И глаго́ла Госпо́дь къ Моисе́ю въ пусты́ни Сина́йстѣй, въ ски́нiи свидѣ́нiя, въ пе́рвый де́нь ме́сяца втора́го, втора́го лѣ́та изше́дшымъ и́мъ от земли́ Еги́петскiя, глаго́ля:

возми́те сочте́нiе всего́ со́нма сыно́въ Изра́илевыхъ по сродство́мъ и́хъ, по домо́мъ оте́чества и́хъ, по числу́ име́нъ и́хъ, по глава́мъ и́хъ:

вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою Изра́илевою, согля́дайте и́хъ съ си́лою и́хъ, ты́ и Ааро́нъ созира́йте и́хъ:

и съ ва́ми да бу́дутъ съ си́лою свое́ю кі́йждо, кі́йждо по пле́мени коего́ждо от князе́й, по домо́мъ оте́чествъ да бу́дутъ.

И сiя́ имена́ муже́й, и́же ста́нутъ съ ва́ми: от Руви́ма Елису́ръ сы́нъ Седiу́ровъ,

от Симео́на Саламiи́лъ сы́нъ Сурисада́евъ,

от Иу́ды Наассо́нъ сы́нъ Аминада́вль,

от Иссаха́ра Наѳанаи́лъ сы́нъ Сога́ровъ,

от Завуло́на Елiа́въ сы́нъ Хело́нь,

от сыно́въ Ио́сифовыхъ, и́же от Ефре́ма, Елиса́мъ сы́нъ Семiу́довъ, от Манассі́и Гамалiи́лъ сы́нъ Фадассу́ровъ,

от Венiами́на Авида́нъ сы́нъ Гадеоні́евъ,

от Да́на Ахiе́зеръ сы́нъ Амисада́евъ,

от Аси́ра Фагаiи́лъ сы́нъ Ехра́новъ,

от Га́да Елиса́фъ сы́нъ Рагуи́ловъ,

от Нефѳали́ма Ахире́й сы́нъ Ена́нь.

Сі́и нарече́ннiи со́нма кня́зи от племе́нъ, по оте́чествамъ и́хъ, тысященача́лницы Изра́илевы су́ть.

И поя́ Моисе́й и Ааро́нъ му́жы сiя́ нарече́нныя и́менемъ.

И ве́сь со́нмъ собра́ша въ пе́рвый де́нь ме́сяца втора́го лѣ́та, и согля́даша я́ по родо́мъ и́хъ, по оте́чествамъ и́хъ, по числу́ име́нъ и́хъ, от два́десяти лѣ́тъ и вы́шше, вся́къ му́жескъ по́лъ по глава́мъ и́хъ,

я́коже повелѣ́ Госпо́дь Моисе́ю: и согля́дашася сі́и въ пусты́ни Сина́йстѣй.

И бы́ша сы́нове Руви́ма, пе́рвенца Изра́илева, по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Руви́мля четы́редесять ше́сть ты́сящъ и пя́ть со́тъ.

Сыно́въ Симео́новыхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Симео́ня пятьдеся́тъ де́вять ты́сящъ и три́ста.

Сыно́въ Иу́диныхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Иу́дина се́дмьдесятъ четы́ри ты́сящы и ше́сть со́тъ.

От сыно́въ Иссаха́ровыхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Иссаха́рова пятьдеся́тъ и четы́ри ты́сящы и четы́ре ста́.

От сыно́въ Завуло́нихъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Завуло́ня пятьдеся́тъ се́дмь ты́сящъ и четы́ре ста́.

От сыно́въ Ио́сифовыхъ, сыно́въ Ефре́млихъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Ефре́мля четы́редесять ты́сящъ и пя́ть со́тъ.

От сыно́въ Манассі́иныхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Манассі́ина три́десять и двѣ́ ты́сящы и двѣ́сти.

От сыно́въ Венiами́новыхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Венiами́ня три́десять и пя́ть ты́сящъ и четы́ре ста́.

От сыно́въ Га́довыхъ, по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескiй по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Га́дова четы́редесять пя́ть ты́сящъ и ше́сть со́тъ и пятьдеся́тъ.

От сыно́въ Да́новыхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Да́нова шестьдеся́тъ и двѣ́ ты́сящы и се́дмь со́тъ.

От сыно́въ Аси́ровыхъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Аси́рова четы́редесять еди́на ты́сяща и пя́ть со́тъ.

