ID=6819
date=57
Другий канон крестовоскресен, глас 5
Песнь 1
И́же во́лею на кресте́ пригвожде́нному пло́тию, и дре́вняго от изрече́ния дре́вом (дре́вняго осужде́ния и́же дре́вом) па́дшаго свобо́ждшему, Тому́ Еди́ному воспои́м: я́ко просла́вися.
И́же из гро́ба мертвецу́ воскре́сшу Христу́, и па́дшаго совозста́вившу, и соседе́нием Оте́ческим украси́вшему, Тому́ Еди́ному воспои́м: я́ко просла́вися.
Богородичен: Пречи́стая Ма́ти Бо́жия, из Тебе́ вопло́щшемуся, и от не́др Роди́теля не разлу́чшемуся Бо́гу, непреста́нно моли́ся, от вся́каго обстоя́ния спасти́, и́хже созда́.
Песнь 3
Воскре́сл еси́ от гро́ба, Христе́, тли́ сме́ртныя изба́вль воспева́ющих, Жизнода́вче, во́льное Твое́ распя́тие.
Пома́зати ми́ром те́ло Твое́ мироно́сицы, Христе́, тща́хуся, и не обре́тшя возврати́шася, воспева́ющя Твое́ Воста́ние.
Богородичен: Моли́ непреста́нно, Чи́стая, воплоще́ннаго из боку́ Твое́ю, изба́вити от ле́сти диа́воли, воспева́ющыя Тя́, Де́ву Чи́стую.
Песнь 4
Я́ко водрузи́ся на земли́ на ло́бнем Кре́ст, сокруши́шася вереи́ и вра́тницы ве́чнии, и возопи́ша: сла́ва си́ле Твое́й, Го́споди.
Я́ко сни́де Спа́с к свя́занным я́ко ме́ртв, совоскресо́ша с Ни́м и́же от ве́ка уме́ршии, и возопи́ша: сла́ва си́ле Твое́й, Го́споди.
Де́ва роди́, и ма́терских не позна́: но Ма́ти у́бо е́сть, Де́ва же пребы́сть: Ю́же воспева́юще, ра́дуйся, Богоро́дице, взыва́ем.
Песнь 5
Просте́рл еси́ дла́ни, Спа́се на́ш, на дре́ве, вся́ призыва́я к Себе́, я́ко Человеколю́бец.
Плени́л еси́ а́д, Спа́се мо́й, Твои́м погребе́нием, и Твои́м Воскресе́нием ра́дости вся́ испо́лнил еси́.
Воскре́с от гро́ба тридне́вно, Жизнода́вче, и все́м источи́л еси́ безсме́ртие неги́блющее.
Богородичен: Де́ву по Рождестве́ воспева́ем Тя́, Богоро́дице: Ты́ бо Бо́га Сло́ва пло́тию ми́рови родила́ еси́.
Песнь 6
Просте́рл еси́ дла́ни Твои́, собира́я дале́че расточе́нная язы́к Твои́х собра́ния, Христе́ Бо́же на́ш, живоно́сным Кресто́м Твои́м, я́ко Человеколю́бец.
Плени́л еси́ сме́рть, и врата́ а́дова сокруши́л еси́, Ада́м же свя́занный разреше́н бы́в, вопия́ше Тебе́: спасе́ мя десни́ца Твоя́, Го́споди.
Богородичен: Купину́ Тя неопали́му, и го́ру и ле́ствицу одушевле́ну, и врата́ небе́сная досто́йно сла́вим, Мари́е сла́вная, правосла́вных похвало́.
Песнь 7
И́же дре́вом кре́стным и́дольскую пре́лесть разреши́вый, благослове́н Бо́г оте́ц на́ших.
Воскресы́й из ме́ртвых, и су́щыя во а́де совоздви́гнувый, благослове́н Бо́г оте́ц на́ших.
Твое́ю сме́ртию, Христе́, сме́ртную разо́рь держа́ву, благослове́н Бо́г оте́ц на́ших.
Богородичен: И́же от Де́вы ро́ждься, и Богоро́дицу Сию́ показа́вый, благослове́н Бо́г оте́ц на́ших.
Песнь 8
И́же на Кресте́ во́лею дла́ни просте́ршаго, и у́зы сме́ртныя разруши́вшаго Христа́ Бо́га, свяще́нницы по́йте, лю́дие превозноси́те во вся́ ве́ки.
И́же я́ко Жениха́ из гро́ба возсия́вшаго Христа́ Бо́га, и мироно́сицам я́вльшагося, и ра́дость те́м провеща́вша, свяще́нницы по́йте, лю́дие превозноси́те во вся́ ве́ки.
Богородичен: Херуви́м превы́шши яви́лася еси́, Богоро́дице Чи́стая, во чре́ве Твое́м, И́же на те́х носи́маго поне́сши: Его́же со безпло́тными челове́цы славосло́вим во вся́ ве́ки.
Песнь 9
Тебе́ И́же на Кресте́ стра́сть подъе́мшаго, и а́дову си́лу сме́ртию сокруши́вшаго, ве́рнии правосла́вно велича́ем.
Тебе́ из гро́ба тридне́вно воскре́сша, и а́д плени́вшаго, и ми́р просвети́вшаго, ве́рнии единому́дренно велича́ем.
Богородичен: Ра́дуйся, Богоро́дице, Ма́ти Христа́ Бо́га, Его́же родила́ еси́, моли́ прегреше́ний оставле́ние дарова́ти, ве́рою пою́щым Тя́.