ID=7464
date=27
Канон крестовоскресный, глас 2
Песнь 1
Си́ла немощны́х, Воскресе́ние па́дших, и нетле́ние уме́рших бы́л еси́, Христе́, пло́ти Твоея́ стра́стию: я́ко просла́вися.
Уще́дри па́дший о́браз, и воскреси́ сокруше́нный, Соде́тель Бо́г и Обнови́тель умерщвле́н бы́в все́х оживи́: я́ко просла́вися.
Песнь 3
И́же все́х вы́шши Христо́с, ума́лися ма́лым чи́м, стра́стию плотско́ю, а́нгельскаго естества́.
Ме́ртв со беззако́нными вмени́вся, сия́я жена́м венце́м сла́вы, Христе́, яви́лся еси́ от Воскресе́ния.
Песнь 4
Ви́девши на дре́ве Тя́, Христе́, пригвожде́на Де́ва, Я́же неболе́зненно Тя́ ро́ждшая, ма́терски боле́зни претерпе́.
Побежде́на бы́сть сме́рть, ме́ртв пленя́ет а́дова врата́: всея́дцу бо разо́ршуся, я́же па́че естества́ вся́ ми́ дарова́шася.
Песнь 5
Пости́ти отверги́йся Ада́м, вкуша́ет смертоно́снаго дре́ва пе́рвый: но сего́ гре́х потребля́ет, распны́йся Вторы́й.
Естество́м челове́ческим стра́стен же и сме́ртен бы́л еси́, И́же безстра́стный невеще́ственным Божество́м, обезтли́вый умерщвле́нныя, Христе́, от преиспо́дних а́довых воскреси́л еси́.
Песнь 6
Блюсти́тели положи́л еси́ па́дшему, Херуви́мы дре́ва живо́тнаго, но ви́девше Тя́, две́ри отверзо́шася: яви́лся бо еси́ путетворя́ разбо́йнику в ра́й.
Пу́ст а́д и испрове́ржен бы́сть сме́ртию Еди́наго: е́же бо мно́гое бога́тство сокро́виществова, Еди́н о все́х на́с Христо́с истощи́л е́сть.
Песнь 7
Осуди́ пра́отца дре́вле во Еде́ме преслуша́ние: но во́лею суди́м бы́сть, престу́пльшему разреша́я прегреше́ния, Пребоже́ственный отце́в Бо́г, и Препросла́влен.
Спа́сл еси́ уя́звеннаго язы́ком, за́вистию человекоуби́йцы, во Еде́ме во́льным угрызе́нием: во́льною бо стра́стию исцели́л еси́, Пребоже́ственный отце́в Бо́г, и Препросла́влен.
Богородичен: Ходя́ща мя́ в се́ни сме́ртней призва́л еси́ к све́ту, темнозра́чный а́д, блиста́нием обло́ж Божества́, Пребоже́ственный отце́в Бо́г, и Препросла́влен.
Песнь 8
Ви́ден бы́л еси́ на кресте́ пригвожда́ем, И́же бога́тый в ми́лости, во́лею погре́блся еси́: и тридне́вно воскре́сл еси́, и изба́вил еси́ вся́ челове́ки, Человеколю́бче, ве́рою пою́щыя: да пое́т Го́спода вся́ тва́рь, и превозно́сит во вся́ ве́ки.
Изба́вити от истле́ния, соше́д в преиспо́дняя, Сло́ве Бо́жий, его́же созда́л еси́, Христе́, си́лою Твое́ю Боже́ственною, и без истле́ния сотво́рь, сла́вы присносу́щныя Твоея́ прича́стника соде́лал еси́, да пое́т, зову́щи, вся́ тва́рь, и превозно́сит Христа́ во ве́ки.
Песнь 9
Посреде́ осужде́нных, я́ко А́гнец возвы́шен бы́л еси́ Христе́, на кресте́, на ло́бнем копие́м в ребро́ пробода́ем, живо́т дарова́л еси́ на́м пе́рстным я́ко бла́г, ве́рою чту́щым Боже́ственное Твое́ Воскресе́ние.
И́же Свое́ю сме́ртию, сме́рти держа́ву си́лою упраздни́вшему Бо́гу вси́ ве́рнии поклони́мся, я́ко и́же от ве́ка ме́ртвыя совоскреси́, и все́м подае́т живо́т и Воскресе́ние.