да оскудѣ́етъ человѣ́къ и ско́ти, да оскудѣ́ютъ пти́цы небе́сныя и ры́бы морскі́я, и да изнемо́гутъ нечести́вiи, и изъиму́ беззако́нныя от лица́ земли́, глаго́летъ Госпо́дь.

И простру́ ру́ку мою́ на Иу́ду и на вся́ живу́щыя во Иерусали́мѣ: и изъиму́ от мѣ́ста сего́ имена́ Ваа́лова и имена́ жре́ческа со жерца́ми,

и покланя́ющихся на покро́вѣхъ во́инству небе́сному и клену́щихся Го́сподемъ и клену́щихся царе́мъ свои́мъ,

и укланя́ющихся от Го́спода и не и́щущихъ Го́спода и не придержа́щихся Го́спода.

Убо́йтеся от лица́ Го́спода Бо́га, зане́ бли́зъ де́нь Госпо́день, я́ко угото́ва Госпо́дь же́ртву свою́ и освяти́ зва́нныя своя́.

И бу́детъ въ де́нь же́ртвы Госпо́дни: и отмщу́ на кня́зи и на до́мъ ца́рскiй и на вся́ оболче́нныя во одѣя́нiя чужда́я,

и отмщу́ я́вѣ на вся́ предвра́тныя въ де́нь то́й, исполня́ющыя хра́мъ Го́спода Бо́га своего́ нече́стiемъ и ле́стiю.

И бу́детъ въ де́нь о́нъ, глаго́летъ Госпо́дь, гла́съ во́пля от вра́тъ избода́ющихъ и пла́чь от вторы́хъ и сотре́нiе ве́лiе от холмо́въ.

Пла́чите, живу́щiи въ посѣче́ннѣй, я́ко уподо́бишася вси́ лю́дiе Ханаа́ну, и потреби́шася вси́ велича́ющiися сребро́мъ.

И бу́детъ въ то́й де́нь, изыщу́ Иерусали́ма со свѣти́лникомъ и отмщу́ на му́жы нерадя́щыя о стражба́хъ свои́хъ, глаго́лющыя въ сердца́хъ свои́хъ: не и́мать бла́га сотвори́ти Госпо́дь, ниже́ и́мать озло́бити.

И бу́детъ си́ла и́хъ въ расхище́нiе и до́мы и́хъ въ разоре́нiе: и сози́ждутъ жили́ща и не и́мутъ пожи́ти въ ни́хъ, и насадя́тъ виногра́ды и не и́мутъ пи́ти вина́ и́хъ:

я́ко бли́зъ де́нь Госпо́день вели́кiй, бли́зъ и ско́ръ зѣло́, гла́съ дне́ Госпо́дня го́рекъ и же́стокъ учини́ся.

Си́ленъ де́нь гнѣ́ва де́нь то́й, де́нь ско́рби и ну́жды, де́нь безго́дiя и изчезнове́нiя, де́нь тмы́ и мра́ка, де́нь о́блака и мглы́,

де́нь трубы́ и во́пля на гра́ды тве́рдыя и на у́глы высо́кiя.

И оскорблю́ человѣ́ки, и по́йдутъ я́ко слѣ́пи, зане́ Го́сподеви прегрѣши́ша, и излiе́тся кро́вь и́хъ я́ко пе́рсть, и пло́ти и́хъ я́ко ла́йна:

и сребро́ и́хъ и зла́то и́хъ не возмо́жетъ изъя́ти и́хъ въ де́нь гнѣ́ва Госпо́дня, и огне́мъ рве́нiя его́ пояде́на бу́детъ вся́ земля́: зане́ сконча́нiе и тща́нiе сотвори́тъ на вся́ живу́щыя на земли́.