и живо́е пти́чище да во́зметъ, и дре́во ке́дрово и соска́ну червлени́цу и иссо́пъ, и да омо́читъ и́хъ и пти́чище живо́е въ кро́ви закла́наго пти́чища надъ водо́ю живо́ю:

и да воскропи́тъ на очи́стившагося от прокаже́нiя седми́жды, и чи́стъ бу́детъ: и да отпу́ститъ пти́чище живо́е на по́ле:

и да испере́тъ очи́стивыйся ри́зы своя́ и да остриже́тъ вся́ власы́ своя́ и да измы́ется водо́ю, и чи́стъ бу́детъ: и по си́хъ да вни́детъ въ по́лкъ и да пребу́детъ внѣ́ до́му своего́ се́дмь дні́й.

И бу́детъ въ де́нь седмы́й, обрі́ются вси́ власы́ его́, глава́ его́ и брада́ и бро́ви, и вся́къ вла́съ его́ да обрі́ется: и да измы́етъ ри́зы своя́, и да омы́ется тѣ́ло его́ водо́ю, и чи́стъ бу́детъ.

И въ де́нь осмы́й да во́зметъ два́ а́гнца единолѣ́тна непоро́чна и о́вцу еди́ну единолѣ́тну непоро́чну, и три́ десяти́ны муки́ пшени́чны на же́ртву смѣ́шаныя съ еле́емъ и мѣ́ру еле́а еди́ну:

и да поста́витъ жре́цъ очища́яй человѣ́ка очища́емаго и сiя́ предъ Го́сподемъ, у две́рiй ски́нiи свидѣ́нiя:

и во́зметъ жре́цъ а́гнца еди́наго и приведе́тъ его́ преступле́нiя ра́ди, и ча́шу еле́а, и отлучи́тъ я́ жре́цъ во отлуче́нiе предъ Го́сподемъ:

и зако́лютъ а́гнца на мѣ́стѣ, идѣ́же закала́ютъ всесожже́нiя и я́же грѣха́ ра́ди, на мѣ́стѣ свя́тѣ: е́сть бо е́же грѣха́ ра́ди, я́коже и преступле́нiя ра́ди е́сть жерцу́: свята́я святы́хъ су́ть:

и во́зметъ жре́цъ от кро́ве я́же преступле́нiя ра́ди, и возложи́тъ жре́цъ на обу́шiе у́ха очища́емаго десна́го, и на кра́й руки́ его́ десны́я, и на кра́й ноги́ его́ десны́я:

и взе́мъ жре́цъ от ча́ши еле́а, возлiе́тъ на ру́ку лѣ́вую свою́:

и да омо́читъ жре́цъ пе́рстъ сво́й десны́й въ еле́й, и́же е́сть въ руцѣ́ его́ лѣ́вѣй, и да воскропи́тъ от еле́а пе́рстомъ седми́жды предъ Го́сподемъ:

оста́вшiйся же еле́й, и́же въ руцѣ́ его́, да возложи́тъ жре́цъ на обу́шiе у́ха очища́емаго десна́го, и на кра́й руки́ его́ десны́я, и на кра́й ноги́ его́ десны́я, на мѣ́сто кро́ве я́же преступле́нiя ра́ди:

оста́вшiйся же еле́й, и́же въ руцѣ́ жерца́, да возложи́тъ жре́цъ на главу́ очище́нному: и помо́лится о не́мъ жре́цъ предъ Го́сподемъ:

и сотвори́тъ жре́цъ е́же грѣха́ ра́ди, и помо́лится жре́цъ от очища́ющемся от грѣха́ своего́: и по се́мъ зако́летъ жре́цъ всесожже́нiе:

и вознесе́тъ жре́цъ всесожже́нiе и же́ртву на олта́рь предъ Го́сподемъ, и помо́лится о не́мъ жре́цъ, и очи́стится.

А́ще же убо́гъ е́сть, и рука́ его́ не дости́гнетъ, да во́зметъ а́гнца единолѣ́тнаго еди́наго, въ о́ньже преступи́лъ на отлуче́нiе, я́ко помоли́тися о не́мъ, и десяти́ну муки́ пшени́чны смѣ́шаны съ еле́емъ въ же́ртву, и ча́шу еле́а еди́ну,

и два́ го́рличища, или́ два́ птенца́ голуби́на, ели́ка обрѣ́те рука́ его́, и да бу́детъ еди́нъ грѣха́ ра́ди, и другі́й во всесожже́нiе:

и да принесе́тъ я́ въ де́нь осмы́й, во е́же очи́стити его́, къ жерцу́, предъ две́ри ски́нiи свидѣ́нiя предъ Го́спода:

и взе́мъ жре́цъ а́гнца и́же преступле́нiя ра́ди, и ча́шу еле́а, возложи́тъ я́ возложе́нiе предъ Го́сподемъ,

и зако́летъ а́гнца и́же преступле́нiя ра́ди, и во́зметъ жре́цъ от кро́ве я́же преступле́нiя ра́ди, и возложи́тъ на обу́шiе у́ха очища́емаго десна́го, и на кра́й руки́ его́ десны́я, и на кра́й ноги́ его́ десны́я:

и от еле́а возлiе́тъ жре́цъ на ру́ку свою́ лѣ́вую,

и воскропи́тъ жре́цъ пе́рстомъ свои́мъ десны́мъ от еле́а, и́же въ руцѣ́ его́ лѣ́вѣй, седми́жды предъ Го́сподемъ:

и возложи́тъ жре́цъ от еле́а су́щаго въ руцѣ́ его́ на обу́шiе у́ха очища́емаго десна́го, и на кра́й руки́ его́ десны́я, и на кра́й ноги́ его́ десны́я, на мѣ́стѣ кро́ве я́же преступле́нiя ра́ди:

оста́вшееся же от еле́а, е́же е́сть въ руцѣ́ жерца́, да возложи́тъ на главу́ очи́стившемуся: и помо́лится о не́мъ жре́цъ предъ Го́сподемъ,

и сотвори́тъ еди́ну от го́рлицъ, или́ от птенце́въ голуби́ныхъ, я́коже обрѣ́те рука́ его́,

еди́ну грѣха́ ра́ди, и другу́ю во всесожже́нiе съ же́ртвою: и помо́лится жре́цъ о очища́емѣмъ предъ Го́сподемъ.

