и та́ко ше́сть со́тъ ты́сящъ пѣшце́въ, соше́дшихся въ жестосе́рдiи свое́мъ. И а́ще бу́детъ еди́нъ жестоковы́йный въ лю́дехъ, ди́вно е́сть сiе́, а́ще непови́ненъ бу́детъ.

Ми́лость бо и гнѣ́въ у него́, си́ленъ умоле́нъ бы́ти и излiя́ти гнѣ́въ.

По мно́зѣй ми́лости его́, та́ко мно́го и обличе́нiе его́: му́жеви по дѣло́мъ его́ су́дитъ.

Не убѣжи́тъ хище́нiемъ грѣ́шный, и терпѣ́нiе благовѣ́рнаго не лише́но бу́детъ.

Вся́цѣй ми́лостыни сотвори́тъ мѣ́сто: кі́йждо бо по дѣло́мъ свои́мъ обря́щетъ.

Не рцы́, я́ко от Го́спода скры́юся, еда́ свы́ше кто́ мя помяне́тъ?

въ лю́дехъ мно́жайшихъ не воспомяне́нъ бу́ду, что́ бо е́сть душа́ моя́ въ безчи́сленнѣй тва́ри?

се́, небо и небо небесе́ Бо́жiя, бе́здна и земля́ посѣще́нiемъ его́ подви́гнутся:

вку́пѣ го́ры и основа́нiя земли́, егда́ воззри́тъ на ня́, тре́петомъ стрясу́тся,

и о си́хъ не размы́слитъ се́рдце:

и пути́ его́ кто́ пости́гнетъ? и бу́рю ю́же не у́зритъ человѣ́къ, мно́жайшая же дѣ́лъ его́ въ сокрове́нныхъ:

дѣла́ пра́вды его́ кто́ возвѣсти́тъ? или́ кто́ стерпи́тъ? дале́че бо завѣ́тъ.

Умаля́яйся се́рдцемъ размышля́етъ сiя́, а му́жъ безу́менъ и заблужда́яй размышля́етъ бу́яя.

Послу́шай мене́, ча́до, и научи́ся вѣ́дѣнiя, и на словеса́ моя́ внима́й се́рдцемъ твои́мъ:

изъявля́ю въ мѣ́рилѣ наказа́нiе и со испыта́нiемъ возвѣщу́ вѣ́дѣнiе.

Судо́мъ Госпо́днимъ дѣла́ его́ изъ нача́ла, и от сотворе́нiя его́ раздѣли́ ча́сти и́хъ:

украси́ во вѣ́къ дѣла́ своя́, и нача́ла и́хъ въ ро́ды и́хъ: ниже́ взалка́ша, ниже́ утруди́шася, и не преста́ша от дѣ́лъ свои́хъ.

Кі́йждо и́скренняго своего́ не оскорби́,

и да́же до вѣ́ка не воспроти́вятся глаго́лу его́.

И по си́хъ Госпо́дь на зе́млю призрѣ́ и испо́лни ю́ от бла́гъ свои́хъ:

душа́ вся́каго живо́тна покры́ лице́ ея́, и въ ню́ возвраще́нiе и́хъ.

Глава: