И сі́и ста́нове сыно́въ Изра́илевыхъ, егда́ изыдо́ша изъ земли́ Еги́петскiя съ си́лою свое́ю руко́ю Моисе́овою и Ааро́нею.
И написа́ Моисе́й воздвиже́нiя и́хъ и ста́ны и́хъ, по словеси́ Госпо́дню. И сі́и ста́нове ше́ствiя и́хъ:
воздвиго́шася от Рамессы́ въ ме́сяцъ пе́рвый, въ пятыйна́десять де́нь пе́рваго ме́сяца: нау́трiе па́схи изыдо́ша сы́нове Изра́илтестiи руко́ю высо́кою предъ всѣ́ми Еги́птяны:
и Еги́птяне погреба́ху уме́ршыя от ни́хъ вся́, я́же изби́ Госпо́дь вся́каго пе́рвенца въ земли́ Еги́петстѣй: и въ бозѣ́хъ и́хъ сотвори́ отмще́нiе Госпо́дь.
И воздви́гшеся сы́нове Изра́илевы от Рамессы́, ополчи́шася въ сокхо́ѳѣ:
и воздви́гшеся от сокхо́ѳа, ополчи́шася въ вуѳа́нѣ, и́же е́сть ча́сть нѣ́кая пусты́ни:
и воздвиго́шася от вуѳа́на, и ополчи́шася во у́стiи Иро́ѳа, и́же е́сть пря́мо веельсепфо́ну, и ополчи́шася пря́мо Магдо́лу:
и воздвиго́шася пря́мо Иро́ѳу, и проидо́ша среди́ мо́ря въ пусты́ню: и идо́ша путе́мъ три́ дни́ въ пусты́ни ті́и, и ополчи́шася въ го́рькостехъ.
И воздвиго́шася от го́рькостей и прiидо́ша въ Ели́мъ: и въ Ели́мѣ [бы́ша] двана́десять исто́чники во́дъ, и се́дмьдесятъ сте́блiй фи́никовъ, и ополчи́шася у воды́ та́мо.
И воздвиго́шася от Ели́ма и ополчи́шася у мо́ря чермна́го:
и воздвиго́шася от мо́ря чермна́го и ополчи́шася въ пусты́ни Си́нъ:
и воздвиго́шася от пусты́ни Си́нъ и ополчи́шася въ Рафа́кѣ:
и воздвиго́шася от Рафа́ка и ополчи́шася въ Елу́сѣ:
и воздвиго́шася от Елу́са и ополчи́шася въ Рафиди́нѣ: и не бы́сть та́мо воды́ лю́демъ пи́ти.
И воздвиго́шася от Рафиди́на и ополчи́шася въ пусты́ни Сина́:
и воздвиго́шася от пусты́ни Сина́ и ополчи́шася во гробѣ́хъ похотѣ́нiя:
и воздвиго́шася от гробо́въ похотѣ́нiя и ополчи́шася во Асиро́ѳѣ:
и воздвиго́шася от Асиро́ѳа и ополчи́шася въ раѳа́мѣ:
и воздвиго́шася от раѳа́ма и ополчи́шася въ ремно́нъ-фаре́сѣ:
и воздвиго́шася от ремно́нъ-фаре́са и ополчи́шася въ лемво́нѣ:
и воздвиго́шася от лемво́на и ополчи́шася въ ресса́нѣ:
и воздвиго́шася от ресса́на и ополчи́шася въ макелла́ѳѣ:
и воздвиго́шася от макелла́ѳа и ополчи́шася во Арсафа́ѳѣ:
и воздвиго́шася от Арсафа́ѳа горы́ и ополчи́шася въ Харада́ѳѣ:
и воздвиго́шася от Харада́ѳа и ополчи́шася въ макидо́ѳѣ:
и воздвиго́шася от макидо́ѳа и ополчи́шася въ катаа́ѳѣ:
и воздвиго́шася от катаа́ѳа и ополчи́шася во Ѳара́ѳѣ:
и воздвиго́шася от Ѳара́ѳа и ополчи́шася въ маѳе́ккѣ:
и воздвиго́шася от маѳе́кка и ополчи́шася во Аселмо́нѣ:
и воздвиго́шася от Аселмо́на и ополчи́шася въ Масуру́ѳѣ:
и воздвиго́шася от Масуру́ѳа и ополчи́шася въ ванакка́нѣ:
и воздвиго́шася от ванакка́на и ополчи́шася въ горѣ́ гадда́дъ:
и воздвиго́шася от горы́ гадда́дъ и ополчи́шася во етева́ѳѣ:
и воздвиго́шася от етева́ѳа и ополчи́шася во евро́нѣ:
и воздвиго́шася от евро́на и ополчи́шася въ гесiо́нъ-га́верѣ:
и воздвиго́шася от гесiо́нъ-га́вера и ополчи́шася въ пусты́ни Си́нъ: и воздвиго́шася от пусты́ни Си́нъ и ополчи́шася въ пусты́ни Фара́ни, я́же е́сть Ка́дисъ:
и воздвиго́шася от Ка́диса и ополчи́шася въ горѣ́ о́ръ бли́зъ земли́ Едо́мли.
И взы́де Ааро́нъ жре́цъ на го́ру о́ръ повелѣ́нiемъ Госпо́днимъ, и у́мре та́мо въ четыредеся́тое лѣ́то изше́ствiя сыно́въ Изра́илевыхъ изъ земли́ Еги́петскiя, ме́сяца пя́таго въ пе́рвый де́нь ме́сяца.
И Ааро́нъ бя́ше ста́ два́десяти тре́хъ лѣ́тъ, егда́ у́мре въ горѣ́ о́ръ.
И услы́ша Ханане́й ца́рь Ара́дскiй, и се́й живя́ше въ земли́ Ханаа́ни, егда́ вхожда́ху сы́нове Изра́илевы.
И воздвиго́шася от горы́ о́ръ и ополчи́шася въ селмо́нѣ:
и воздвиго́шася от селмо́на и ополчи́шася въ Фино́нѣ:
и воздвиго́шася от Фино́на и ополчи́шася во ово́ѳѣ:
и воздвиго́шася от ово́ѳа и ополчи́шася въ гаи́, объ ону́ страну́ предѣ́лъ Моа́влихъ:
и воздвиго́шася от гаи́ и ополчи́шася въ Дево́нъ-га́дѣ:
и воздвиго́шася от Дево́нъ-га́да и ополчи́шася въ гелмо́нъ-девлаѳаи́мѣ:
и воздвиго́шася от гелмо́нъ-девлаѳаи́ма и ополчи́шася въ гора́хъ Авари́млихъ пря́мо Нава́ву:
и воздвиго́шася от го́ръ Авари́млихъ и ополчи́шася на за́падѣ Моа́вли, у Иорда́на при иерихо́нѣ:
и воздвиго́шася от за́пада Моа́вля и ополчи́шася у Иорда́на, между́ есимо́ѳомъ, до велсатти́ма на за́пады Моа́ва.
И рече́ Госпо́дь къ Моисе́ю въ за́падѣ Моа́ва у Иорда́на при иерихо́нѣ, глаго́ля:
глаго́ли сыно́мъ Изра́илевымъ и рече́ши къ ни́мъ: вы́ прехо́дите Иорда́нъ въ зе́млю Ханаа́ню,
и погуби́те вся́ живу́щыя на земли́ от лица́ ва́шего, и разруши́те стражбы́ и́хъ, и вся́ и́долы излiя́нныя и́хъ сокруши́те я́, и вся́ ка́пища и́хъ разруши́те,
и погуби́те вся́ живу́щыя на земли́, и всели́теся въ ню́: ва́мъ бо да́хъ зе́млю и́хъ по жре́бiю:
и наслѣ́дите зе́млю и́хъ жре́бiемъ по племена́мъ ва́шымъ: мно́гимъ умно́жите одержа́нiе и́хъ, и ма́лымъ ума́лите одержа́нiе и́хъ: въ не́же изы́детъ и́мя его́, та́мо да бу́детъ жре́бiй его́: по племена́мъ оте́чествiй ва́шихъ наслѣ́дите:
а́ще же не погубите́ живу́щихъ на земли́ от лица́ ва́шего, бу́дутъ, и́хже оста́вите от ни́хъ, остны́ во очесѣ́хъ ва́шихъ и стрѣ́лы въ ре́брахъ ва́шихъ, и совражду́ютъ ва́мъ на земли́, на не́йже вы́ вселите́ся:
и бу́детъ я́коже умы́слихъ сотвори́ти о́нѣмъ, то́ сотворю́ ва́мъ.
