55 Глас 5, пяток. Утреня. Кано́н честно́му и животворя́щему Кресту́, творе́ние ки́р Ио́сифа.

ID=7056

date=55

Кано́н честно́му и животворя́щему Кресту́, творе́ние ки́р Ио́сифа, глас 5

Песнь 1

Ирмос: Спаси́телю Бо́гу, в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ Еди́ному пои́м, я́ко просла́вися.

Страстоуби́йственную, Христе́, хоте́нием Твои́м претерпе́л еси́ стра́сть, и уби́л еси́ в раи́ дре́вле на́с уби́вшаго: те́мже Твою́ сла́вим благосты́ню.

Воздви́глся еси́ на Кре́ст, и низпаде́ся вра́г: и па́дшии воздвиго́хомся, и ра́йстии жи́тели, Христе́, бы́хом, держа́ву сла́вяще Ца́рствия Твоего́.

Щито́м кре́стным вооружи́вшеся до́бре, к боре́нию вся́кому бесо́вскому ополчи́стеся прему́дрии великому́ченицы: и того́ победи́вше, сла́ву получи́сте.

Я́ко а́гнцы честни́и, на́с ра́ди страда́льцы А́гнцу пожре́ному принесо́стеся, нечи́стыя же́ртвы я́ве уста́вльше: те́мже ублажа́ем ва́с, всехва́льнии.

Богородичен: Но́во отроча́ на́м ве́тхаго де́ньми, Чи́стая Де́во родила́ еси́, обетша́вшее естество́ челове́ческое обновля́юща, Всенепоро́чная, Боже́ственною стра́стию свое́ю.

Песнь 3

Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Увяда́еши плода́ тлю́, на Дре́во Спа́се воздвиза́емь, и нетле́ния исто́чники на́м от ре́бр источа́еши, Влады́ко.

Закла́ся на кресте́ я́коже а́гнец, пра́ги назна́менуя ду́ш на́ших Боже́ственною Твое́ю кро́вию, Влады́ко: те́мже Тя́ со стра́хом сла́вим.

Вя́жеми Христо́вы страда́льцы, и многообра́зне ураня́еми, и звере́м помета́еми, непрело́жни пребы́сте.

Я́коже гро́здие виногра́да живо́тнаго, муче́ния вино́ источи́ша, ве́рных сердца́ веселя́щее, Бо́га на́шего му́ченицы.

Богородичен: Жи́зни на́м хода́тай, Чи́стая, умира́я на Дре́ве яви́ся Тво́й Сы́н же и Госпо́дь, прославля́яй пою́щыя Тя́ .

Песнь 4

Ирмос: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Егда́ заше́л еси́ на Кресте́ пра́вды Со́лнце Христе́, све́т невече́рний возсия́л еси́ на́м, пою́щым Твое́, Сло́ве, стра́шное смотре́ние.

Стоя́щу Ти́ судие́, иногда́ пред суди́щем, Христе́, осуди́л еси́ непра́веднаго врага́: и распя́лся еси́ посреде́ непра́ведных, на́с оправда́я.

Венча́еми победи́тельно, Госпо́дни страда́льцы, неви́димаго посрами́ша врага́, и взыва́ху: сла́ва си́ле Твое́й, Го́споди.

Неувяда́емыя цве́ты мы́сленнаго рая́ многоце́нныя сосу́ды, Христо́вы страстоте́рпцы, ве́рою сше́дшеся да почти́м.

Богородичен: Егда́ узре́ла на Кресте́ Христа́, Его́же родила́ еси́, Чи́стая, диви́лася еси́ неизрече́нному Его́ долготерпе́нию: те́мже Тя́ с ни́м прославля́ем.

Песнь 5

Ирмос: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве во Тебе́ ино́го не зна́ем.

Ка́мение Тя́ на ка́мени ощути́вше, Христе́, воздви́жена, распадо́шася, и земли́ потрясо́шася основа́ния.

Отложи́ све́тлость со́лнце, воздви́жену Тебе́ на Дре́во, Со́лнце пра́ведное Долготерпели́ве.

Чуде́с блиста́ете святи́и све́тлостию, тьму́ отгоня́юще боле́зней ду́хом.

Разсека́ема бе́ша телеса́ ва́ша мечи́, ду́х же Боже́ственныя любве́ не отсека́емь име́сте му́ченицы.

Богородичен: Ви́девши на Кре́ст воздви́жена Спа́са, рыда́ющи восклица́ше, Де́во Ма́ти Всенепоро́чная.

