Скрыть
20:2
20:3
20:5
20:6
20:10
20:12
20:14
20:17
20:18
20:19
20:21
20:22
20:23
20:24
20:25
20:26
20:31
Ко́ль добро́ е́сть обличи́ти, не́жели яри́тися та́йно: и исповѣ́даяйся от­ умале́нiя воз­бране́нъ бу́детъ.
Ко́ль добро́ обличе́н­ному яви́ти покая́нiе:
се́й бо во́льнаго избѣжи́тъ грѣха́.
Жела́нiе ско́пчо растли́тъ ли дѣви́цу? та́кожде творя́й ну́ждею суды́.
Е́сть молча́й обрѣта́яйся прему́дръ, и е́сть ненави́димь от­ мно́гiя бесѣ́ды.
Е́сть молча́й, не и́мать бо от­вѣ́та: и е́сть молча́й вѣ́дый вре́мя.
Человѣ́къ прему́дръ умолчи́тъ до вре́мене: проде́рзый же и безу́мный превосхо́дитъ вре́мя.
Умножа́яй словеса́ ме́рзокъ бу́детъ, и восхища́яй вла́сть воз­ненави́дѣнъ бу́детъ.
Е́сть благопоспѣ́ш­ст­во во злы́хъ му́жеви, и е́сть изобрѣ́тенiе на умале́нiе.
Е́сть дая́нiе, е́же ти́ не бу́детъ на по́льзу, и е́сть дая́нiе, его́же от­да́нiе сугу́бо.
Е́сть умале́нiе сла́вы ра́ди, и е́сть, и́же от­ смире́нiя воз­несе́ главу́.
Е́сть купу́яй мно́гая ма́лымъ и воз­враща́яй я́ седмери́цею.
Прему́дрый во словеси́ любе́зна сотвори́тъ себе́: благода́ти же безу́мныхъ излiю́т­ся.
Дая́нiе безу́мнаго не упо́льзуетъ ти́, о́чи бо его́ вмѣ́сто еди́наго мно́зи ко воспрiя́тiю:
ма́ло да́стъ, а мно́го поноси́ти бу́детъ и от­ве́рзетъ уста́ своя́ я́ко проповѣ́дникъ: дне́сь взаи́мъ да́стъ, а у́тро истя́жетъ: ненави́димь человѣ́къ таковы́й Го́споду и человѣ́комъ.
Бу́й рече́тъ: нѣ́сть ми́ дру́га и нѣ́сть хвалы́ благи́мъ мо­и́мъ: яду́щiи хлѣ́бъ мо́й льсти́ви язы́комъ.
Коли́кощи и коли́цы посмѣю́т­ся ему́?
Поползнове́нiе на земли́ лу́чше не́же от­ язы́ка: та́ко паде́нiе злы́хъ со тща́нiемъ прiи́детъ.
Человѣ́къ безблагода́тенъ ба́снь безвре́мен­на: во устѣ́хъ ненака́зан­ныхъ при́сно бу́детъ.
От у́стъ бу́яго от­ве́ржена бу́детъ при́тча: не и́мать бо ея́ рещи́ во вре́мя свое́.
Е́сть воз­браня́емый согрѣша́ти от­ ску́дости, и въ поко́и сво­е́мъ не умили́т­ся.
Е́сть погубля́яй ду́шу свою́ за сты́дъ, и от­ лица́ безу́мна погуби́тъ ю́.
Е́сть ра́ди стыда́ обѣща́яйся дру́гови, и при­­обрѣ́те его́ врага́ ту́не.
Поро́къ зо́лъ человѣ́ку лжа́, и во устѣ́хъ ненака́зан­ныхъ при́сно бу́детъ.
У́не е́сть та́ть, не́жели при́сно лжа́й: о́ба же па́губу наслѣ́дятъ.
Обы́чай человѣ́ка лжи́ва безче́стiе, и сту́дъ его́ при́сно съ ни́мъ.
Прему́дрый словесы́ про­изведе́тъ себе́, и человѣ́къ му́дрый уго́денъ бу́детъ вельмо́жамъ.
Дѣ́лаяй зе́млю воз­несе́тъ сто́гъ сво́й, и угожда́яй вельмо́жамъ уми́лостивитъ о непра́вдѣ [сво­е́й].
Мзда́ и да́рове ослѣпля́ютъ о́чи прему́дрыхъ, и я́коже бразды́ на устѣ́хъ от­враща́ютъ обличе́нiя.
Прему́дрость сокрове́на и сокро́вище не явле́но, ка́я по́льза е́сть во обо­и́хъ?
Лу́чше человѣ́къ скрыва́яй бу́й­ст­во свое́, не́жели человѣ́къ скрыва́яй прему́дрость свою́.
Толкования стиха Скопировать ссылку Скопировать текст Добавить в избранное
Библ. энциклопедия Библейский словарь Словарь библ. образов Практическая симфония
Цитата из Библии каждое утро
TG: t.me/azbible
Viber: vb.me/azbible