И посла́ Иису́съ сы́нъ Нави́нъ изъ Сатти́на два́ ю́ношы согля́дати вта́й, глаго́ля: взы́дите и ви́дите зе́млю и Иерихо́нъ. И ше́дша два́ ю́ношы внидо́ста во Иерихо́нъ и внидо́ста въ до́мъ жены́ блудни́цы, е́йже и́мя Раа́въ: и вита́ста та́мо.

И повѣ́даша царю́ Иерихо́нскому, глаго́люще: се́, му́жiе внидо́ша сѣ́мо [въ сiю́ но́щь] от сыно́въ Изра́илевыхъ согля́дати зе́млю.

И посла́ ца́рь Иерихо́нскiй и рече́ къ Раа́вѣ, глаго́ля: изведи́ му́жы вше́дшыя въ до́мъ тво́й но́щiю: согля́дати бо зе́млю прiидо́ша.

И пое́мши жена́ два́ му́жа, сокры́ и́хъ: и рече́ и́мъ, глаго́лющи: прiидо́ша ко мнѣ́ му́жiе, но не вѣ́мъ отку́ду бы́ша:

егда́ же врата́ затворя́ху въ сумра́ки, и му́жiе изыдо́ша: не вѣ́мъ ка́мо поидо́ша: пожени́те ско́ро вслѣ́дъ и́хъ, а́ще пости́гнете и́хъ.

Она́ же возведе́ я́ на хра́мину и сокры́ я́ въ па́здерѣ льня́нѣ со́бранѣмъ у нея́ на хра́минѣ.

И му́жiе гна́ша вслѣ́дъ и́хъ путе́мъ ко Иорда́ну къ прехо́домъ, и врата́ затворе́ны бы́ша.

И бы́сть егда́ изыдо́ша жену́щiи вслѣ́дъ и́хъ, и сі́и пре́жде не́же усну́ти и́мъ, и она́ взы́де къ ни́мъ на хра́мину и рече́ къ ни́мъ:

вѣ́мъ, я́ко предаде́ Госпо́дь зе́млю [сiю́] ва́мъ: нападе́ бо стра́хъ ва́шъ на ны́, и ужасо́шася вси́ обита́ющiи на земли́ от лица́ ва́шего:

слы́шахомъ бо, я́ко изсуши́ Госпо́дь Бо́гъ мо́ре Чермно́е предъ лице́мъ ва́шимъ, егда́ исхожда́сте изъ Еги́пта, и ели́ка сотвори́сте двои́мъ царе́мъ Аморре́йскимъ, и́же бы́ша объ ону́ страну́ Иорда́на, Сио́ну и О́гу, и́хже потреби́сте:

и слы́шавше мы́ ужасо́хомся въ се́рдцы на́шемъ, и не ста́ ктому́ ду́хъ ни во еди́нѣмъ от на́съ от лица́ ва́шего: я́ко Госпо́дь Бо́гъ ва́шъ, Бо́гъ на небеси́ горѣ́ и на земли́ до́лѣ:

и ны́нѣ клени́теся мнѣ́ Го́сподемъ Бо́гомъ [ва́шимъ], я́ко а́зъ творю́ ми́лость ва́мъ, да сотвори́те и вы́ ми́лость въ дому́ отца́ моего́, и дади́те ми́ зна́менiе и́стинно:

и оживи́те до́мъ отца́ моего́, и ма́терь мою́, и бра́тiю мою́, и сестры́ моя́, и вся́, ели́ка су́ть и́мъ, и изми́те ду́шы на́шя от сме́рти.

И реко́ша е́й му́жiе: душа́ на́ша вмѣ́сто ва́съ на сме́рть, а́ще ны́нѣ не объяви́ши на́съ. Она́ же рече́: и бу́детъ егда́ преда́стъ Госпо́дь ва́мъ гра́дъ [се́й], сотвори́те мнѣ́ ми́лость и и́стину.

И свѣ́си и́хъ на ве́рвѣ окно́мъ: я́ко до́мъ ея́ при стѣнѣ́, и при стѣнѣ́ сiя́ живя́ше:

и рече́ и́мъ: отиди́те въ го́ру, да не сря́щутъ ва́съ гоня́щiи, и скры́йтеся та́мо три́ дни́, до́ндеже возвратя́тся гоня́щiи вслѣ́дъ ва́съ: и по си́хъ отъи́дете въ пу́ть ва́шъ.

И рѣ́ша къ не́й му́жiе: непови́нни есмы́ кля́твѣ се́й твое́й, е́юже закля́ла еси́ на́съ:

се́, мы́ вхо́димъ въ ча́сть гра́да, и поста́виши зна́менiе, ве́рвь червле́ну, сiю́ да обя́жеши у окна́, и́мже спусти́ла еси́ на́съ: отца́ же твоего́ и ма́терь твою́, и бра́тiю твою́ и ве́сь до́мъ отца́ твоего́ да собере́ши къ себѣ́ въ до́мъ тво́й:

и бу́детъ вся́къ, и́же а́ще изы́детъ изъ две́рiй до́му твоего́ во́нъ, са́мъ себѣ́ пови́ненъ бу́детъ, мы́ же непови́нни [бу́демъ] кля́твѣ твое́й се́й: и ели́цы а́ще съ тобо́ю бу́дутъ въ дому́ твое́мъ, мы́ бу́демъ пови́нни, а́ще рука́ прико́снется и́хъ:

а́ще же кто́ на́съ оби́дитъ, или́ откры́етъ словеса́ на́ша сiя́, бу́демъ непови́нни кля́твѣ твое́й се́й, е́юже закля́ла еси́ на́съ.

И рече́ и́мъ: по словеси́ ва́шему та́ко да бу́детъ. И отпусти́ и́хъ, и отидо́ша: и привяза́ ве́рвь червле́ну у окна́.

И отидо́ша, и проидо́ша въ го́ру, и пребы́ша та́мо три́ дни́, до́ндеже возврати́шася гна́вшiи. И иска́ша гоня́щiи по всѣ́мъ путе́мъ, и не обрѣто́ша.

И возврати́стася два́ ю́ношы и снидо́ста съ горы́: и преидо́ста [Иорда́нъ] ко Иису́су сы́ну Нави́ну, и повѣ́даста ему́ вся́ случи́вшаяся и́ма:

и рѣ́ста ко Иису́су: я́ко предаде́ Госпо́дь Бо́гъ на́шъ въ ру́цѣ на́ши всю́ зе́млю, и убоя́шася вси́ живу́щiи на земли́ то́й от на́съ.

Глава: