ID=6820
date=57
Ин канон Пресвятей Богородице, глас 5
Песнь 1
Све́та все́льшагося в Тя́, Пречи́стая, и просве́щшаго ми́р луча́ми Божества́, Христа́ моли́, просвети́ти вся́ пою́щыя Тя́, Ма́ти Де́во.
Я́ко украша́ема добро́тою доброде́телей, Благода́тная, добротво́рное благоле́пие луче́ю Ду́ха, подъя́ла еси́, Всечи́стая, вся́ческая удобри́вшаго.
Тебе́ дре́вле прообразу́ющи купина́ в Сина́и, не опали́ся, Де́во, огню́ присовоку́пльшися: Де́ва бо родила́ еси́, и Де́ва пребыла́ еси́, па́че смы́сла Ма́ти Де́во.
Песнь 3
Ле́ствица, Е́юже к на́м сни́де Вы́шний, истле́вшее естество́ испра́вити, Ты́ я́вственно, Чи́стая, все́м ны́не ви́дена была́ еси́, Тобо́ю бо Преблаги́й ми́рови бесе́довати (причасти́тися) благоволи́.
Е́же дре́вле предуста́вленное, Де́во, та́инство, и пре́жде ве́к прови́димое вся́ ве́дущему Бо́гу, ле́том ны́не напосле́док в ложесна́х Твои́х, Всенепоро́чная, коне́ц прие́м яви́ся.
Разреши́ся кля́твы дре́вния осужде́ние Твои́м хода́тайством, Де́во Пречи́стая: из Тебе́ бо Госпо́дь я́влься, все́м благослове́ние я́ко Преблаги́й источи́, Еди́на челове́ком удобре́ние.
Песнь 4
Се́рдцем и умо́м, душе́ю же и усты́ испове́дую всеблагоче́стно Тя́ Богоро́дицу вои́стинну, Чи́стая, спасе́ния пло́д объе́мля, и спаса́юся, Де́во, моли́твами Твои́ми.
Созда́вый от не су́щих вся́ческая, от Тебе́, Чи́стыя, созда́тися я́ко Благоде́тель благоволи́, на спасе́ние ве́рою и любо́вию Тя́ пою́щих, Всенепоро́чная.
Пою́т Твое́ Рождество́, Всенепоро́чная, преми́рнии ли́цы, спасе́нию ра́дующеся, И́стинную Богоро́дицу му́дрствующих Тя́, Де́во Нескве́рная.
Тя́ Же́зл Иса́иа именова́, от Него́же прозябе́ на́м кра́сный Цве́т, Христо́с Бо́г, на спасе́ние ве́рою и любо́вию притека́ющих к Покро́ву Твоему́.
Песнь 5
Вси́ проро́цы Тя́ я́ве предвозвести́ша хотя́щую бы́ти Бо́жию Ма́терь, Богоро́дице Чи́стая: еди́на бо обрела́ся еси́, Чи́стая, соверше́нна Непоро́чная.
Све́тел о́блак Тя́ живо́тныя воды́, на́м ту́чу нетле́ния Христа́ одожди́вший отча́янным, Чи́стая, познава́ем.
Я́ко бли́з всю́ Тя до́бру и непоро́чну, запечатле́нну де́вством чи́сте возлюби́, в Тя́ Всели́выйся Бо́г, я́ко еди́н Благоутро́бен.
Песнь 6
И́же всему́ вино́вный, и е́же бы́ти все́м пода́вый, я́ко вино́вну имя́ше воплоща́емь, е́же по на́м, Тя́, Богома́ти Всенепоро́чная.
Исцеле́ний, Влады́чице, душепита́тельный точа́щий исто́чник ве́рно притека́ющым к покро́ву Твоему́ благосла́вному, ве́мы Тя́, Всенепоро́чная.
Спасе́нию вино́вна Жизнода́вца родила́ еси́ на́м, ве́чное избавле́ние да́рующаго, И́стинную Богоро́дицу Тя́ пропове́дающым.
Песнь 7
Неопределе́нный пребы́в Непрело́жен, пло́ти по Ипоста́си соедини́ся, я́ко Благоутро́бен, в Тебе́ Пресвяте́й: И́же Еди́н благослове́н Бо́г оте́ц на́ших.
Неве́сту Тя́ Всенепоро́чную, Богоро́дице Влады́чице, согла́сно сла́вим и Престо́л Зижди́теля Твоего́. Ему́же вси́ пое́м: Бо́же, благослове́н еси́.
Ма́ти все́х Царя́, очи́щшися ду́хом Де́во, была́ еси́, Тебе́ Созда́вшаго. Ему́же вси́ пое́м: Бо́же, благослове́н еси́.
Спасе́ мя Госпо́дь, Богома́ти Пречи́стая, оде́ждею пло́ти из Тебе́ оде́явся. Ему́же вси́ пое́м: Бо́же, благослове́н еси́.
Песнь 8
Преста́ ны́не я́же пра́отчая печа́ль, ра́дость прие́мши Ти́ Богома́терни. Те́мже непреста́нно пое́м Тя́, Де́во, и превозно́сим во вся́ ве́ки.
Пое́т с на́ми безпло́тных собо́р, Де́во, Рождество́ Твое́ непостижи́мое, еди́н ли́к соста́вльше любо́вию, и превознося́ще его́ во ве́ки.
Струя́ прозра́чная безсме́ртия, Отрокови́це, из Тебе́ изы́де, И́же все́х Госпо́дь, скве́рну омыва́я ве́рою Тя́ пою́щих, и превознося́щих во вся́ ве́ки.
Боже́ственный вои́стинну, и светоно́сный Престо́л, и скрижа́ли благода́ти испове́дуем Тя́, Сло́во, Де́во, О́тчее я́ко прие́мшую: Его́же превозно́сим во вся́ ве́ки.
Песнь 9
От чи́стых крове́й Твои́х усыри́ся пло́ть преесте́ственно все́х Соде́телю, Единоро́дному Сы́ну Роди́телеву, не от му́жа, без се́мене же у́мна и одушевле́нна, Богоро́дице Присноде́во.
Обходи́мое уста́вила еси́ сме́рти неудержи́мое стремле́ние, ро́ждши пло́тию вои́стинну па́че ума́ Жи́знь ве́чную: Е́йже прило́жься усты́ го́рькими а́д упраздни́ся, Пресвята́я Ма́ти Де́во.
На престо́ле седя́ Сы́н Тво́й Влады́чне, ря́сны Тя́ златы́ми Боже́ственных доброде́телей све́т сия́ющу, одесну́ю поста́ви Себе́, Чи́стая, дая́ че́сть я́ко Ма́тери Тебе́, Всенепоро́чная.
Па́че ума́ Рождество́ Твое́, Богома́ти: без му́жа бо зача́тие в тебе́, и деви́чески рожде́ние бы́сть: и́бо Бо́г е́сть Рожде́йся, Его́же велича́юще, Тя́, Де́во, ублажа́ем.