ID=7039
date=53
Кано́н Кресту́, творе́ние Ио́сифово, глас 5
Песнь 1
Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.
И́же непостиже́нием разумева́емаго воплоще́нна, и ми́ру я́вльшася пло́тию, на Дре́ве воздви́же дре́вле восхоте́вшаго, евре́йский собо́р законопресту́пный.
Егда́ плодоно́сна виногра́да Тебе́, Христе́, на Дре́во кре́стное евре́и возбеси́вшеся воздвиго́ша: тогда́ вино́ иска́пал еси́ весе́лия сло́ве, вся́ко пия́нство злы́х оте́млющее.
Зако́ном не подпа́дает похва́льным му́ченицы, ва́ше терпе́ние: па́че бо естества́ вся́каго челове́ческаго боле́зни претерпе́сте, и ко упокое́нию неболе́зненному всели́стеся веселя́щеся.
Во́лны му́к преплы́вше окормле́нием сло́ва, всехва́льнии Христо́вы страда́льцы, во приста́нища достиго́сте небе́сная, Боже́ственныя тишины́ ны́не наслажда́ющеся.
Богородичен: Егда́ из чре́ва Твоего́ рожде́ннаго Го́спода, усмотри́вши на Дре́во без пра́вды возвыша́ема, Де́во прослези́лася еси́, и того́ воспе́ла еси́ неизрече́нное вои́стинну снизхожде́ние.
Песнь 3
Ирмос: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, еди́не бла́же и Человеколю́бче.
Распина́ешися, и ра́й па́ки отверза́ется, и разбо́йник пре́жде все́х ра́дуяся вхо́дит: и умира́еши, Иису́се мо́й, и вра́г льсте́ц умерщвля́ется, умерщвле́нный же Ада́м оживля́ется: сла́ва мно́гому Твоему́ милосе́рдию.
Увяда́еши грехо́вный пла́мень, распина́емь, Иису́се, на Дре́ве за бла́гость: реши́ши пре́лесть связу́емь, обнаже́н бы́в одева́еши оде́ждею сла́вы челове́ка: сла́ва мно́гому благоутро́бию Твоему́.
Явле́й при́сно сия́ющыя зве́зды му́ченики, нече́стия тьму́ прогоня́ющыя: те́х мольба́ми, Христе́, но́щь зо́л мои́х отжени́, и просвети́ омраче́нное мое́ се́рдце.
Зако́нно благосла́внии пострада́вше му́ченицы, и зако́нною ве́рою венцы́ венча́ни бы́ша, и беззако́ннующих сове́ты уклони́ша му́дре, и пи́щу Боже́ственную прия́ша, и ра́йское вселе́ние.
Богородичен: Пою́т а́нгельстии ли́цы Тя́, Всепе́тая, без разсужде́ния си́х преиму́щую: Бо́га бо родила́ еси́ пло́тию, от Дре́ва кля́тву дре́вом погу́бльшаго, и благослове́ние источи́вшаго.
Песнь 4
Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.
Душа́м всеконе́чное избавле́ние сотворя́я, Христе́, в ру́це Отцу́ пре́дал еси́ Пресвяту́ю Ду́шу Твою́, на дре́ве во́лею ви́симь.
Непра́ведный судия́ осуди́ Тя пра́веднаго судию́, Иису́се, умре́ти на Дре́ве ви́симу: я́ко да оправди́ши на́с, непра́ведно врагу́ подкло́ншыяся.
Ви́дети сподо́бистеся му́ченицы я́же от ве́ка Блага́я, беда́м мно́гим и ско́рбем, и неизче́тным му́кам на земли́ явле́нно причасти́вшеся.
Зи́му искуше́ний преидо́сте, и к весне́ воздая́ния небе́снаго достиго́сте, и лико́м а́нгельским, честни́и сочета́стеся му́ченицы.
Богородичен: Ору́жие Боже́ственных Страсте́й про́йде Твою́, Благослове́нная, ду́шу, внегда́ ви́дела еси́ распина́ема Твоего́ Сы́на, и в ру́це О́тчи ду́шу преда́вша.
Песнь 5
Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.
Стоя́л еси́ суди́мь пра́ведный судие́, Христе́, и осужда́я пло́тию вражду́, тро́стию бие́мь, и свобожде́ние соверше́нное подпису́я мне́.
Тебе́ я́ко ви́де пло́тию ви́сима, Христе́, на Дре́ве, со́лнце све́т во тьму́ преложи́, и земля́ поколеба́ся, и ка́мение распаде́ся.
Земли́ концы́ освяти́ли есте́, я́ко испо́лнителие бо зако́на Боже́ственнаго, всехва́льнии му́ченицы, стра́ждуще, святы́ню насле́довасте.
Предо́брейшии и богоза́рнейшии, и́же Боже́ственною сла́вою оде́яни, и обнажи́вше вра́жию зло́бу, му́ченицы да почита́ются.
Богородичен: Тебе́ Всенепоро́чную Бо́жию Роди́тельницу ублажа́ем: Ея́же ра́ди кля́тва непло́дна бы́сть, и избавле́ние и благослове́ние даде́ся.
