Православное Богослужение
Переводы Богослужебных книг

 

Главная \ Церковь \ Богослужения \ Переводы богослужебных книг \ Праздничная минея\ Служба Погребенiя Божiей Матери


 

Мѣ́сяца А́вгуста въ 17-й де́нь.

ПОХВАЛЫ,
ИЛИ́ СВЯЩЕ́ННОЕ ПОСЛѢ́ДОВАНІЕ
НА СВЯТО́Е ПРЕСТАВЛЕ́НІЕ
ПРЕСВЯТЫ́Я ВЛАДЫ́ЧИЦЫ НА́ШЕЯ
БОГОРО́ДИЦЫ И ПРИСНОДѢ́ВЫ МАРíИ,
ПОЕ́МОЕ ВЪ СЕДЬМЫ́Й НА́ДЕСЯТЬ ДЕ́НЬ
МѢ́СЯЦА АВГУСТА, КАЖДОГО́ДНО
ВЪ СКИ́ТѢ ГЕѲСИМА́НІИ.

Изъ книгъ намѣстника Троицко-Сергіевой Лавры архим. Антонія (Медведева) [Служба на Успение Богоматери в Гефсиманскомъ ските. Рукопись № 290 XIX в. (не ранее 1846) из собрания Свято-Троицкой Сергиевой Лавры («Дополнительная библиотека»)]

НА ВЕЛИЦѢЙ ВЕЧЕРНИ

Стихосло́вимъ Блаже́нъ му́жъ, 1-й антифо́нъ. На Го́споди воззва́хъ, ста́вимъ стихо́въ 8, и пое́мъ стихи́ры пра́здника, гла́съ 1:

Сти́хъ: Изъ глубины́ воззва́хъ къ Тебѣ́, Го́споди: Го́споди, услы́ши гла́съ мо́й.

О, ди́вное чу́до! / Исто́чникъ Жи́зни / во гро́бѣ полага́ется, / и лѣ́ствица къ небеси́ гро́бъ быва́етъ. / Весели́ся Геѳсима́ніе, / Богоро́диченъ святы́й до́ме. / Возопіе́мъ вѣ́рніи, / Гавріи́ла иму́ще чинонача́льника: / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: Да бу́дутъ у́ши Твои́ вне́млющѣ гла́су моле́нiя моего́.

Ди́вны Тво́я та́йны, Богоро́дице: / Вы́шняго престо́лъ / яви́лася eси́, Влады́чице, / и отъ земли́ къ небеси́ преста́вилася eси́ дне́сь. / Сла́ва Твоя́ боголѣ́пная, / богоподо́бными сія́ющи чудесы́. / Дѣ́вы съ Ма́терію Царе́вою, / на высоту́ вознеси́теся. / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: А́ще беззако́нiя на́зриши, Го́споди, Го́споди, кто́ постои́тъ? Я́ко у Тебе́ очище́нiе е́сть.

Твое́ сла́вятъ успе́ніе / Вла́сти и Престо́ли, / Нача́ла и Госпо́дьства, / Си́лы и Херуви́ми, и стра́шніи Серафи́ми, / ра́дуются земноро́дніи, / о Боже́ственнѣй Твое́й сла́вѣ крася́щеся, / припа́даютъ ца́ріе со Арха́нгелы и Ангелы, и воспѣва́ютъ: / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: И́мене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́: упова́ душа́ моя́ на Го́спода.

Ины стихи́ры
изъ Іерусали́мскаго послѣ́дованія, гла́съ 6:

Дне́шній де́нь та́йно / вели́кій псалмопѣ́вецъ прообразова́ше, глаго́ля: / воскресни́, Го́споди, въ поко́й Тво́й, / Ты́ и Киво́тъ святы́ни Твоея́. / И па́ки: предста́, глаго́ля, Цари́ца одесну́ю Тебе́, / ря́сны златы́ми одѣ́яна, преиспещре́на. / Сія́ бо е́сть благослове́нная суббо́та, / се́й е́сть упокое́нія Боже́ственный де́нь, / въ о́ньже почи́ отъ живота́ Ма́терь су́щи Живота́, / смотре́ніемъ е́же на сме́рть, / пло́тію суббо́тствовавшая и преста́вльшаяся, / и на небеса́ возше́дшая, / си́лою И́же изъ Нея́ вопло́щшагося Христа́ Бо́га, / и съ Ни́мъ во вѣ́ки вѣко́въ вѣ́чнующая, / и да́рующая на́мъ живо́тъ вѣ́чный, / съ любо́вію чту́щимъ свято́е Ея́ успе́ніе.

Гла́съ 2. Подо́бенъ: Егда́ отъ дре́ва.

Сти́хъ: От стра́жи у́треннiя до но́щи, от стра́жи у́треннiя да упова́етъ Изра́иль на Го́спода.

Егда́ отъ мíра, Жи́знь су́щи, / ро́ждшая Жи́знь вся́ческихъ, Сы́на Бо́жія во пло́ти, / взе́млема была́ еси́, / восходя́щи во вхо́ды боже́ственныя, небе́сныя, Чи́стая, / тогда́ чу́до сбы́сться, / е́же возгласи́ Ду́хъ Святы́й: / кто́ Сія́, ны́нѣ восходя́щая отъ пусты́ни? / Вся́ же со стра́хомъ вопія́ху: / сла́ва восхожде́нію Твоему́, Любоблага́я.

Сти́хъ: Я́ко у Го́спода ми́лость, и мно́гое у Него́ избавле́нiе: и то́й изба́витъ Изра́иля от всѣ́хъ беззако́нiй его́.

Егда́ во гро́бѣ, Маріа́мъ, / въ Геѳсима́ніи положи́лася еси́ пло́тію, / естества́ Оживотвори́тельнице, / тогда́ вся́ тва́рь, зря́щи Тя́, ужасе́ся; / Творе́цъ же ду́хъ Тво́й, ру́цѣ распросте́ръ, / благода́тнѣ прія́тъ, я́ко должни́къ Сы́нъ. / Еже Безпло́тныхъ чи́ни зря́ще, / со стра́хомъ вопія́ху: / сла́ва восхожде́нію Твоему́, Любоблага́я.

Сти́хъ: Хвали́те Го́спода, вси́ язы́цы, похвали́те Его́, вси́ лю́дiе.

Егда́ тріе́ свяще́нницы, / Ареопаги́тъ о́ный и Іероѳе́й съ Тимоѳе́емъ, / Твое́ боже́ственное уви́дѣша, Всенетлѣ́нная, успе́ніе, / тогда́, сле́зы точа́ще, глаго́лютъ си́це: / ка́ко стерпи́мъ страда́ніе въ мíрѣ? / Въ Тебѣ́ бо, о Дѣ́вая, / Сы́на Твоего́ мнѣ́хомъ зрѣ́ти и утѣша́хомся.

Гла́съ 5. Сти́хъ: Я́ко утверди́ся ми́лость Его́ на на́съ, и и́стина Госпо́дня пребыва́етъ во вѣ́къ.

Тебе́, одѣ́ющагося свѣ́томъ, я́ко ри́зою, / Сы́на Бо́жія ро́ждшую, / ли́къ учени́къ Его́ ви́дѣвъ ме́ртву, / во гро́бѣ, мра́ка испо́лненномъ, просте́рту, / благосе́рдный пла́чь воспріи́мъ, рыда́я, глаго́лаше: / увы́ мнѣ́, сладча́йшая Маріа́мъ, / Ю́же въ ма́лѣ имѣ́хъ утѣше́ніе, / и ви́дя Тебе́ мнѣ́хъ, Учи́теля моего́ зрѣ́ти, / но се́, ны́нѣ ви́жду Тя́ / по зако́ну естества́ подъе́мшу сме́рть. / О, ка́ко Тя́ погребу́, Дѣ́во, / или́ ка́ко плащани́цами обвію́? / Кíими же рука́ма прикосну́ся нетлѣ́нному Твоему́ тѣ́лу? / Или́ кíя пѣ́сни воспою́, Твоему́ исхо́ду досто́йныя? / Ка́ко же стерплю́, Госпоже́, / Твое́, ско́рбное ми, отше́ствіе? / Или́ ка́ко безтру́дно понесу́ всетя́жкое сиротство́? / Недоумѣва́ю, блаже́нная Богоро́дице Марíе, / и болѣ́зненнымъ се́рдцемъ соплета́ю пѣснопѣ́нія, / и велича́ю Тя́, Влады́чице, / пѣсносло́влю зача́тіе Твое́, / почита́ю Твое́ боже́ственное рождество́, / чту́ восхожде́ніе Твое́, Дѣ́во. / Ублажа́ю же успе́ніе Твое́ / и всесвято́е погребе́ніе Твое́ со преставле́ніемъ, зовы́й: / Го́споди, сла́ва Тебѣ́.

Сла́ва, и ны́нѣ, гла́съ 1: Богонача́льнымъ манове́ніемъ, / отвсю́ду Богоно́сніи апо́столи, / о́блаки высо́цѣ взима́еми, / доше́дше пречи́стаго и живонача́льнаго Твоего́ тѣ́ла, / любе́зно лобыза́ху. / Превы́шнія же небе́сныя си́лы, / съ свои́мъ Влады́кою прише́дше, / богопрія́тное и пречи́стое тѣ́ло предсыла́юще, / у́жасомъ одержи́ми; / прекра́сно же предъидя́ху, / и неви́димо вопія́ху превы́шнимъ чинонача́ліемъ: / се́ Всецари́ца Богоотрокови́ца пріи́де. / Возми́те врата́ и Сію́ премíрно подъими́те, / Присносу́щаго Ма́терь Свѣ́та, / Тоя́ бо ра́ди всеро́дное человѣ́комъ спасе́ніе бы́сть. / На Ню́ же взира́ти не мо́жемъ, / и То́й досто́йную че́сть возда́ти немо́щно: / Тоя́ бо преизя́щное прехо́дитъ вся́къ у́мъ. / Тѣ́мже, Пречи́стая Богоро́дице, / при́сно съ Живоно́снымъ Царе́мъ, и Рождество́мъ живу́щи, / моли́ся вы́ну сохрани́ти и спасти́, / отъ вся́каго прило́га проти́внаго, / но́выя лю́ди Твоя́: / Твое́ бо предста́тельство стяжа́хомъ, / во вѣ́ки свѣтоявле́нно блажа́ще.

Вхо́дъ.

Проки́менъ, гла́съ 2:

Воскресни́, Го́споди, въ поко́й Тво́й, / Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною и не отве́ржется ея́.

Чте́нія три́:

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и А́нгели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Я́ко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому – ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости – стра́хъ Госпо́день, и совѣ́тъ святы́хъ – ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, самогла́сны, гла́съ 1.

Подоба́ше самови́дцамъ Сло́ва и слуга́мъ, / и е́же по пло́ти Ма́тере Его́ успе́ніе ви́дѣти, / коне́чное ели́ко на Не́й та́инство, / я́ко да не то́кмо е́же отъ земли́ Спа́сово восхожде́ніе у́зрятъ, / но и Ро́ждшія Его́ преставле́нію свидѣ́тельствуютъ. / Тѣ́мже, отвсю́ду Боже́ственною си́лою собра́вшеся, / Сіо́на достиго́ша, / и на не́бо иду́щую предсыла́ху, вы́шшую Херуви́мъ, / Ейже и мы́ съ ни́ми покланя́емся, / я́ко моля́щейся о душа́хъ на́шихъ.

Гла́съ 2. Анато́ліево:

Я́же небе́съ вы́шшая су́щи, / и херуви́мъ сла́внѣйшая, / и всея́ тва́ри честнѣ́йшая, / я́же премно́гія ра́ди чистоты́, / Присносу́щнаго Существа́ прія́телище бы́вши, / въ Сыно́внѣ ру́цѣ дне́сь всесвяту́ю предае́тъ ду́шу, / и съ Не́ю исполня́ются вся́ческая ра́дости, / и на́мъ да́руетъ ве́лію ми́лость.

Іоа́нново:

Всенепоро́чная Невѣ́ста / и Ма́ти Благоволе́нія Отча, / Я́же Бо́гу пронарече́нная, / во Свое́ Ему́ жили́ще, несли́тнаго соедине́нія, / дне́сь пречи́стую ду́шу Творцу́ и Бо́гу предае́тъ, / Ю́же безпло́тныхъ си́лы боголѣ́пно подъе́млютъ, / и къ животу́ преставля́ется, / су́щая Ма́ти Живота́, / Свѣща́ непристу́пнаго Свѣ́та, / спасе́ніе вѣ́рныхъ, / и упова́ніе ду́шъ на́шихъ.

Гла́съ 3. Ге́рманово:

Пріиди́те, вси́ концы́ земнíи, / честно́е преставле́ніе Богома́тере восхва́лимъ: / въ ру́цѣ бо Сы́на ду́шу непоро́чную положи́. / Тѣ́мже святы́мъ успе́ніемъ Ея́ мíръ оживотвори́ся, / во псалмѣ́хъ, и пѣ́ніихъ и пѣ́снехъ духо́вныхъ, / со безпло́тными и апо́столы пра́зднуетъ свѣ́тло.

Сла́ва, гла́съ 5: Ѳеофа́ново: Пріиди́те, празднолю́бныхъ собо́ръ, / пріиди́те, и ли́къ соста́вимъ, / пріиди́те, вѣнча́емъ / пѣ́сньми Це́рковь, / упокое́ніемъ Ковче́га Бо́жія. / Дне́сь бо не́бо простира́етъ нѣ́дра, / пріе́мля Ро́ждшую всѣ́ми Невмѣсти́маго, / и земля́, исто́чникъ жи́зни, отдаю́щи благослове́ніе, / украша́ется благолѣ́піемъ. / А́нгели ли́къ составля́ютъ со апо́столы, / ужа́сно взира́юще / отъ живота́ въ живо́тъ преставля́ему, / Ро́ждшую Нача́льника жи́зни. / Вси́ поклони́мся Ей́, моля́щеся: / сро́дна присвое́нія не забу́ди, Влады́чице, / вѣ́рно пра́зднующихъ всесвято́е Твое́ успе́ніе.

