ID=7558
date=26
Други́й кано́н усо́пшым, глас 2
Песнь 1
Ирмос: Непроходи́мое волня́щееся мо́ре, Бо́жиим Свои́м веле́нием изсуши́вшему, и пешеше́ствовати сквозе́ е́ Изра́ильтеския лю́ди наста́вльшему, Го́сподеви пои́м, сла́вно бо просла́вися.
Сме́ртию Твое́ю попра́в сме́рть, Боже́ственныя жи́зни источи́л еси́ присносу́щие: е́же пода́ждь, Бла́же, душа́м усо́пших, му́ченик Твои́х мольба́ми, оставле́ние прегреше́ний да́руя.
И́же бога́тую ми́лость при́сно источа́я, благоче́стно при́сно прие́млющым Тя́, в дому́ Твое́м, Христе́, в ди́вней Твое́й ски́нии, ме́сто ослабле́ния пода́ждь, Влады́ко, рабо́м Твои́м, я́ко благоутро́бен.
Крепча́йший на сме́рть бы́л еси́ Христе́: те́мже ту́ связа́в, на́с изба́вил еси́, и ны́не изба́ви от сея́ тле́ния усо́пшыя, я́ко Бла́г, и Твоего́ сия́ния прича́стие да́руй.
Богородичен: Утве́рждши коле́блемый у́м мо́й, Ма́ти Бо́жия, укрепи́ Боже́ственными повеле́ньми, Ро́ждшагося из Твоего́ освяще́ннаго чре́ва, и упраздни́вшаго, Влады́чице, а́дово мра́чное ца́рство.
Песнь 3
Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Твоея́ красоты́ сия́нием озари́тися в ве́ре усо́пшым благоволи́, с му́ченики Твои́ми, и́же бога́тый в ми́лости: Ты́ бо еси́ Бо́г на́ш, и не́сть пра́веден па́че Тебе́, Го́споди.
На ме́сте прохлажде́ния, в не́дрех Авраа́мовых, избра́ннаго Твоего́, сподо́би водворя́тися рабо́м Твои́м, я́ко ще́др, Тебе́ вопию́щым: Ты́ бо еси́ Бо́г на́ш, и не́сть пра́веден па́че Тебе́, Го́споди.
В черто́зех небе́сных водворя́тися, с му́дрыми де́вами совше́дшими, Влады́ко, приими́ рабы́ Твоя́ свещено́сцы, и́хже преста́вил еси́ Твое́ю во́лею от вре́менных, Еди́не Человеколю́бче.
Богородичен: Умерщвле́на мя́ и к земли́ возвраще́на воздви́гнула еси́, ро́ждши Жизнода́вца, и возвела́ еси́ мя из а́да преиспо́днейшаго, Богоро́дицу Тя́ ве́рою сла́вящаго, и почита́ющаго Пречи́стая, Тебе́ всепе́тую.
Песнь 4
Ирмос: Пою́ Тя, слу́хом бо, Го́споди, услы́шах и ужасо́хся, до мене́ бо и́деши, мене́ ищя́ заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.
Упова́нием и любо́вию пожи́вшыя, и умо́м правосла́вным, я́же па́че ума́ сла́вы Твоея́ сподо́би рабы́ Твоя́, Христе́, мно́гим Твои́м человеколю́бием, и избра́нных му́ченик мольба́ми.
Я́ко имы́й сла́дости приснотеку́щий пото́к, при́сно напоя́еши избра́нныя, Го́споди: с ни́миже и ны́не преста́вленныя Христе́ к Тебе́, неизрече́нным Твои́м милосе́рдием пита́еши при вода́х оставле́ния.
Ты́ живы́ми госпо́дьствуеши, Влады́ко, и ме́ртвыми владе́еши. Ты́ в земли́ пе́рсть су́щую си́лою Твое́ю воскреси́ши. Те́мже к Тебе́ преше́дшыя во дво́рех Твои́х, Спа́се, всели́.
Богородичен: Исцели́ла еси́ Е́вино сокруше́ние, и дре́внее окая́нство: Зижди́теля бо родила́ еси́, могу́щаго испра́вити на́с прегреше́ньми пове́рженых, Богороди́тельнице еди́на Ма́ти Де́во.
Песнь 5
Ирмос: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́ ино́го Бо́га не зна́ем.
Умерщвле́ных на́с, и положе́ных во тли́, возве́л еси́ от мра́чных а́довых сокро́вищ, и восхи́тил еси́, Бла́же, и сочета́в святы́х а́нгел во́инством.
За е́же спасти́ на́с я́ко прише́л еси́ Христе́ приими́ ны́не и́же благоче́стно к Тебе́ преста́вленныя, я́ко еди́н бла́г, на ло́нех Авраа́ма, и с Ла́зарем те́х всели́.
Разреши́л еси́, Влады́ко, ле́тную мою́ и до́лгую бра́нь, Тебе́ пре́жде хода́таю, и моли́твеннику примире́ния бы́вшу: и ны́не Твоя́ рабы́ уще́дрив упоко́й.
