0-42 Неделя 7-я по Пасхе, святы́х, богоно́сных оте́ц, и́же в Нике́и. Канон отцев

ID=7490

date=0-42

Канон отцев, глас 6

Песнь 1

Святы́х оте́ц восхваля́я всесвяты́й Собо́р, всесвято́е того́ во мне́ прорица́ние, вопия́: молю́ Тя Христе́, сохрани́тися мне́.

Богоно́снии отцы́, я́ко мо́лния соше́дшеся дне́сь, Тебе́ Христе́ Единоро́дна, Отцу́ Собезнача́льна Сы́на испове́даша я́сно, и единосу́щна.

Неве́сты Твоея́ Це́ркве, благосла́внии невестокраси́телие Влады́ко, ве́ры я́ве определе́ние изложи́вше злато́е, я́ко у́тварию боголе́пною сию́ украси́ша.

Богородичен: Преукраше́нна сла́вою боже́ственною Честна́я Цари́ца, Сы́ну Своему́ и Бо́гу предстои́т, на́м спасе́ние душе́вное прося́щи.

Песнь 3

Ирмос: То́к и стра́сть и сече́ние, А́рий безу́мный рождеству́ Боже́ственному злоче́стно нечести́вый прилага́я, сечи́тельным оте́ческим мече́м отсека́ется.

Я́коже дре́вле боже́ственный Авраа́м, вво́инившеся вси́ всечестни́и богоглаго́ливии, враги́ Твоя́ Бла́же неи́стовныя Твое́ю си́лою кре́пко погуби́ша.

Пе́рвое собра́ние собра́вшееся Твои́х свяще́нных, Единосу́щна Тя́ Спа́се Безнача́льному Отцу́, и Творца́ все́х Ро́ждшагося благоче́стно пропове́даша.

Богородичен: Не мо́жет сло́во земны́х, ниже́ язы́к Де́во восхвали́ти Тя́ досто́йно: из Тебе́ бо без се́мене Жизнода́вец Христо́с воплоти́тися Пречи́стая благоволи́.

Песнь 4

Прелюбоде́йствовавый А́рий умо́м неразу́мным правосла́вную ве́ру, оте́ческими суды́ изгна́н бы́сть от це́ркве, я́коже у́д гнилы́й, злоимени́тый.

О Тебе́ Влады́ко, подвиза́вся ли́к оте́ц, Твоя́ враги́ зело́ победи́ и Соесте́ственна Тя́ Отцу́ и Ду́ху просла́ви.

Хода́тай бы́л еси́ Бо́же и Челове́че, Бо́гу и челове́ком Христе́: те́мже во двою́ Тя́ естеству́ Еди́наго зна́юще Сы́на, богому́дрии пропове́даша.

Богородичен: Ме́ртва мя́ показа́ сада́ вкуше́ние, Жи́знь же Дре́во из Тебе́ я́вльшееся Всечи́стая воскреси́, и ра́йския сла́дости насле́дника мя́ показа́.

Песнь 5

Кра́сны но́ги я́ко вои́стинну, ны́не пропове́дающих Тя́ Ми́р вся́к у́м преиму́щий, все́х а́нгелов и челове́ков Христе́, и мно́жеством ми́ра ми́р совокупля́ющий.

Прему́дрость, си́лу, о́тчее сло́во ипоста́сное христе́, тебе́ соше́дшеся пропове́даша, всесвята́го свяще́нства че́стно зако́ном печа́тавше, боже́ственнии учи́телие.

Во́д струя́ми чи́стыми уче́ния, Правосла́вную Це́рковь напои́вшии, на вода́х поко́я ны́не наслажда́етеся ве́чно ра́дующеся.

Богородичен: Све́щник Пречи́стая све́тлый, все́м озаря́ющий Христа́ Пра́вды Со́лнце, Тебе́ ве́дуще еди́на Богороди́тельнице Чи́стая, Твое́ ны́не заступле́ние призыва́ем.

Песнь 6

Утаи́тися не возмо́же пле́велов се́ятель, про́мысла неизрече́ннаго, неи́стовству тезоимени́т нарече́нный: Иу́де бо поревнова́в, я́коже о́н разсе́деся вселука́вый.