И ны́нѣ, гла́съ то́йже: Воспо́йте, лю́діе, / Ма́тери Бо́га на́шего, воспо́йте: / дне́сь бо всесвѣ́тлую ду́шу Свою́ въ пречи́стыя дла́ни, / И́же изъ Нея́ Вопло́щшагося безъ сѣ́мене предае́тъ, / Его́же и мо́литъ непреста́нно, / дарова́ти вселе́ннѣй ми́ръ, и ве́лію ми́лость.

На стихо́внѣ стихи́ры
самогла́сны, гла́съ 4:

Пріиди́те, воспое́мъ, лю́діе, / Пресвяту́ю Дѣ́ву Чи́стую, / изъ Нея́же неизрече́нно про́йде, / вопло́щся, Сло́во Отчее, / зову́ще и глаго́люще: / благослове́нна Ты́ въ жена́хъ, / блаже́нное чре́во, вмѣсти́вшее Христа́. / Того́ святы́мъ рука́мъ ду́шу преда́вши, / моли́ся, Пречи́стая, / спасти́ся душа́мъ на́шимъ.

Сти́хъ: Воскресни́, Го́споди, въ поко́й Тво́й, / Ты́ и Киво́тъ святы́ни Твоея́.

Дави́дскую пѣ́снь дне́сь, лю́діе, воспое́мъ Христу́ Бо́гу: / приведу́тся, рече́, Царю́ дѣ́вы въ слѣ́дъ Ея́, / и и́скренняя Ея́ приведу́тся въ весе́ліи и ра́дованіи. / Ибо отъ сѣ́мене Дави́дова, / Ея́же ра́ди мы́ обожи́хомся, / въ ру́цѣ Своего́ Сы́на и Влады́ки, / сла́вно и па́че сло́ва прелага́ется, / Ю́же, я́ко Ма́терь Бо́жію, воспѣва́юще, / вопіе́мъ и глаго́лемъ: / спаси́ на́съ, исповѣ́дающихъ Тя́, Богоро́дицу, / отъ вся́каго обстоя́нія, / и изба́ви отъ бѣ́дъ ду́ши на́ша.

Сти́хъ: Кля́тся Госпо́дь Дави́ду и́стиною, / и не отве́ржется eя́.

Всечестно́е Твое́ успе́ніе, / Пресвята́я Дѣ́ва Чи́стая, / А́нгелъ мно́жества на небеси́, / и человѣ́ческій ро́дъ на земли́, ублажа́емъ, / я́ко Ма́ти была́ еси́ Творца́ всѣ́хъ, Христа́ Бо́га, / Того́ моля́щи не преста́й о на́съ, мо́лимся, / и́же на Тя́ съ Бо́гомъ упова́ніе поло́жшихъ, / Богоро́дице Всепѣ́тая и Неискусобра́чная.

Сла́ва, и ны́нѣ, гла́съ то́йже: Егда́ изшла́ еси́, Богоро́дице Дѣ́во, / ко изъ Тебе́ Ро́ждшемуся неизрече́нно, / бя́ше Іа́ковъ, бра́тъ Бо́жій и пе́рвый священнонача́льникъ, / Пе́тръ же, честнѣ́йшій верхо́вникъ, / богосло́вовъ нача́льникъ, / и ве́сь боже́ственный апо́стольскій ли́къ, / явле́ннымъ богосло́віемъ пѣсносло́вяще, / Боже́ственное и стра́шное Христа́ Бо́га смотре́нія та́инство, / и живонача́льное и богопрія́тное Твое́ тѣ́ло погре́бше, / ра́довахуся, Всепѣ́тая. / Превы́ше же пресвяты́я и старѣ́йшія а́нгельскія си́лы, / чудеси́ дивя́щеся, / прини́кше дру́гъ ко дру́гу глаго́лаху: / возми́те ваша́ врата́, / и воспріими́те Ро́ждшую небесе́ и земли́ Творца́, / славословле́нми же воспое́мъ честно́е и свято́е тѣ́ло, / вмѣсти́вшее на́ми Неви́димаго и Го́спода. / Тѣ́мже и мы́, па́мять Твою́ пра́зднующе, / вопіе́мъ Ти́, Препѣ́тая: / христіа́нскій ро́гъ вознеси́, и спаси́ ду́ши на́ша.

На благослове́ніи хлѣ́бовъ
тропа́рь, гла́съ 1:

Въ рождествѣ́ дѣ́вство сохрани́ла eси́, / во успе́ніи мíра не оста́вила eси́, Богоро́дице, / преста́вилася eси́ къ животу́, Ма́ти су́щи Живота́, / и моли́твами Твои́ми избавля́еши отъ сме́рти ду́ши на́ша. [Три́жды.]

И быва́етъ благослове́ніе хлѣ́бовъ и раздробле́ніе, и, а́ще изво́литъ настоя́тель, чре́зъ діа́коновъ дае́тъ все́й це́ркви.

По возгла́сѣ: Благослове́ніе Госпо́дне на ва́съ.., быва́етъ чте́ніе о Успе́ніи Пресвяты́я Влады́чицы на́шея Богоро́дицы, и а́ще изво́литъ настоя́тель, съ нѣ́кіимъ сокраще́ніемъ, да въ мѣ́ру бу́детъ слу́жба.

НА УТРЕНИ.

По шестопса́лміи и по вели́цѣй ектеніи́ поставля́ется посредѣ́ це́ркве укра́шенный анало́гій, и пѣва́ему: Бо́гъ Госпо́дь и яви́ся на́мъ, исхо́дитъ отъ алтаря́ предстоя́тель, неся́ о́бразъ Успе́нія Пресвяты́я Богоро́дицы, послѣ́дуютъ же ему́ свяще́нницы въ облаче́ніи, и полага́ется о́бразъ на анало́гіи, и раздае́тъ предстоя́тель свѣщи́ бра́тіи, и благословля́етъ діа́кономъ и пономаре́мъ раздая́ти свѣщи́ та́кожде и наро́ду. И пою́тся сіи́ тропари́ изъ Іерусали́мскаго послѣ́дованія, кадя́щу предстоя́телю святы́мъ и о́бразу.

Гла́съ 2. Подо́бенъ: Благообра́зный Іо́сифъ.

Благообра́зныхъ учени́къ ли́къ ны́нѣ Боже́ственный, о Честна́я, / нескве́рное тѣ́ло Твое́ слеза́ми чи́стыми омочи́въ, я́ко арома́ты, / во гро́бѣ, че́стнѣ погреба́я, положи́, / но тридне́вно преста́вилася еси́, Влады́чице, / подаю́щи мíрови Боже́ственную ми́лость.

Сла́ва: Егда́ снизшла́ еси́ къ сме́рти, Живота́ Ма́ти безсме́ртная, / тогда́ а́дъ удиви́ся и ужасе́ся стра́шно, / егда́ же узрѣ́лася еси́ преста́вльшися на небеса́, Маріа́мъ, отъ гро́ба, / вся́ си́лы небе́сныя взыва́ху: / живоно́сная Ма́ти Живота́ на́шего, сла́ва Тебѣ́.

И ны́нѣ: Свяще́ннымъ ученико́мъ, въ Геѳсима́нію тѣ́ло Ма́тере Бо́жія нося́щимъ, / пѣ́снь, ю́же возглаша́ю, прили́чна е́сть. / Сего́ ра́ди Христа́ Ма́тери, / вои́стинну Еди́нѣй Богоотрокови́цѣ, возопíйте: / воста́ни, о Влады́чице, подаю́щи всѣ́мъ ве́лію ми́лость.

Возглаша́етъ канона́рхъ, на гла́съ 5: Благослове́нъ еси́, Го́споди, научи́ мя оправда́ніемъ Твои́мъ. И чте́тъ 1-й сти́хъ 17-я каѳи́смы: Блаже́ни непоро́чніи.

Статія́ пе́рвая.

1. Блаже́ни непоро́чніи въ пу́ть, ходя́щіи въ зако́нѣ Госпо́дни.

Жи́знь, во гро́бѣ положи́лся еси́, Христе́, / и Ма́терь Живота́ полага́ется: / стра́нное видѣ́ніе А́нгеломъ и человѣ́комъ.

2. Блаже́ни испыта́ющіи свидѣ́нія Его́, всѣ́мъ се́рдцемъ взы́щутъ Его́.

Велича́емъ Тя́, Богоро́дице Чи́стая, / и чти́мъ свято́е Твое́ успе́ніе, / и покланя́емся честно́му гро́бу Твоему́.

3. Не дѣ́лающіи бо беззако́нія въ путе́хъ Его́ ходи́ша.

Маріа́мъ, ка́ко умира́еши, Жи́знь вѣ́рныхъ? / ка́ко же гро́бъ вмѣсти́ Твое́ тѣ́ло, / вмѣсти́вшее Невмѣсти́маго всѣ́ми?

4. Ты́ заповѣ́далъ еси́ за́повѣди Твоя́ сохрани́ти зѣло́.

Небе́съ Царя́, Бо́га, ро́ждшая, / въ небе́сное Ца́рство прелага́ешися, Чи́стая, ца́рски.

5. Дабы́ испра́вилися путіе́ мои́, сохрани́ти оправда́нія Твоя́.

Отъ земли́ преста́вилася еси́ / и отъ земли́ ника́коже отлучи́лася еси́, Всесвята́я Богоро́дице, / избавля́ющи ве́сь мíръ отъ бѣ́дъ.

6. Тогда́ не постыжу́ся, внегда́ призрѣ́ти ми́ на вся́ за́повѣди Твоя́.

Вся́ земля́ сла́витъ погребе́ніе Твое́, Христе́, / и пое́тъ, Влады́ко, погреба́льная Пречи́стыя Твоея́ Ма́тери всеблагоговѣ́йно.

7. Исповѣ́мся Тебѣ́ въ пра́вости се́рдца, внегда́ научи́ти ми ся судьба́мъ пра́вды Твоея́.

А́нгели, зря́ще Тя́, Чи́стая, просте́рту ме́ртву, / Живо́тъ мíру возсія́вшую, / соужаса́ющеся, дивля́хуся.

8. Оправда́нія Твоя́ сохраню́, не оста́ви мене́ до зѣла́.

Па́ки по́сланъ бы́сть Гавріи́лъ отъ Бо́га / и Твое́ благовѣству́етъ изше́ствіе, / Пренебе́сная, Нетлѣ́нная, Чи́стая.

9. Въ чесо́мъ испра́витъ юнѣ́йшій пу́ть сво́й? внегда́ сохрани́ти словеса́ Твоя́.

Въ черто́гъ Боже́ственный, Тебе́ Невѣ́сту Бо́жію, / Жени́хъ призыва́етъ, Богоневѣ́сто, / весели́тися при́сно боголѣ́пно.

10. Всѣ́мъ се́рдцемъ мои́мъ взыска́хъ Тебе́, не отри́ни мене́ отъ за́повѣдей Твои́хъ.

До Престо́ла Бо́жія, / идѣ́же свѣ́тъ Тро́ицы стра́шный и непристу́пный, / дости́гла еси́ и почи́ла еси́, Дѣ́во, и́стинно.

11. Въ се́рдцѣ мое́мъ скры́хъ словеса́ Твоя́, я́ко да не согрѣшу́ Тебѣ́.

Преста́вльшися отъ земли́, Бо́гу предста́ла еси́, Богоро́дице, / отъ Бо́га ника́коже отлуче́на бы́вши / николи́же отъ утро́бы ма́тере.

12. Благослове́нъ еси́, Го́споди, научи́ мя оправда́ніемъ Твои́мъ.

Честно́е Твое́ тѣ́ло, Дѣ́во, / тлѣ́нія и во гро́бѣ не увѣ́дѣ, / но съ тѣ́ломъ прешла́ еси́ отъ земли́ къ небеси́.

13. Устна́ма мои́ма возвѣсти́хъ вся́ судьбы́ у́стъ Твои́хъ.

Всесвято́е Твое́ лице́, Пречи́стая, и ме́ртвое я́ко ра́й явля́шеся, / благода́тію и жи́знію ды́шущее взира́ющимъ.

14. На пути́ свидѣ́ній Твои́хъ наслади́хся, я́ко о вся́комъ бога́тствѣ.

Отъ на́съ, ча́дъ Твои́хъ, Ма́ти, / любо́вь на́шу и пѣ́снь исхо́дную пріими́, / приноси́мую изъ глубины́ души́.

15. Въ за́повѣдехъ Твои́хъ поглумлю́ся и уразумѣ́ю пути́ Твоя́.

Отве́рзи, Ма́ти, честны́я Твои́ о́чи / и на ча́дъ со́бранныхъ при́зри, / Твое́ успе́ніе сла́вящихъ че́стно.

16. Во оправда́нніихъ Твои́хъ поучу́ся, не забу́ду слове́съ Твои́хъ.

Отве́рзи уста́ и да́ждь намъ благослове́ніе, Пресвята́я Богоро́дице, / преста́вльшаяся отъ на́съ коне́чнѣ.

17. Возда́ждь рабу́ Твоему́, живи́ мя, и сохраню́ словеса́ Твоя́.

Не оста́ви на́съ ны́нѣ, си́рыхъ, Ма́ти, / отъ земли́ на не́бо ны́нѣ взе́млема, / сопребыва́ти иму́щая Сы́ну и Бо́гу.

18. Откры́й о́чи мои́, и уразумѣ́ю чудеса́ отъ зако́на Твоего́.

Окрестъ одра́ Твоего́ предстоя́ще, / те́плѣ взыва́емъ Тебѣ́, Дѣ́во: / поми́луй, Всесвята́я, спаси́ всѣ́хъ вѣ́рныхъ.

19. Пришле́цъ а́зъ е́смь на земли́, не скры́й отъ мене́ за́повѣди Твоя́.

Пріиди́ ны́нѣ, Анно, ста́ни съ на́ми, / нача́льствующи во пра́зднествѣ твоея́ / Святы́я Дще́ре, Богома́тере.

20. Возлюби́ душа́ моя́ возжела́ти судьбы́ Твоя́ на вся́кое вре́мя.

Пріиди́те, дади́мъ сла́ву и хвалу́ Бо́гу, / призва́вшему Сію́ во Свята́я, / я́ко Святу́ю, святы́хъ бо́льшую.

21. Запрети́лъ еси́ го́рдымъ, про́кляти уклоня́ющіися отъ за́повѣдей Твои́хъ.

Ны́нѣ прія́тъ не́бо пресла́вно Цари́цу вселе́нныя и весели́тся, / ца́рствующую зря́ съ Бо́гомъ.

