева, сы́на хелкі́ева,

сы́на Селлу́мля, сы́на садду́кова, сы́на Ахито́вля,

сы́на самарі́ева, сы́на Есрі́ева, сы́на марео́ѳова,

сы́на зараі́ева, сы́на езеі́ева, сы́на воккі́ева,

сы́на Авису́ева, сы́на Финее́сова, сы́на Елеаза́рова, сы́на Ааро́на свяще́нника пе́рваго:

се́й Е́здра взы́де от Вавило́на и се́й писе́цъ ско́ръ въ зако́нѣ Моисе́овѣ, его́же даде́ Госпо́дь Бо́гъ Изра́илю. И даде́ ему́ ца́рь, я́ко рука́ Го́спода Бо́га его́ на не́мъ бѣ́ во всѣ́хъ, я́же иска́ше о́нъ.

И взыдо́ша от сыно́въ Изра́илевыхъ и от свяще́нниковъ и от леви́товъ, и пѣвцы́ и придве́рницы и наѳини́ми во Иерусали́мъ, въ лѣ́то седмо́е Артаксе́ркса царя́,

и прiидо́ша во Иерусали́мъ ме́сяца пя́таго: сiе́ е́сть лѣ́то седмо́е царе́во:

зане́ въ пе́рвый де́нь ме́сяца пе́рваго то́й нача́ восходи́ти от Вавило́на, и въ пе́рвый де́нь ме́сяца пя́таго прiидо́ша во Иерусали́мъ, я́ко рука́ Бо́га его́ блага́ на не́мъ бѣ́:

Е́здра бо угото́ва се́рдце свое́, да взы́щетъ зако́на [Госпо́дня] и да тво́ритъ и учи́тъ во Изра́или повелѣ́ниемъ и судьба́мъ.

И сiе́ е́сть сказа́нiе посла́нiя е́же даде́ ца́рь Артаксе́рксъ е́здрѣ свяще́ннику, писцу́ кни́ги слове́съ за́повѣдiй Госпо́днихъ и повелѣ́нiй его́ во Изра́или:

Артаксе́рксъ ца́рь царе́й е́здрѣ свяще́ннику, писцу́ зако́на Го́спода Бо́га небе́снаго: да соверши́тся сло́во и отвѣ́тъ:

от мене́ повелѣ́но есть, да кі́йждо, и́же и́мать усе́рдiе бла́го во ца́рствѣ мое́мъ от люді́й Изра́илевыхъ и от свяще́нниковъ и от леви́товъ поити́ во Иерусали́мъ, съ тобо́ю да и́детъ:

от лица́ царе́ва и седми́ совѣ́тниковъ его́ по́сланъ еси́, да посѣти́ши Иуде́ю и Иерусали́мъ въ зако́нѣ Бо́га и́хъ, су́щемъ въ руку́ твое́ю,

и да отнесе́ши въ до́мъ Госпо́день сребро́ и зла́то, е́же ца́рь и совѣ́тницы его́ со усе́рдiемъ да́ша Бо́гу Изра́илеву, и́же во Иерусали́мѣ обита́етъ,

и все́ зла́то и сребро́, е́же а́ще обря́щеши во все́й о́бласти Вавило́нстѣй, съ доброво́льнымъ дая́нiемъ людски́мъ и свяще́нниковъ, во́лею принося́щихъ въ до́мъ Бо́жiй, и́же во Иерусали́мѣ:

и вся́кiй дохо́дъ то́й усе́рдно впиши́ въ кни́гу сiю́: телцы́, овны́, а́гнцы, и же́ртвы и́хъ и возлiя́нiя и́хъ: и принеси́ та́ на олта́рь до́му Бо́га ва́шего, и́же е́сть во Иерусали́мѣ:

и а́ще что́ тебѣ́ и бра́тiи твое́й бла́го возмни́тся от оста́вшагося сребра́ и зла́та сотвори́ти, я́коже уго́дно Бо́гу ва́шему, сотвори́те:

и сосу́ды, и́же даны́ тебѣ́ въ слу́жбу до́му Бо́жiя, вда́ждь предъ Бо́гомъ во Иерусали́мѣ:

и про́чыя потре́бы до́му Бо́га твоего́, е́же а́ще возмни́тся тебѣ́ да́ти, да да́си изъ домо́въ сокро́вища царе́ва

и от мене́ а́зъ Артаксе́рксъ ца́рь уста́вихъ повелѣ́нiе всѣ́мъ храни́телемъ сокро́вищъ, и́же су́ть за рѣко́ю, да все́, е́же а́ще воспро́ситъ от ва́съ Е́здра свяще́нникъ и писе́цъ зако́на Бо́га небе́снаго, гото́во да бу́детъ:

сребра́ да́же до ста́ тала́нтъ, и пшени́цы да́же до ста́ мѣ́ръ, и вина́ да́же до ста́ бо́чекъ, и еле́а да́же до ста́ чва́новъ, а со́ли безъ записа́нiя:

все́, е́же е́сть по во́ли Бо́га небе́снаго, да бу́детъ въ дому́ Бо́га небе́снаго: вонми́те, да не кто́ простре́тъ ру́ку на до́мъ Бо́га небе́снаго, да не когда́ бу́детъ гнѣ́въ на ца́рство царе́во и сыно́въ его́:

и ва́мъ зна́емо твори́мъ сiе́, от всѣ́хъ свяще́нниковъ и леви́товъ, пѣвце́въ, две́рниковъ, наѳини́мовъ и слу́гъ дому́ Бо́жiя да́нь да не бу́детъ тебѣ́, ниже́ имѣ́йте вла́сти порабоща́ти и́хъ:

ты́ же, Е́здра, по прему́дрости Бо́га твоего́, я́же въ руцѣ́ твое́й, поста́ви кни́жники и судiи́, да су́дятъ вся́ лю́ди, и́же су́ть за рѣко́ю, всѣ́мъ зна́ющымъ зако́нъ Бо́га твоего́, и не вѣ́дающему вѣ́дати сотвори́те:

и вся́къ, и́же не сотвори́тъ зако́на Бо́га твоего́ и зако́на царе́ва усе́рдно, су́дъ да бу́детъ сотворе́нъ на него́, а́ще въ сме́рть, или́ въ наказа́нiе, или́ во отщетѣ́нiе живота́, или́ въ темни́цу.

Благослове́нъ Госпо́дь Бо́гъ оте́цъ на́шихъ, и́же даде́ си́це въ се́рдце царе́во, да просла́витъ до́мъ Госпо́день, и́же во Иерусали́мѣ,

и на мя́ уклони́ милосе́рдiе предъ очи́ма царя́ и совѣ́тниковъ его́ и всѣ́хъ князе́й царе́выхъ си́льныхъ: и а́зъ укрѣпле́нъ бы́хъ, я́ко рука́ Бо́жiя блага́я на мнѣ́, и собра́хъ от Изра́иля князе́й взы́ти со мно́ю.