ID=10403
date=
Канон святому, глас 8
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ израильтя́нин вопия́ше:/ Изба́вителю и Бо́гу на́шему пои́м.
Умиле́ния ми во́ду изле́й, Го́споди, в се́рдце,/ и ум озари́ досто́йно воспе́ти Твоего́ уго́дника, преподо́бнаго Корни́лия.
Мона́хов наста́вник и учи́тель нелицеприя́тен был еси́/ и, Бо́гу сих приводя́,/ му́ченическим венце́м от земна́го царя́ венча́лся еси́, блаже́нне.
Христо́вым светоли́тием просвеща́ем, преподоби́е о́тче Корни́лие,/ моли́твами твои́ми, преблаже́нне, омраче́нную ду́шу мою́ просвети́,/ я́ко да воспева́ю тя.
Богородичен: Тишина́ Ты, Влады́чице, и пристани́ще погиба́ющим в мо́ре грехо́в,/ темже к Тебе́ притека́ющих не отри́ни, Присноде́во,/ но спаси́ Твои́м предста́тельством Богома́терним.
Песнь 3
Ирмос: Тишина́ Ты, Влады́чице, и пристани́ще погиба́ющим в мо́ре грехо́в,/ темже к Тебе́ притека́ющих не отри́ни, Присноде́во,/ но спаси́ Твои́м предста́тельством Богома́терним.
Просвети́л еси́ лю́ди, и́долом служа́щия, све́том и́стинныя ве́ры,/ озари́ и нас, гре́шных, прибега́ющих к Твоему́ заступле́нию,/ благода́тию от Всеблага́го Человеколю́бца.
Всем бла́га духо́вныя и теле́сныя дея,/ наве́том злых плоть твоя́ умертви́ся/ со святы́ми же дух твой всели́ся,/ и ны́не с ни́ми моли́ся Христу́ о нас, преподо́бие.
Ны́не в безконе́чную сла́ву преше́д от земли́,/ окая́нную ду́шу мою́ страстьми́, преподо́бие,/ приле́жным очище́нием твое́я моли́твы уврачу́й.
Богородичен: То́чию в хра́ме Твое́м, аки в корабле́, Тобо́ю окормля́емем, Богоро́дице,/ избавля́емся ны́не от враг ви́димых и неви́димых/ и укрепля́емся Твое́ю по́мощию, Присноде́во.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Оби́тель бя́ше издре́вле святы́х в Богозда́нней пеще́ре,/ Бо́гу Еди́ному ве́домая,/ ты же, о́тче Корни́лие, тем подража́я/ и ме́сто их по́двигов почита́я,/ мно́жество и́ноков к Бо́гу приве́л еси́.
Не оста́ви, Корни́лие преподо́бие,/ твои́ми по́тами и труда́ми возраще́нныя се́я оби́тели,/ но охраня́й ю,/ и́бо и врази́ тя ви́деша охраня́ющим ю и укрепля́ющим.
Многоболез́ненныя стра́сти всегда́ врачу́еши приступа́ющих к тебе́,/ благода́ть бо, преподо́бие, прии́м от Го́спода,/ содева́ти зна́мения и чудеса́.
Богородичен: Утоли́, Богома́ти, свире́пствующую бу́рю неве́рия и ожесточе́ния,/ злы́я стра́сти, поглоти́ти хотя́щия Тя сла́вящих и о́браз Твой почита́ющих,/ но заступи́ нас моли́твами преподо́бнаго Твоего́.
Песнь 5
Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бие.
Я́ко ка́мень драги́й/ огради́л еси́ кре́пко оби́тель от ра́тников злых, преподо́бие,/ изыма́я и свобожда́я и́ноков от страсте́й/ и доброде́тельми горе́ возводя́.
Да не оскуде́ют, о́тче, твои́ми моли́твами и́стиннии подви́жницы благоче́стия во оби́тели твое́й,/ но ку́пно со святы́м чудотво́рцем Никола́ем,/ ему́же охране́ние ея́ вве́рил еси́,/ до трубы́ Арха́нгела соблюди́ ю.
Преподо́бие о́тче,/ помози́ оби́тели твое́й,/ насе́льником и всем нам вся ко́зни лука́ваго отража́ти,/ я́коже ты иногда́ отража́л еси́ ви́димыя враги́ и неви́димыя.
