ID=7775
date=05-18
Ин кано́н святы́х му́чеников, глас 4
Песнь 1
Ирмос: Воспою́ Тебе́, Го́споди Бо́же мо́й,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.
Ве́ры побо́рницы, ве́рою свяще́нное ва́ше всегда́ творя́щия торжество́,/ страсте́й изба́вите и вся́каго обстоя́ния.
Ве́трилом впери́вшеся, Богоно́снии, кре́стным пресла́вно,/ немо́кренно пучи́ну муче́ний преплы́сте, враги́ пото́пльше.
Совокупи́стеся чино́м Небе́сным, претерпе́вше я́звы в телеси́, святи́и,/ те́мже Боже́ственную днесь ва́шу па́мять почита́ем.
Зако́ном Боже́ственным утвержда́еми,/ беззако́ннующих сове́ты, му́дрии, упраздни́сте,/ пострада́вше же зако́нно, Бо́жию сла́ву улучи́сте.
Богородичен: Я́ко престо́л, Де́во, Царя́,/ на него́же всед, ве́рным седа́лище Небе́сное угото́ва,/ почита́ем и любо́вию Тя сла́вим.
Песнь 3
Ирмос: Лук си́льных изнемо́же,/ и немощству́ющии препоя́сашася си́лою:/ сего́ ра́ди утверди́ся в Го́споде се́рдце мое́.
Поста́вль на ка́мени ве́ры, Пе́тре, души́ твоея́ но́ги, блаже́нне,/ сопротивле́нием не победи́лся еси́ безбо́жных, всеблаже́нне.
Я́коже тя звезду́ сия́ющу, град твой, Пе́тре, ми́рови предлага́ет,/ отгоня́ща безбо́жия нощь Боже́ственною благода́тию.
Воззре́нием к Бо́гу вжиля́яся, Пе́тре, колесы́ и у́зами сокруша́емь/ и бие́мь непреста́нно, венцено́сец показа́лся еси́.
Пе́ние Бо́гови принося́ще,/ вся́ко, страстоте́рпцы, нанесе́ние мук претерпе́сте:/ сего́ ра́ди венце́в сподо́бистеся.
Богородичен: Еди́на де́вствуеши, ро́ждши,/ еди́на та́инства вели́каго вои́стинну Служи́тельница позна́лася еси́,/ Бо́га ро́ждши, Богоро́дице Ма́ти Де́во.
Песнь 4
Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.
Дрема́ние от ве́ждей душе́вных оттря́сше, е́же от ле́ности, бо́дростию Боже́ственною,/ все успи́сте безбо́жных зло́е умышле́ние.
Я́ко пречестни́и и Боже́ственнии Сло́ва ка́мение,/ уморе́ни бы́вше ка́мением, Андре́й, Па́вел и Диони́сий/ присносу́щныя жи́зни сподо́бишася.
Прекра́сное цве́тие благоче́стия и и́стинное и Боже́ственное Христо́во благово́ние/ ве́рою восхва́лим му́ченики днесь.
До́льняя презре́вше жела́нием Боже́ственным/ и плотски́я боле́зни претерпе́вше до́блественне,/ ра́дующеся, к неболе́зненному животу́ преидо́ша.
Богородичен: Препе́тая Де́во Богороди́тельнице,/ пою́щия Тя спаса́й, на Тя упова́ющия,/ вся́каго обстоя́ния, и бед, и скорбе́й.
Песнь 5
Ирмос: Просвеще́ние Твое́, Го́споди, низпосли́ нам,/ и от мглы́ прегреше́ний разреши́ ны, Бла́же,/ Твой мир да́руяй.
Зна́менавшеся, му́ченицы, све́том разу́мным,/ муче́ния тьму́ и ночь злу́ю многобо́жия/ си́лою Боже́ственною непоткнове́нно преидо́сте.
Деви́ческими сия́ющи, Христи́но, добро́тами, я́звенными заря́ми све́тло украси́лася еси́/ и в мы́сленный Христо́в черто́г всели́лася еси́, ра́дующися.
Неи́стовне рачи́тельствующии те́ла твоего́, Христи́но му́ченице,/ сла́дким твои́м сло́вом жела́нию Бо́жию привя́зани,/ пострада́ша кре́пко.
Богородичен: Неве́сто Бо́жия Безневе́стная,/ Ея́же ра́ди ве́тхаго отреши́вшеся до́лга,/ сы́нове по благода́ти яви́хомся Отца́ Небе́снаго,/ пою́щия Тя сохраня́й.
Песнь 6
Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.
Сла́вный до́блествовав Иракли́й,/ прия́т ве́лию сла́ву, рая́ граждани́н бью/ и честны́м лико́м соедини́вся страда́лец, ны́не ра́дуется.