22. Отъими́ отъ мене́ поно́съ и уничиже́ніе, я́ко свидѣ́ній Твои́хъ взыска́хъ.

Бо́гъ сла́вы, Сы́нъ Тво́й, Чи́стая, / со сла́вою, я́ко Ма́терь, прія́тъ Тя́ / и посади́ одесну́ю Себе́.

23. Ибо сѣдо́ша кня́зи и на мя́ клевета́ху, ра́бъ же Тво́й глумля́шеся во оправда́ніихъ Твои́хъ.

Облече́нна и преукра́шенна благода́тію, / ны́нѣ предста́ла еси́ Бо́гу, / я́ко Цари́ца и Ма́ти Бо́жія.

24. Ибо свидѣ́нія Твоя́ поуче́ніе мое́ е́сть, и совѣ́ти мои́ оправда́нія Твоя́.

А́нгели, Дѣ́во, служа́ху на земли́, / А́нгели и ны́нѣ на небесѣ́хъ предстоя́тъ Тебѣ́ раболѣ́пно.

25. Прильпе́ земли́ душа́ моя́, живи́ мя по словеси́ Твоему́.

А́нгельская во́инства, слетѣ́вше, / со стра́хомъ обстоя́ху, / Твое́, Честна́я Влады́чице, преставле́ніе зря́ще.

26. Пути́ моя́ возвѣсти́хъ, и услы́шалъ мя́ еси́, научи́ мя оправда́ніемъ Твои́мъ.

И ны́нѣ у́мныя си́лы, мы́сленно съ на́ми предстоя́ще, пою́тъ, / преставле́ніе сла́вяще Твое́.

27. Пу́ть оправда́ній Твои́хъ вразуми́ ми, и поглумлю́ся въ чудесѣ́хъ Твои́хъ.

Отъ коне́цъ пріидо́ша ученицы́ Христо́вы, / послужи́ти погребе́нію Твоему́, Влады́чице, / и воспѣ́ти Твое́ успе́ніе, Чи́стая.

28. Воздрема́ душа́ моя́ отъ уны́нія, утверди́ мя въ словесѣ́хъ Твои́хъ.

Христо́съ Бо́гъ, Дѣ́во, Ангелы Своя́ / и Боже́ственныя апо́столы посла́ на погребе́ніе Ма́тере сынолѣ́пно.

29. Пу́ть непра́вды отста́ви отъ мене́ и зако́номъ Твои́мъ поми́луй мя́.

Всѣ́ ду́ши святы́хъ пра́отецъ, и проро́къ, и пра́ведникъ снидо́шася, / исхо́дную принося́ще пѣ́снь.

30. Пу́ть и́стины изво́лихъ и судьбы́ Твоя́ не забы́хъ.

Тебе́, Богоро́дице Чи́стая, живу́щую и ны́нѣ по сме́рти, / сла́витъ все́ мно́жество небе́сныхъ и земны́хъ.

31. Прилѣпи́хся свидѣ́ніемъ Твои́мъ, Го́споди, не посрами́ мене́.

Живе́ши и по сме́рти, Живопріе́мный Исто́чниче, / отъ живота́ бо къ животу́ прешла́ еси́, / я́ко ро́ждшая Присноживо́тный Живо́тъ.

32. Пу́ть за́повѣдей Твои́хъ теко́хъ, егда́ разшири́лъ еси́ се́рдце мое́.

Аще и умира́еши, Дѣ́во, ны́нѣ по подо́бію на́шему, / но всѣ́хъ Цари́ца явля́ешися, / я́ко заче́ншая Творца́ вся́ческихъ.

33. Законоположи́ мнѣ́, Го́споди, пу́ть оправда́ній Твои́хъ, и взыщу́ и́ вы́ну.

Аще и сокрыва́ешися во гро́бѣ ма́лѣмъ, Дѣ́во, / но са́мое не́бо Тебѣ́ отве́рзеся, / и на престо́лъ прія́тъ Тебе́ Бо́гъ.

34. Вразуми́ мя, и испыта́ю зако́нъ Тво́й и сохраню́ и́ всѣ́мъ се́рдцемъ мои́мъ.

Изъ нѣ́дръ Отчихъ роди́выйся Бо́гъ / и въ нѣ́дра Твоя́, Непоро́чная, вше́дый, / прія́тъ во объя́тія Тебе́, Чи́стая.

35. Наста́ви мя́ на стезю́ за́повѣдей Твои́хъ, я́ко ту́ю восхотѣ́хъ.

Бо́гъ погребе́ся, и Ма́ти Бо́жія, / Бо́гъ въ те́мная сни́де, и [совни́де и] Ма́ти Бо́жія.

36. Приклони́ се́рдце мое́ во свидѣ́нія Твоя́, а не въ лихои́мство.

Сы́на, Дѣ́во, и на Крестѣ́ не оста́вила еси́, / сего́ ра́ди и То́й не оста́ви Тя́, / Тебѣ́ ны́нѣ предстоя́ тѣле́снѣ.

37. Отврати́ о́чи мои́, е́же не ви́дѣти суеты́, въ пути́ Твое́мъ живи́ мя.

Гро́бъ Сы́на прославля́еши ма́терски, / и То́й, Дѣ́во, Твое́ свято́е успе́ніе воспрославля́етъ боже́ственнѣ.

38. Поста́ви рабу́ Твоему́ сло́во Твое́ въ стра́хъ Тво́й.

Восхвали́ша Тебе́ вси́ А́нгели Бо́жіи, / егда́ вы́ше небе́съ возшла́ еси́, / и, па́дше, поклони́шася че́стно.

39. Отъими́ поноше́ніе мое́, е́же непщева́хъ, я́ко судьбы́ Твоя́ бла́ги.

Къ Престо́лу прише́дши Всевы́шняго Бо́га, / па́дши, ра́бски поклони́лася еси́ / и предста́ла еси́, зря́щи Бо́га.

40. Се́, возжела́хъ за́повѣди Твоя́, въ пра́вдѣ Твое́й живи́ мя.

О, ра́дости неизрече́нныя! / О, че́сти безмѣ́рныя! / Маріа́мъ со Іису́сомъ, Сы́номъ Свои́мъ, ца́рствуетъ на небеси́ и на земли́.

41. И да пріи́детъ на мя́ ми́лость Твоя́, Го́споди, спасе́ніе Твое́ по словеси́ Твоему́.

Богоро́дице Дѣ́во, преста́вльшися отъ земли́, / су́щихъ на земли́ не оста́ви, / сохраня́ющи покланя́ющихся преставле́нію Твоему́.

42. И отвѣща́ю поноша́ющимъ ми́ сло́во, я́ко упова́хъ на словеса́ Твоя́.

Отъ небесе́, Ма́ти, идѣ́же ны́нѣ обита́еши, / призрѣ́вши на зе́млю, бу́ди благоутро́бна / и поми́луй мíръ, Блага́я.

43. И не отъими́ отъ у́стъ мои́хъ словесе́ и́стинна до зѣла́, я́ко на судьбы́ Твоя́ упова́хъ.

Апо́столи, Богоро́дице Чи́стая, / егда́ пресвято́е тѣ́ло Твое́ ви́дѣша, / припа́дше, поклони́шася че́стно.

44. И сохраню́ зако́нъ Тво́й вы́ну, въ вѣ́къ и въ вѣ́къ вѣ́ка.

Исхо́дныя псалмы́, и пѣ́нія, и пѣ́сни, ли́къ соста́вльше, поя́ху Тебѣ́, / чудя́щеся сла́вѣ Твое́й, Чи́стая.

45. И хожда́хъ въ широтѣ́, я́ко за́повѣди Твоя́ взыска́хъ.

Боголѣ́пнымъ, Дѣ́во, Твои́мъ та́мо сія́ніемъ озаря́еміи, / ра́довахуся, и мня́ху Сы́на Твоего́ зрѣ́ти.

46. И глаго́лахъ о свидѣ́ніихъ Твои́хъ предъ цари́, и не стыдя́хся.

Живонача́льному Твоему́ тѣ́лу / кíими рука́ми ны́нѣ прикосне́мся, Всенепоро́чная, глаго́лаху, / Сло́ва Пита́тельнице, Чи́стая?

47. И поуча́хся въ за́повѣдехъ Твои́хъ, я́же возлюби́хъ зѣло́.

Кíя словеса́, Дѣ́во, Тебѣ́ изрече́мъ ны́нѣ? / Кíя пѣ́сни, Препѣ́тая Влады́чице, принесе́мъ успе́нію Твоему́?

48. И воздвиго́хъ ру́цѣ мои́ къ за́повѣдемъ Твои́мъ, я́же возлюби́хъ, и глумля́хся во оправда́ніихъ Твои́хъ.

Маріа́мъ, Дѣ́во, прія́тное Бо́гу и́мя и существо́, / ка́ко умерла́ еси́, обожи́вшая естество́ сме́ртныхъ?

49. Помяни́ словеса́ Твоя́ рабу́ Твоему́, и́хже упова́ніе да́лъ ми́ еси́.

Ка́ко ви́дѣна была́ еси́ бездыха́нна, / вся́кое дыха́ніе Даю́щаго неизрече́нно ро́ждшая? / О, сбытія́, Дѣ́во, но́ваго!

50. То́ мя утѣ́ши во смире́ніи мое́мъ, я́ко сло́во Твое́ живи́ мя.

Преше́дшая естества́ уста́вы, / ка́ко подклоня́ешися уста́вамъ естества́, Влады́чице, / и сме́рти, я́коже мы́, иску́съ прія́ла еси́?

51. Го́рдіи законопреступова́ху до зѣла́, отъ зако́на же Твоего́ не уклони́хся.

Рождество́мъ Твои́мъ, Дѣ́во, / гро́зное сме́рти устремле́ніе останови́вшая, / ка́ко ны́нѣ наше́ствію сме́рти уступа́еши?

52. Помяну́хъ судьбы́ Твоя́ отъ вѣ́ка, Го́споди, и утѣ́шихся.

Огнено́сная купина́, / ка́ко клеща́ми сме́рти объя́та была́ еси́, Богоневѣ́сто, / носи́вшая Огнь Божества́?

53. Печа́ль прія́тъ мя́ отъ грѣ́шникъ, оставля́ющихъ зако́нъ Тво́й.

Почи́ла еси́, Дѣ́во, а не умерла́ ны́нѣ, / и, въ лу́чшемъ животѣ́ и безсме́ртнѣмъ пробу́ждшися, / обрѣла́ся еси́ во пло́ти.

54. Пѣ́та бя́ху мнѣ́ оправда́нія Твоя́ на мѣ́стѣ прише́льствія моего́.

Боже́ственный киво́тъ завѣ́та съ на́ми Бо́жія, / въ ски́ніи ди́внѣй, въ до́мѣ Бо́жіи, всели́ся.

55. Помяну́хъ въ нощи́ и́мя Твое́, Го́споди, и сохрани́хъ зако́нъ Тво́й.

Злата́я ста́мна, въ не́йже ма́нна небе́сная соблюде́ся, / преложи́ся отъ земли́ Богоотрокови́ца Маріа́мъ къ Бо́гу.

56. Се́й бы́сть мнѣ́, я́ко оправда́ній Твои́хъ взыска́хъ.

Бо́га и Сло́ва крило́, на крило́ небе́сное восхо́дитъ па́че сло́ва, / Богоневѣ́ста Чи́стая.

57. Ча́сть моя́ еси́, Го́споди, рѣ́хъ сохрани́ти зако́нъ Тво́й.

Ева́нгельскій многоцѣ́нный би́серъ усокро́виществовася ны́нѣ / въ та́йная сокро́вища Бо́жія.

58. Помоли́хся Лицу́ Твоему́ всѣ́мъ се́рдцемъ мои́мъ, поми́луй мя́ по словеси́ Твоему́.

Смотре́нія Бо́га вопло́щшагося / сокраще́нный е́сть о́бразъ сіе́ са́мое та́инство, / преставле́ніе Твое́ къ Бо́гу.

59. Помы́слихъ пути́ Твоя́ и возврати́хъ но́зѣ мои́ во свидѣ́нія Твоя́.

Ви́дяще Тя́, Дѣ́во, Ма́терь Бо́жію, / мнѣ́хомъ ви́дѣти Бо́га при́сно. / Ка́ко же ны́нѣ стерпи́мъ отлуче́ніе?

60. Угото́вихся и не смути́хся, сохрани́ти за́повѣди Твоя́.

Тебе́, стяжа́вшую Ду́ха Бо́жія, / въ Тебе́, Богоневѣ́сто, все́льшагося, бездыха́нну ви́дя, / и на́шъ ду́хъ оскудѣва́етъ.

61. Ужа грѣ́шникъ обяза́шася мнѣ́, и зако́на Твоего́ не забы́хъ.

Богоро́дице Дѣ́во, ра́досте на́ша, / Богоро́дице, проповѣ́даніе на́ше, / Богоро́дице, ка́мо отхо́диши отъ на́съ?

62. Полу́нощи воста́хъ исповѣ́датися Тебѣ́ о судьба́хъ пра́вды Твоея́.

Ка́мо отхо́диши, Дѣ́во? / Ка́мо преставля́ешися ны́нѣ? / Превы́ше небе́съ возлетѣ́ла еси́, / оста́вльши на земли́ птенцы́.

63. Прича́стникъ а́зъ е́смь всѣ́мъ боя́щимся Тебе́ и храня́щимъ за́повѣди Твоя́.

Дави́де богоо́тче, бу́ди съ на́ми ны́нѣ, / во исхо́дѣ Ма́тери Бо́га на́шего / и въ благознамени́тый де́нь пра́здника.

64. Ми́лости Твоея́, Го́споди, испо́лнь земля́, оправда́ніемъ Твои́мъ научи́ мя.

Возопíй и ны́нѣ ко А́нгеломъ Бо́жіимъ: / возми́те врата́ прія́ти Ма́терь Бо́жію боголѣ́пно.

65. Бла́гость сотвори́лъ еси́ съ рабо́мъ Твои́мъ, Го́споди, по словеси́ Твоему́.

Кра́сный добро́тою, Ца́рь небе́сный, / ны́нѣ добро́ты Ма́тере вожделѣ́ / и призва́ Ю въ небеса́.

66. Бла́гости, и наказа́нію, и ра́зуму научи́ мя, я́ко за́повѣдемъ Твои́мъ вѣ́ровахъ.