Богородичен: Мглу страсте́й на́ших разреши́, Де́во,/ и благода́тною си́лою Сы́на Твоего́ отжени́ враго́в кова́рство/ и наве́ты диа́вола от раб Твои́х, Тя сла́вящих.
Песнь 6
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Пречи́стыя дом, преподо́бие, огради́л и укра́сил еси́,/ те́мже и сам ны́не во оби́тели Ея́/ на Небеси́ и на земли́ в хра́ме Ея́ досто́йно обита́вши.
Утеши́ и утиши́ нас, си́рых, и в доброде́тели ни́щих, преподобному́чениче,/ жите́йскую го́рдость отрева́я/ и моли́тве и́стинней науча́я.
Соде́яв, преславне, ду́шу твою́ храм Свято́му Ду́ху,/ был еси́ насле́дник Го́рняго Ца́рствия,/ с Вы́шними си́лами и со все́ми святы́ми моли́ся ко Го́споду/ о спасе́нии душ на́ших.
Богородичен: Сохрани́ дом Твой, Богоро́дице, до сконча́ния ве́ка/ и не оста́ви нас, си́рых, без Твое́й Ма́терния по́мощи/ и предста́тельства преподо́бных Твои́х.
Песнь 7
Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Ио́ны первонача́льника, гони́телей не́когда избе́гшего, му́ченичество восприя́л еси́, сла́вне,/ те́мже с ним Бо́гу моли́ся, да сохрани́т оби́тель ва́шу невреди́му/ и нас покая́нием к вам привлече́т.
Марк, пусты́нник та́йный,/ а́ки Мелхиседе́к, не́мощию тя вразуми́, Корни́лие, о и́мени свое́м,/ его́ же смире́нию поревнова́ти научи́ нас, блаже́нне.
Просвети́в твое́ се́рдце, преподо́бие,/ мона́хов был еси́ наста́вник,/ наказу́я и уча́ и всех приводя́ к Бо́жией во́ле, поя́:/ оте́ц на́ших Бо́же, благослове́н еси́.
Песнь 8
Ирмос: Царя́ Небе́снаго,/ Его́же пою́т вой А́нгельстии,/ хвали́те и превозноси́те во вся ве́ки
Вразумля́вши живу́щия во огра́де твое́й, преподо́бие,/ явля́лся им я́ве и во сне наставля́я,/ но и всем, моля́щимся тебе́, чу́дно помога́вши/ и от злых бед избавля́вши.
Моли́ о нас, преподо́бне,/ и не забу́ди к тебе́ притека́ющих, в скорбе́х и печа́лех су́щих,/ подая́й утеше́ние от твое́й ра́ки цельбоно́сныя.
Процве́л еси́ я́ко фи́никс Дави́дски, о́тче,/ и оби́тель яви́лся еси́ Ду́ха Пресвята́го,/ о нас непреста́нно моли́/ почита́ющих ве́рою прече́стную па́мять твою́, преподо́бие Корни́лие.
Богородичен: Век скончава́ется, любо́вь оскудева́ет,/ побе́ду лука́вый торжеству́ет,/ и кто нам по́мощи мо́жет, аще не Ты, Де́во, Чу́дная Ма́ти,/ огради́ши Кресто́м Сы́на Твоего́.
Песнь 9
Ирмос: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
В до́му Богома́тери, я́коже в Гефсима́нии, почива́вши ны́не, блаже́нне,/ иде́же, служа́ умиле́ние,/ предстоя́л еси́ Престо́лу Ббжию смире́нно, в верте́пе освяще́нному.
Никто́же неуте́шен отхо́дит от твое́й ра́ки, преподо́бие,/ но исцеле́ние душ и теле́с ве́рующим подае́ши всегда́ изоби́льно.
Зри́ши Бо́жия и А́нгельския све́тлости патриа́рх и му́ченик и апо́стольския красо́ты,/ моли́ с ни́ми Человеколю́бца оставле́ние грехо́в и жития́ исправле́ние/ дарова́ти нам, преподо́бие, хваля́щим тя.
Богородичен: Тишина́ ве́лия бысть в пеще́ре су́щим,/ суе́т ми́ра избе́гшим святы́м./ Ты, о Ма́ти Де́во,/ Небе́сную тишину́ ниспосли́ и нам, Чи́стая,/ Тебе́ велича́ющим.