ID=7030
date=51
Канон, творение кир Иосифа, глас 5
Песнь 1
Ирмос: Пои́м Го́сподеви, сотво́ршему ди́вная чудеса́ в Чермне́м мо́ри, пе́снь побе́дную, я́ко просла́вися.
Мно́гими лестьми́ извлеко́ма, и прельща́ема, Христе́, чу́ждаго, обрати́ и уще́дри мя́, я́ко всеси́лен.
И́же глуха́го у́шы отве́рзый, Христе́, души́ моея́ огло́хнувшая ушеса́ отве́рзи, молю́ся: я́ко да Твоя́ словеса́ внуша́ю.
Новоявле́нныя зве́зды су́ще му́ченицы со́лнца пра́веднаго Христа́, тьму́ отжени́те от серде́ц на́ших.
Разжже́нныя стре́лы Боже́ственными у́гльми Свята́го Ду́ха страда́льцы я́вльшеся, стре́лы сокруша́ют вся́ зми́евы.
Богородичен: Две́ре Боже́ственныя сла́вы, покая́ния ми́ две́ри отве́рзи, и от вра́т а́довых исхити́, молю́ся, смире́нную мою́ ду́шу.
Песнь 3
Ирмос: Над язы́ки Бо́г воцари́ся, Бо́г седи́т на престо́ле святе́м Свое́м, и пое́м ему́ разу́мно я́ко Царю́ и Бо́гу.
Ты́, и́же ни еди́ному хотя́й поги́бнути, благи́й Го́споди, погиба́ющаго уще́дри, и спаси́ мя, ма́нием всеще́дре ми́лости Твоея́.
Я́же в ве́дении и не в ве́дении согреши́х к Тебе́, Христе́ Го́споди, вся́ ве́дящему прихожду́ и припа́даю Ти́, приими́ мя я́коже блу́днаго.
Да живу́щий гре́х умертвите́ му́ченицы и ме́ртва врага́ пока́жете, о ме́ртвости теле́сней блаже́ннии неради́сте.
Испещре́ни страда́ньми му́ченицы, и оде́ждами кро́вию оброще́нными украша́еми, все́х Царю́ венцено́сцы предстоите́.
Богородичен: Де́во Ма́ти, я́же Бо́га вопло́щшая, гла́сы приими́ вопию́щих Ти́ всегда́, и изба́ви на́с от разли́чных обстоя́ний.
Песнь 4
Ирмос: Дела́ смотре́ния Твоего́ Го́споди, ужаси́ша проро́ка Авваку́ма: изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.
Дела́, я́же в житии́ соверши́х, су́ть лука́ва и лю́та: о ни́хже, Христе́ Бо́же мо́й, изба́ви мя́, покая́ние и́скреннее подая́ ми.
Вся́ку за́поведь честну́ю уничижи́х, стра́х Тво́й отри́нух, Христе́, и бою́ся неизбе́жнаго Твоего́ суди́ща, в не́мже да не осу́диши мене́, Благоутро́бне.
Реме́ньми отвсю́ду вои́стинну протяза́еми, и ра́нами изнуря́еми зе́льне, и ноготьми́ стру́жеми сло́ве, страда́льцы Твои́, ве́рою ра́довахуся.
Поколеба́ти ва́с страда́льцы от Боже́ственнаго стоя́ния, не возмо́же вся́чески лука́вый: те́мже мно́гим коле́блемым, до́блии утвержде́ние Боже́ственное показа́стеся.
Богородичен: Воплоща́ется от чи́стых крове́й Твои́х Госпо́дь, покая́ние чту́щым Тя́ подава́я, Всепе́тая, Твои́м благи́м хода́тайством, я́ко благоутро́бен, и еди́н Человеколю́бец.
Песнь 5
Ирмос: Све́те и́стинный, Христе́ Бо́же, к Тебе́ у́тренюет ду́х мо́й от но́щи, яви́ на мя́ лице́ Твое́.
Воспряни́, о душе́, воспряни́ от сна́ тя́жкаго, моего́ лю́таго греха́, и покая́ния све́том озари́ся.
Обнови́м ду́шу прилежа́нием, и умиле́ния ту́чами напои́мся: я́ко да прозябе́м покая́ния кла́с.
У́гльми любве́ наостри́вшеся, небокова́ннии ме́чеве, страстоте́рпцы яви́стеся, враго́в ссеца́юще полки́.
Непорабоще́ни от врага́ бы́сте, порабо́тисте сего́ страстоте́рпцы, и бли́жнии Христу́ яви́стеся дру́зи.
Богородичен: Де́во в жена́х благослове́нная, Твоя́ ми́лости пода́ждь лю́дем Твои́м: ми́лостиваго бо яви́лася еси́ Ма́ти.
Песнь 6
Ирмос: От ки́та проро́ка изба́вил еси́, мене́ же из глубины́ грехо́в возведи́, Го́споди, и спаси́ мя.
Не́сть в житии́ се́м греха́, его́же а́з еди́н не сотвори́х окая́нный, Еди́не Безгре́шне, уще́дри мя́.
Ве́трилом усе́рдия впери́мся, и ко приста́нищу спасе́ния покая́нием предвари́м вси́, я́ко да спасе́мся.
Пропове́дников, апо́столов и му́чеников страда́нием озаря́ется тва́рь: и́миже и на́с просвети́, Человеколю́бче.
Сосу́ды вмести́вшыя зарю́ Боже́ственную, и честна́я светоли́тия му́ченики вси́ почти́м.
Богородичен: Де́во ве́рным Предста́тельнице, изба́витися от вся́каго греха́ рабо́м Твои́м моли́ Го́спода.
Песнь 7
Ирмос: Благослове́н еси́ Бо́же, ви́дяй бе́здны, и на престо́ле сла́вы седя́й, препе́тый и пресла́вный.
Благослове́н еси́, Бо́же, и́же за благоутро́бие ка́ющихся все́х прие́мля, препе́тый и пресла́вный.
Исцели́, благоутро́бне Христе́, мно́гия моя́ стра́сти, И́же мое́ све́дый неможе́ние, препе́тый и пресла́вный.
Си́лою Боже́ственною укрепи́ся ли́к страстоте́рпец, враги́ победи́ вопия́: препе́тый и превозноси́мый во ве́ки.
Укрепи́вый прему́дрыя страстоте́рпцы сло́ве, претерпе́ти многоплете́нныя му́ки, моли́твами и́х уще́дри все́х.
Богородичен: Благослове́н еси́, Бо́же, И́же во чре́во Деви́че всели́вся, и спа́сл челове́ка, препе́тый и превозноси́мый во ве́ки.
Песнь 8
Ирмос: Творца́ тва́ри, Его́же ужаса́ются А́нгели, по́йте лю́дие, и превозноси́те во вся́ ве́ки.
Ме́ртва преступле́нием бы́вша мя́, Го́споди, оживи́, да Тя́ сла́влю во вся́ ве́ки.
Просвети́в мя́ покая́нием, тьмы́ грехо́вныя изба́ви, Го́споди, да Тя́ сла́влю во вся́ ве́ки.
Страстоте́рпцы му́ченицы, пла́мень пре́лести попра́ша, ро́су с небесе́ прие́мше пресла́вно.
Я́коже земля́ ту́чная святи́и, кла́с вои́стинну стори́чествующ, подвигополо́жнику Христу́ плодоноси́сте.
Богородичен: Из Тебе́ Бо́г возсия́, Всепе́тая Де́во, и богоразу́мием просвети́ омраче́нныя.
Песнь 9
Ирмос: Тя́ блаже́нную в жена́х, и благослове́нную Бо́гом, челове́ческий ро́д, пе́сньми велича́ем.
Ми́лостив бу́ди ми́, Го́споди, без числа́ безу́мно согреши́вшему, и Твоего́ Ца́рствия, Сло́ве, сподо́би мя́.
Я́коже ниневи́тяны спа́сл еси́ дре́вле пока́явшыяся еди́не Спа́се, и на́с пою́щих Тя́ спаси́ ми́лостию Твое́ю.
Пло́ть преда́вше вся́ческим я́звам, неуя́звлену спасли́ есте́ ду́шу страстоте́рпцы Госпо́дни, Боже́ственныя сла́вы прича́стницы.
Днесия́тельныя зве́зды, на земли́ все́х озаря́ющи ду́шы, страстоно́сцы все́х Го́спода яви́стеся.
Богородичен: Но́сиши я́коже престо́л о́гненный ма́нием вся́ нося́щаго, и сосце́ма пита́еши, Де́во, все́х пита́ющаго.