0—15 Суббота 5-й седмицы Великого поста. Иный четверопеснец

ID=7239

date=0--15

Иный четверопеснец, глас 5

Песнь 6

Па́мять соверша́юще му́ченик, / Го́сподеви возсле́м пе́сни, / днесь Боже́ственно веселя́щеся.

Мече́в и огня́ не убоя́вшеся, / дерза́юще в ве́ре страстоте́рпцы, / мучи́тели в сем уязви́сте.

Троичен: Тро́ицу Ли́цы воспева́ю Тя, / Еди́нице по существу́ покланя́юся, / Тебе́, О́тче, Сы́не и Ду́ше Святы́й.

Богородичен: А́нгел и челове́к благохвале́ние еси́, / я́ко родила́ е́си, Де́во, Христа́, Спа́са душа́м на́шим.

Сме́ртию живо́т премени́вше, / ра́дуетеся, на Небесе́х живу́ще, / страстоте́рпцы пресла́внии Христа́ Бо́га.

Сме́ртию и живото́м облада́яй, / ве́рою преста́вльшияся от жития́, Христе́, / со святы́ми Твои́ми упоко́й.

Ирмос: От ки́та проро́ка изба́вил еси́, / мене́ же из глубины́ грехо́в возведи́, / Го́споди, и спаси́ мя.

Песнь 7

Благослове́н еси́, Бо́же, / показа́вый до́блия о Тебе́ стра́ждущия му́ченики, / препе́тый и препросла́вленный.

Благослове́н еси́, Бо́же, / страстоте́рпцы моли́твенники нам к Тебе́ подава́яй, / препе́тый и препросла́вленный.

Троичен: Благослове́н еси́, Бо́же, / еди́н у́бо Естество́м, Ли́цы же треми́ познава́емый, / препе́тый и препросла́вленный.

Богородичен: Благослове́н еси́, Бо́же, / рожде́йся безсе́менно, и Ро́ждшую показа́вый чисто́тствующую, / препе́тый и препросла́вленный.

Благослове́н еси́, Бо́же, / зве́ри укроти́вый и погаси́вый огнь, / в сла́ву святы́х Твои́х, препе́тый и препросла́вленный.

Благослове́н еси́, Бо́же, / от сме́рти в безконе́чный живо́т преложи́вый, / ве́рою в житии́ послужи́вшия Тебе́.

Ирмос: Благослове́н еси́, Бо́же, / ви́дяй бе́здны / и на Престо́ле Сла́вы седя́й, / препе́тый и пресла́вный.

Песнь 8

Ли́цы му́ченик святи́и, / помяни́те любо́вию воспева́ющия вы / и превознося́щия Христа́ во ве́ки.

Мече́м усека́еми, ра́довахуся му́ченицы, пою́ще Христа́ / и превознося́ще во вся ве́ки.

Троичен: Странноле́пно разделя́ется Тро́ица / и пребыва́ет неразде́льна, я́ко Бог, / Ю́же превозно́сим во вся ве́ки.

Богородичен: Де́ва Младе́нца роди́, / Бог бо из Нея́ вочелове́чися, / вся тварь да пое́т Его́ во ве́ки.

Столпи́ му́жества яви́шася, / паде́нием диа́волим ра́дующеся му́ченицы, / пою́ще Христа́ и превознося́ще во ве́ки.

У Авраа́ма вне́дритися сподо́би, Го́споди, рабы́ Твоя́, / ве́рою преста́вльшияся к Тебе́, и наде́ждею.

Ирмос: Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

Песнь 9

Соверша́юще торжество́ му́ченическое, / днесь лю́дие воскли́кнем пе́сньми, / пою́ще Христу́ подвигополо́жнику / и побе́ды на враги́им пода́вшему, / Его́же в пе́снех велича́ем.

Ноготьми́ растерза́еми и усеца́еми мече́м на у́ды, / совокупи́стеся Христу́ любе́зно, всехва́льнии му́ченицы. / Тем и ны́не на небесе́х веселя́щеся, о всех моли́теся.

Еди́но Существо́м воспева́ю Тя, Безнача́льная Тро́ице, / честна́я, живонача́льная, несеко́мая Еди́нице, / О́тче нерожде́нный и рожде́нный Сло́ве и Сы́не, Ду́ше Святы́й, / нас спаси́, пою́щих Тя.

Богородичен: Па́че ума́ рождество́ Твое́, Богома́ти, / без му́жа бо зача́тие в Тебе́ и де́вственно рожде́ние бысть, / и́бо Бог есть роди́выйся, / Его́же велича́юще, Тя, Де́во, ублажа́ем.

До́блее во́инство Царя́ всех и Бо́га, / му́чеников пе́сньми венча́им, лю́дие, / ти́и бо победи́ша бесо́вския полки́ я́ве, / я́же воспева́юще, Влады́ку велича́ем.

Егда́ все созда́ние Твое́ возста́виши суди́тися, Христе́, я́же прия́л еси́, / и ны́не рабы́ Твоя́ ве́рныя поми́луй, / прости́, я́же в житии́ прегреше́ния их, / и со святы́ми Твои́ми упоко́й я́во ве́ки.

Ирмос: Иса́ие, лику́й, / Де́ва име́ во чре́ве / и роди́ Сы́на Емману́ила, / Бо́га же и Челове́ка, / Восто́к и́мя Ему́, / Его́же велича́юще, / Де́ву ублажа́ем.