И посла́ я́ Моисе́й ты́сящу от пле́мене и ты́сящу от пле́мене съ си́лою и́хъ, и Финее́са сы́на Елеаза́рова сы́на Ааро́на жерца́: и сосу́ды святы́я, и трубы́ зна́менныя въ рука́хъ и́хъ.

И ополчи́шася на Мадiа́ма, я́коже повелѣ́ Госпо́дь Моисе́ю, и изби́ша ве́сь му́жескъ по́лъ:

и царе́й Мадiа́мскихъ уби́ша вку́пѣ съ я́звеными и́хъ, и Еви́на и Роко́ма, и Су́ра и У́ра и Рово́ка, пя́ть царе́й Мадiа́млихъ: и Валаа́ма сы́на Вео́рова уби́ша мече́мъ съ я́звеными и́хъ:

и плѣни́ша же́нъ Мадiа́млихъ и имѣ́нiя и́хъ, и скоты́ и́хъ и вся́ притяжа́нiя и́хъ, и си́лу и́хъ плѣни́ша:

и вся́ гра́ды и́хъ, я́же во обита́нiихъ и́хъ, и ве́си и́хъ пожго́ша огне́мъ,

и взя́ша ве́сь плѣ́нъ и́хъ и вся́ коры́сти и́хъ, от человѣ́ка до скота́:

и приведо́ша къ Моисе́ю и ко Елеаза́ру жерцу́ и ко всѣ́мъ сыно́мъ Изра́илевымъ плѣ́нъ и коры́сти и имѣ́нiе въ по́лкъ, во араво́ѳъ Моа́вль, и́же е́сть у Иорда́на при Иерихо́нѣ.

И изы́де Моисе́й и Елеаза́ръ жре́цъ и вси́ кня́зи со́нма въ срѣ́тенiе и́мъ внѣ́ полка́.

И разгнѣ́вася Моисе́й на надзира́телей си́лы, тысященача́лниковъ и стонача́лниковъ иду́щихъ от ополче́нiя бра́ни.

И рече́ и́мъ Моисе́й: вску́ю жи́въ оста́висте ве́сь же́нскъ по́лъ?

Ты́я бо бы́ша сыно́мъ Изра́илевымъ, по словеси́ Валаа́млю, е́же отступи́ти и презрѣ́ти сло́во Госпо́дне Фого́ра ра́ди, и бы́сть я́зва въ со́нмѣ Госпо́дни:

и ны́нѣ избі́йте вся́къ му́жескъ по́лъ во вся́комъ во́зрастѣ, и вся́ку жену́, я́же позна́ ло́же му́жеско, избі́йте:

и вся́къ во́зрастъ же́нскъ, я́же не позна́ша ло́жа му́жеска, живы́хъ оста́вите я́:

и вы́ ста́ните внѣ́ полка́ се́дмь дні́й: вся́къ уби́вый ду́шу и прикосну́выйся убiе́ному да очи́стится въ тре́тiй де́нь и въ де́нь седмы́й, вы́ и плѣ́нъ ва́шъ:

и вся́ку оде́жду, и вся́къ сосу́дъ ко́жанъ, и вся́ко содѣ́ланое от козли́чины, и вся́къ сосу́дъ древя́нъ очи́стите.

И рече́ Елеаза́ръ жре́цъ къ муже́мъ си́лы приходя́щымъ от ополче́нiя ра́тнаго: сiе́ оправда́нiе зако́на, е́же заповѣ́да Госпо́дь Моисе́ю:

кромѣ́ сребра́ и зла́та, и мѣ́ди и желѣ́за, и кассите́ра и о́лова,

вся́ка ве́щь, я́же про́йдетъ сквозѣ́ о́гнь, и [огне́мъ] очи́стится, но и водо́ю очище́нiя очи́стится: и вся́, ели́ка а́ще не про́йдутъ сквозѣ́ о́гнь, да про́йдутъ сквозѣ́ во́ду:

и испери́те ри́зы ва́шя въ де́нь седмы́й, и очи́ститеся: и по си́хъ вни́дете въ по́лкъ.

