ID=6799
date=0--45
Иный трипеснец господина Феодора, глас 5
Песнь 4
Со́лнца пра́вды су́ще, апо́столи, свети́ла всесве́тлая, просвеща́ете земны́й мир, мрак пре́лести отгоня́ще.
Ли́ра су́ще Спа́сова духодви́жимая, апо́столи, позна́вшеся на земли́, доброгла́сную пое́те нам пе́снь, и мир к Бо́гу обраща́ете.
Троичен: Тро́ицу во еди́нственном Существе́ сла́вяще, Еди́наго Го́спода Бо́га воспои́м, нерожде́нна Отца́, Сы́на рожде́ннаго, и Ду́ха живу́щаго.
Богородичен: Де́ва зача́т во чре́ве, Го́споди, и роди́ Тебе́ Емману́ила: изше́л бо еси́ во спасе́ние люде́й Твои́х, спасти́ благи́я Твоя́, Человеколю́бче.
Апо́стольская двоенадеся́тице, боже́ственная и всечестна́я, моли́ Христа́ о нас, мо́лимся прейти́ нам благомо́щно четыредесятодне́вное по́прище.
Ирмос: Дела́ смотре́ния Твоего́, Го́споди, ужаси́ша проро́ка Авваку́ма: изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.
Песнь 8
Ду́ха трубы́ Христо́вы ученики́ воспева́юще, вопие́м: благослови́те дела́ Госпо́дня, Го́спода.
Я́ко моли́твенники ми́ра, и пре́лести прогони́тели, ученики́ пои́м Христо́вы: благослови́те, вопию́ще, дела́ Госпо́дня, Го́спода.
Троичен: Тро́ицу Всесвяту́ю, во Отце́ и Сы́не и Ду́се, воспева́юще пое́м: благослови́те дела́ Госпо́дня, Го́спода.
Богородичен: Неизглаго́ланное Твое́ Рождество́ вси пое́м челове́цы, благоче́стно взыва́юще, Чистая: благослови́те дела́ Госпо́дня, Го́спода.
Апо́столи, моли́теся, в ми́ре нам очисти́тельныя дни сконча́ти: благослови́те, вопию́щим, дела́ Госпо́дня, Го́спода.
Ирмос: Преподо́бнии Твои́ о́троцы, в пещи́, Христе́, воспева́юще глаго́лаху: благослови́те вся дела́ Госпо́дня, Го́спода.
Песнь 9
Из исто́чников проро́чески Спа́совых, поче́рпше апо́столи во́ду безсме́ртия, жа́ждущия преда́ниями жи́зни напая́ют всегда́.
Царя́ Небе́снаго я́вльшеся кня́зи апо́столи, повину́сте вселе́нную всю, Сего́ еди́наго че́сти, покланя́тися, и славосло́вити я́ко Бо́га.
Троичен: Тро́ице Неразде́льная, Еди́нице Вседе́тельная и Всеси́льная, О́тче, Сы́не и Святы́й Ду́ше: Ты Бог мой, Го́сподь и Свет, и Тебе́ воспева́я покланя́юся.
Богородичен: Тя, Ма́ти и Де́во Чи́стая, ублажа́ем ро́ди родо́в, я́ко была́ е́си очисти́лище ми́ра, Спа́са и Соде́теля неизглаго́ланно ро́ждши.
Апо́стольский ли́че, воспева́ющия тя, спаса́й: и сподо́би во умиле́нии се́рдца, дни вся прейти́ светотво́рных посто́в.
Ирмос: Велича́ем, Христе́, Твою Всенепоро́чную Ма́терь Чи́стую: я́ко роди́ Тя преесте́ственно пло́тию, от вся́кия ле́сти и тли нас избавля́юща.