ID=7265
date=75
Кано́н честно́му и животворя́щему Кресту́, творе́ние ки́р Ио́сифа, глас 7
Песнь 1
Ирмос: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.
Христо́с возноси́мь на Кре́ст, к Себе́ вся́ привлече́ челове́ки, и низве́рже врага́, все́х низве́ргшаго.
Во́ду животу́ моему́, Иису́се, от живоно́сных ре́бр источи́л еси́, и умертви́л еси́ врага́, Влады́ко, бы́в ме́ртв.
Моли́тву Христу́ за на́с, страстоте́рпцы, приле́жную принеси́те, стра́шнаго суда́ все́м на́м изба́витися.
Смири́вшеся вы́ Христа́ ра́ди, прему́дрии му́ченицы, го́рдаго врага́ низложи́сте Боже́ственною благода́тию.
Богородичен: Возсия́вшаго из Тебе́, превели́ким благоутро́бием, Влады́чице, на Кресте́ зря́щи пла́кала еси́, того́ сла́вящи.
Песнь 3
Ирмос: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́, Го́споди, и Тя́ пое́т ду́х мо́й.
Безстра́стный по существу́, ка́ко стра́сть терпи́ши, живо́т мне́ вдыха́яй? Ка́ко умира́еши на дре́ве? Ве́лия Твоя́ ми́лость и долготерпе́ние, Спа́се.
На Кресте́ посреде́ разбо́йников, Сло́ве, непра́ведно воздви́глся еси́, и оправда́л еси́ ве́рою позна́вшаго Тебе́ Зижди́теля всея́ тва́ри, во́лею стра́ждуща.
Строга́ния пло́ти терпя́ще, ру́к же отя́тие, и но́г, и все́х удо́в страстоте́рпцы, сла́вы сподо́бишася, о на́с моля́щеся.
Премно́гими му́ками о Бо́зе просвети́вшеся, премно́гую сла́ву му́дрии ны́не насле́довасте, всегда́ моля́щеся о душа́х на́ших.
Богородичен: Разреше́ние долго́в на́ших, Чи́стая Де́во, пода́ждь ма́терними Твои́ми моли́твами, на Кресте́ пригвожде́ннаго челове́ка бы́вша, Бо́га Сло́ва ро́ждшая.
Песнь 4
Ирмос: Услы́шах слу́х Тво́й, и убоя́хся: разуме́х дела́ твоя́, и ужасо́хся Го́споди.
Я́коже красне́йший гро́зд на Кресте́ воздви́глся еси́, Влады́ко, весе́лия вино́ иска́пал еси́ Человеколю́бче.
Многоболе́зненныя челове́ков стра́сти утиши́л еси́ вои́стинну, стра́сти Влады́ко, во́лею на пло́ти Твое́й прие́м.
Острупи́ша острупля́еми страстоте́рпцы борца́: и яви́шася вра́чеве ду́ш на́ших.
Ополчи́шася к мучи́телем страстоно́сцы, и победи́вше, венча́ни бы́ша побе́дными венцы́.
Богородичен: Родила́ еси́ без се́мене Де́во Сло́ва, на Кресте́ погуби́вшаго тле́ние бла́гостию.
Песнь 5
Ирмос: У́тренюет ду́х мо́й к Тебе́, Бо́же: зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.
Воздви́жемь, Влады́ко, на Дре́во пло́тию, тва́рь всю́ из ро́ва лю́тых неразу́мия извле́кл еси́, к ра́зуму Твоему́, Человеколю́бче.
На ло́бнем Тя́ ме́сте испроси́ша лю́дие беззако́ннии распя́ти Иису́се, главу́ па́губную зми́еву сокруша́ющаго.
Уста́висте злоче́стия тече́ние, Христо́вы му́ченицы, Боже́ственными кровьми́ ва́шими, и фарао́на мучи́теля в си́х потопи́сте.
Ноготьми́ неща́дно стру́жеми, растерза́сте обличе́ньми, страда́льцы, сердца́ суему́дренная, и победи́телие бы́сте.
Богородичен: Освяти́л е́сть Бо́г утро́бу Твою́, Свята́я Чи́стая, и всели́ся в ню́: и на Кре́ст воздви́жемь, тва́рь совоздви́гл е́сть.
Песнь 6
Ирмос: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.
Неду́говавшее челове́ческое естество́, я́влься за милосе́рдие ми́лости, врачу́ неду́гующих, исцели́л еси́ Кресто́м и стра́стию Твое́ю.
Дре́вом дре́вле Ада́м осуди́ся: Дре́вом же ны́не кре́стным оправда́ся, вхожде́ние прие́м в ра́й, и сла́дости восприя́тие.
