ID=7215
date=0--22
Ин четверопеснец господина Феодора, глас 4
Песнь 6
Пло́ти и кро́ве святи́и не пощаде́вше, ко вся́кому муче́нию ста́сте небоя́зненни, Христа́ не отмета́ющеся: те́мже с небе́с низпосла́ Христо́с ва́м венцы́.
Му́ченик торжество́ усря́щим, просвети́вшеся де́тельми, и возопии́м богодухнове́нными пе́сньми: вы́ есте́ вои́стинну денни́цы на земли́, Христо́вы му́ченицы.
Троичен: Тро́ице Свята́я сла́влю Тя́, Естество́ безнача́льное, еди́наго Бо́га, еди́наго Го́спода, три́ Ли́ца, Отца́, Сы́на и Ду́ха: нерожде́нна, рожде́нна, исхо́дна, Ту́южде и присносу́щну.
Богородичен: О блаже́нная Богоневе́сто, ка́ко родила́ еси́ без му́жа, и пребыла́ еси́ я́коже пре́жде? Бо́га бо родила́ еси́, чу́до стра́шное: но моли́ спасти́ся пою́щым Тя́.
Усече́ния удо́в ва́ших зря́ще, наслажда́стеся кровьми́ ра́дующеся: но моли́те о на́с приле́жно Го́спода, му́ченицы присносла́внии.
От земли́ созда́вый мя́, и оживи́вый мя́, и в зе́млю возврати́тися мне́ па́ки реки́й, я́же прия́л еси́ рабы́ твоя́ упоко́й, и от тли́ сме́ртныя возведи́ Го́споди.
Ирмос: Бу́рею грехо́вною погружа́емь, я́ко во чре́ве ки́тове содержи́мь, с проро́ком зову́ Ти: возведи́ от тли́ живо́т мо́й Го́споди, и спаси́ мя.
Песнь 7
Возвели́чивый святы́я Твоя́ вся́, зна́меньми удиви́в я́ в ми́ре: благослове́н еси́ во ве́ки Го́споди Бо́же отце́в на́ших.
Вся́кий ви́д ра́н проше́дше, и коле́на ваа́лу не поко́ршеся преклони́ти, венцы́ сла́вы взя́сте от Бо́га Христо́вы му́ченицы.
Троичен: Во Еди́нице Тро́ице, покланя́емое Существо́, О́тче, Сы́не и Ду́ше, воспева́ющыя Тя́ сохраня́й, Бо́же отце́в на́ших.
Богородичен: Де́во Ма́ти Отрокови́це всесве́тлая, еди́на к Бо́гу хода́тайство, не преста́й Влады́чице моли́ти спасти́ся на́м.
Безсме́ртному Царю́ во́инствовавше, и ве́ру к Нему́ показа́вше соверше́нную, кро́вь свою́ му́ченицы за Него́ излия́сте.
Иде́же све́т Тво́й жи́зни истека́ет, преложи́ я́же преста́вил еси́ от вре́менных, ве́рныя Твоя́ рабы́, Го́споди Бо́же оте́ц на́ших.
Ирмос: Глаго́лавый на горе́ с Моисе́ем, и о́браз де́вства явле́й в купине́, благослове́н еси́ Бо́же оте́ц на́ших.
Песнь 8
О до́браго измене́ния, и́мже обрето́сте сме́ртию живо́т, священному́ченицы Христо́вы, огня́ и меча́, мра́за и звере́й ника́коже убоя́вшеся, и вопию́ще: по́йте Го́спода, и превозноси́те во вся́ ве́ки.
Горе́ ли́к а́нгельский, до́ле же мы́ земни́и, хва́лим му́ченицы Христо́вы, стра́нная страда́ния, и по́двиги ва́шего му́жества, благословя́ще, пою́ще Го́спода, и превознося́ще во вся́ ве́ки.
Троичен: Све́т, Живо́т же и Животы́, почита́ю Тя́ Отца́, и Сы́на, и Ду́ха исхо́дна, Естество́ еди́но, три́ Ипоста́си, Бо́га Еди́наго поя́, благословлю́ Тя, пою́ Тя Го́спода, и превозношу́ тя во вся́ ве́ки.
Богородичен: Кто́ не воспое́т Тя́ от земноро́дных, нескве́рная Чи́стая голуби́ца? Ты́ бо родила́ еси́ на́м Све́т вели́кий, жи́зни бога́тство, Иису́са Спа́са: Его́же пое́м хва́ляще я́ко Го́спода, и превозно́сим во вся́ ве́ки.
По́двиги чу́дныя, му́ченицы, сла́вяще ва́шя, благоде́теля и Бо́га благослови́м и покланя́емся, на по́прище по́двигов ва́с укрепи́вшаго: Его́же превозно́сим во вся́ ве́ки.
Ты́ сме́рти и живота́ Госпо́дь сы́й и Бо́г, преста́вльшихся благоче́стно воздвиза́яй, та́мо преложи́ в селе́ниих пра́ведных, благословя́щыя, пою́щыя Тя́ Го́споди, и превознося́щыя во вся́ ве́ки.
Ирмос: Земля́, и вся́ я́же на не́й, мо́ре и вси́ исто́чницы, небеса́ небе́с, све́т и тьма́, мра́з и зно́й, сы́нове челове́честии, свяще́нницы благослови́те Го́спода, и превозноси́те Его́ во ве́ки.
Песнь 9
Воспева́ем вси́ па́мяти ва́шя, му́ченицы прехва́льнии, по́двиги ви́дяще свяще́нных ва́ших страда́ний, и удиви́вшеся Христа́ велича́ем.
Дру́г ко дру́гу стра́ждуще глаго́лаху страстоте́рпцы: пло́ти не пощади́м, прииди́те, у́мрем о Христе́, да во вся́ ве́ки поживе́м лику́юще непреста́нно.
Троичен: О Тро́ице во еди́ном Естестве́, Тя́ воспева́ющыя, О́тче нерожде́нный, и рожде́нный Сы́не, и Ду́ше исхо́дный, Твое́ю ми́лостию невреди́мы соблюди́.
Богородичен: Ра́дуйся Всечестна́я Чи́стая, де́вства похвало́, ма́терей утвержде́ние, челове́ков по́моще, и ми́ра ра́досте, Мари́е Ма́ти, и Рабо́ Бо́га на́шего.
Ли́че святы́х, приими́ мольбу́ мою́: и я́ко сподо́бил мя́ еси́ Кре́ст целова́ти, и спаси́тельней стра́сти поклони́тися мне́, Христа́ моли́те.
Осла́би, оста́ви Ще́дре, к Тебе́ Человеколю́бцу преста́вленным, и си́х поко́й в селе́ниих избра́нных: Ты́ бо еси́ Жи́знь и Воскре́сние.
Ирмос: Велича́ем вси́ человеколю́бие Твое́, Христе́ Спа́се на́ш, сла́во ра́б Твои́х, и ве́нче ве́рных, возвели́чивый па́мять Ро́ждшия Тя́.