Богородичен: Под кро́вом Твои́м, Ма́ти Бо́жия, и́же наде́ющиися на Тя́ спаса́ются: Жизнода́вца бо родила́ еси́ на́м, животворя́щаго вся́ во́лею.
Песнь 6
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Неизрече́нныя, и Боже́ственныя све́тлости, иде́же му́ченичестии ли́цы, сподо́би, я́же от земли́ преста́вил еси́, вседе́тельною Твое́ю во́лею Человеколю́бче.
Озари́тися добро́тою сла́вы Твоея́ сподо́би, оста́вльшыя житие́, и к све́ту Твоему́ неизрече́нному, Влады́ко, преше́дшыя упоко́й.
Богородичен: Избавля́ющи усе́рдно яви́ся призыва́ющыя Тя́, Пречи́стая Влады́чице, я́же Бо́га ро́ждшая живото́м и сме́ртию облада́юща.
Песнь 7
Ирмос: Богопроти́вное веле́ние беззако́ннующаго мучи́теля, высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.
И́же везде́ сы́й, низше́л еси́ Го́споди, е́же спасти́ и́же дре́вле прельща́емый челове́чь ро́д. Те́мже Тя́ му́ченицы мо́лят: си́х я́же преста́вил еси́ от земли́, в земли́ кро́тких, Спа́се, упоко́й.
Ме́ртвости умерщвле́ние оттря́сл еси́ в ме́ртвых свобо́дь бы́в, са́м еди́н Христе́: и ны́не умерщвле́ния грехо́внаго влады́ко изба́ви рабы́ Твоя́, явля́я и́х насле́дники Ца́рствия Твоего́.
Мно́гим Твои́м и неизрече́нным милосе́рдием, и неизме́рною бе́здною человеколю́бия Твоего́, Христе́, прегреше́ний у́бо оставле́ние преста́вленным да́ждь, и благода́тию Твое́ю очище́ны си́х яви́.
Богородичен: Свети́льник была́ еси́ Боже́ственныя сла́вы, сия́ние нося́щи Де́во ду́хом, и пло́тию на́м я́вльшагося, и а́дову мглу́ све́тлостию Божества́ Своего́ потре́бльша, Богора́дованная.
Песнь 8
Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щыя: благослови́те вся́ дела́ Госпо́дня Го́спода.
Показа́л еси́ на́м враго́в сме́рть, схожде́нием Твои́м я́ко безсме́ртен: Боже́ственною же си́лою Твое́ю, вхо́ды яви́л еси́ живота́, Безсме́ртне, его́же му́ченицы Твои́ ны́не досто́йно получи́ша.
Добро́ты у́мныя Твоея́ наслади́тися преста́вленным сподо́би, сту́д греха́ злообра́знаго очища́я, я́ко Человеколю́бец: еди́н бо ты́, Влады́ко, яви́лся еси́ греха́ отчужде́н.
Испра́вил еси́ на́с Христе́, па́дшыя в пе́рсть сме́ртную, сме́ртию Твое́ю живо́т да́руя, и пи́щу безконе́чную, и ра́дость присносу́щную, ея́же ны́не преста́вленныя сподо́би, я́ко ми́лостив.
Богородичен: Ве́лия и стра́шна е́сть та́йна Богома́ти Твоего́ рождества́: Бо́га бо родила́ еси́, его́же сме́рть не претерпе́, и гро́б не растли́. Те́мже Тя́, Пречи́стая, вси́ язы́цы сла́вим.
Песнь 9
Ирмос: Я́же пре́жде Со́лнца Свети́льника Бо́га возсия́вшаго, пло́тски к на́м прише́дшаго, из боку́ Де́вчу неизрече́нно воплоти́вшая, благослове́нная Всечи́стая, Тя́, Богоро́дице, велича́ем.
Име́яй вла́сть живы́ми и ме́ртвыми живота́ Нача́льниче, от земли́ к Тебе́ преше́дшым, насле́дие небе́сное пода́ждь, Влады́ко, и све́тлость святы́х, и пресла́вных страстоте́рпец Твои́х.
Сло́во сы́й, е́же дре́вле бы́ти ми́ подая́ живонача́льнейшее, и е́же до́бре бы́ти па́ки да́руя, в не́дрех жела́нных Авраа́ма пра́отца, преста́вльшыяся рабы́ Твоя́, я́ко ми́лостив всели́.
Ве́сь еси́ Спа́се мо́й сла́дость светови́днейшая, ве́сь еси́ жела́ние ненасыща́емое: пото́ки Твоея́ пи́щи, и водо́ю оставле́ния усо́пшыя напо́й, непреста́нно Тебе́ сла́вящыя.
Богородичен: Тя́ Богоро́дице, досто́йно ве́рнии ны́не ублажа́ем, богодохнове́нным словесе́м Твои́м после́дующе: Ты́ бо еди́на земны́м Бо́га родила́ еси́, сме́рти разо́ршаго си́лу, Ма́ти Де́во.