Боже́ственное собра́ние оте́ц честно́е, Единоро́дное Озаре́ние, от существа́ возсия́вшее О́тча, пропове́дует Тя́ Влады́ко, и пре́жде все́х ве́к рожде́нна Сы́на.

Чре́во растерза́ется по словеси́, исто́чник му́тный и непи́тный ересе́й, источи́вший злочести́вых, ра́лом моли́твы свяще́нник боже́ственных промы́сленнее.

Богородичен: Вели́кий преднаписа́ во проро́цех Моисе́й, Тебе́ Ковче́г, и Трапе́зу, и Све́щник, и Ру́чку, обра́зно зна́менуя воплоще́ние Вы́шняго из Тебе́ Ма́ти Де́во.

Песнь 7

Победи́сте неи́стовству тезоимени́таго А́риа, неи́стовствовавшаго лю́те, и глаго́лавшаго на высоту́ непра́ведная. Бо́жию бо Сы́ну отрече́ся вопи́ти: благослове́н еси́ Бо́же оте́ц на́ших.

Сы́на гро́мова подража́юще чу́днии, Сло́ва Отцу́ Собезнача́льна и Единопресто́льна, огнезра́чными усты́ ва́шими все́х научи́сте вопи́ти: благослове́н еси́ Бо́же оте́ц на́ших.

Я́ко крила́тии, Сло́ву помо́гшии, приидо́сте богоблаже́ннии, от коне́ц бо вселе́нныя собра́ ва́с Ду́х Святы́й вопи́ти: благослове́н еси́ Бо́же оте́ц на́ших.

Богородичен: Ю́ношы три́ пе́щь не опали́, Рождество́ прообразу́ющыя Твое́: Боже́ственный бо О́гнь Тебе́ не опали́в, всели́ся в Тя́, и все́х просвети́ вопи́ти: благослове́нна еси́ Бо́га пло́тию Поро́ждшая.

Песнь 8

Просвети́вшеся луча́ми Твоего́ Божества́ блази́и Твои́ па́стырие, Тебе́ испове́даша бытию́ Соде́теля все́х и Го́спода: его́же превозно́сим во вся́ ве́ки.

Ли́к па́стырей приснопа́мятный собра́вся, богому́дренно Тро́ицу Несозда́нную ны́не богосло́вя, все́х учи́т вопи́ти: Тя́ превозно́сим во вся́ ве́ки.

Священнонача́льницы, па́стырие достосла́внии, Христо́ву Це́рковь просвеща́ют, ины́й и́нуду сию́ освеща́юще, и превознося́ще во вся́ ве́ки.

Богородичен: Та́йно во о́бразех предви́деша Тебе́ проро́цы вси́, Сло́во ро́ждшую, пло́ть бо из Тебе́ Взе́мый Се́й про́йде сугу́б: Его́же превозно́сим во вся́ ве́ки.

Песнь 9

Обре́т вы́ спобо́рники собра́, держа́вною си́лою вооружи́в Ду́ха, Отцу́ Собезнача́льное, и Сопресто́льное Сло́во, пре́жде ве́к Су́щее: Его́же ны́не всесвяще́ннии, с небе́сными во́инствы при́сно сла́вите.

Па́жить А́риеву лю́тыя е́реси, я́ко вра́чеве душа́м же и телесе́м уста́висте, свяще́нный ве́ры Симво́л все́м изложи́вше, и́же ны́не держа́ще, па́мять ва́шу священноде́телие при́сно сла́вим.

Я́ко Све́т сы́й Христе́ Пречи́стый, от страсте́й мглы́ ду́шу мою́ очи́сти, моли́твами Влады́ко Твои́х служи́телей, ны́не Тебе́ пропове́давших Безнача́льна, Несозда́нна, Зижди́теля же все́х и Бо́га, и Отцу́ Собезнача́льна.

Богородичен: Ме́ртвым воскресе́ние ны́не дарова́ся Твои́м неизрече́нным и неизглаго́ланным Рождество́м, Богоро́дице Влады́чице: Жи́знь бо из Тебе́ пло́тию обложе́на все́м возсия́, и сме́рти неускла́бное я́ве разруши́.