ID=7090
date=56
И́н кано́н усо́пшым, пое́мый на ряду́, иде́же не́сть мине́и, Феофанов, глас 5
Песнь 1
Ирмос: Спаси́телю Бо́гу, в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ Еди́ному пои́м, я́ко просла́вися.
Боже́ственною любо́вию страстоте́рпцы Христо́вы мучи́телей горды́ню попра́ша: преста́вленным же ве́рою ми́лостивное про́сят оставле́ние и поко́й.
Во святы́х селе́ниих, во дво́рех Твои́х, Христе́, преста́вленныя всели́! И́же до́лг за ни́х пролия́вый кро́вь Твою́, Влады́ко, пречестне́йшую.
Прему́дрость Бо́жия, И́же изве́стно начерта́ние все́ нося́й Роди́телево: и́хже прия́т, Ще́дре, Са́м упоко́й, подава́я и́м присносу́щное блаже́нство.
Богородичен: Светоно́сная се́нь, златови́дный ковче́г, Боже́ственное Сло́во обдержа́щи воплоще́нное на́с ра́ди, и разори́вшее сме́ртную си́лу, яви́лася еси́, Всенепоро́чная.
Песнь 3
Ирмос: Утверди́ ны́, Бо́же Спа́се, Твое́ю си́лою, и воздви́гни ро́г Твоея́ Це́ркве, правове́рно хва́лящих Тя́.
Му́жески подви́гшеся страда́льцы, мучи́тельским стремле́нием проти́ву ста́ша, и мо́лятся о усо́пших Христу́.
Зако́ны Твои́ми воспита́вшихся, преста́вльшихся, Преблаги́й, в све́тлых Твои́х селе́ниих прие́мь, упоко́й.
Ми́лостивый Еди́не Бо́же, я́же избра́л еси́, сподо́би святы́х све́тлостей, презира́я те́х согреше́ния.
Богородичен: Пое́м Твое́ Рождество́, Чи́стая, И́мже пе́рваго осужде́ния и кля́твы изба́вихомся, и от сме́рти свободи́хомся.
Песнь 4
Ирмос: Услы́шах, Го́споди, из гро́ба Твое́ воста́ние, и просла́вих Твою́ непобеди́мую си́лу.
Соприсносу́щна Тя́ Отцу́ испове́давше благоче́стно му́ченицы, Христе́, убие́ни бы́ша, и вопию́т Ти́: изба́ви и́хже прия́л еси́ рабы́ Твоя́.
И́же в мертвеце́х бы́вый еди́н свобо́дь мертве́ц, Христе́, и мертвеце́м жи́знь ве́чную да́руя, поко́й да́ждь ны́не преста́вленым рабо́м Твои́м.
Прише́дый во е́же спасти́ заблу́ждшыя, Христе́, ра́йскаго сподо́би вселе́ния, я́же преста́вил еси́ в ве́ре, оправда́вый благода́тию.
Богородичен: Осени́ Тя Вы́шняго, Отрокови́це, си́ла, в Тебе́ ра́й соде́ла живо́тный, дре́во иму́щий посреде́, Хода́тая и Го́спода.
Песнь 5
Ирмос: У́тренююще вопие́м Ти́, Го́споди, спаси́ ны, Ты́ бо еси́ Бо́г на́ш, ра́зве бо Тебе́ ино́го не зна́ем.
Му́ченик прие́м, Го́споди, моле́ния, ду́шы, я́же преста́вил еси́, со избра́нными Ти́ причти́.
Предре́кл еси́, не узре́ти сме́рти ве́рующым в Тя́: те́мже, Влады́ко, усо́пшыя упоко́й.
Красоты́ до́му Твоего́, Го́споди, Твоя́ рабы́ улучи́ти сподо́би, и сла́дкаго прича́стия.
Богородичен: Сло́во, Е́же Отцу́ соприсносу́щное, от Де́вы вопло́щься, умертви́ сме́ртию сме́рть.
Песнь 6
Ирмос: Обы́де мя́ бе́здна, гро́б мне́ ки́т бы́сть: а́з же возопи́х к Тебе́ Человеколю́бцу, и спасе́ мя десни́ца Твоя́, Го́споди.
Во́инство му́ченик Твои́х, вы́шним си́лам подо́бящеся, Христе́, мо́лят Тя́, пода́ждь Человеколю́бче, преста́вленым е́же от Тебе́ наслажде́ние.
В ме́стех прохлажде́ния, в ме́стех святы́х све́тлости, в ме́стех ослабле́ния, Христе́, я́ко человеколю́бец, и́хже прия́л еси́, учини́ рабы́ Твоя́.
Очи́сти рабы́ Твоя́, и те́м согреше́ний проще́ние пода́ждь, Человеколю́бче, и жи́зни сподо́би нетле́нней, и блаже́нному насле́дию.
Богородичен: Зача́тия безсе́меннаго Твоего́, кто́ сло́вом изрещи́ мо́жет чудесе́, Всенепоро́чная: Бо́га во родила́ еси́, за милосе́рдие к на́м прише́дша.
Песнь 7
Ирмос: В пещи́ о́гненней песносло́вцы спасы́й о́троки, благослове́н Бо́г оте́ц на́ших.
Ны́не непристу́пнаго све́та насы́титися, пода́ждь, Спа́се, преста́вленым, мольба́ми страстоте́рпец Твои́х.
В Це́ркви пе́рвенец, Христе́, в ве́ре сконча́вшихся, Ще́дре, сопричти́.
Укра́шены оде́ждами нетле́ния Твоя́ Рабы́, преста́вленыя к Тебе́, Спа́се, упоко́й.
Богородичен: То́к сме́ртнаго существа́ отсекла́ еси́, Пречи́стая, жи́знь без се́мене заче́нши, Всенепоро́чная.
Песнь 8
Ирмос: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.
И́же святы́х му́ченик по́двиги прие́мый, и те́х ра́ди упокоя́яй в ве́ре Твое́й усо́пшыя, Тебе́, Спа́се, пое́м, и превозно́сим во вся́ ве́ки.
Преми́рныя Твоея́ сла́вы сия́нием озаря́тися, я́же от на́с преста́вленыя сподо́би, я́ко благоутро́бен, Тебе́, Спа́се, пою́щыя, и превознося́щыя во вся́ ве́ки.
С ли́ки святы́х, и́хже преста́вил еси́, учини́, и Авраа́му, в не́дрех с Ла́зарем причти́ Тебе́, Спа́се, пою́щих, и превознося́щих во вся́ ве́ки .
Богородичен: Укра́шена добро́тою чистоты́, Де́во Ма́ти, добротво́рнаго благоле́пия жили́ще бы́вши: те́мже Тя́ пое́м, и превозно́сим Чи́стую во вся́ ве́ки.
Песнь 9
Ирмос: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.
Страда́ний свяще́нных му́ченицы, воздая́ния прие́мше, дарова́ти Тя́ ны́не мо́лят, ве́рою преста́вленым, Спа́се, ослабле́ние.
Умерщвле́ние претерпе́л еси́, Еди́не Спа́се Безсме́ртне, и́же воскресе́ние ме́ртвым подая́ я́ко благоутро́бен, и безсме́ртия све́тлость.
Испра́вил еси́ на́с па́дших в сме́рть, и на живо́т ве́чный наде́ятися научи́л еси́, его́же улучи́ти Твои́м рабо́м, Спа́се, да́руй.
Богородичен: Зако́на се́ни преидо́ша рождество́м Твои́м, и́стина возсия́, благода́ть дарова́ся Богоро́дице: те́мже Тя́ велича́ем.