Аще и пріе́млеши погребе́ніе, Дѣ́во, я́ко сме́ртная, / но, я́ко Ма́ти Бо́жія, востае́ши Ду́хомъ Бо́жіимъ, Вседѣ́тельнымъ.

67. Пре́жде да́же не смири́ти ми ся, а́зъ прегрѣши́хъ, сего́ ра́ди сло́во Твое́ сохрани́хъ.

Богопріе́мное тѣ́ло, а́ще и во гро́бъ вселя́ется, / но во гро́бѣ пребы́ти не навы́че, / востае́тъ же си́лою Боже́ственною.

68. Бла́гъ еси́ Ты́, Го́споди, и бла́гостію Твое́ю научи́ мя оправда́ніемъ Твои́мъ.

Погребе́ніе Твое́, Бого́родице, Лѣ́ствице небе́сная, / Тебѣ́ лѣ́ствица бы́сть, / е́юже возшла́ еси́ къ Бо́гу, су́щему верху́ ея́.

69. Умно́жися на мя́ непра́вда го́рдыхъ, а́зъ же всѣ́мъ се́рдцемъ мои́мъ испыта́ю за́повѣди Твоя́.

Свѣтоно́сный свѣ́щникъ незаходи́маго Свѣ́та / подъ земле́ю вма́лѣ сокрыва́ется, / но полага́ется свѣ́тло на высотѣ́.

70. Усыри́ся, я́ко млеко́, се́рдце и́хъ, а́зъ же зако́ну Твоему́ поучи́хся.

Бы́вши еди́ножды отъ Бо́га проклята́ земля́, / освяти́ся погребе́ніемъ Бо́га на́шего, / и ны́нѣ па́ки погребе́ніемъ Твои́мъ, Ма́ти.

71. Бла́го мнѣ́, я́ко смири́лъ мя́ еси́, я́ко да научу́ся оправда́ніемъ Твои́мъ.

Съ небесе́ паде́ бѣ́днѣ безпло́тный дре́вле, / превы́ше небе́съ чу́дно быва́етъ ны́нѣ плотоно́сная Дѣ́ва Маріа́мъ.

72. Бла́гъ мнѣ́ зако́нъ у́стъ Твои́хъ, па́че ты́сящъ зла́та и сребра́.

Твое́, Чи́стая, вели́чіе и сла́ва вни́де предъ лице́ сла́вы Го́спода, / преста́вльшейся Тебе́ отъ земли́.

Сла́ва Отцу́, и Сы́ну, и Свято́му Ду́ху.

Воспѣва́емъ, Сло́ве, Тебе́, всѣ́хъ Бо́га, / со Отце́мъ и Святы́мъ Твои́мъ Ду́хомъ, / и сла́вимъ Боже́ственный зра́къ Тво́й.

И ны́нѣ, и при́сно, и во вѣ́ки вѣко́въ, ами́нь.

Блажи́мъ Тя́, вси́ ро́ди, Богоро́дице Приснодѣ́во Влады́чице, / и сла́вимъ успе́ніе Твое́.

И па́ки пе́рвый ли́къ пе́рвый сти́хъ:

Жи́знь, во гро́бѣ положи́лся еси́, Христе́, / и Ма́терь Живота́ полага́ется: / стра́нное видѣ́ніе А́нгеломъ и человѣ́комъ.

Та́же ектенія́ ма́лая и возгла́съ:

Я́ко благослови́ся Твое́ и́мя и просла́вися Твое́ Ца́рство, / Отца́, и Сы́на, и Свята́го Ду́ха, / ны́нѣ, и при́сно, и во вѣ́ки вѣко́въ.

И, покади́вшу іере́ю, лѣ́вый ли́къ начина́етъ втору́ю статію́.

Статія́ втора́я.

Досто́йно е́сть велича́ти Тя́, Жизнода́вца, / возвели́чившаго живоно́сное преставле́ніе Ма́тере Твоея́ Чи́стыя.

73. Ру́цѣ Твои́ сотвори́стѣ мя́ и созда́етѣ мя́: вразуми́ мя, и научу́ся за́повѣдемъ Твоимъ.

Досто́йно е́сть велича́ти Тя́, Богоро́дице, / ду́шу Боже́ственную и непоро́чную въ ру́цѣ Бо́га положи́вшую.

74. Боя́щіися Тебе́ у́зрятъ мя́ и возвеселя́тся, я́ко на словеса́ Твоя́ упова́хъ.

О, чудесе́ но́ваго! / Две́рь въ две́ри, Не́бо въ не́бо ны́нѣ и́детъ / и Престо́лъ Бо́жій на Престо́лъ Бо́жій.

75. Разумѣ́хъ, Го́споди, я́ко пра́вда судьбы́ Твоя́, и вои́стинну смири́лъ мя́ еси́.

Ста́ и удиви́ся все́ мно́жество А́нгеловъ, зря́щи Христа́ Бо́га непристу́пнаго, / приступа́юща къ Ма́тери, че́сть Ей воздаю́ща.

76. Бу́ди же ми́лость Твоя́, да утѣ́шитъ мя́, по словеси́ Твоему́ рабу́ Твоему́.

Ужасе́ся, Бо́га тре́петно зря́щи, низходя́щаго па́ки, / и ду́шу на ру́цѣ пріе́млющаго, / и возше́дшаго во сла́вѣ Боже́ственнѣй.

77. Да пріи́дутъ мнѣ́ щедро́ты Твоя́, и жи́въ бу́ду, я́ко зако́нъ Тво́й поуче́ніе мое́ е́сть.

Ужасни́ся, не́бо, и ты́, земле́, внуши́ глаго́лы: / Бо́гъ, И́же надъ всѣ́ми, пе́рвѣе сни́де / и ны́нѣ второ́е на зе́млю ра́ди Ма́тере.

78. Да постыдя́тся го́рдіи, я́ко непра́ведно беззако́нноваша на мя́, а́зъ же поглумлю́ся въ за́повѣдехъ Твои́хъ.

Прему́дрость до́мъ Сво́й, / отъ земли́ преста́вивши въ до́мъ Сво́й пренебе́сный, / испо́лни ны́нѣ сла́вы Боже́ственныя.

79. Да обратя́тъ мя боя́щіися Тебе́ и вѣ́дящіи свидѣ́нія Твоя́.

Не отъ не́ба сни́де Богоневѣ́стная Дѣ́ва, / но на небеса́ взы́де, / я́ко ро́ждшая небе́снаго Царя́.

80. Бу́ди се́рдце мое́ непоро́чно во оправда́ніяхъ Твои́хъ, я́ко да не постыжу́ся.

Ны́нѣ прохо́дно бы́сть не́бо и человѣ́комъ, / пріиди́те у́бо, вси́ христоно́сніи, / взы́демъ съ Ма́терію Бо́жіею.

81. Исчеза́етъ во спасе́ніе Твое́ душа́ моя́, на словеса́ Твоя́ упова́хъ.

Въ зе́млю пони́кла еси́, неора́нная земле́ Госпо́дня, / Кла́съ живота́ израсти́вшая, / и во странѣ́ произни́кла еси́ небе́снѣй.

82. Исчезо́ша о́чи мои́ въ сло́во Твое́, глаго́люще: когда́ утѣ́шиши мя́?

Со́лнце, ви́дѣвшее пре́жде заше́дшее Со́лнце Пра́вды, / ви́дитъ ны́нѣ и Луну́ заше́дшую, / Дѣ́ву и Ма́терь Свѣ́та.

83. Зане́ бы́хъ я́ко мѣ́хъ на сла́нѣ, оправда́ній Твои́хъ не забы́хъ.

Гро́бъ несвѣ́тлый покры́ пріосѣне́нную и свѣтоно́сную го́ру Госпо́дню, / покры́вшую небеса́ добродѣ́телію.

84. Коли́ко е́сть дне́й раба́ Твоего́? когда́ сотвори́ши ми́ отъ гоня́щихъ мя́ су́дъ?

Аще и преста́вилася еси́ отъ земли́ къ небе́снымъ, Дѣ́во, / оба́че вся́ земля́ сора́дуется / и сла́витъ преставле́ніе Твое́.

85. Повѣ́даша мнѣ́ законопресту́пницы глумле́нія, но не я́ко зако́нъ Тво́й, Го́споди.

Аще и въ небеси́ заключи́ся нетлѣ́нное тѣ́ло Твое́, Дѣ́во, / оба́че благода́ть Твоя́ излія́ся / и исполня́етъ все́ лице́ земли́.

86. Вся́ за́повѣди Твоя́ и́стина, непра́ведно погна́ша мя́, помози́ ми́.

Въ пѣ́снѣхъ къ Бо́гу, моли́твахъ и поще́ніихъ, Дѣ́во, / въ сіи́ дни́ упражня́ющися, / ожида́ла еси́ преставле́нія Твоего́.

87. Въ ма́лѣ не сконча́ша мене́ на земли́, а́зъ же не оста́вихъ за́повѣдей Твои́хъ.

Ра́дуется душа́, и лице́ свѣ́томъ блиста́етъ, / отходя́щей Тебѣ́ ко Го́споду, / Всесвята́я Госпоже́ вѣ́рныхъ.

88. По ми́лости Твое́й живи́ мя, и сохраню́ свидѣ́нія у́стъ Твои́хъ.

Се́, вѣ́рніи, надгро́бную пѣ́снь соверша́емъ Тебѣ́, / нача́тку жи́зни на́шея, / предстоя́ще гро́бу Твоему́ благоче́стно.

89. Во вѣ́къ, Го́споди, сло́во Твое́ пребыва́етъ на небеси́.

Любо́вію, вѣ́рніи, ны́нѣ у́тренююще, / славосло́вимъ Тя́, Влады́чице, Дѣ́во Непоро́чная, / и сла́вимъ успе́ніе Твое́.

90. Въ ро́дъ и ро́дъ и́стина Твоя́: основа́лъ еси́ зе́млю, и пребыва́етъ.

Помяни́ на́съ во Ца́рствіи небе́снѣмъ, / преставле́ніе Твое́ вѣ́рно пою́щихъ, / Дѣ́во Богоневѣ́сто.

91. Учине́ніемъ Твои́мъ пребыва́етъ де́нь, я́ко вся́ческая рабо́тна Тебѣ́.

Ны́нѣ Си́льный, я́коже предрекла́ еси́, / вели́чіе Тебѣ́, Пречи́стая Дѣ́во, сотвори́, / не́ба и земли́ Созда́тель.

92. Я́ко а́ще бы не зако́нъ Тво́й поуче́ніе мое́ бы́лъ, тогда́ у́бо поги́блъ бы́хъ во смире́ніи мое́мъ.

Предстои́ши ны́нѣ Божеству́ Тріѵпоста́сному, / лице́мъ къ лицу́ зря́щи, / идѣ́же ли́ца покрыва́ютъ Серафи́ми.

93. Во вѣ́къ не забу́ду оправда́ній Твои́хъ, я́ко въ ни́хъ оживи́лъ мя́ еси́.

Не́бо ны́нѣ сра́дуется землѣ́ и сликовству́етъ, / человѣ́цы со Ангелы соедини́шася, / преста́вльшейся Чи́стѣй на не́бо.

94. Тво́й е́смь а́зъ, спаси́ мя́, я́ко оправда́ній Твои́хъ взыска́хъ.

Іоаки́мъ ны́нѣ сра́дуется сла́вѣ Дще́ри своея́ и Богоотрокови́цы, / неизрече́ннѣй и боже́ственнѣй и́стинно.

95. Мене́ жда́ша грѣ́шницы погуби́ти мя́, свидѣ́нія Твоя́ разумѣ́хъ.

Геѳсима́нія, блаже́нный и дѣ́вственный гро́бъ пріе́мшая, ублажа́ется, / честву́ема, я́ко черто́гъ ца́рскій.

96. Вся́кія кончи́ны ви́дѣхъ коне́цъ, широка́ за́повѣдь Твоя́ зѣло́.

Пріиди́те, вѣ́рніи, / свято́му гро́бу Го́спода и Всесвяты́я Его́ Ма́тере поклони́мся / со стра́хомъ и ра́достію.

97. Ко́ль возлюби́хъ зако́нъ Тво́й, Го́споди, ве́сь де́нь поуче́ніе мое́ е́сть.

Іерусали́мъ объи́мемъ вси́ усе́рдно / и у́зримъ та́инства Бо́жія, / на́съ ра́ди соверши́вшіяся.

98. Па́че вра́гъ мои́хъ умудри́лъ мя́ еси́ за́повѣдію Твое́ю, я́ко въ вѣ́къ моя́ е́сть.

А́нгели че́стно сопровожда́ютъ честны́й гро́бъ Тво́й, Чи́стая, / свѣ́томъ свяще́ннымъ молніено́сно сія́ющій, / просвѣща́емый свѣ́томъ Бо́жіимъ.

99. Па́че всѣ́хъ уча́щихъ мя́ разумѣ́хъ, я́ко свидѣ́нія Твоя́ поуче́ніе мое́ е́сть.

Ужасо́шася вси́ ду́си возду́шніи, / о е́же на небеса́ восхожде́ніи Твое́мъ, / и вострепета́ша держа́вы Твоея́, Чи́стая.

100. Па́че ста́рецъ разумѣ́хъ, я́ко за́повѣди Твоя́ взыска́хъ.

Вострепета́ сатана́, узрѣ́въ свѣ́тъ сла́вы Ма́тере Бо́жія, / отъ высоты́ молніеви́дно проше́дшій да́же до а́да, / и, пла́ча и стеня́, взыва́ше: / что́ мнѣ́ и Тебѣ́, Ма́ти Бо́жія?

101. Отъ вся́каго пути́ лука́ва возбрани́хъ нога́мъ мои́мъ, я́ко да сохраню́ словеса́ Твоя́.

О, бога́тства Христа́ Бо́га! / О, безмѣ́рная глубина́ любве́! / И до́льнѣйшія страны́ земли́ испо́лни пресла́внаго явле́нія Ма́тере.

102. Отъ суде́бъ Твои́хъ не уклони́хся, я́ко Ты́ законоположи́лъ ми́ еси́.

Пре́жде на́съ ра́ди во а́дъ Христо́съ сни́де, / ны́нѣ же Дѣ́ва Маріа́мъ взы́де на не́бо, / въ ра́дость и по́мощь на́мъ.