И рече́ Госпо́дь къ Моисе́ю, глаго́ля:

возми́те сочисле́нiе коры́стей плѣ́на от человѣ́ка до скота́, ты́ и Елеаза́ръ жре́цъ и кня́зи оте́чествъ со́нма,

и раздѣли́те коры́сти между́ во́ины ходи́вшими на бра́нь и между́ всѣ́мъ со́нмомъ,

и отлучи́те да́нь Го́споду от люді́й вое́нныхъ ходи́вшихъ на бра́нь, еди́ну ду́шу от пяти́ со́тъ, от человѣ́къ и от ското́въ, и от воло́въ и от ове́цъ и от осля́тъ,

и от полови́ны и́хъ да во́змете, и да́си Елеаза́ру жерцу́ нача́тки Госпо́дни:

и от полови́ны сыно́въ Изра́илевыхъ да во́змеши еди́но от пяти́десяти человѣ́къ, и от воло́въ и от ове́цъ, и от осля́тъ и от всѣ́хъ ското́въ, и да́си я́ леви́томъ, и́же стрегу́тъ стражбы́ въ ски́нiи Госпо́дни.

И сотвори́ Моисе́й и Елеаза́ръ жре́цъ, я́коже повелѣ́ Госпо́дь Моисе́ю.

И бы́сть мно́жество плѣ́на, его́же плѣни́ша му́жи во́инстiи, от ове́цъ ше́сть со́тъ се́дмьдесятъ пя́ть ты́сящъ,

и воло́въ се́дмьдесятъ двѣ́ ты́сящы,

и осло́въ шестьдеся́тъ еди́на ты́сяща,

и ду́шъ человѣ́ческихъ от же́нска по́лу, я́же не позна́ша ло́жа му́жеска, всѣ́хъ ду́шъ три́десять двѣ́ ты́сящы:

и бы́сть полови́на ча́сть ходи́вшихъ на бра́нь, от числа́ ове́цъ три́ста три́десять се́дмь ты́сящъ и пя́ть со́тъ:

и бы́сть да́нь Го́споду от ове́цъ ше́сть со́тъ се́дмьдесятъ пя́ть:

и воло́въ три́десять ше́сть ты́сящъ, и да́нь Го́споду се́дмьдесятъ и два́:

и осло́въ три́десять ты́сящъ пя́ть со́тъ, и да́нь Го́споду шестьдеся́тъ еди́нъ:

и ду́шъ человѣ́ческихъ шестьна́десять ты́сящъ, и да́нь от си́хъ Го́споду три́десять двѣ́ души́.

И даде́ Моисе́й да́нь Го́споду, уча́стiе Бо́жiе Елеаза́ру жерцу́, я́коже повелѣ́ Госпо́дь Моисе́ю.

От полови́ны сыно́въ Изра́илевыхъ, и́хже раздѣли́ Моисе́й от муже́й вое́нныхъ:

и бы́сть полови́на от со́нма, от ове́цъ три́ста и три́десять се́дмь ты́сящъ и пя́ть со́тъ:

и воло́въ три́десять ше́сть ты́сящъ:

осло́въ три́десять ты́сящъ и пя́ть со́тъ:

и человѣ́чихъ ду́шъ шестьна́десять ты́сящъ:

и взя́ Моисе́й от полови́ны сыно́въ Изра́илевыхъ, еди́но от пяти́десяти, от человѣ́къ и от ското́въ, и даде́ я́ леви́томъ стрегу́щымъ стражбы́ ски́нiи Госпо́дни, я́коже повелѣ́ Госпо́дь Моисе́ю.

И прiидо́ша къ Моисе́ю вси́ поста́вленнiи надъ ты́сящами си́лы, тысященача́лники и стонача́лники,

и реко́ша къ Моисе́ю: о́троцы твои́ взя́ша сочте́нiе от муже́й вои́нскихъ, и́же су́ть у на́съ, и никто́же поги́бе от ни́хъ:

и принесо́хомъ да́ръ Го́споду, му́жъ е́же обрѣ́те, сосу́дъ зла́тъ и обру́чiе, и гри́вну и пе́рстень, и усеря́зи и че́пь злату́ю, умоли́ти о на́съ предъ Го́сподемъ.

И взя́ Моисе́й и Елеаза́ръ жре́цъ зла́то от ни́хъ, вся́къ сосу́дъ содѣ́ланъ.

И бы́сть всего́ зла́та уча́стiе, е́же отлучи́ся Го́споду, шестьна́десять ты́сящъ и се́дмь со́тъ и пятьдеся́тъ Си́кль от тысященача́лниковъ и от стонача́лниковъ.

И му́жи во́инстiи плѣни́ша кі́йждо себѣ́.

И взя́ша Моисе́й и Елеаза́ръ жре́цъ зла́то от тысященача́лниковъ и от стонача́лниковъ и внесо́ша е́ въ ски́нiю свидѣ́нiя, въ па́мять сыно́въ Изра́илевыхъ предъ Го́сподемъ.