Я́ко бре́нiе скуде́льника въ руцѣ́ его́, вси́ путiе́ его́ по изволе́нiю его́: та́ко человѣ́цы въ руцѣ́ сотво́ршаго и́хъ, и́мже возда́стъ по суду́ своему́.

[Я́ко] проти́ву зло́му благо́е и проти́ву сме́рти живо́тъ, та́ко проти́ву благочести́ваго грѣ́шникъ. И си́це воззри́ во вся́ дѣла́ вы́шняго: дво́е дво́е, еди́но проти́ву еди́ному.

А́зъ же послѣ́днiй бдѣ́хъ и наслѣ́дихъ я́коже от нача́тка, я́коже собира́яй вслѣ́дъ объима́телей виногра́дныхъ.

Во благослове́нiе Госпо́дне достиго́хъ и я́ко объима́тель напо́лнихъ точи́ло.

Разсмотри́те, я́ко не себѣ́ еди́ному труди́хся, но всѣ́мъ и́щущымъ наказа́нiя.

Послу́шайте мене́, вельмо́жи люді́й, и вла́стелiе собо́ра, внуши́те.

Сы́ну и женѣ́, бра́ту и дру́гу не да́ждь вла́сти на себѣ́ въ животѣ́ свое́мъ,

и не да́ждь ино́му имѣ́нiя своего́, да не раска́ешися тре́буяй и́хъ:

до́ндеже жи́въ еси́ и дыха́нiе въ тебѣ́, не измѣни́ себе́ вся́цѣй пло́ти:

лу́чше бо е́сть, да тебѣ́ мо́лятся ча́да твоя́, не́жели тебѣ́ зрѣ́ти въ ру́цѣ ча́дъ твои́хъ.

Во всѣ́хъ дѣ́лѣхъ твои́хъ бу́ди преспѣва́я и не да́ждь поро́ка на сла́ву твою́.

Въ де́нь сконча́нiя дні́й живота́ твоего́ и во вре́мя сме́рти твоея́ раздѣли́ наслѣ́дiе твое́.

Пи́ща и же́злiе и бре́мя ослу́: хлѣ́бъ и наказа́нiе и дѣ́ло рабу́.

Накажи́ раба́, и обря́щеши поко́й: осла́би ру́ку ему́, и иска́ти на́чнетъ свобо́ды.

И́го и реме́нь вы́ю прекланя́ютъ, и рабу́ лука́ву у́зы и ра́ны.

Вложи́ его́ въ дѣ́ло, да не пра́зденъ бу́детъ, мно́зѣй бо зло́бѣ научи́ла пра́здность:

устро́й его́ въ дѣ́лѣхъ, я́коже подоба́етъ ему́, и а́ще не послу́шаетъ, всади́ его́ во око́вы.

И не бу́ди изли́шенъ надъ вся́кою пло́тiю, и безъ суда́ не сотвори́ ничесо́же.

А́ще ти́ е́сть ра́бъ, да бу́детъ я́коже ты́, поне́же кро́вiю стяжа́лъ еси́ его́:

а́ще ти́ е́сть ра́бъ, имѣ́й его́ я́коже бра́та, поне́же я́ко души́ твоея́ востре́буеши его́:

а́ще озло́биши его́ непра́ведно, и воста́въ отбѣжи́тъ, кі́имъ путе́мъ пои́щеши его́? [не вѣ́си.]