Песнь 6
Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.
Воздви́жеся Долготерпели́ве на Дре́во, вся́ вра́жия возвыше́ния низложи́л еси́, и спа́сл еси́ па́дшаго, мно́гия ра́ди Твоея́ бла́гости.
Ду́шы пра́ведных, на Дре́ве дре́вле ду́шу Тя́ предаю́ща, Влады́ко, я́ко ощути́ша, ве́чных у́з сло́ве отпуща́еми быва́ху.
Я́коже тве́рдии адама́нти, му́к вся́ко разжже́ние терпели́вым нра́вом претерпе́сте, и врага́ смири́вшеся низложи́сте.
Подо́бницы Христо́вым страсте́м бы́вше, подъя́сте вся́ко муче́ние, страстоте́рпцы Госпо́дни: сего́ ра́ди небе́сных красо́т сподо́бистеся.
Богородичен: Ди́вно Рождество́ Твое́, е́же ве́лия чудеса́ творя́щее, и во святы́х прославля́емо, Богоро́дице еди́на всечу́дная Влады́чице.
Песнь 7
Ирмос: Превозноси́мый отце́в Госпо́дь, пла́мень угаси́, о́троки ороси́ согла́сно пою́щыя: Бо́же, благослове́н еси́.
Венча́ те́рнием Тя́, Царю́ безсме́ртне, собо́р законопресту́пный, из ко́рене изсеца́юща преле́стное те́рние: Бо́же, благослове́н еси́.
Да облече́ши мя́ оде́ждею сло́ве, нетле́ния, обнажи́лся еси́ во́лею: и терпи́ши оплева́ния, и распя́тие, и стра́сть, безстра́стен сы́й по существу́.
Сообра́зни бы́вше страсте́м, святи́и, все́ми влады́чествующему, вои́стинну есте́ сы́нове и насле́дницы Ца́рствия непоколеби́маго.
Древесе́м безслове́снейшым не принесо́сте че́сти, на Дре́ве просте́ршаго ру́це чту́ще, я́ко все́х Царя́ и Влады́ку.
Богородичен: Стра́нно е́сть Рождество́ Твое́, Всенепоро́чная: Бо́га бо родила́ еси́, Дре́вом увяди́вшаго пла́мень пре́лести, и просвети́вшаго ми́р.
Песнь 8
Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая Го́спода по́йте, и превозноси́те во вся́ ве́ки.
Вы́шний Бо́же, на Кре́ст воздви́глся еси́, же́лчи напоя́емь, сла́досте жи́зненная: копие́м пробода́ешися, закала́я зми́я, в раи́ Ада́ма низложи́вшаго.
Разреша́еши мя́ от у́з грехо́вных сло́ве, хоте́нием связу́емь, и ве́чными у́зами связу́я, Спа́се, врага́ отсту́пника: те́мже Твоя́ сла́влю стра́сти во ве́ки.
Яви́стеся прича́стницы све́та невеще́ственнаго, све́ти су́ще втори́и святи́и му́ченицы, тьму́ пре́лести оте́млюще, и все́х ве́рных сердца́ просвеща́юще Боже́ственне.
Иерусали́ма вы́шняго свобо́днаго сы́нове бы́сте му́ченицы, просвеща́юще перворо́дных Це́рковь, и превознося́ще Христа́ во ве́ки.
Богородичен: Стоя́ла еси́ у Креста́ смотря́ющи, Отрокови́це, пригвожде́на Христа́, Его́же родила́ еси́, Влады́чице. Те́мже вопия́ше: не безча́дну мя́ яви́ безнача́льне, безнача́льнаго Отца́ Сы́не и Сло́ве.
Песнь 9
Ирмос: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.
Я́ко а́гнец воздви́глся еси́ на дре́во, Влады́ко Христе́, че́люсти сокруша́я во́лка мы́сленнаго, и от у́ст его́ исхища́я Твоя́ слове́сныя о́вцы, и приводя́, Влады́ко, роди́телю.
Венце́м терно́вым увя́злся еси́, я́коже Ца́рь Ца́рствующих, Христе́, лука́ваго потребля́я ца́рствия, и из ко́рене изсеца́я пре́лести те́рние: те́мже ве́рою Тя́, Бла́же, сла́вим.
Облиста́ я́коже со́лнце тве́рдое стоя́тельное сопротивле́ние ва́ше, и всю́ разруши́ вра́жию мглу́, му́ченицы непобеди́мии, просвети́телие все́х ве́рных, столпи́ непрекло́ннии благоче́стия, достосла́внии.
По́лк богосо́бран, во́инство небе́сное, собо́р избра́нный, свята́я се́нь яви́стеся, вы́ всехва́льнии му́ченицы Спа́са, лука́ваго гра́ды разруша́юще Боже́ственною благода́тию.
Богородичен: Садоде́теля родила́ еси́, благоче́стия сади́теля, всажда́юща на земли́ ра́зум и́стинный, и прозя́бшую, от сада́ разоря́юща кля́тву, Его́же велича́юще, Тебе́ Де́ву ублажа́ем.