И нача́лницы леви́томъ Асаві́а и сараві́а и Иису́съ, и сы́нове кадмiи́ловы и бра́тiя и́хъ предъ ни́ми въ пѣ́снехъ хвали́ти и исповѣ́довати, по за́повѣди дави́да человѣ́ка Бо́жiя, по чреда́мъ от дне́ до дне́.

Матѳані́а и ваквакі́а, Авді́а, месулла́мъ, телмо́нъ, аку́въ, стрегу́щiи две́рницы стра́жу, внегда́ собра́ти ми́ две́рники.

Во дни́ Иоаки́ма сы́на Иису́сова, сы́на Иоседе́кова, и во дни́ Неемі́и и е́здры свяще́нника и книго́чiи,

и во обновле́нiи стѣны́ Иерусали́мскiя, взыска́ша леви́товъ въ мѣ́стѣхъ и́хъ да возведу́тъ и́хъ во Иерусали́мъ сотвори́ти обновле́нiе и весе́лiе во хвале́нiи и пѣ́снехъ, въ кимва́лѣхъ и псалти́рехъ и гу́слехъ.

И собра́шася сы́нове пою́щихъ и от страны́ окре́стныя во Иерусали́мъ, и от се́лъ нетофаті́евыхъ,

и от до́му [галга́лъ] и от стра́нъ [гева́ и азмаве́тъ], я́ко се́ла созда́ша себѣ́ пѣвцы́ о́крестъ Иерусали́ма:

и очи́стишася свяще́нницы и леви́ти, и очи́стиша люді́й и врата́ и стѣ́ну.

И возведо́хъ нача́лниковъ Иу́диныхъ на стѣ́ну, и поста́вихъ два́ кли́роса вели́ка, хвалы́ ра́ди, и проидо́ша от десны́я страны́ на стѣ́ну ко врато́мъ гно́йнымъ.

И идо́ша за ни́ми осаі́а и полови́на нача́лниковъ Иу́диныхъ,

и Азарі́а и Е́здра и месулла́мъ,

Иу́да и Венiами́нъ, и самаі́а и Иеремі́а:

и от сыно́въ свяще́нничихъ съ труба́ми Заха́рiа сы́нъ Ионаѳа́новъ, сы́нъ самаі́и, сы́нъ маѳані́инъ, сы́нъ Михаи́нъ, сы́нъ закху́ровъ, сы́нъ Аса́фовъ,

и бра́тiя его́ самаі́а и Озiи́лъ, гело́лъ, маі́а, наѳанаи́лъ и Иу́да и Анані́й, е́же хвали́ти въ пѣ́снехъ дави́да человѣ́ка Бо́жiя:

и Е́здра книго́чiй предъ ни́ми при вратѣ́хъ исто́чника, хвали́ти пря́мо и́хъ. И взыдо́ша на лѣ́ствицы гра́да дави́дова, на восхо́дъ стѣны́ вы́ше до́му дави́дова и да́же до вра́тъ водны́хъ къ восто́ку.

И кли́росъ вторы́й хвалу́ воздаю́щихъ идя́ше сопроти́въ и́хъ, и а́зъ по не́мъ, и полови́на люді́й по стѣнѣ́, верху́ столпа́ Ѳанури́мля и да́же до стѣны́ простра́ннѣйшiя,

и на врата́ Ефраи́ма, и на врата́ ста́рая, и на врата́ ры́бная, и на сто́лпъ Анамеи́ль, и на сто́лпъ Ема́ѳъ, и да́же до вра́тъ о́вчихъ.

И ста́ша на вратѣ́хъ стра́жи, ста́ша же два́ кли́роса хва́ляща въ дому́ Бо́жiи, и а́зъ и полови́на воево́дъ со мно́ю,

и свяще́нницы Елiаки́мъ, маасі́а, Мiами́нъ, Михе́а, Елiона́, Заха́рiа, Анані́а съ труба́ми,

и маасі́а и семеі́а, и Елеаза́ръ и Озі́а, и Иоана́нъ и Мелхі́а, и Елеамі́й и Иезу́ръ. И слы́шани бы́ша пѣвцы́ и Иезрі́а, и согля́дани, и восхвали́ша.

И пожро́ша въ де́нь то́й же́ртвы вели́кiя и возвесели́шася, я́ко Бо́гъ возвесели́ и́хъ вельми́: и жены́ и́хъ и ча́да и́хъ ра́довахуся, и слы́шано бы́сть весе́лiе то́ во Иерусали́мѣ издале́ча.

И поста́виша въ де́нь то́й муже́й надъ сокро́вищными храни́лищи, на нача́тки и десяти́ны, и да собира́ютъ си́ми нача́лниками от градо́въ ча́сти свяще́нникомъ и леви́томъ, я́ко весе́лiе бѣ́ во Иуде́и, во свяще́нницѣхъ и въ леви́тѣхъ предстоя́щихъ,

и стрежа́ху стра́жу Бо́га своего́, и хране́нiе очище́нiя, и пѣвце́въ и две́рниковъ, по повелѣ́нiю дави́да и Соломо́на сы́на его́.

Я́ко во дни́ дави́довы Аса́фъ от нача́ла пе́рвый въ пѣвцѣ́хъ и въ пѣ́снехъ и хвале́нiи Бо́гу,

и ве́сь Изра́иль во дни́ зорова́веля и во дни́ Неемі́и дая́ху обро́къ пѣвце́мъ и две́рникомъ от дне́ до дне́ и освяща́ху леви́томъ, леви́ти же освяща́ху сыново́мъ Ааро́нимъ.