ID=7119
date=0--29
И́ный четверопе́снец господи́на Фео́дора, глас 8
Песнь 6
Ны́не му́ченик торжество́, стеце́мся, и страда́ния и́х всечестна́я ублажа́юще, Христа́ си́х венча́вшаго воспои́м.
Боже́ственною разжига́еми любо́вию Христо́вою на у́глех огня́ преходи́сте я́ко на росе́, того́ пою́ще му́ченицы блаже́ннии.
Троичен: Боже́ственною разжига́еми любо́вию Христо́вою на у́глех огня́ преходи́сте я́ко на росе́, того́ пою́ще му́ченицы блаже́ннии.
Богородичен: От ко́рене твоего́ возсия́ цве́т жи́зни, Иессе́е пра́отче взыгра́й, спаса́яй ми́р, от Чи́стыя Отрокови́цы Христо́с Бо́г.
Огня́ и меча́, и сме́рти не убоя́вшеся, испове́дание соблюдо́сте спасе́ния, от Христа́ блаже́ннии укрепля́еми.
В ме́ртвых свобо́дь, я́ко сы́й Нача́льник живота́ и сме́рти, Ты́ упоко́й я́же прия́л еси́, и во дворы́ Твоя́ всели́ человеколю́бче.
Ирмос: Содержи́ма мя́ приими́ человеколю́бче, грехи́ мно́гими, и припа́дающа щедро́там твои́м, я́ко проро́ка Го́споди, и спаси́ мя́.
Песнь 7
Честны́х му́ченик показа́вый па́мяти, ра́дость Це́ркви Твое́й, и душе́вное утеше́ние: благослове́н еси́ во ве́ки Го́споди Бо́же оте́ц на́ших.
Не лже́м Ти́ Христе́, ни отмета́емся, му́ченицы вопия́ху, посреде́ муче́ний, беззако́нныя судии́ удивля́юще: благослове́н еси́ во ве́ки Го́споди Бо́же оте́ц на́ших.
Троичен: В тре́х Ли́цех еди́но Естество́ чти́м, Отца́, и Сы́на, и Ду́ха, проро́чески вопию́ще: благослове́н еси́ во ве́ки Го́споди Бо́же оте́ц на́ших.
Богородичен: Ка́ко я́ко Ма́ти ражда́еши, и Де́ва пребыла́ еси́? Яко Бо́га роди́х, не испыту́й ми́ о́браза: ели́ка бо хо́щет, твори́т, Богоотрокови́ца вопие́т.
Му́ченический ли́че богоизбра́нный, рабы́ твоя́ сподо́би, покло́нники бы́ти Боже́ственному и животворя́щему Спа́сову Кресту́.
Жи́зни сокро́вище, Царю́ безсме́ртне, я́же избра́л еси́ рабы́ Твоя́ в ве́ре и наде́жде, ве́чныя Твоея́ жи́зни сподо́би.
Ирмос: А́нгелом о́троки из огня́ спасы́й, и гремя́щую пе́щь преложи́вый на ро́су, благослове́н еси́ Бо́же оте́ц на́ших.
Песнь 8
Огнепа́льныя му́ки претерпе́вше, я́ко ороше́ние страда́льцы, с ра́достию взыва́сте: благослови́те дела́ Госпо́дня Го́спода.
Богово́инственный по́лк му́ченик, победи́вый ле́сть, победи́тельно взыва́ше: благослови́те дела́ Госпо́дня Го́спода.
Троичен: С Сы́ном Отцу́ поклони́мся, и Всесвято́му Ду́ху, вси́ ве́рно возопии́м: Тро́ице, Я́же во еди́нстве, спаси́ ду́шы на́шя.
Богородичен: Ты́ и Де́ва и Ма́ти яви́лася еси́, ро́ждши без му́жа, Бо́га все́х, Всечи́стая: но Того́ моли́, спасти́ рабы́ Твоя́.
Страстоте́рпец моли́твами, Твоя́ рабы́, и поклони́тися и ви́дети Христе́ Спа́се сподо́би, животворя́щий Кре́ст, Твоея́ бла́гости.
Разори́вый держа́ву сме́рти, из ме́ртвых воста́нием Твои́м, преста́вльшыяся упоко́й со избра́нными Твои́ми, хвали́ти Тя́ Го́спода.
Ирмос: Богоглаго́ливии о́троцы в пещи́ , со огне́м пла́мень попира́юще поя́ху: благослови́те дела́ Госпо́дня Го́спода.
Песнь 9
Му́чеников па́мять соверша́ем ве́рнии, да те́х причасти́мся сла́вы, восхваля́юще страда́льчество по́двигов и́х.
Ва́шего му́жества зве́рие убоя́шася зело́, угасе́ о́гнь, сокруши́шася лу́цы, в ва́с страда́льцы ди́вен Бо́г.
Троичен: Пребезнача́льное Естество́, триипоста́сная Еди́нице, О́тче, Сы́не и Ду́ше Святы́й, Све́те и Жи́зне Богонача́льная, Тебе́ славосло́вящыя сохраня́й.
Богородичен: Благослови́м Тя́ Бо́га Изра́илева, от Де́вы яви́вшагося ми́ру, и воздви́гшаго ро́г спасе́ния на́шего.
Моли́твенницы ми́ра, страстоте́рпцы Христо́вы, Того́ ви́дети Кре́ст, и поклони́тися сподо́бите все́х моли́твами ва́шими.
Иде́же истека́ет исто́чник жи́зни, Сы́не Бо́жий, и посеще́ния Твоего́ лица́ просвеще́ние, к Тебе́ преста́вльшыяся учини́.
Ирмос: Велича́ем Тя́ Ма́терь Бо́жию, и сла́вим Тя́ Богоро́дице Де́во, я́ко Спа́са ро́ждшую ду́ш на́ших.