ID=7763
date=0-38
Канон предпразднства , глас 5
Песнь 1
Горе́ ко Отцу́ Христо́с восхо́дит, и прино́сит пло́ть, ю́же от на́с восприя́т: того́ воспои́м в похвале́нии дне́сь, побе́дную пе́снь пою́ще.
Кни́ги писа́ний Боже́ственных, и про́поведи прему́дрых богоглаго́льник, коне́ц я́ве прия́ша: по воста́нии бо Влады́ка, восхо́дит со сла́вою в небе́сная.
Земля́ та́йно лику́ет, и небе́сная весе́лия исполня́ются о Вознесе́нии Христа́, дре́вле разстоя́щаяся соедини́вшаго благода́тию, и Е́вино прегражде́ние разори́вшаго
Песнь 3
Связа́в Свое́ю сме́ртию Сло́ве сме́рть, из ме́ртвых воскре́сл еси́ я́ве тридне́вен, и к небе́сным Спа́се возше́л еси́ со сла́вою, песносло́вящым безпло́тным Твое́ смотре́ние неизрече́нное.
Прише́л еси́ к земны́м Христе́ кроме́ те́ла, и обле́кся в пло́ть, Кре́ст претерпе́л еси́, и воскре́с из ме́ртвых, возше́л еси́ со сла́вою к началосве́тному Отцу́ Твоему́, умиротвори́вый вся́ческая.
Поиска́в Христе́ на земли́ заблу́ждшее овча́, незаблу́дным Сло́ве, сие́ счини́л еси́: и Возне́сся к небесе́м, се́л еси́ во сла́ве одесну́ю Твоего́ Роди́теля. Сла́ва мно́гому благоутро́бию Твоему́.
Песнь 4
Пре́жде грехо́м осужде́нное естество́ на́ше Всецарю́ Твои́м прия́тием поми́ловася, песносло́вящее Твое́ со стра́хом Воста́ние, и Боже́ственное Вознесе́ние.
Дивя́тся безпло́тных чи́ни, смотря́юще Тя́ Христе́ нося́ща те́ло земно́е, и возше́дша на о́блак, и к небе́сным восходя́ща.
Воспле́щим рука́ма, Госпо́дь воста́в из ме́ртвых, на небеса́ взы́де, повину́вшымся Ему́ а́нгелом, я́ко Творцу́ и Бо́гу на́шему.
Воспле́щим рука́ма, Госпо́дь воста́в из ме́ртвых, на небеса́ взы́де, повину́вшымся Ему́ а́нгелом, я́ко Творцу́ и Бо́гу на́шему.
Песнь 5
Разреши́в осужде́ние челове́чества, Христо́с воскре́се и к небе́сным, О́тчим соседе́нием поче́т, и́хже возлюби́.
По воскресе́нии радостнотвори́вый Христе́ ученики́ Твоя́, возше́л еси́ горе́, к Твоему́ Роди́телю, Его́же не разлучи́лся еси́, а́ще и челове́ком бесе́довал еси́.
Зако́ну предсе́ния, и пропове́дания богоглаго́ливых испо́лнив, Христе́ возше́л еси́, о́блаку Тя́ подъе́мшу Спа́се, к небе́сным.
Песнь 6
Стра́нное виде́ние яви́лся еси́ а́нгелом.челове́чь зра́к нося́, восхо́дом Твои́м стра́шным Человеколю́бче: те́мже со стра́хом воспева́ем Тя́.
Все́х Госпо́дь со сла́вою восхо́дит све́тло к Своему́ Безнача́льному Роди́телю: вся́ тва́рь ны́не пра́зднует лику́ющи.
Вся́к язы́к дне́сь да вопие́т: в воскликнове́нии, Христо́с взы́де, и в трубы́ Боже́ственном гла́се к небесе́м: и́хже не оста́ви.
Песнь 7
Растерза́в средосте́ние вражды́ Го́споди, Кресто́м и Стра́стию Твое́ю, о́блаком носи́мь возше́л еси́ со сла́вою к Безнача́льному Отцу́.
Тре́петни взыва́ху си́лы: возми́те врата́, прии́де Христо́с те́ло земно́е нося́, и Боже́ственною Стра́стию велиа́ра умертви́в.
Что́ твоя́ ри́зы червле́ны человеколю́бче? си́лам боже́ственным вопроша́ющым: точи́ло ны́не изгнето́х, христо́с восходя́ вопия́ше.
Пе́сньми Твое́ распя́тие Христе́, и Воста́ние согла́сно сла́вим, све́тло пра́зднующе о Вознесе́нии честне́м Твое́м во ве́ки.
Песнь 8
Све́т Тя́ от Све́та су́щий, о́блак све́тел подъя́т от горы́ Ма́сличныя, все́м зря́щым боже́ственным ученико́м Твои́м, и Тебе́ воспева́ющым во вся́ ве́ки.
Рука́ми псало́мски воспле́щим, воскре́се Христо́с Бо́г на́ш, и взы́де, отону́дуже сни́де к на́м человеколю́бно, умиротвори́вый дре́вле разстоя́щаяся.
Поя́ Дави́д вопие́т: Христо́с взы́де на херуви́мех Свои́х, и возлете́ я́ве на крилу́ у́мных чино́в: его́же превозно́сим во вся́ ве́ки.
Яви́лся еси́ ученико́м воскре́с от гро́ба, и си́х возве́л еси́ на го́ру Ма́сличную, отону́дуже о́блак све́тел подъе́м, взя́т к го́рним Христе́ Тебе́ со сла́вою.
Песнь 9
Свяще́нное торжество́ вся́ тва́рь прино́сит я́ве Вознесе́нию Твоему́ Сло́ве Бо́жий, и́мже прине́сл еси́ Отцу́ Твоему́, е́же от на́с естество́ восприя́л еси́ па́че сло́ва Неизме́нне.
Я́ко Бо́г сте́рл еси́ врата́ а́дова Спа́се и вереи́, и воскре́с из ме́ртвых, к небе́сным восте́кл еси́ чино́м а́нгельским, врата́ возми́те, вопию́щым со удивле́нием.
Твоему́ Боже́ственному восхо́ду дивя́щымся боже́ственным ученико́м, предста́ша я́вственно а́нгели, те́м вопию́ще: Его́же ви́дите восходя́ща на небеса́, Се́й прии́дет со сла́вою суди́ти все́м.
Е́же Христе́ дарова́л еси́ ми́р ученико́м, к го́рним дре́вле восходя́. то́й и на́м бога́тно низпосли́, в любви́ все́х содержа́я: я́ко да согла́сно Тебе́ Спа́са велича́ем.
Светоно́сная колесни́ца Со́лнца мы́сленнаго, Ты́ была́ еси́ вои́стинну, Нескве́рная Чи́стая, И́мже седя́щии во тме́ ви́деша све́т позна́ния, по до́лгу Тя́ сла́вяще.