0--37 Пяток 2-й седмицы Великого поста. Трипеснец Триоди

ID=6981

date=0--37

Трипеснец господи́на Ио́сифа, глас 4

Песнь 5

Во́лею влады́ко возне́слся еси́ на Кре́ст, и низве́ргл еси́ врага́: те́мже во́лею низве́ржена мя́ похотьми́ в про́пасть, благоутро́бием Твои́м испра́ви.

Омраче́на мя́ страстьми́ безме́стными душе́ю, просвети́ Иису́се, омрачи́вый со́лнце на Кресте́ просте́рся, и просвети́вый вся́ вселе́нныя исполне́ния.

По́стную пучи́ну преплы́ти ти́хо сподо́би мя́ Христе́, утиша́я во́лны мы́сли моея́, и в приста́нища Воскре́сния окорми́.

Богородичен: Чи́стую чисто́тствующим почти́м умо́м, добро́ту Иа́ковлю, Боже́ственными дея́ньми украша́ющеся, благоче́стно воспои́м, я́ко Ма́терь Бо́га на́шего.

Песнь 8

На Кресте́ пригво́ждься за благоутро́бие, разбо́йнику ра́й отве́рзл еси́: ны́не же разбие́на мя́ де́монскою лю́тостию, и в души́ всепло́тную я́зву прии́мша уврачу́й, отверза́я ми́ две́ри покая́ния Твои́м человеколю́бием.

Посто́м просвети́вше пло́ть, ду́шу доброде́тельми утучни́м, убо́гия напита́им, бога́тство неистощи́мое на небесе́х купу́юще, и воззове́м: Го́спода по́йте дела́ и превозноси́те Его́ во ве́ки.

Стра́стию Твое́ю тва́рь поколеба́ся, на Кресте́ Тя́ ви́девше пригвожда́ема, Спа́се Преблаги́й. Те́мже молю́ Тя, прило́ги коле́блемый при́сно змии́ными, утверди́ у́м мо́й Ще́дре, на тве́рдем ка́мени Твои́х хоте́ний.

Богородичен: Две́ре Бо́жия заключе́на, е́юже еди́н про́йде Госпо́дь, напра́ви мя́ к стезя́м Боже́ственным, и отве́рзи ми́ спасе́ния две́ри, Богоблагода́тная: к Тебе́ бо прибега́ю Де́во, еди́ней предста́тельнице ро́да челове́ческаго.

Песнь 9

Ка́мень Тя́ отсече́нный прови́де проро́к, от горы́ Де́вы Спа́се, сокруши́вшаго ка́мение Твои́м распя́тием. Те́мже отягче́на мя́ нечу́вствия ка́мением, я́ко Всеще́дрый, свободи́.

Пости́ся от зло́бы душе́ моя́, Боже́ственною любо́вию наслажда́ющися, две́ри отве́рзи вся́ким благи́м ви́дом, загражда́ющи лука́вства вхо́д, воздержа́нием и моле́нием.

Мене́ осужде́наго спаси́, осуди́вый Кресто́м Твои́м Влады́ко Спа́се мо́й вражду́, и да не пока́жеши гее́нне пови́нна, оскверне́наго страстьми́, и грехми́ омраче́наго.

Богородичен: Пощади́ мя́ Христе́, егда́ прии́деши суди́ти ми́ру со сла́вою, разреши́ мглу́ зло́б мои́х, мольба́ми Ро́ждшия Тя́, и насле́дника сотвори́ Небе́снаго Ца́рствия Твоего́.