ID=7381
date=0--2
Трипеснец господина Космы, глас 6
Песнь 5
Ирмос: К Тебе́ у́тренюю, милосе́рдия ра́ди Себе́ истощи́вшему непрело́жно, и до страсте́й безстра́стно прекло́ншемуся, Сло́ве Бо́жий, мир пода́ждь ми па́дшему, Человеколю́бче.
Умы́вше ноги, и предочи́стившеся Та́инства Причаще́нием Боже́ственнаго ны́не, Христе́, Твоего́, служи́телие от Сио́на на Елео́нскую го́ру вели́кую с Тобо́ю взыдо́ша, пою́ще Тя, Человеколю́бче.
Зри́те, рекл еси́, дру́зи, не бо́йтеся, ны́не бо прибли́жися час, я́ту Ми бы́ти, и убие́ну рука́ма беззако́нных: вси же расточите́ся, Мене́ оста́вивше, и́хже соберу́ пропове́дати Мя, Человеколю́бца.
Песнь 8
Ирмос: Столп зло́бы богопроти́вныя Боже́ственнии о́троцы обличи́ша: на Христа́ же шата́ющееся беззако́нных собо́рище сове́тует тще́тная, уби́ти поуча́ется, живо́т Держащаго дланию: Его́же вся тварь благослови́т, сла́вящи во ве́ки.
От ве́ждей ученико́м ны́не сон, рекл еси́, Христе́, отряси́те, в моли́тве же бди́те, да не в напа́сть вни́дете, и наипа́че, Си́моне: крепча́йшему бо бо́лий иску́с. Разуме́й Мя, Пе́тре: Его́же вся тварь благослови́т, сла́вящи во ве́ки.
Скве́рна сло́ва усте́н, никогда́же изреку́ Тебе́, Влады́ко, с Тобо́ю умру́ я́ко благоразу́мен, а́ще и вси отве́ргутся, возопи́ Петр: ни плоть, ниже́ кровь, но Оте́ц Твой откры́ ми Тя: Его́же вся тварь благослови́т, сла́вящи во ве́ки.
Глубину прему́дрости Боже́ственныя и ра́зума, не всю испыта́л еси́, бе́здну же мои́х суде́б не пости́гл еси́, челове́че, Го́сподь рече́: плоть у́бо сый не хвали́ся, три́жды бо отве́ржешися Мене́: Его́же вся тварь благослови́т сла́вящи во ве́ки.
Отрица́ешися, Си́моне Петре, е́же сотвори́ши ско́ро, я́коже рече́ся, и к тебе́ отрокови́ца еди́на прише́дши устраши́т тя, Госпо́дь рече́: го́рце прослези́в, обря́щеши Мя оба́че ми́лостива: Его́же вся тварь благослови́т, сла́вящи во ве́ки.
Песнь 9
Ирмос: Честне́йшую Херувим, и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Па́губное собо́рище богоме́рзких, лука́внующих богоуби́йц со́нмище, предста́, Христе́, Тебе́, и я́ко непра́ведника влеча́ше, Зижди́теля всех, Его́же велича́ем.
Зако́на не разуме́юще нечести́вии, гла́сом проро́ческим поуча́ющеся вотще́, я́ко овча́ влеча́ху Тя, всех Влады́ку, непра́ведно закла́ти: Его́же велича́ем.
Язы́ком изда́нную жизнь, с кни́жники уби́ти свяще́нницы преда́ху, уя́звлени самозави́стною зло́бою, естество́м Животодавца, Его́же велича́ем.
Обыдо́ша я́ко пси мно́зи, и уда́риша, Царю́, лани́ту Твою́ зауше́нием: вопроша́ху Тя, Тебе́ же ло́жна свиде́тельствоваху. И вся претерпе́в, всех спасл еси́.