Се́й зако́нъ въ не́мже е́сть я́зва прокаже́нiя, и не обрѣта́ющему руко́ю во очище́нiе свое́.

И рече́ Госпо́дь къ Моисе́ю и Ааро́ну, глаго́ля:

егда́ вни́дете въ зе́млю Ханаа́нску, ю́же А́зъ даю́ ва́мъ въ притяжа́нiе, и да́мъ я́зву прокаже́нiя въ домѣ́хъ земли́ притяжа́нныя ва́мъ:

и прiи́детъ, его́же до́мъ, и повѣ́сть жерцу́ глаго́ля: а́ки я́зва явля́ется въ дому́ мое́мъ.

И повели́тъ жре́цъ испраздни́ти сосу́ды до́му, пре́жде не́же вни́ти жерцу́ ви́дѣти я́зву, и да не бу́дутъ нечи́ста вся́ я́же въ дому́. По си́хъ же вни́детъ жре́цъ согля́дати до́мъ:

и у́зритъ жре́цъ я́зву, и се́, я́зва на стѣна́хъ до́му удо́лiя зеленѣ́ющаяся или́ червленѣ́ющаяся, и обли́чiе и́хъ худѣ́е стѣ́нъ:

изше́дъ жре́цъ изъ до́му къ две́ремъ до́му, и отлучи́тъ жре́цъ до́мъ на се́дмь дні́й.

И возврати́тся жре́цъ въ седмы́й де́нь, и у́зритъ до́мъ, и се́, разсы́пася я́зва по стѣна́мъ до́му:

и повели́тъ жре́цъ, да изъи́мутъ ка́менiе, на ни́хже е́сть я́зва, и да изнесу́тъ е́ во́нъ изъ гра́да на мѣ́сто нечи́сто:

и да постру́жутъ извнутри́ до́мъ о́крестъ, и изсы́плютъ пе́рсть состро́ганую внѣ́ гра́да на мѣ́сто нечи́сто:

и да во́змутъ ка́менiе и́но остро́гано, и вло́жатъ я́ вмѣ́сто ка́менiя: и пе́рсть и́ну да во́змутъ, и пома́жутъ до́мъ.

А́ще же па́ки на́йдетъ я́зва, и яви́тся въ дому́ по изнесе́нiи ка́менiя и по острога́нiи до́му и по пома́занiи,

и вни́детъ жре́цъ, и у́зритъ: а́ще разсы́пася я́зва въ дому́, прокаже́нiе пребыва́ющее е́сть въ дому́, нечи́стъ е́сть:

и разоря́тъ до́мъ, и древа́ его́ и ка́менiе его́ и всю́ пе́рсть до́му изнесу́тъ внѣ́ гра́да, на мѣ́сто нечи́сто.

И входя́й въ до́мъ вся́ дни́, въ ня́же е́сть отлуче́нъ, нечи́стъ бу́детъ до ве́чера:

и спя́й въ дому́ да испере́тъ ри́зы своя́ и нечи́стъ бу́детъ до ве́чера: и яды́й въ дому́ да испере́тъ ри́зы своя́ и нечи́стъ бу́детъ до ве́чера.

А́ще же прише́дый вни́детъ жре́цъ, и уви́дитъ: и се́, разсы́панiемъ не разсы́пася я́зва въ дому́ но пома́занiи до́му, да очи́ститъ жре́цъ до́мъ, я́ко исцѣлѣ́ я́зва:

и во́зметъ очи́стити до́мъ, два́ пти́чища жи́ва чи́ста и дре́во ке́дрово, и соска́ну червлени́цу и иссо́пъ:

и да зако́летъ пти́чище еди́но въ сосу́дъ гли́нянъ надъ водо́ю живо́ю:

и во́зметъ дре́во ке́дрово и соска́нiе червле́ное, и иссо́пъ и пти́чище живо́е, и да омо́читъ е́ въ кро́вь пти́чища закла́наго надъ водо́ю живо́ю, и да окропи́тъ и́ми въ дому́ седми́жды:

и очи́ститъ до́мъ кро́вiю пти́чищною и водо́ю живо́ю, и пти́чищемъ живы́мъ и дре́вомъ ке́дровымъ, и иссо́помъ и соска́ною червлени́цею:

и да отпу́ститъ пти́чище живо́е внѣ́ гра́да на по́ле и помо́лится о до́мѣ, и чи́стъ бу́детъ.

Се́й зако́нъ о вся́кой я́звѣ прокаже́нiя и вре́да,

и прокаже́нiя ри́зы и до́му,

и стру́па, и зна́менiя, и блеща́щагося,

и повѣ́дати въ о́ньже де́нь нечи́сто, и въ о́ньже де́нь очи́стится: се́й зако́нъ прокаже́нiя.