От сыно́въ Нефѳали́млихъ по сродство́мъ и́хъ, по со́нмомъ и́хъ, по домо́мъ оте́чествъ и́хъ, по числу́ име́нъ и́хъ, по глава́мъ и́хъ, вся́къ му́жескъ по́лъ и́хъ от два́десяти лѣ́тъ и вы́шше, вся́къ исходя́й съ си́лою,

согля́данiе и́хъ от пле́мене Нефѳали́мля пятьдеся́тъ и три́ ты́сящы и четы́ре ста́.

Сiе́ сочисле́нiе, е́же согля́даша Моисе́й и Ааро́нъ и кня́зи Изра́илевы, двана́десять муже́й, му́жъ еди́нъ от пле́мене еди́наго, по пле́мени домо́въ оте́чества и́хъ бы́ша.

И бы́сть всего́ согля́данiя сыно́въ Изра́илевыхъ съ си́лою и́хъ, от два́десяти лѣ́тъ и вы́шше, вся́къ исходя́й ополча́тися во Изра́или,

ше́сть со́тъ ты́сящъ и три́ ты́сящы и пя́ть со́тъ и пятьдеся́тъ.

Леви́ти же от пле́мене оте́чества и́хъ не сочи́слишася въ сынѣ́хъ Изра́илевыхъ.

И рече́ Госпо́дь къ Моисе́ю, глаго́ля:

ви́ждь, пле́мене Леві́ина да не сочи́слиши, и числа́ и́хъ да не прiи́меши среди́ сыно́въ Изра́илевыхъ:

и ты́ приста́ви леви́ты къ ски́нiи свидѣ́нiя и ко всѣ́мъ сосу́домъ ея́, и ко всѣ́мъ, ели́ка су́ть въ не́й: да но́сятъ сі́и ски́нiю и вся́ сосу́ды ея́, и ті́и да слу́жатъ въ не́й, и о́крестъ ски́нiи да ополча́ются:

и внегда́ воздвиза́ти ски́нiю, да снима́ютъ ю́ леви́ти, и внегда́ поста́вити ски́нiю, да возста́вятъ: и иноплеме́нникъ приступа́яй да у́мретъ.

И да ополча́ются сы́нове Изра́илевы, вся́къ въ свое́мъ чи́нѣ и вся́къ по своему́ старѣ́йшинству, съ си́лою свое́ю:

леви́ти же да ополча́ются сопроти́въ, о́крестъ ски́нiи свидѣ́нiя, и не бу́детъ согрѣше́нiя въ сынѣ́хъ Изра́илевыхъ, и да стрегу́тъ леви́ти са́ми стра́жу ски́нiи свидѣ́нiя.

И сотвори́ша сы́нове Изра́илевы по всѣ́мъ, ели́ка заповѣ́да Госпо́дь Моисе́ю и Ааро́ну, та́ко сотвори́ша.

И рече́ Валаа́мъ къ Вала́ку: сози́жди мнѣ́ здѣ́ се́дмь тре́бищъ, и угото́вай мнѣ́ здѣ́ се́дмь телце́въ и се́дмь овно́въ.

И сотвори́ Вала́къ, я́коже рече́ ему́ Валаа́мъ: и вознесе́ телца́ и овна́ на тре́бище.

И рече́ Валаа́мъ къ Вала́ку: ста́ни у тре́бы своея́, и пойду́, а́ще яви́тся мнѣ́ Бо́гъ въ срѣ́тенiе, и сло́во, е́же мнѣ́ ука́жетъ, повѣ́мъ тебѣ́. И ста́ Вала́къ у тре́бы своея́.

И Валаа́мъ и́де вопроси́ти Бо́га, и и́де пря́мо: и яви́ся Бо́гъ Валаа́му. И рече́ къ нему́ Валаа́мъ: се́дмь тре́бищъ изгото́вихъ и возложи́хъ телца́ и овна́ на тре́бище.

И вложи́ Бо́гъ сло́во во уста́ Валаа́му и рече́: возврати́вся къ Вала́ку та́ко глаго́ли.

И возврати́ся къ нему́: о́нъ же стоя́ше у всесожже́нiй свои́хъ, и вси́ кня́зи Моа́вли съ ни́мъ: и бы́сть Ду́хъ Бо́жiй на не́мъ.

И воспрiи́мъ при́тчу свою́ рече́: от Месопота́мiи приведе́ мя Вала́къ ца́рь Моа́вль, от го́ръ восто́чныхъ, глаго́ля: гряди́, проклени́ ми Иа́кова, и гряди́, проклени́ ми Изра́иля:

что́ проклену́, его́же не клене́тъ Госпо́дь? Или́ что́ зло́ реку́, его́же не злосло́витъ Бо́гъ?

