0--23 Пяток 4-й седмицы Великого поста. Ин трипеснец

ID=7212

date=0--23

Ин трипеснец, глас 4

Песнь 5

Дне́сь предлага́ется Кре́ст Тво́й, дре́во жи́зни покланя́емое, и ми́р ра́дуется прише́ствием Ду́ха, того́ облобыза́яй.

Предлежа́щий зря́ще Кре́ст Тво́й служи́телие небе́снии, пою́т Тя́ Го́споди, и де́мони трепе́щут, не терпя́ще держа́вы Твоея́.

Троичен: Тро́ицу просла́вим правосла́вно со Отце́м и Сы́ном, и Ду́ха Свята́го, еди́но Божество́, Еди́ницу Триипоста́сную.

Богородичен: Ма́терь Тя́ и Де́ву правосла́вно испове́дуем ве́рнии, неизрече́нно роди́вшую Христа́ Бо́га на́шего, еди́наго Многоми́лостиваго.

На пе́вке, и ке́дре, и кипари́се распны́йся Сы́не Бо́жий, освяти́ вся́ ны́, и живоно́сную Твою́ стра́сть сподо́би ви́дети.

Ирмос: Из но́щи у́тренююще, просвети́ на́с животво́рче Кре́сте Христо́в, со стра́хом покланя́ющыяся тебе́, и де́нь спаси́тельный при́сно возсия́й на́м.

Песнь 8

Да то́чат го́ры разу́мно пра́вду, и хо́лми да веселя́тся, Дре́во кре́стное покланя́емо ви́дяще: его́же превозно́сим Христе́ во ве́ки.

Благода́ть Креста́ Твоего́ стра́шная: и́бо де́монов изгоня́ет полки́, челове́ком подаю́щи исцеле́ний во́ды: те́мже Тя́ пое́м Христе́ во ве́ки.

Троичен: Безнача́льнаго Отца́, и Сы́на со Святы́м воспои́м Ду́хом, Тро́ицу единосу́щную, еди́но нача́ло, и Бо́га хва́ляще, пою́ще Его́ благоче́стно во ве́ки.

Богородичен: Вся́к язы́к земноро́дный пое́т Тя́ Де́во, я́ко све́т непристу́пный возсия́ла еси́, просвеща́ющий ми́р, Христа́ Бо́га: Его́же превозно́сим при́сно во ве́ки.

Ра́дуются концы́ земни́и поклоне́нию Креста́ Твоего́ Человеколю́бче: а́нгели на небесе́х ликовству́ют дне́сь с на́ми, пою́ще Тя́ Христе́ во ве́ки.

Ирмос: Вся́ дела́ Бо́жия, и вся́ тва́рь, благослови́те Го́спода, я́ко челове́ком от земли́ возсия́ све́т, и вселе́нную всю́ просвети́, и жи́знь ве́чную ми́ру дарова́, по́йте лю́дие, и превозноси́те Его́ во ве́ки.

Песнь 9

Кре́ст честны́й, его́же объе́млют а́нгельская во́инства, и мы́ кла́няющеся велича́ем.

Дре́во пречи́стое, и́мже причасти́хомся жи́зни, пре́жде уме́ршии, Кре́ст Спа́сов велича́ем.

Троичен: Отца́ безнача́льна, Сы́на собезнача́льна, и Ду́ха сопресто́льна, Тро́ицу Святу́ю велича́ем.

Богородичен: Ма́терь безневе́стную, и Де́ву вси́ Чи́стая воспева́ем Тя́: без се́мене бо Созда́теля родила́ еси́.

Сподо́бившыяся ви́дети тя́, и поклони́тися, благопоспе́шствуй, предвари́ти пресвяту́ю стра́сть, Кре́сте Христо́в.

Ирмос: Безсе́менное Рождество́ Твое́, Богоро́дице Чи́стая, Христа́ Бо́га на́шего, пе́сньми немо́лчными велича́ем.