103. Ко́ль сладка́ горта́ни моему́ словеса́ Твоя́, па́че ме́да усто́мъ мои́мъ.

Схожде́нію Бо́жію и восхожде́нію Твоему́, Дѣ́во, / покланя́юся, сла́влю я́ и чту́, / я́ко вины́ вхо́да моего́ въ живо́тъ.

104. Отъ за́повѣдей Твои́хъ разумѣ́хъ, сего́ ра́ди возненави́дѣхъ вся́къ пу́ть непра́вды.

По́ясъ честны́й, во свидѣ́ніе Твоего́ съ пло́тію ны́нѣ къ Бо́гу преставле́нія, / вруча́еши, Дѣ́во, Ѳомѣ́.

105. Свѣти́льникъ нога́ма мои́ма зако́нъ Тво́й и свѣ́тъ стезя́мъ мои́мъ.

Аще и ны́нѣ па́ки не приспѣ́ Ѳома́ близне́цъ, / но та́инъ сподо́бися, / пресла́внымъ воскресе́ніемъ Христа́.

106. Кля́хся и поста́вихъ сохрани́ти судьбы́ пра́вды Твоея́.

О, бори́тельный и стропти́вый ро́де евре́йскій! / Сы́на кресту́ пре́далъ еси́ / и ны́нѣ ру́цѣ воздвиза́еши на Ма́терь.

107. Смири́хся до зѣла́, Го́споди, живи́ мя по словеси́ Твоему́.

Ка́ко киво́ту Киво́та Бо́га Жи́ва прикосну́тися, лука́ве, дерзну́лъ еси́? / Но пости́же су́дъ отсѣче́ніемъ.

108. Во́льная у́стъ мои́хъ благоволи́ же, Го́споди, и судьба́мъ Твои́мъ научи́ мя.

До́лѣ Тя́, Чи́стая, апо́столи обстоя́ху, / горѣ́ же си́лы срѣта́ху Тебе́, / я́ко А́нгеловъ еси́ Влады́чица и сме́ртныхъ.

109. Душа́ моя́ въ руку́ Твое́ю вы́ну, и зако́на Твоего́ не забы́хъ.

Пла́чь свяще́нный соверша́юще Тебѣ́, Дѣ́во, взыва́ху: / ка́ко Тя́, Бо́жію пала́ту, покры́емъ земле́ю мертволѣ́пно?

110. Положи́ша грѣ́шницы сѣ́ть мнѣ́, и отъ за́повѣдей Твои́хъ не заблуди́хъ.

Ка́ко Тя́ гро́бу предади́мъ, Чи́стая, / Сы́на и Сло́ва ра́й слове́сный, / па́че ума́ и сло́ва?

111. Наслѣ́довахъ свидѣ́нія Твоя́ во вѣ́къ, я́ко ра́дованіе се́рдца моего́ су́ть.

Словесы́ Боже́ственными богопроповѣ́дники утѣша́я, / мно́жество ско́рби разрѣши́ла еси́, / возглаго́лавши ма́тернимъ о́бразомъ къ ни́мъ, Богома́ти.

112. Приклони́хъ се́рдце мое́ сотвори́ти оправда́нія Твоя́ въ вѣ́къ за воздая́ніе.

Ча́да Го́спода и Сы́на Моего́! / ра́дости отше́ствія Моего́ къ Бо́гу / не претворя́йте въ пла́чь слеза́ми ва́шими.

113. Законопресту́пныя возненави́дѣхъ, зако́нъ же Тво́й возлюби́хъ.

Хода́таица къ Бо́гу се́ отхожду́ превы́ше мíра, / съ ва́ми же е́смь въ мíрѣ при́сно, со Го́сподемъ, / я́коже обѣща́лся е́сть.

114. Помо́щникъ мо́й и Засту́пникъ мо́й еси́ Ты́, на словеса́ Твоя́ упова́хъ.

Ужаса́емся прикосну́тися всесвято́му и богопріе́мному тѣ́лу Твоему́, Чи́стая, раби́ Твои́, / и погребсти́ Ма́терь Живота́.

115. Уклони́теся отъ мене́, лука́внующіи, и испыта́ю за́повѣди Бо́га моего́.

Кíя оде́жды, кíя пелены́, Дѣ́во, и мѵ́ры, / кíя же надгро́бныя пѣ́сни погребе́нію Твоему́ принесе́мъ, Чи́стая?

116. Заступи́ мя по словеси́ Твоему́, и жи́въ бу́ду, и не посрами́ мене́ отъ ча́янія моего́.

Ца́ріе зе́мстіи и бога́тіи лю́дстіи мо́лятся лицу́ Твоему́, Дѣ́во, / я́ко Дще́ри Царя́ небе́снаго.

117. Помози́ ми и спасу́ся, и поучу́ся во оправда́ніихъ Твои́хъ вы́ну.

Бо́гъ въ Ма́тери почи́ на земли́, я́ко Младе́нецъ, / ны́нѣ же на не́бѣ почíетъ / и всели́тся Ма́ти въ Бо́зѣ.

118. Уничижи́лъ еси́ вся́ отступа́ющіи отъ оправда́ній Твои́хъ, я́ко непра́ведно помышле́ніе и́хъ.

Ны́нѣ Маріа́мъ весели́тся, / всенепоро́чное тѣ́ло Го́спода, обоже́нное, / зря́щи на Престо́лѣ Бо́жіи.

119. Преступа́ющіи непщева́хъ вся́ грѣ́шныя земли́, сего́ ра́ди возлюби́хъ свидѣ́нія Твоя́.

Ны́нѣ услы́шала еси́ та́мо неизрече́нныя глаго́лы, Дѣ́во, / и безвѣ́стная и та́йная прему́дрости яви́ Тебѣ́ Бо́гъ.

120. Пригвозди́ стра́ху Твоему́ пло́ти моя́, отъ суде́бъ бо Твои́хъ убоя́хся.

Взя́тся отъ земли́ пресла́вный гра́дъ Госпо́день, / о не́мъ же пресла́вная глаго́лашася, / и введе́ся въ до́мъ Бо́жій.

121. Сотвори́хъ су́дъ и пра́вду, не преда́ждь мене́ оби́дящимъ мя́.

Взя́тся отъ земли́ земля́ неоскверне́нная и дѣ́вственная, / изъ Нея́же созда́ся но́вый Ада́мъ, / пра́отца Ада́ма Созда́тель.

122. Воспріими́ раба́ Твоего́ во бла́го, да не оклевета́ютъ мене́ го́рдіи.

Не́бо ны́нѣ колесни́цу Бо́жію, тмочи́сленно Святу́ю, пріе́млетъ, / со тма́ми А́нгеловъ, пресла́вно.

123. Очи мои́ исчезо́стѣ во спасе́ніе Твое́ и въ сло́во пра́вды Твоея́.

Дне́сь отъ земли́ чи́стый и всесвятѣ́йшій Образъ, новолѣ́пно возно́сится та́мо, / идѣ́же первообра́зное быва́етъ.

124. Сотвори́ съ рабо́мъ Твои́мъ по ми́лости Твое́й и оправда́ніемъ Твои́мъ научи́ мя́.

Богосодѣ́ланный Образъ, / Красоту́ земли́ преизоби́льную, / ны́нѣ боголѣ́пно прелага́етъ Бо́гъ на не́бо.

125. Ра́бъ Тво́й е́смь а́зъ, вразуми́ мя, и увѣ́мъ свидѣ́нія Твоя́.

Кни́га та́инственная, въ не́йже написа́ся Бо́жіе Сло́во, / въ ру́цѣ Бо́га полага́ется, / въ написа́ніе небе́сныхъ та́инъ.

126. Вре́мя сотвори́ти Го́сподеви, разори́ша зако́нъ Тво́й.

Я́ко голуби́ца, уя́звленная любо́вію, Дѣ́во, / Престо́лъ Бо́жій облета́еши, / отлетѣ́вши отъ гнѣзда́, е́же на земли́.

127. Сего́ ра́ди возлюби́хъ за́повѣди Твоя́ па́че зла́та и топа́зія.

Земли́ и не́ба Всецари́це, ди́вная Марíе, / въ Ца́рство введи́ сла́вящихъ успе́ніе Твое́.

128. Сего́ ра́ди ко всѣ́мъ за́повѣдемъ Твои́мъ направля́хся, вся́къ пу́ть непра́вды возненави́дѣхъ.

Успи́, Чи́стая, успе́ніемъ Твои́мъ живоно́снымъ, / утиши́ Це́ркве собла́зны / и утверди́ ю́, я́ко Блага́я.

129. Ди́вна свидѣ́нія Твоя́, сего́ ра́ди испыта́ я́ душа́ моя́.

Воспѣва́емъ ны́нѣ успе́ніе и погребе́ніе Твое́, Чи́стая, / и вси́ вѣ́рно ублажа́емъ Тя́, / иску́плени отъ сме́рти Твои́мъ Рожде́ніемъ.

130. Явле́ніе слове́съ Твои́хъ просвѣща́етъ и вразумля́етъ младе́нцы.

Тя́, Одръ честны́й, святы́й и богопріе́мный, / на одрѣ́ че́стно зря́ще, / апо́столи вопія́ху со пла́чемъ.

131. Уста́ моя́ отверзо́хъ и привлеко́хъ ду́хъ, я́ко за́повѣдей Твои́хъ жела́хъ.

Наляцы́, Честна́я, Приснодѣ́вая Дѣ́во Марíе, / и успѣва́й, и ца́рствуй во вѣ́ки вѣко́въ съ Бо́гомъ.

Сла́ва Отцу́, и Сы́ну, и Свято́му Ду́ху.

Безнача́льне Бо́же, Соприсносу́щне Сло́ве и Ду́ше Святы́й, / вознеси́ ро́гъ христіа́нъ, / я́ко Всеми́лостивый и Благíй.

И ны́нѣ, и при́сно, и во вѣ́ки вѣко́въ, ами́нь.

Жи́знь ро́ждшая, Всенепоро́чная Чи́стая Дѣ́во, / и къ жи́зни преста́вльшаяся ны́нѣ, / и́стинныя жи́зни сподо́би и вся́ вѣ́рныя.

И па́ки вторы́й ли́къ сти́хъ пе́рвый:

Досто́йно е́сть велича́ти Тя́, Жизнода́вца, / возвели́чившаго живоно́сное преставле́ніе Ма́тере Твоея́ Чи́стыя.

Та́же ектенія́ ма́лая и возгла́съ:

Я́ко святи́ся и просла́вися всечестно́е и великолѣ́пое и́мя Твое́, / Отца́, и Сы́на, и Свята́го Ду́ха, / ны́нѣ, и при́сно, и во вѣ́ки вѣко́въ.

И, покади́вшу іере́ю, пра́вый ли́къ начина́етъ тре́тію статію́.

Статія́ тре́тія, гла́съ 3:

Ро́ди вси́ пѣ́снь погребе́нію Твоему́ прино́сятъ, Дѣ́во.

132. При́зри на мя́ и поми́луй мя́, по суду́ лю́бящихъ и́мя Твое́.

Гряди́ сѣ́мо, вся́ тва́рь, / пѣ́сни исхо́дныя принесе́мъ Дѣ́вѣ.

133. Стопы́ моя́ напра́ви по словеси́ Твоему́, и да не облада́етъ мно́ю вся́кое беззако́ніе.

Ученицы́ Христа́ моего́ / погреба́ютъ тѣ́ло Ма́тере Бо́га моего́.

134. Изба́ви мя́ отъ клеветы́ человѣ́ческія, и сохраню́ за́повѣди Твоя́.

А́нгеловъ и Арха́нгеловъ чи́ни, / предстоя́ще, воспѣва́ютъ неви́димо.

135. Лице́ Твое́ просвѣти́ на раба́ Твоего́ и научи́ мя оправда́ніемъ Твои́мъ.

Жены́ честны́я со апо́столы / вопія́ху, пла́чуще.

136. Исхо́дища водна́я изведо́стѣ о́чи мои́, поне́же не сохрани́хъ зако́на Твоего́.

Неискусому́жная Дѣ́во, Ма́ти Бо́га Вы́шняго, / ка́ко стерпи́мъ болѣ́знь?

137. Пра́веденъ еси́, Го́споди, и пра́ви суди́ Твои́.

Твое́ ны́нѣ отше́ствіе – ра́дость всему́ мíру, / на́мъ же пла́чь ско́рбный.

138. Заповѣ́далъ еси́ пра́вду, свидѣ́нія Твоя́, и и́стину зѣло́.

Отъ Ма́тернія любве́ Твоея́ и попече́нія Твоего́ / да не оста́немъ си́ры.

139. Иста́яла мя́ е́сть ре́вность Твоя́, я́ко забы́ша словеса́ Твоя́ врази́ мои́.

Свѣ́те на́шъ, Дѣ́во, / ка́ко стерпи́мъ не зрѣ́ти Твоего́ сла́дкаго о́ка?

140. Разжже́но сло́во Твое́ зѣло́, и ра́бъ Тво́й возлюби́ е́.

Ка́ко боголю́бная Твоя́ и богосло́вная уста́ / молча́ніемъ, увы́, связа́шася?

141. Юнѣ́йшій а́зъ е́смь и уничиже́нъ, оправда́ній Твои́хъ не забы́хъ.

Отъ Ма́тере Учи́теля на́шего не отсту́пимъ, / апо́столи вопія́ху.

142. Пра́вда Твоя́ пра́вда во вѣ́къ, и зако́нъ Тво́й и́стина.

На о́блацѣхъ па́ки предпо́слемъ Тя́, Дѣ́во, до небе́сныхъ.

143. Ско́рби и ну́жды обрѣто́ша мя́, за́повѣди Твоя́ поуче́ніе мое́.

Же́злъ святы́й, положе́нный во гро́бѣ, / жи́знь израща́етъ.

144. Пра́вда свидѣ́нія Твоя́ въ вѣ́къ, вразуми́ мя, и жи́въ бу́ду.

Во гро́бѣ положи́ся / ме́ртвыя отъ гробо́въ Воздви́гшая Рождество́мъ Свои́мъ.

145. Воззва́хъ всѣ́мъ се́рдцемъ мои́мъ, услы́ши мя́, Го́споди, оправда́нія Твоя́ взыщу́.

Ка́мо отхо́диши, Ма́ти? / Дру́гъ и дѣ́вственникъ сынолѣ́пно вопія́ше.

