ID=6968
date=0--40
И́ный господи́на Фео́дора, глас 8
Песнь 2
Уви́дехом, позна́хом, я́ко бла́го на́м в покая́ние вре́мя, е́же определи́л еси́: но в се́м приими́ Бо́же, моли́твы на́шя, и испра́ви пред Тобо́ю Ще́дре, я́ко кади́ло до́брое, я́ко же́ртву прия́тную.
Ужаса́юся и бою́ся, помышля́я, ели́ка согреши́х: ка́ко Тя́ усря́щу; ка́ко явлю́ся Тебе́ стра́шне; ка́ко же предста́ну неумы́тному Твоему́ суди́щу; те́мже пощади́ мя́ Ще́дре, в ча́с, егда́ и́маши суди́ти все́й земли́.
Троичен: Пресоверше́нная Еди́нице, Пребоже́ственная, Триипоста́сная, нерожде́нне О́тче, и Сы́не Единоро́дне, Ду́ше от Отца́ исходя́й, Сы́ном же явля́яйся: Существо́ еди́но и Естество́, госпо́дьство, Ца́рство, спаси́ все́х на́с.
Богородичен: Неизглаго́ланное чу́до Твоего́ рождества́, Ма́ти Де́во: ка́ко бо и ражда́еши, и чиста́ еси́ в то́мже; ка́ко Отроча́ ражда́еши, и не ве́си иску́са му́жеска отню́д; я́коже ве́сть па́че естества́ от Мене́ новоле́пно, Сло́во Бо́жие ро́ждшееся.
Ты́ ниневи́тяны пока́явшыяся и пости́вшыяся, от запреще́ннаго изве́л еси́ гне́ва: содо́мляны же огне́м поже́гл еси́ в пресыще́нии блудя́щыя: но изба́ви мя́ Христе́, преще́ния и́х.
Ирмос: Ви́дите, ви́дите, я́ко А́з е́смь Бо́г ва́ш, освяти́вый нача́ток ва́м прия́тен, от дне́й всего́ ле́та одеся́тствование, и сие́ да́в лю́дем Мои́м, во избавле́ние страсте́й, во спасе́ния нача́ло.
Песнь 8
В наро́читый де́нь воздержа́ния, прииди́те вси́ востру́бим в пе́снех: и я́ко сла́достию боже́ственною учрежда́ющеся, пе́сньми пои́м Го́спода, и превозно́сим во вся́ ве́ки.
Кто́ снеда́ет челове́ка Бо́жия дре́вле; зве́рь ле́в, от ле́сти проро́чи преслуша́ния сне́ди прии́мша: блюди́ у́бо душе́ моя́, да тя́ не прельсти́т чревобе́сия зми́й.
Троичен: Я́ко Еди́ницу Существо́м пою́ Тя, я́ко Тро́ицу Ли́цы Тя́ чту́, О́тче, и Сы́не, и Ду́ше Пресвяты́й, безнача́льную держа́ву Твоего́ Ца́рствия сла́влю во ве́ки.
Богородичен: Ты́ гора́ Бо́жия яви́лася еси́ Богоро́дице, в ню́же Христо́с всели́вся, Боже́ственныя хра́мы соде́ла пою́щыя: Го́спода по́йте, и превозноси́те во вся́ ве́ки.
По́ст я́ко храни́теля чистоты́ и ма́терь безстра́стия почита́юще, прииди́те лю́дие от любве́ целу́им, Го́спода пою́ще, и превознося́ще во вся́ ве́ки.
Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.
Песнь 9
И́стинным посто́м пости́мся Го́сподеви, я́ко бра́шен воздержа́щеся, язы́ка, я́рости, и лжи́, и вся́кия ины́я стра́сти очужди́мся, да чи́сте Па́сху у́зрим.
Ты́ Саму́ила процвети́л еси́ пло́д по́сте: ты́ воспита́л еси́ Сампсо́на вели́каго хра́бра, ты́ соверша́еши свяще́нники и проро́ки: ты́ на́с освяти́ по́сте честны́й.
Троичен: Трисве́тлое Го́споди, твоего́ единонача́лия, све́тлыми сия́ньми во у́м на́ш облиста́й от пре́лести многообра́зныя обраща́тися на́м к соедини́тельному обоже́нию.
Богородичен: Ты́ еси́ Богоро́дице ору́жие на́ше, и стена́, Ты́ еси́ заступле́ние, к Тебе́ притека́ющих. Тя́ и ны́не в моли́тву дви́жем, да изба́вимся враго́в на́ших.
Иму́ще Ду́ха Свята́го, поста́ гости́теля бога́тна, Того́ дарова́ний насы́тимся, и бога́тно наслади́мся, Того́ воспева́юще я́ко Бо́га на́шего.
Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.