ID=6970
date=0--39
Трипеснец господи́на Ио́сифа, глас 1
Песнь 3
На Кресте́ дла́ни распросте́рл еси́, просте́ртыя дре́вле руки́ Ада́мовы к разу́мному са́ду, оте́мля гре́х, за милосе́рдие щедро́т, Сло́ве Бо́жий преблаги́й.
Утверди́ мое́ помышле́ние, коле́блемое за́вистию зми́я: страсте́й наведе́ния, Твое́ю стра́стию отжени́ пострада́вый, и безстра́стие ве́рным дарова́вый.
По́стная благода́ть возсия́, невоздержа́ния тьму́ отгоня́щая: се́ благоприя́тное вре́мя, и де́нь спаси́тельный, покая́ния пока́жем плоды́, и жи́ви бу́дем.
Богородичен: Па́дающих исправле́ние, сласте́й стремни́ною па́дша мя́, и грехи́ лю́тыми впа́дша в про́пасти, воздви́гни Чи́стая, и к жи́зни наста́ви.
Песнь 8
Со беззако́нными вмени́тися, за мно́жество ми́лости изво́ливый, моя́ грехи́ загла́ди, я́ко да ве́рою Тя́ сла́влю во вся́ ве́ки.
Грехо́в мои́х рукописа́ние Твои́м раздери́ копие́м, и се́рдца моего́ боле́зни уврачу́й Го́споди, уя́звленнаго стрела́ми зло́бы лука́вых де́монов.
Омраче́нное се́рдце мое́ грехо́м, избавле́нием Твои́м омы́й, исте́кшею из ре́бр кро́вию Христе́ мо́й, да Тя́ сла́влю во вся́ ве́ки.
Богородичен: Невозде́ланно прозя́бшая небе́сный кла́с, пита́ющаго Боже́ственною си́лою вся́ческая Де́во, насы́ти а́лчущую смире́нную ду́шу мою́.
Песнь 9
Пости́вся Елисе́й воскреси́ уме́рша о́трочища, я́коже е́сть пи́сано: и мы́ постя́щеся, плотска́я мудрова́ния умертви́ти ве́рнии потщи́мся, да жи́знь та́мо получи́м.
Увы́ мне́ душе́, стра́шное суди́лище, и Судиино́ стра́шное изрече́ние! потщи́ся пока́йся, Христу́ примири́ся, тебе́ ра́ди на Кресте́ пове́шенному, и изба́вльшему ве́рныя осужде́ния.
Увы́ мне́ душе́, стра́шное суди́лище, и Судиино́ стра́шное изрече́ние! потщи́ся пока́йся, Христу́ примири́ся, тебе́ ра́ди на Кресте́ пове́шенному, и изба́вльшему ве́рныя осужде́ния.
Богородичен: Я́ко во глубину́ зло́бы отве́ржен е́смь, и помышле́ньми сопроти́вными обурева́юся, де́моном повину́яся, сластьми́ порабоще́н сы́й: помози́ ми́ Чи́стая Де́во Ма́ти, ко спасе́ния пути́ наставля́ющи мя́.