Воспое́м с Павли́ном Боже́ственнаго Венеди́ма и Андре́я,/ Иракли́я и Диони́сия, Петра́ же, и Па́вла, и Христи́ну,/ Госпо́дни му́ченики.
Растерза́еми и ка́мением непра́ведно бие́ми,/ огне́м же скончава́еми, сла́внии му́ченицы,/ в Це́ркви пе́рвенец жи́ти сподо́бистеся.
Показа́вшему прему́дрыя страстоте́рпцы, сия́юще,/ я́коже зве́зды, на тве́рди церко́вней, благоче́стно пою́ще:/ Сы́ну Бо́жию поклони́мся.
Богородичен: Я́ко ни́ва, плодоно́сный клас прозябла́ еси́, Богоро́дице, живо́тный,/ жи́знию ве́рныя препита́ющаго/ и глас преле́стный от земли́ вои́стинну отвраща́ющаго.
Песнь 7
Ирмос: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́.
Ю́ным ревну́юще ве́рно в Вавило́не де́тем,/ во огнь усе́рдно внидо́сте, вопию́ще, блаже́ннии:/ оте́ц на́ших Бо́же, благослове́н еси́.
Не поклони́стеся истука́нным, страда́льцы сла́внии, небре́гше,/ приснопа́мятную смерть претерпе́сте, безсме́ртная наслажде́ния я́ве восприе́мше.
Му́жественною душе́ю и кре́постию нра́ва/ беззако́ннующих шата́ния низложи́ша му́ченицы, вопию́ще ве́рно:/ оте́ц на́ших Бо́же, благослове́н еси́.
Глаго́лы Боже́ственных му́ченик укре́плься, Павли́не,/ умре́ти произво́лил еси́, пресла́вне, вопия́ Сотво́ршему вся́ческая:/ оте́ц на́ших Бо́же, благослове́н еси́.
Богородичен: Киво́т Бо́жий, Боже́ственныя ма́нны ста́мну,/ златы́й све́щник и трапе́зу,/ го́ру святу́ю, Богоро́дицу вси пе́сненно сла́вим, ве́рнии.
Песнь 8
Ирмос: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
Истка́нную от вы́шния благода́ти совлече́нием бре́ннаго телесе́/ страда́льцы в ри́зу облеко́шася, любо́вию вопию́ще:/ вся дела́, благослови́те, по́йте Го́спода.
Кропле́нием Боже́ственныя кро́ве, му́ченицы, очи́стившеся,/ кровь ва́шу за Христа́ излия́сте, пою́ще непреста́нно:/ вся дела́, благослови́те, по́йте Го́спода.
Красны́ гро́зды яви́стеся мы́сленнаго виногра́да, блаже́ннии,/ вино́ нам пролива́юще благоче́стия, любо́вию взыва́ющим:/ вся дела́, благослови́те, по́йте Го́спода.
Богородичен: Мы́сленное очисти́лище бысть, всех моли́твы прие́млющи/ и Сы́ну Твоему́, Пречи́стая, вознося́щи во избавле́ние пою́щим:/ вся дела́, благослови́те, по́йте Го́спода.
Песнь 9
Ирмос: Е́ва убо неду́гом преслуша́ния кля́тву всели́ла есть,/ Ты же, Де́во Богоро́дице,/ прозябе́нием чревоноше́ния/ мирови благослове́ние процвела́ еси́./ Тем Тя вси велича́ем.
Поже́рше жела́нием са́ми себе́, му́ченицы до́блии,/ ра́дующеся, преда́ша кро́ви усе́рдно,/ и бога́тство неотъе́млемо прия́ша,/ и ны́не му́ченическим причто́стеся ликостоя́нием, всехва́льнии.
Яви́стеся цве́ти мы́сленнии, благоуха́юще, страстоно́сцы, благоче́стие,/ и Боже́ственнаго гра́да гра́ждане, приста́нища су́щим в бу́ри спаси́тельна,/ свети́льницы и́стины и побо́рницы,/ те́мже досто́йно блажи́ми есте́.
С Петро́м и Па́влом му́драго Иракли́я, Павли́на и Венеди́ма,/ вку́пе Андре́я, и Христи́ну, и Диони́сия почти́м,/ кре́пко за Христа́ пострада́вшия и ле́сть потре́бльшия.
Богородичен: Земля́ у́бо кро́ви ва́ша прия́т,/ излия́вшияся, великоимени́тии, за всех Благоде́теля,/ жили́ща же пра́ведных ду́хи,/ с ни́миже лику́юще, помяни́те помина́ющия вас всегда́.