заповѣ́ждь сыно́мъ Изра́илевымъ, и рече́ши къ ни́мъ, глаго́ля: да́ры Моя́, дая́нiя Моя́, прино́сы Моя́, въ воню́ благово́нiя соблюди́те приноси́ти Мнѣ́ на пра́здники Моя́.

И да рече́ши къ ни́мъ: сiя́ приноше́нiя, я́же принесе́те Го́споду, а́гнцевъ единолѣ́тныхъ непоро́чныхъ два́ на де́нь во всесожже́нiе вы́ну:

а́гнца еди́наго сотвори́те ра́но, и а́гнца втора́го сотвори́те въ ве́черъ:

и да сотвори́ши деся́тую ча́сть е́фи [мѣ́ры] муки́ пшени́чны на же́ртву, вмѣ́шану въ еле́и четве́ртую ча́сть [мѣ́ры] и́на:

всесожже́нiе непреста́нное, я́коже бы́сть въ горѣ́ Сина́йстѣй, въ воню́ благово́нiя Го́споду.

И возлiя́нiе его́ четве́ртую ча́сть [мѣ́ры] и́на а́гнцу еди́ному: во святѣ́мъ да возлiе́ши возлiя́нiе сике́ру Го́споду:

и а́гнца втора́го сотвори́ши къ ве́черу: по же́ртвѣ его́ и по возлiя́нiю его́ да сотвори́ши, въ воню́ благово́нiя Го́споду.

И въ де́нь суббо́тъ приведе́те два́ а́гнца единолѣ́тна непоро́чна и двѣ́ десяти́ны муки́ пшени́чны вмѣ́шаны въ еле́и на же́ртву и возлiя́нiе,

всесожже́нiя суббо́ты въ суббо́тахъ, на всесожже́нiе всегда́шнее и возлiя́нiе его́.

И въ новоме́сячiихъ да принесе́те во всесожже́нiе Го́споду телца́ два́ от говя́дъ и овна́ еди́наго, а́гнцевъ единолѣ́тныхъ се́дмь непоро́чныхъ:

три́ десяти́ны муки́ пшени́чны вмѣ́шаны въ еле́и телцу́ еди́ному, и двѣ́ десяти́ны муки́ пшени́чны вмѣ́шаны въ еле́и овну́ еди́ному,

по десяти́нѣ муки́ пшени́чны вмѣ́шаны въ еле́и а́гнцу еди́ному: же́ртву въ воню́ благово́нiя прино́съ Го́споду.

Возлiя́нiе и́хъ от вина́ по́лъ [мѣ́ры] и́на да бу́детъ телцу́ еди́ному: и тре́тiя ча́сть [мѣ́ры] и́на да бу́детъ овну́ еди́ному: и четве́ртая ча́сть [мѣ́ры] и́на да бу́детъ а́гнцу еди́ному: сiе́ всесожже́нiе от ме́сяца до ме́сяца въ ме́сяцы лѣ́та.

И козла́ еди́наго от ко́зъ грѣха́ ра́ди Го́споду на всесожже́нiе при́сное сотвори́те и возлiя́нiе его́.

И въ ме́сяцѣ пе́рвѣмъ въ четвертыйна́десять де́нь ме́сяца Па́сха Го́споду:

и въ пятыйна́десять де́нь ме́сяца сего́ пра́здникъ: се́дмь дні́й опрѣсно́ки да я́сте.

И де́нь пе́рвый наро́читъ свя́тъ да бу́детъ ва́мъ: вся́каго дѣ́ла служе́бна да не сотворите́.

И принесе́те всесожже́нiя прино́съ Го́споду, телца́ от воло́въ два́, овна́ еди́наго, а́гнцевъ единолѣ́тныхъ се́дмь: непоро́чни бу́дутъ ва́мъ.

И же́ртва и́хъ мука́ пшени́чна вмѣ́шана въ еле́и: три́ десяти́ны телцу́ еди́ному и двѣ́ десяти́ны овну́ еди́ному да сотвори́те:

по десяти́нѣ сотвори́ши а́гнцу еди́ному, седми́ а́гнцемъ:

и козла́ еди́наго от ко́зъ грѣха́ ра́ди, во е́же умоли́ти о ва́съ.

Кромѣ́ всесожже́нiя всегда́шняго у́тренняго, е́же е́сть всесожже́нiе всегда́шнее, сотвори́те сiя́.

По сему́ сотвори́те на [вся́къ] де́нь, въ се́дмь дні́й, да́ръ, прино́съ въ воню́ благово́нiя Го́споду: на всесожже́нiе всегда́шнее сотвори́ши возлiя́нiе его́.

И де́нь седмы́й наро́читъ свя́тъ да бу́детъ ва́мъ: вся́каго дѣ́ла служе́бнаго да не сотворите́ въ о́нь.

И де́нь но́выхъ [плодо́въ], егда́ принесе́те Го́сподеви же́ртву но́ву седми́цъ, наро́читъ свя́тъ бу́детъ ва́мъ: вся́каго дѣ́ла служе́бна да не сотворите́.

И да принесе́те всесожже́нiя въ воню́ благово́нiя Го́споду, телца́ от воло́въ два́, овна́ еди́наго, а́гнцевъ единолѣ́тныхъ се́дмь непоро́чныхъ.

Же́ртва и́хъ мука́ пшени́чна вмѣ́шана въ еле́и: три́ десяти́ны телцу́ еди́ному и двѣ́ десяти́ны овну́ еди́ному:

по десяти́нѣ а́гнцу еди́ному, седми́ а́гнцемъ:

и козла́ еди́наго от ко́зъ грѣха́ ра́ди, во е́же умоли́ти о ва́съ.

Кромѣ́ всесожже́нiя всегда́шняго, и же́ртву и́хъ сотвори́те Мнѣ́, непоро́чни да бу́дутъ ва́мъ, и возлiя́нiя и́хъ.