Пое́м Тя́ пло́тию распе́ншагося, сла́вим те́рнием венча́вшагося, и сла́вою венча́вшаго челове́ки, Царю́ преблаги́й.
Губи́тельный ны́не отри́нувше вре́д страда́льцы идолобе́сия, му́кам причасти́шася: и уме́рше со Христо́м ца́рствуют.
Ни гоне́ние, ни гла́д, ни нагота́, ни беды́, ниже́ сме́рть, отню́д Боже́ственныя страстоте́рпцы, от любве́ Христо́вы разлучи́ша.
Богородичен: Славосло́виши из Тебе́ вопло́щшагося, и пла́чеши на Кресте́ воздви́женаго, того́ смотря́ющи, Де́во Ма́ти Свята́я Всенепоро́чная.
Песнь 7
Ирмос: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.
Тяготу́ облегча́я беззако́ний мои́х, посреде́ беззако́нных воздви́глся еси́ на Кре́ст, преблаги́й Го́споди, превозноси́мый отце́в Госпо́дь, и Бо́г благослове́н еси́.
Копие́м пробо́дься в Боже́ственная ре́бра Твоя́, и ре́бренное поползне́ние испра́вил еси́, Спа́се, пла́менному же ору́жию дава́ти ми́ вхо́д рая́ повелева́еши всегда́.
Зве́зды на высоте́ основа́нныя це́ркве му́ченицы бы́вше, тва́рь озаря́ете страда́ний све́тлостию, и исцеле́ний сия́нием.
Кни́га прино́сит при́сно напи́санных живы́х Госпо́дних му́ченик, напи́саная Бо́жия оправда́ния усе́рдно сохрани́вших, и пострада́вших кре́пко.
Богородичен: Всесвята́я, пресвято́е Сло́во, е́же от нея́ возсия́вшее, на святе́м Кресте́ воздви́жено, и освяща́ющо земны́я, зря́щи рыда́ше.
Песнь 8
Ирмос: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.
Ме́ртва мя́ показа́ дре́во ра́зума, Ты́ же, Христе́ мо́й, умертви́вся на дре́ве оживи́л еси́, и просвети́л еси́ пе́ти: по́йте, свяще́нницы, лю́дие превозноси́те во вся́ ве́ки.
Те́рнием венча́ законопресту́пный со́нм Тя́, Царю́, преслуша́ния искоренева́юща те́рние Ада́ма первозда́ннаго, и воздви́же на Кре́ст, вся́ из глубины́ пре́лести извле́кшаго.
Ра́зумом просте́ршаго Небеса́, Тебе́ простира́ют на Дре́ве лю́дие неразу́мнии, исцеля́юща на́шя стра́сти стра́стию Твое́ю, Спа́се, и уставля́юща боле́зни, я́же от гвозде́й боле́зньми.
Му́ченик мо́щи благоуха́ния испуща́ют чуде́с приходя́щым несумне́нным се́рдцем, и страсте́й злово́ние прогоня́ют при́сно, и все́м здра́вие о Бо́зе подава́ют.
Богородичен: Святы́х чи́нове мо́лятся, Де́во, из утро́бы Твоея́ проше́дшему Влады́це, показа́вшему на Кресте́ си́м пу́ть страда́ния, Чи́стая, и славосло́вят Тя́ я́ко все́х Цари́цу.
Песнь 9
Ирмос: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.
На Кресте́ Тя возвы́шена, Царю́ веко́в, я́ко ви́де со́лнце омрачи́ся, и земля́ потрясе́ся, и це́ркве раздра́ся заве́са све́тлости, Иису́се Всеси́льне.
Ископа́ша ру́це и но́зе твои́ беззако́нницы, и ре́бра живоно́сная прободо́ша копие́м, и же́лчи со о́цтом напои́ша Тя́, Христе́ мо́й, все́х сла́дость, и Бо́га и́стинна.
Сокруши́ша началозло́бнаго се́ти, сокруша́еми вся́кими ви́ды муче́ния, и венцено́сцы побе́дою бы́вше, до́блии страда́льцы ублажа́ются.
Освяти́ша положе́нием моще́й всю́ зе́млю страстоте́рпцы, и угаси́ша сква́ры идоложе́ртвенныя, огню́ примеша́ющеся, и в не́м та́йно всесожига́еми.
Богородичен: Благолюби́вая, херуви́м святе́йшая, я́же Бо́жие Сло́во Бо́га пло́тию ро́ждшая, воздви́женнаго на Кресте́ хоте́нием, за все́х приле́жно тому́ моли́ся.