ID=6793
date=0--46
Ин трипеснец Триоди, глас 2
Песнь 3
Древо кре́стное воздержа́ние ми́ру процвете́: е́же любо́вию облобыза́вше, наслади́мся всепло́дия Боже́ственных за́поведей Христо́вых.
Воздержа́ние страсте́й и ны́не нося́ще, плоть распне́м Го́сподеви, и ме́ртвенно тоя́ мудрова́ние пока́жем вси Боже́ственней жи́зни.
Троичен: Три Ли́ца Еди́наго Зра́ка сла́влю, Отца́, Сы́на и Ду́ха, Еди́ну Держа́ву Божества́, Ца́рство всех, и све́тлость.
Богородичен: Рождество́ Твое́, Чи́стая, стра́шно бысть: Бог бо есть вочелове́чивыйся, безнача́льно из Отца́ роди́выйся, и из Тебе́ напосле́док кроме́ му́жа ро́ждься.
Распя́тие пою́, и прободе́ние Боже́ственных ребр Твои́х, из ни́хже питие́ безсме́ртное че́рплю всегда́, Христе́, и освяща́юся.
Ирмос: Утверди́ нас в Тебе́, Го́споди, дре́вом умерщвле́й грех, и страх Твой всади́ в сердца́ нас, пою́щих Тя.
Песнь 8
Посреде́ разбо́йник распя́таго на дре́ве, и копие́м прободе́ннаго, в живото́чная ре́бра, по́йте, благослови́те и превозноси́те во вся ве́ки.
Судя́й всей земли́, суди́щу предста́л еси́, зауше́н был еси́ и пору́ган, на Кресте́ пове́шен был еси́, от тли мя пременя́я дре́вняго греха́, во вся ве́ки.
Троичен: Божество́ Еди́но Тро́ица, Неразде́льное Естество́, разде́льное же Ли́цы, Непоколеби́мая Держа́во, О́тче, Сы́не и Ду́ше, Тебе́ песносло́вим во вся ве́ки.
Богородичен: Богороди́тельнице Чи́стая, Небе́сная Врата́, Спаси́тельная Две́ре, всех христиа́н моле́ния приими́, блажа́щих Тя во вся ве́ки.
Кре́сте Христо́в, разбо́йника наста́вивый к ве́ре, и мене́ к тече́нию благоси́льно посто́м сподо́би, предвари́ти на поклоне́ние твое́, и оживотвори́тися.
Ирмос: В купине́ Моисе́ю Де́вы чу́до, на Сина́йстей горе́ прообрази́вшаго иногда́, по́йте, благослови́те и превозноси́те во вся ве́ки.
Песнь 9
О благоутро́бия Твоего́! я́ко Крест претерпе́л еси́, гво́здие и копие́, Го́споди, мене́ ради осужде́ннаго тле́ю: те́мже пою́ Тя, Христе́.
Кресту́, тро́сти, гво́здием и копию́, жи́зненным Твои́м Страсте́м вси лю́дие покланя́ющеся, пе́сньми, Христе́, пое́м Тя.
Троичен: Еди́нице Триипоста́сная, Тро́ице Еди́нственная. Господонача́льная, естество́ равносла́вное, О́тче, Сы́не и Боже́ственный Ду́ше, спаси́ всех нас.
Богородичен: Ра́дуйся, очисти́лище ми́ру, Богоро́дице, в не́же прибе́гши вси гре́шнии, к Бо́гу примире́ния при́сно обрета́ем.
Кресто́м Твои́м, Го́споди, и мене́ укрепи́в, посто́в мне да́руй Благи́й благомо́щно сконча́ти обхожде́ние.
Ирмос: Чи́стую и Пречи́стую, Ма́терь и Де́ву, пе́сньми пе́сней вси ве́рнии, благоче́стно я́ко Богоро́дицу велича́ем.