146. Воззва́хъ Ти́, спаси́мя, и сохраню́ свидѣ́нія Твоя́.

Въ ра́дость Сы́на Твоего́ отхо́диши, Богома́ти, / и весели́шися, и ра́дуешися.

147. Предвари́хъ въ безго́діи и воззва́хъ, на словеса́ Твоя́ улова́хъ.

Еда́ па́ки въ Ка́ну на бра́къ / ны́нѣ позвана́ еси́ со апо́столы?

148. Предвари́стѣ о́чи мои́ ко у́тру, поучи́тися словесе́мъ Твои́мъ.

Поими́, Дѣ́во, къ Боже́ственному Твоему́ Сы́ну / и мене́ ны́нѣ, Твое́ ча́до.

149. Гла́съ мо́й услы́ши, Го́споди, по ми́лости Твое́й, по судьбѣ́ Твое́й живи́ мя.

Преста́ви мя́, Ма́ти, ны́нѣ Твои́мъ преставле́ніемъ / къ Ро́ждшемуся изъ Тебе́.

150. Прибли́жишася гоня́щіи мя́ беззако́ніемъ, отъ зако́на же Твоего́ удали́шася.

Да сопредстои́мъ на небеси́ сла́вѣ, / я́коже при Крестѣ́ страда́нію.

151. Бли́зъ еси́ Ты́, Го́споди, и вси́ путіе́ Твои́ и́стина.

Со тма́ми умо́въ сни́де Влады́ка: / Геѳсима́ніе, весели́ся.

152. Испе́рва позна́хъ отъ свидѣ́ній Твои́хъ, я́ко въ вѣ́къ основа́лъ я́ еси́.

Ученико́въ ли́къ, весели́ся, / зря́ Го́спода во сла́вѣ.

153. Ви́ждь смире́ніе мое́ и изми́ мя, я́ко зако́на Твоего́ не забы́хъ.

Вся́ земля́ да взыгра́етъ, / Бо́га, па́ки сходя́ща, дне́сь зря́щи.

154. Суди́ су́дъ мо́й и изба́ви мя́, словесе́ ра́ди Твоего́ живи́ мя.

Изы́демъ ско́ро во срѣ́теніе Го́спода, / па́ки снизше́дшаго.

155. Дале́че отъ грѣ́шникъ спасе́ніе, я́ко оправда́ній Твои́хъ не взыска́ша.

Да услы́шимъ вси́ Бо́га, / собесѣ́дующа ны́нѣ Ма́тери Всенепоро́чнѣй.

156. Щедро́ты Твоя́ мно́ги, Го́споди, по судьбѣ́ Твое́й живи́ мя.

О, Сладча́йшая Ма́ти, / къ Сладча́йшему Сы́ну пріиди́, ра́дуяся.

157. Мно́зи изгоня́щіи мя́ и стужа́ющіи ми́, отъ свидѣ́ній Твои́хъ не уклони́хся.

Ви́ждь, се́ ны́нѣ Сы́нъ Тво́й пріи́де, / во Своя́ Тебе́ прія́ти.

158. Ви́дѣхъ неразумѣва́ющія и иста́яхъ, я́ко слове́съ Твои́хъ не сохрани́ша.

Пріидо́хъ, глаго́летъ, / да предъ лице́мъ сла́вы Отца́ яви́тся сла́ва Ма́тере Моея́.

159. Ви́ждь, я́ко за́повѣди Твоя́ возлюби́хъ, Го́споди, по ми́лости Твоей́ живи́ мя.

Сла́влю Твое́, Бо́же Мо́й, / къ Сы́ну Ма́терь глаго́летъ, / кра́йнее благоутро́біе.

160. Нача́ло слове́съ Твои́хъ и́стина, и во вѣ́къ вся́ судьбы́ пра́вды Твоея́.

Сла́влю Тя́, Сы́не Мо́й, / и покланя́юся сла́вѣ Твоего́ вели́чествія.

161. Кня́зи погна́ша мя́ ту́не, и отъ слове́съ Твои́хъ убоя́ся се́рдце мое́.

Бли́зъ Отца́ Моего́ пріиди́, бли́жняя Моя́, / отъ земли́ воста́вши.

162. Возра́дуюся а́зъ о словесѣ́хъ Твои́хъ, я́ко обрѣта́яй коры́сть мно́гу.

Ты́ са́дъ заключе́нный, / идѣ́же дре́во жи́зни и безсме́ртія.

163. Непра́вду возненави́дѣхъ и омерзи́хъ, зако́нъ же Тво́й возлюби́хъ.

Ты́ еси́ исто́чникъ запечатлѣ́нный, / въ не́мже пото́къ сла́дости всенеизрече́нныя.

164. Седмери́цею дне́мъ хвали́хъ Тя́ о судьба́хъ пра́вды Твоея́.

Пѣсносло́влю, Сы́не Мо́й, / Божества́ Твоего́ Пребоже́ственнаго держа́ву.

165. Ми́ръ мно́гъ лю́бящимъ зако́нъ Тво́й, и нѣ́сть и́мъ собла́зна.

Пѣсносло́влю, Бо́же мо́й, / снизхожде́ніе Твое́ и человѣколю́біе.

166. Ча́яхъ спасе́нія Твоего́, Го́споди, и за́повѣди Твоя́ возлюби́хъ.

Пріиди́, кра́сная Моя́, / да наслажда́ешися красоты́ Сы́на Твоего́ и Созда́теля.

167. Сохрани́ душа́ моя́ свидѣ́нія Твоя́ и возлюби́ я́ зѣло́.

Пріиди́, Ма́ти Моя́, / въ ра́дость Боже́ственную и въ Ца́рство.

168. Сохрани́хъ за́повѣди Твоя́ и свидѣ́нія Твоя́, я́ко вси́ путіе́ мои́ предъ Тобо́ю, Го́споди.

Пріиди́, Марíе, / идѣ́же спокланя́емь е́сть Оте́цъ, Сы́нъ и Ду́хъ.

169. Да прибли́жится моле́ніе мое́ предъ Тя́, Го́споди, по словеси́ Твоему́ вразуми́ мя.

Что́ Ти́ возда́мъ, Богочеловѣ́че Сы́не Мо́й, / Раба́ Влады́цѣ?

170. Да вни́детъ проше́ніе мое́ предъ Тя́, Го́споди, по словеси́ Твоему́ изба́ви мя́.

Что́ ны́нѣ Ти́ принесу́ на небеси́, Бо́же Мо́й, / а́ще не ду́шу и тѣ́ло?

171. Отры́гнутъ устнѣ́ мои́ пѣ́ніе, егда́ научи́ши мя́ оправда́ніемъ Твои́мъ.

Сла́влю Отца́, / воспѣва́ю Тя́, Сы́на Моего́, / и покланя́юся Ду́ху.

172. Провѣща́етъ язы́къ мо́й словеса́ Твоя́, я́ко вся́ за́повѣди Твоя́ пра́вда.

Сла́ва Тебе́, Богоро́дицѣ, / сла́ва Твоему́ рождеству́, / сла́ва и успе́нію.

173. Да бу́детъ рука́ Твоя́, е́же спасти́ мя́, я́ко за́повѣди Твоя́ изво́лихъ.

Ада́мъ и Ева чудя́хуся, зря́ще сла́ву Дѣ́вы.

174. Возжела́хъ спасе́ніе Твое́, Го́споди, и зако́нъ Тво́й поуче́ніе мое́ е́сть.

Іоаки́мъ и Анна, блаже́ни есте́, / ро́ждше мíрови Дще́рь.

175. Жива́ бу́детъ душа́ моя́ и восхва́литъ Тя́, и судьбы́ Твоя́ помо́гутъ мнѣ́.

Препросла́вленную, въ превы́спренняя всели́вшуюся, / я́ко Ма́терь Бо́жію.

176. Заблуди́хъ, я́ко овча́ поги́бшее, взыщи́ раба́ Твоего́, я́ко за́повѣдей Твои́хъ не забы́хъ.

Ми́ръ – Це́ркви, лю́демъ Твои́мъ – спасе́ніе / да́руй, Твои́мъ успе́ніемъ.

Сла́ва Отцу́, и Сы́ну, и Свято́му Ду́ху.

О, Тро́ице, Бо́же мо́й, / Отче, Сы́не и Ду́ше, / поми́луй мíръ!

И ны́нѣ, и при́сно, и во вѣ́ки вѣко́въ, ами́нь.

Ви́дѣти Сы́на Твоего́ Ца́рство / сподо́би, Дѣ́во, рабы́ Твоя́.

Та́же о́ба ли́ка сти́хъ пе́рвый:

Ро́ди вси́ пѣ́снь погребе́нію Твоему́ прино́сятъ, Дѣ́во.

И пото́мъ благослове́нны,
на гла́съ 5:

Благослове́нная Влады́чице, / просвѣти́ мя свѣ́томъ Сы́на Твоего́.

Ангельскій собо́ръ удиви́ся, / зря́ Тебе́ въ ме́ртвыхъ вмѣни́вшуюся, / ду́шу же въ ру́цѣ Бо́га преда́вшую / и съ Бо́гомъ возше́дшую, Пренепоро́чная, / со сла́вою Боже́ственною въ небе́сная.

Благослове́нная Влады́чице, / просвѣти́ мя свѣ́томъ Сы́на Твоего́.

Почто́ ра́дость со слеза́ми, / Богопроповѣ́дницы, растворя́ете? / Прише́дъ Близне́цъ, свы́ше вразумля́емь, / приглаша́ше апо́столомъ: / ви́дите вы́ по́ясъ и уразумѣ́йте, / Дѣ́ва воскре́се отъ гро́ба.

Благослове́нная Влады́чице, / просвѣти́ мя свѣ́томъ Сы́на Твоего́.

Учени́къ, невѣ́ривый, Влады́чице, / Воскресе́нію Сы́на Твоего́, / ны́нѣ увѣря́етъ про́чихъ о воста́ніи Твое́мъ, глаго́ля: / рыда́нія вре́мя преста́, не пла́чите, / воскресе́ніе же Дѣ́вы рцы́те.

Благослове́нная Влады́чице, / просвѣти́ мя свѣ́томъ Сы́на Твоего́.

Богоно́снымъ, Дѣ́во, ученико́мъ, / собра́вшимся ко гро́бу Твоему́ и рыда́ющимъ, / яви́выйся Ѳома́ рече́, глаго́ля: / что́ съ ме́ртвыми Живу́ю помышля́ете? / Воскре́се бо, я́ко Бо́га Роди́тельница.

Сла́ва Отцу́, и Сы́ну, и Свято́му Ду́ху.

Поклони́мся Отцу́, / и Его́ Сы́нови, и Свято́му Ду́ху, / Святѣ́й Тро́ицѣ во Еди́номъ Существѣ́, / съ Серафи́мы зову́ще: / Свя́тъ, Свя́тъ, Свя́тъ еси́, Го́споди.

И ны́нѣ, и при́сно, и во вѣ́ки вѣко́въ, ами́нь.

Жизнода́вца ро́ждши, / къ жи́зни нестарѣ́емѣй прешла́ еси́, / ра́дость же, Дѣ́во, / въ печа́ли мѣ́сто подала́ еси́ ученико́мъ, / изъ гро́ба тридне́вно воста́вшая Дѣ́во, / я́коже и Госпо́дь.

Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.]

Егда́ же пою́тся Благослове́нны, кадя́тъ два́ діа́кона. По Благослове́нныхъ ектенія́ ма́лая. Возгла́съ:

Я́ко Тя́ хва́лятъ вся́ си́лы небе́сныя, Отца́, и Сы́на, и Свята́го Ду́ха, и Тебѣ́ сла́ву возсыла́ютъ ны́нѣ, и при́сно, и во вѣ́ки вѣко́въ.

Степенна
1-й антифонъ 4-го гласа:

Отъ ю́ности моея́ / мнóзи бóрютъ мя́ стрáсти, / но Сáмъ мя́ заступи́, / и спаси́, Спáсе мóй.

Ненави́дящии Сióна, / посрами́теся отъ Гóспода, / я́ко травá бо огнéмъ / бу́дете изсóхше.

Слaва и нынѣ: Святы́мъ Ду́хомъ / вся́ка ду́ша живи́тся, / и чистотóю возвышáется, / свѣтлѣ́ется Трóическимъ Еди́нствомъ священнотáйнѣ.

Таже проки́менъ, гла́съ 4: Помяну́ и́мя Твое́ / во вся́комъ ро́дѣ и ро́дѣ. Сти́хъ: Слы́ши Дщи́ и ви́ждь, и приклони́ у́хо Твое́.

Другiй прокименъ: Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́, хвали́те Его́ в утверже́ніи си́лы Его́.

Ева́нгеліе Луки́, зача́ло 4.

Во дни́ о́ны, воста́вши Маріа́мъ, и́де въ го́рняя со тща́нiемъ, во гра́дъ Иу́довъ: и вни́де въ до́мъ Заха́рiинъ, и цѣлова́ Елисаве́тъ. И бы́сть я́ко услы́ша Елисаве́тъ цѣлова́нiе Марі́ино, взыгра́ся младе́нецъ во чре́вѣ ея́: и испо́лнися Ду́ха Свя́та Елисаве́тъ, и возопи́ гла́сомъ ве́лiимъ, и рече́: благослове́на Ты́ въ жена́хъ, и благослове́нъ пло́дъ чре́ва Твоего́: и отку́ду мнѣ́ сiе́, да прiи́детъ Ма́ти Го́спода моего́ ко мнѣ́? Се́ бо, я́ко бы́сть гла́съ цѣлова́нiя Твоего́ во у́шiю мое́ю, взыгра́ся младе́нецъ ра́дощами во чре́вѣ мое́мъ. И блаже́нна Вѣ́ровавшая, я́ко бу́детъ соверше́нiе глаго́ланнымъ Е́й от Го́спода. И рече́ Марiа́мь: вели́читъ душа́ Моя́ Го́спода, и возра́довася Ду́хъ Мо́й о Бо́зѣ Спа́сѣ Мое́мъ: я́ко призрѣ́ на смире́нiе рабы́ Своея́: се́ бо, отны́нѣ ублажа́тъ Мя́ вси́ ро́ди: я́ко сотвори́ Мнѣ́ вели́чiе Си́льный, и свято и́мя Его́. Пребы́сть же Марiа́мь съ не́ю я́ко три́ мѣ́сяцы и возврати́ся въ до́мъ Сво́й.