Я́ко от верха́ го́ръ узрю́ его́ и от хо́лмъ проуразумѣ́ю его́: се́, лю́дiе еди́ни населя́тся и со язы́ки не вмѣня́тся:

кто́ изслѣ́дитъ сѣ́мя Иа́ковле? И кто́ изочте́тъ со́нмы Изра́иля? Да у́мретъ душа́ моя́ въ душа́хъ пра́ведныхъ, и бу́ди сѣ́мя мое́, я́коже сѣ́мя и́хъ.

И рече́ Вала́къ къ Валаа́му: что́ сотвори́лъ еси́ ми́? На прокля́тiе вра́гъ мои́хъ призва́хъ тя́, и се́, благослови́лъ еси́ [я́] благослове́нiемъ.

И рече́ Валаа́мъ къ Вала́ку: не ели́ка ли вло́житъ Бо́гъ во уста́ моя́, сiе́ сохраню́ глаго́лати?

И рече́ къ нему́ Вала́къ: пойди́ еще́ со мно́ю на мѣ́сто и́но, съ него́же не у́зриши и́хъ отту́ду, но ра́звѣ ча́сть нѣ́кую и́хъ у́зриши, всѣ́хъ же не у́зриши, и проклени́ ми и́хъ отту́ду.

И поя́ его́ на стра́жу села́, на ве́рхъ Исте́санаго, и созда́ та́мо се́дмь тре́бищъ, и возложи́ телца́ и овна́ на тре́бище.

И рече́ Валаа́мъ къ Вала́ку: ста́ни у тре́бы своея́, а́зъ же пойду́ вопроси́ти Бо́га.

И срѣ́те Бо́гъ Валаа́ма, и вложи́ сло́во во уста́ ему́ и рече́: возврати́ся къ Вала́ку, и рече́ши сiя́.

И возврати́ся къ нему́: о́нъ же стоя́ше у всесожже́нiй свои́хъ, и вси́ кня́зи Моа́вли съ ни́мъ. И рече́ ему́ Вала́къ: что́ глаго́ла Госпо́дь?

И воспрiи́мъ при́тчу свою́, рече́: воста́ни, Вала́къ, и послу́шай, внуши́ свидѣ́тель, сы́не Сепфо́ровъ:

не я́ко человѣ́къ Бо́гъ коле́блется, ниже́ я́ко сы́нъ человѣ́ческiй измѣня́ется: То́й глаго́лаше, не сотвори́тъ ли? Рече́тъ, и не пребу́детъ ли?

Се́, благословля́ти приведе́нъ е́смь: благословлю́, и не отвращу́:

не бу́детъ труда́ во Иа́ковѣ, ниже́ у́зрится болѣ́знь во Изра́или: Госпо́дь Бо́гъ его́ съ ни́мъ, сла́ва ца́рская на не́мъ:

Бо́гъ изведы́й его́ изъ Еги́пта, я́коже сла́ва единоро́га въ не́мъ:

нѣ́сть бо вражбы́ во Иа́ковѣ, ниже́ волхвова́нiя во Изра́или: во вре́мя нарече́тся Иа́кову и Изра́илю, что́ соверши́тъ Бо́гъ:

се́, лю́дiе я́ко льви́чища воста́нутъ, и я́ко ле́въ вознесе́тся: не у́снетъ, до́ндеже снѣ́стъ ло́въ и кро́вь посѣ́ченыхъ испiе́тъ.

И рече́ Вала́къ къ Валаа́му: ни кля́твами мнѣ́ клени́ и́хъ, ниже́ благослове́нiемъ благослови́ и́хъ.

И отвѣща́въ Валаа́мъ, рече́ къ Вала́ку: не рѣ́хъ ли ти́, глаго́ля: сло́во, е́же а́ще возглаго́летъ Бо́гъ, сiе́ сотворю́?

И рече́ Вала́къ къ Валаа́му: гряди́, пойму́ тя на мѣ́сто и́но, а́ще уго́дно бу́детъ Бо́гу, и проклени́ ми и́хъ отту́ду.

И поя́ Вала́къ Валаа́ма на ве́рхъ Фого́ра, простира́ющася въ пусты́ню.

И сотвори́ Вала́къ, я́коже рече́ ему́ Валаа́мъ: и вознесе́ телца́ и овна́ на тре́бище.