Песнь 6

Ирмос: Обы́де мя́ бе́здна, гро́б мне́ ки́т бы́сть, а́з же возопи́х к Тебе́ Человеколю́бцу, и Спасе́ мя десни́ца Твоя́, Го́споди.

Кре́ст на земли́ водружа́шеся, и паде́ние бесо́м быва́ше: и ве́ра утвержде́ния нача́ло приима́ше, и зло́ба от среды́ отгони́ма быва́ше.

Со́лнце угасе́, пло́ть Твою́ я́коже свещу́ возже́гшу Ти́ на Дре́ве, Го́споди: дра́хма же обрета́шеся погребе́ная мра́чными страстьми́.

Воздви́жену Ти́, Человеколю́бче, на Дре́во, ли́к му́ченик после́дующ стопа́м Твои́м име́л еси́, стра́сти Твое́й подо́бящься, безстра́стию хода́таице.

Пото́ки изсуши́ли есте́ преле́стныя кро́вным тече́нием, и о́гнь угаси́сте чу́ждий бесо́в Боже́ственною росо́ю, венцено́сцы му́ченицы.

Богородичен: Ору́жие про́йде се́рдце Твое́, Де́во Всенепоро́чная, егда́ распина́ема Зижди́теля ви́дела еси́, и копие́м Боже́ственная ре́бра ископава́ема.

Песнь 7

Ирмос: В пещи́ о́гненней песносло́вцы спасы́й о́троки, благослове́н Бо́г Оте́ц на́ших.

Да изба́вимся мы́ сла́стнаго греха́, же́лчи вкуси́л еси́, Христе́, сла́досте жи́зненная.

Тебе́ на Дре́ве, Христе́, уя́звену, исцеле́ша я́звы Ада́мовы многоле́тныя.

Свои́ми во́льными устремле́ньми отлучи́шася ко страда́нию, страстоте́рпцы, и победи́телие яви́шася.

Поче́тше Бо́га боле́зненным безче́стием, и вы́шнюю по́честь получи́сте страда́льцы.

Богородичен: По рождестве́ Чи́стая, я́коже и пре́жде рождества́ пребыва́еши: Бо́г бо бе́ рожде́йся, да обожи́т челове́ки.

Песнь 8

Ирмос: Из отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

И́же кля́тву Дре́ва дре́вом исцели́вый, и благослове́ние источи́вый челове́ком, Преблаги́й: Тебе́, Спа́се, пое́м, и Тебе́ славосло́вим во ве́ки.

Превозвыша́емаго зми́я Кресто́м Твои́м смири́л еси́, и лю́те па́дшагося смиря́емь возне́сл еси́: Тебе́, Спа́се, пое́м, и превозно́сим во вся́ ве́ки.

Потреби́тели пре́лести, и побо́рники Боже́ственныя ве́ры, церко́вныя столпы́, и тве́рдыя вои́стинну адама́нты, Христо́вы ору́жники, ве́рою страстоно́сцы да почти́м в пе́снех.

Сла́внии страстоте́рпцы, я́коже со́лнце возсия́ша, боле́зней о́блаки разгна́вше благода́тию, и нече́стия мра́к разори́ша ве́рою Тро́ическою.

Богородичен: Невестоводи́тель Тебе́ Де́во, Гаврии́л по́слан бы́сть: ра́дуйся, вопия́ше Ти́ глаго́ля: светле́йшая пала́то все́х Царя́ Христа́, в ню́же всели́вся, обожи́ вся́ челове́ки.

Песнь 9

Ирмос: Тя́ па́че ума́ и словесе́ ма́терь Бо́жию, в ле́то безле́тнаго неизрече́нно ро́ждшую, ве́рнии единому́дренно велича́ем.

Кре́пость вра́жия и держа́ва отя́та бы́сть, держа́вный еди́не Го́споди, на Кре́ст вознесе́ну Ти́, и пе́рсты на не́м окровави́вшу.

Ископа́ша, Христе́ мо́й, ру́це и но́зе Твои́, и ко́сти Твоя́ изочто́ша распе́ншии беззако́нницы, и же́лчи со О́цтом Тебе́ напои́ша.

Усты́ све́тлыми Бо́га пропове́дасте бы́вшаго челове́ка, пред мучи́тели страстоте́рпцы, и сла́ву насле́довасте.

Боле́знь прия́ша уязви́вшии врази́ ра́нами, и разли́чными му́ками бию́ще ва́с, всечестни́и вра́чеве боле́зней, Боже́ственнии му́ченицы.

Богородичен: Све́т на́м, Чи́стая, из Тебе́ возсия́ Иису́с, и просвети́ тва́рь всю́ распя́тием, и бесо́вскую тьму́ прогна́л е́сть.