Лк 1:39–49, 56

По 50-мъ псалмѣ́:

Сла́ва: Моли́твами Богоро́дицы, / Ми́лостиве, очи́сти / мно́жества согрѣше́ній на́шихъ.

И ны́нѣ: Моли́твами Богоро́дицы, / Ми́лостиве, очи́сти / мно́жества согрѣше́ній на́шихъ.

Та́же, гла́съ 6-й: Поми́луй мя́, Бо́же, / по вели́цѣй ми́лости Твое́й, / и по мно́жеству щедро́тъ Твои́хъ, / очи́сти беззако́ніе мое́.

И стихи́ра, гла́съ 6. Византíево:

Егда́ преставле́ніе пречи́стаго Твоего́ тѣ́ла гото́вляшеся, / тогда́ апо́столи, обстоя́ще о́дръ, / съ тре́петомъ зря́ху Тя́; / и о́ви у́бо, взира́юще на тѣ́ло, / у́жасомъ одержи́ми бя́ху, / Пе́тръ же со слеза́ми вопія́ше Ти́: / О, Дѣ́во, / ви́жду Тя́ я́сно просте́рту про́сту, / Живота́ всѣ́хъ, и удивля́юся, / въ Не́йже всели́ся бу́дущія жи́зни наслажде́ніе. / Но, о Пречи́стая, / моли́ся прилѣ́жно Сы́ну и Бо́гу Твоему́, / спасти́ся ста́ду Твоему́ невреди́му.

Посе́мъ: Спаси́, Бо́же, лю́ди... И по возгла́сѣ кано́нъ мине́и. Въ сіе́ вре́мя цѣлу́емъ святу́ю ико́ну, и помазу́етъ настоя́тель освяще́ннымъ еле́емъ. Ирмосъ́ по два́жды. Кано́нъ чте́мъ обои́хъ творце́въ, не повторя́юще стихо́въ. Катава́сія пое́тся обѣ́ими ли́ки втора́го творца́: Отверзу́ уста́ моя́... Кано́нъ пе́рвый, его́же краестро́чіе: Да торжеству́ютъ богому́дріи.

Гла́съ 1. Пѣ́снь 1.

Ирмо́съ: Преукраше́нная Боже́ственною сла́вою, / свяще́нная и сла́вная, Дѣ́во, па́мять Твоя́, / вся́ собра́ къ весе́лію вѣ́рныя, / начина́ющей Маріа́мѣ, съ ли́ки и тимпа́ны, / Твоему́ пою́ще Единоро́дному: / сла́вно я́ко просла́вися.

Да провожда́ютъ невеще́ственніи чи́нове, / небоше́ственное въ Сіо́нъ Боже́ственное тѣ́ло Твое́, / внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, / съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, / оба́че же, подо́бящися Творцу́ Твоему́ и Сы́ну, / па́че естества́ повину́ешися есте́ственнымъ зако́номъ. / Тѣ́мже уме́рши, съ Сы́номъ востае́ши вѣ́чнующи.

Другíй кано́нъ, Іоа́нна Дамаскина́, гла́съ 4.
Пѣ́снь 1.

Дѣ́вы отрокови́цы, съ Маріамíею проро́чицею, пѣ́снь исхо́дную ны́нѣ воскли́кните: / Дѣ́ва бо и еди́на Богома́ти ко прія́тію небе́сному преставля́ется.

Досто́йно, я́ко одушевле́нное Тя́ Не́бо, прія́ша небе́сная, Пречи́стая, Боже́ственная селе́нія, / и предста́, свѣ́тло укра́шена, я́ко Невѣ́ста Всенепоро́чная, Царю́ и Бо́гу.

Катава́сія: Отве́рзу уста́ моя́, / и напо́лнятся Ду́ха, / и сло́во отры́гну Цари́цѣ Ма́тери, / и явлю́ся, свѣ́тло торжеству́я, / и воспою́, ра́дуяся, Тоя́ успе́ніе.

Пѣ́снь 3.

Ирмо́съ: Содѣ́тельная и содержи́тельная всѣ́хъ, / Бо́жія Му́дросте и Си́ло, / непрекло́нну, недви́жиму Це́рковь утверди́, Христе́, / еди́нъ бо еси́ Свя́тъ, / во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, / ви́дѣвше, Всенепоро́чная, сла́вніи апо́столи, / ужа́сно прикаса́хуся рука́ми сла́вою облиста́ющей, / я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, / Бо́гу сохра́ншу че́сть одушевле́нному Киво́ту, сла́вою Божества́, / въ Не́мже Сло́во пло́ть бы́сть.

[Инъ.]

Отъ ме́ртвыхъ чре́слъ произве́дшися, естество́мъ подо́бна, Чи́стая, исхожде́ніе разрѣши́, / ро́ждши же су́щую Жи́знь, / къ жи́зни преста́вися Боже́ственнѣй и Ѵпоста́снѣй.

Ли́къ богосло́вовъ отъ коне́цъ, свы́ше же А́нгелъ мно́жества / къ Сіо́ну идя́ху, всеси́льнымъ манове́ніемъ, / достодо́лжно, Влады́чице, Твоему́ погребе́нію служа́ще.

Катава́сія: Твоя́ пѣсносло́вцы, Богоро́дице, / живы́й и незави́стный Исто́чниче, / ли́къ Себѣ́ совоку́пльшія, духо́вно утверди́, / въ Боже́ственнѣй па́мяти Твое́й / вѣнце́въ сла́вы сподо́би.

Ипакои́, гла́съ 8:

Блажи́мъ Тя́, вси́ ро́ди, Богоро́дице Дѣ́во, / въ Тя́ бо Невмѣсти́мый Христо́съ Бо́гъ на́шъ, вмѣсти́тися благоволи́. / Блаже́ни есмы́ и мы́, предста́тельство Тя́ иму́ще: / де́нь бо и но́щь мо́лишися о на́съ, и ски́птры ца́рствія Твои́ми моли́твами утвержда́ются. / Тѣ́мъ, воспѣва́юще, вопіе́мъ Ти́: / ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Рѣ́чи проро́ковъ и гада́нія, / воплоще́ніе прояви́ша отъ Дѣ́вы Твое́, Христе́: / сія́ніе блиста́нія Твоего́ во свѣ́тъ язы́ковъ изы́детъ, / и возгласи́тъ Тебѣ́ бе́здна съ весе́ліемъ: / си́лѣ Твое́й сла́ва, Человѣколю́бче.

Ви́дите лю́діе и чуди́теся: / Гора́ бо свята́я и я́вственная Бо́гу въ небе́сныя оби́тели превы́шше взе́млется, / Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, / отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, / въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и А́нгели воспѣ́ша, / и прія́тъ Христо́съ дѣ́вства Своея́ Ма́тере сосу́дъ; / Херуви́ми подъя́ша Тя́ съ весе́ліемъ, / Серафи́ми же сла́вятъ, ра́дующеся.

[Инъ.]

Чу́до бя́ше зрѣ́ти, Не́бо всѣ́хъ Царя́ одушевле́нное, / испражне́нія преходя́щее земна́я, я́ко чу́дна дѣла́ Твоя́! / Сла́ва си́лѣ Твое́й, Го́споди.

Аще и непости́жный Сея́ Пло́дъ, Имже небеса́ бы́ша, / погребе́ніе прія́тъ во́лею, я́ко ме́ртвъ; / ка́ко погребе́нія отве́ржется, неискусобра́чно Ро́ждшая?

Въ преставле́ніи Твое́мъ, Ма́ти Бо́жія, простра́ннѣйшее тѣ́ло Твое́ и богопрія́тное, / А́нгельская во́инства свяще́нными кри́лы, тре́петомъ и ра́достію покрыва́ху.

Катава́сія: Неизслѣ́дный Бо́жій совѣ́тъ, / е́же отъ Дѣ́вы воплоще́нія / Тебе́, Вы́шняго, / проро́къ Авваку́мъ, усмотря́я, зовя́ше: / сла́ва си́лѣ Твое́й, Го́споди.

Пѣ́снь 5.

Ирмо́съ: Бо́жію и неизрече́нную добро́ту, / добродѣ́телей Твои́хъ, Христе́ исповѣ́мъ: / отъ Присносу́щныя бо Сла́вы, / Соприсносу́щное и Ѵпоста́сное возсія́вый Сія́ніе, / изъ дѣ́вственныя утро́бы, / су́щимъ во тмѣ́ и сѣ́ни, вопло́щся, / возсія́лъ еси́ Со́лнце.

Я́ко на о́блацѣ Дѣ́во, апо́стольскій ли́къ носи́мь, / къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: / отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, / исхо́дную возглаша́юще пѣ́снь Ду́хомъ: / ра́дуйся нетлѣ́нный Исто́чниче, / Бо́жія живонача́льнаго и спаси́тельнаго всѣ́мъ воплоще́нія.

[Инъ.]

Да возглася́тъ трубы́ богосло́вовъ дне́сь, / язы́къ же многовѣща́нный человѣ́ческій ны́нѣ да восхва́литъ, / да огласи́тъ же возду́хъ, безмѣ́рнымъ сія́я свѣ́томъ, / А́нгели да пою́тъ Пречи́стыя Дѣ́вы успе́ніе.

Сосу́дъ подоба́ше избра́нный, пѣ́ніемъ Ти́ ве́сь удивля́емь, Дѣви́це, исхо́денъ, / ве́сь освяще́нъ Бо́гови, всѣ́мъ богопрія́тенъ, / и се́й и́стинно явля́емый, Богоро́дице Всепѣ́тая.

Катава́сія: Ужасо́шася вся́ческая / о честнѣ́мъ успе́ніи Твое́мъ: / Ты́ бо, неискусобра́чная Дѣ́во, / отъ земли́ преста́вилася еси́ къ вѣ́чнымъ оби́телемъ, / и къ безконе́чнѣй жи́зни, / всѣ́мъ, воспѣва́ющимъ Тя́, / спасе́ніе подава́ющая.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь – / тридне́внаго Твоего́ погребе́нія проображе́ніе, / его́же Іо́на проро́къ показа́ся. / Спасе́нъ бо, я́ко и предпосла́ся, неврежде́нъ, вопія́ше: / пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: / въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно / и спросла́ви Боже́ственнымъ преставле́ніемъ, / че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, / кади́льницу злату́ю Боже́ственнаго Угля, во Свята́я святы́хъ всели́, / ру́чку и же́злъ, скрижа́ль богопи́санную, ковче́гъ святы́й, / трапе́зу Сло́ва жи́зни, Дѣ́во, Рождество́ Твое́.

[Инъ.]

Изъ Тебе́ Жи́знь возсія́, ключи́ дѣ́вства не руши́вши; / ка́ко у́бо пречи́стое и живонача́льное Твое́ тѣ́ло / искуше́нія сме́рти бы́сть прича́стно?

Жи́зни бы́вши хра́мъ, жи́знь присносу́щную улучи́ла еси́: / сме́ртію бо къ животу́ премину́ла еси́, / Я́же Жи́знь ро́ждши воѵпоста́сную.

Катава́сія: Боже́ственное сіе́ и всечестно́е / соверша́юще пра́зднество, / богому́дріи, Богома́тере, / пріиди́те, рука́ми воспле́щимъ, / отъ Нея́ ро́ждшагося Бо́га сла́вимъ.

Конда́къ, гла́съ 2:

Въ моли́твахъ неусыпа́ющую Богоро́дицу / и въ предста́тельствахъ непрело́жное упова́ніе, / гро́бъ и умерщвле́ніе не удержа́ста: / я́коже бо Живота́ Ма́терь, / къ животу́ преста́ви, / во утро́бу Всели́выйся приснодѣ́вственную.

Икосъ: Огради́ моя́ помышле́нія, Христе́ мо́й, / и́бо Стѣ́ну мíра воспѣ́ти дерза́ю, Чи́стую Ма́терь Твою́, / на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, / Ты́ бо взыва́ющимъ и прося́щимъ вѣ́рою моле́нія исполня́еши. / Ты́ мнѣ́ у́бо да́руй язы́къ прино́сенъ и по́мыслъ непосты́денъ: / вся́кое бо дая́ніе сія́нія отъ Тебе́ низпосыла́ется, Свѣтопода́телю, / во утро́бу всели́выйся приснодѣ́вственную.

Пѣ́снь 7.

Ирмо́съ: Безсту́днѣй я́рости же и огню́ / Боже́ственное жела́ніе сопротивля́яся, / о́гнь у́бо ороша́ше, / я́рости же смѣя́шеся, / богодохнове́нною слове́сною преподо́бныхъ тривѣща́нною цѣвни́цею, / противовѣща́я мусикíйскимъ орга́номъ посреди́ пла́мене: / препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, / но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. / Съ Не́ю игра́юще, вопіе́мъ Христу́: / препросла́вленный отце́въ и на́шъ Бо́же, благослове́нъ еси́.

Въ кимва́лѣхъ – усты́ чи́стыми, мусикíйски же – се́рдцемъ свѣ́тлымъ, / доброгла́сною трубо́ю – высо́кою мы́слію, / Дѣ́вы и Чи́стыя въ наро́читый избра́нный де́нь преставле́нія, / дѣ́тельными пле́щуще рука́ми, вопіе́мъ: / препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: / Бо́жія бо сла́вы Селе́ніе, отъ Сіо́на преставля́ется къ небе́сному жили́щу, / идѣ́же гла́съ чи́стъ пра́зднующихъ, / гла́съ несказа́ннаго ра́дованія, и въ весе́ліи вопію́щихъ Христу́: / препросла́вленный отце́въ и на́шъ Бо́же, благослове́нъ еси́.

[Инъ.]

Юноши и дѣ́вы, Дѣ́выя же и Богома́тере па́мять чту́ще, / ста́рцы и кня́зи, ца́ріе и судіи́, по́йте: / оте́цъ на́шихъ Го́споди и Бо́же, благослове́нъ еси́.

Да востру́бятъ трубо́ю духо́вною го́ры небе́сныя, / да ра́дуются хо́лми, и да игра́ютъ боже́ственніи апо́столи: / Цари́ца къ Сы́ну преставля́ется, съ Ни́мъ ца́рствующи.

Всесвяще́нное преставле́ніе боже́ственныя Твоея́ и нетлѣ́нныя Ма́тере, / премíрныя вы́шнихъ си́лъ совокупи́ чи́ны, / весели́тися съ су́щими на земли́, Тебѣ́ пою́щими: / Бо́же, благослове́нъ еси́.

Катава́сія: Не послужи́ша тва́ри богому́дріи, / па́че Созда́вшаго, / но, о́гненное преще́ніе му́жески попра́вше, / ра́довахуся, пою́ще: / препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Пла́мень, ороша́ющь преподо́бныя, / злочести́выя же попаля́ющь, / А́нгелъ Бо́жій всемо́щный показа́ отроко́мъ, / живонача́льный же исто́чникъ содѣ́ла Богоро́дицу, / тлю́ сме́рти и живо́тъ точа́щу пою́щимъ: / Содѣ́теля еди́наго пои́мъ, изба́вленніи, / и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, / все́ мно́жество богосло́вовъ въ Сіо́нѣ: / ка́мо и́деши ны́нѣ, Ски́ніе, – зову́ще, – Бо́га Жива́го? / Не преста́й призира́ющи вѣ́рою пою́щія: / Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Я́коже, воздѣ́вши ру́цѣ, исхо́диши Всенепоро́чная, / ру́цѣ, и́миже Бо́га носи́ла еси́ пло́тію, / со дерзнове́ніемъ, я́ко Ма́ти, рекла́ еси́ къ Рожде́нному: / я́же Ми́ да́лъ еси́, во вѣ́ки сохрани́, вопію́щія Тебѣ́: / Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

[Инъ.]

Па́мять Твою́, Чи́стая Дѣ́во, / Нача́ла же, и Вла́сти, и Си́лы, А́нгели, Арха́нгели, / Престо́ли, Госпо́дства, Херуви́ми сла́вятъ и стра́шніи Серафи́ми; / человѣ́ческій же ро́дъ – пое́мъ и превозно́симъ во вся́ вѣ́ки.

И́же стра́нно всели́выйся, Богоро́дице, въ чи́стое чре́во Твое́, воплоща́емь, / Се́й, всесвяще́нный ду́хъ Тво́й пріе́мъ, / у Себе́ упоко́и, я́ко должни́къ Сы́нъ. / Тѣ́мже Тя́ пое́мъ, Дѣ́во, и превозно́симъ во вся́ вѣ́ки.

О, вы́ше ума́ чуде́съ Приснодѣ́вы же и Богома́тере! / Во гро́бъ бо все́льшися, показа́ ра́й, / ему́же предстоя́ще дне́сь, ра́дующеся, пое́мъ: / Го́спода по́йте, дѣла́, и превозноси́те Его́ во вся́ вѣ́ки.

Катава́сія: Отроки благочести́выя въ пещи́ / Рождество́ Богоро́дичо спасло́ е́сть, / тогда́ у́бо образу́емое, / ны́нѣ же дѣ́йствуемое, / вселе́нную всю́ воздвиза́етъ пѣ́ти Тебѣ́: / Го́спода по́йте, дѣла́, / и превозноси́те Его́ во вся́ вѣ́ки.

На 9-й пѣ́сни Честнѣ́йшую... не пое́мъ, но пое́мъ припѣ́вы пра́здника: Ро́ди вси́ блажи́мъ Тя́, / еди́ну Богоро́дицу. Или́: А́нгели успе́ніе Пречи́стыя ви́дѣвше, удиви́шася, / ка́ко Дѣ́вая восхо́дитъ отъ земли́ на не́бо. Та́же ирмо́съ: Побѣжда́ются естества́ уста́вы... И на кíйждо тропа́рь пою́тъ то́йже припѣ́въ по еди́ножды.

Пѣ́снь 9.

Ирмо́съ: Побѣжда́ются естества́ уста́вы / въ Тебѣ́, Дѣ́во Чи́стая: / дѣ́вствуетъ бо рождество́ и живо́тъ предобруча́етъ сме́рть; / по рождествѣ́ Дѣ́ва и по сме́рти жива́, / спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, / же́нскую ду́шу рука́ми нося́щаго, / пречи́сто бо Ро́ждшей, сынолѣ́пно провозглаша́ше: / гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, / со стра́хомъ зря́ще и гла́сомъ ве́ліимъ вѣща́юще: / въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Посе́мъ втора́го кано́на припѣ́въ: Велича́й, душе́ моя́, / отъ земли́ на не́бо честно́е преставле́ніе Бо́жія Ма́тере. Пою́тъ на кíйждо тропа́рь по еди́ножды.

[Инъ.]

Пріиди́те въ Сіо́нъ, на Боже́ственную и ту́чную Го́ру жива́го Бо́га, / возра́дуемся, Богоро́дицу зря́ще: / къ зѣло́ бо лу́чшей и Боже́ственнѣй сѣ́ни, / я́ко Ма́терь, Сію́ во Свята́я святы́хъ Христо́съ преста́ви.

Пріиди́те, вѣ́рніи, ко гро́бу присту́пимъ Бо́жія Ма́тере, / и объи́мемъ сердцы́ и устна́ми, очесы́ и лице́мъ чи́сто прикаса́ющеся / и почерпа́юще исцѣле́ній незави́стныя да́ры от исто́чника приснотеку́щаго.

Пріими́ отъ на́съ пѣ́снь исхо́дную, Ма́ти жива́го Бо́га, / и свѣтоно́сною Твое́ю и Боже́ственною осени́ благода́тію, / Импера́тору – побѣди́тельная, христолюби́вымъ лю́демъ – ми́ръ, / оставле́ніе – пою́щимъ и душа́мъ спасе́ніе подаю́щи.

Та́же пое́мъ втора́го кано́на припѣ́въ и катава́сію.

Катава́сія: Вся́къ земноро́дный / да взыгра́ется, Ду́хомъ просвѣща́емь, / да торжеству́етъ же безпло́тныхъ умо́въ естество́, / почита́ющее свяще́нное преставле́ніе Богома́тере, / и да вопіе́тъ: / ра́дуйся, Всеблаже́нная Богоро́дице, / Чи́стая Приснодѣ́во. [И покло́нъ.]

Свѣти́ленъ. Подо́бенъ: Не́бо звѣзда́ми.

Апо́столи отъ коне́цъ совоку́пльшеся здѣ́, / въ Геѳсиманíйстѣй ве́си погреби́те тѣ́ло Мое́, / и Ты́, Сы́не и Бо́же Мо́й, пріими́ ду́хъ Мо́й. [Три́жды.]

На хвали́техъ стихи́ры на 4, гла́съ 4.
Подо́бенъ: Я́ко до́бля.

Въ сла́вномъ успе́ніи Твое́мъ / небеса́ ра́дуются, / и а́нгельская возра́довашася во́инства, / вся́ же земля́ весели́тся, / пѣ́снь Тебѣ́ исхо́дную провозглаша́ющи, / Ма́тери всѣ́ми Влады́чествующаго, / Неискусобра́чная Пресвята́я Дѣ́во, / Я́же ро́дъ человѣ́ческій изба́вльшая / прароди́тельнаго осужде́нія. [Два́жды.]

Отъ коне́цъ стеко́шася / апо́столовъ лу́чшіи, / богонача́льнымъ манове́ніемъ, погребсти́ Тя́, / и отъ земли́ взе́млему Тя́ къ высотѣ́ зря́ще, / гла́съ Гавріи́ловъ ра́достію вопія́ху Тебѣ́: / ра́дуйся, Носи́ло Божества́ всего́. / Ра́дуйся, Еди́на, земна́я съ вы́шними, / Рождество́мъ Твои́мъ совоку́пльшая.

Я́же Живо́тъ ро́ждшая, / къ жи́зни премину́ла еси́, / честны́мъ успе́ніемъ Твои́мъ, безсме́ртнѣй, / доринося́щимъ Тя́ А́нгеломъ, / Нача́ломъ и Си́ламъ, / апо́столомъ и проро́комъ, / и все́й тва́ри, / пріе́мшу же нетлѣ́нными дла́ньми Сы́ну Твоему́, / непоро́чную ду́шу Твою́, / Дѣ́во Ма́ти Богоневѣ́сто.

Сла́ва, и ны́нѣ, гла́съ 6. На безсме́ртное Твое́ успе́ніе, / Богоро́дице, Ма́ти Живота́, / о́блацы апо́столы по возду́ху восхища́ху, / и, по мíру разсѣ́янныя, / во еди́номъ ли́цѣ предста́ша пресвято́му Твоему́ тѣ́лу, / е́же и погре́бше че́стно, / гла́съ Тебѣ́ Гавріи́ловъ, пою́ще, вопія́ху: / ра́дуйся, Благода́тная Дѣ́во, / Ма́ти Безневѣ́стная, / Госпо́дь съ Тобо́ю. / Съ ни́миже, я́ко Сы́на Твоего́ и Бо́га на́шего моли́, / спасти́ся душа́мъ на́шимъ.

Славосло́віе вели́кое. По славосло́віи тропа́рь: Въ рождествѣ́ дѣ́вство сохрани́ла еси́... [Еди́ножды] Въ концѣ́ 1-го часа́, вмѣ́сто Взбра́нной Воево́дѣ, пое́тся конда́къ: Въ моли́твахъ неусыпа́ющую... Нау́тріе, предъ водоосвяще́ніемъ, чте́тся Ака́ѳистъ на Успе́ніе Пресвяты́я Богоро́дицы, и по водоосвяще́ніи окропля́ются кресты́ и ма́лые хлѣ́бы, для раздая́нія наро́ду.

НА ЛИТУРГІИ

Блаже́нна, 1-го кано́на пѣ́снь 3-я, на 4 и 2-го кано́на пѣ́снь 6-я, на 4.

По вхо́дѣ тропа́рь пра́здника,
гла́съ 1:

Въ рождествѣ́ дѣ́вство сохрани́ла eси́, / во успе́ніи мíра не оста́вила eси́, Богоро́дице, / преста́вилася eси́ къ животу́, Ма́ти су́щи Живота́, / и моли́твами Твои́ми избавля́еши отъ сме́рти ду́ши на́ша.

Сла́ва, и ны́нѣ:
конда́къ, гла́съ 2:

Въ моли́твахъ неусыпа́ющую Богоро́дицу / и въ предста́тельствахъ непрело́жное упова́ніе, / гро́бъ и умерщвле́ніе не удержа́ста: / я́коже бо Живота́ Ма́терь, / къ животу́ преста́ви, / во утро́бу Всели́выйся приснодѣ́вственную.

Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Я́ко призрѣ́ на смире́ніе рабы́ Своея́, се́ бо отъ ны́нѣ ублажа́тъ Мя́ вси́ ро́ди.

Апо́столъ къ Филипписíемъ,
зача́ло 240.

Бра́тiе, сiе́ да му́дрствуется въ ва́съ, е́же и во Христѣ́ Иису́сѣ: И́же, во о́бразѣ Бо́жiи сы́й, не восхище́нiемъ непщева́ бы́ти ра́венъ Бо́гу: но себе́ ума́лилъ, зра́къ раба́ прiи́мъ, въ подо́бiи человѣ́честѣмъ бы́въ, и о́бразомъ обрѣ́теся я́коже человѣ́къ: смири́лъ себе́, послушли́въ бы́въ да́же до сме́рти, сме́рти же кре́стныя. Тѣ́мже и Бо́гъ его́ превознесе́ и дарова́ ему́ и́мя, е́же па́че вся́каго и́мене, да о и́мени Иису́совѣ вся́ко колѣ́но поклони́тся небе́сныхъ и земны́хъ и преиспо́днихъ, и вся́къ язы́къ исповѣ́сть, я́ко Госпо́дь Иису́съ Христо́съ въ сла́ву Бо́га Отца́.

Флп 2:5–11

Аллилу́ія, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́.

Ева́нгеліе Луки́, зача́ло 54.

Во вре́мя о́но, вни́де Иису́съ въ ве́сь нѣ́кую: жена́ же нѣ́кая и́менемъ Ма́рѳа прiя́тъ Его́ въ до́мъ сво́й. И сестра́ е́й бѣ́ нарица́емая Марі́а, я́же и сѣ́дши при ногу́ Иису́сову, слы́шаше сло́во Его́. Ма́рѳа же мо́лвяше о мно́зѣ слу́жбѣ, ста́вши же рече́: Го́споди, не бреже́ши ли, я́ко сестра́ моя́ еди́ну мя́ оста́ви служи́ти? Рцы́ у́бо е́й, да ми́ помо́жетъ. Отвѣща́въ же Иису́съ рече́ е́й: Ма́рѳо, Ма́рѳо, пече́шися, и мо́лвиши о мно́зѣ, еди́но же е́сть на потре́бу: Марі́а же благу́ю ча́сть избра́, я́же не отъи́мется от нея́. Бы́сть же егда́ глаго́лаше сiя́, воздви́гши нѣ́кая жена́ гла́съ от наро́да, рече́ Ему́: блаже́но чре́во носи́вшее Тя́, и сосца́, я́же еси́ сса́лъ. О́нъ же рече́: тѣ́мже у́бо блаже́ни слы́шащiи сло́во Бо́жiе и храня́щiи е́.

Лк 10:38–42; 11:27–28

Вмѣ́сто Досто́йно:

А́нгели успе́ніе Пречи́стыя ви́дѣвше, удиви́шася, / ка́ко Дѣ́вая восхо́дитъ отъ земли́ на не́бо.

Гла́съ 1: Побѣжда́ются естества́ уста́вы / въ Тебѣ́, Дѣ́во Чи́стая: / дѣ́вствуетъ бо рождество́ и живо́тъ предобруча́етъ сме́рть; / по рождествѣ́ Дѣ́ва и по сме́рти жива́, / спаса́еши при́сно, Богоро́дице, наслѣ́діе Твое́.

Прича́стенъ: Ча́шу спасе́нія пріиму́, и и́мя Госпо́дне призову́. / Аллилу́ія. [Три́жды.]

По литургíи кре́стный хо́дъ со святы́ми ико́ны окру́гъ це́ркви, и посе́мъ быва́етъ раздая́ніе святы́хъ кресто́въ и благослове́нныхъ хлѣ́бовъ наро́ду.

 



(c) Переводы Св. Писания и Богослужебных текстов: о. Амвросий (Тимрот).
При любом использовании материалов сайта, ссылка на автора обязательна.

 

 
Рейтинг@Mail.ru Система Orphus