ID=7252
date=71
Канон, творение кир Иосифа, глас 7
Песнь 1
Ирмос: Поспе́шествовавшему Бо́гу во Еги́пте Моисе́ови, извести́ Изра́иля, тому́ еди́ному пои́м, я́ко просла́вися.
В пучи́ну лю́тых впа́д, вопию́ Ти: ру́ку ми́ простри́, Ще́дре, и спаси́ мя я́ко Петра́, Человеколю́бче.
Мене́ ка́ющагося, Христе́, я́коже блудни́цу от согреше́ний мно́гих омы́й манове́нием ми́лости Твоея́, да ве́рою сла́влю Тя́.
И́же святы́я Твоя́, Христе́, горни́лом просвети́вый многови́дных ра́н, те́х моле́нием от помраче́ния страсте́й изба́ви мя́.
Терпе́нием ра́н очи́стившеся, Со́лнца мно́жае облиста́ша святи́и му́ченицы, и пре́лесть помрачи́ша.
Богородичен: Я́же предста́тельнице ве́рных, я́же согреша́ющих обраще́ние к Бо́гу, Де́во Всепе́тая, моли́твами Твои́ми спаси́ мя.
Песнь 3
Ирмос: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м: разшири́шася на враги́ моя́ уста́ моя́, возвесели́хся о спасе́нии Твое́м.
Но́щию безме́стными содержи́мь бы́х грехи́, све́том мя́ покая́ния ны́не озари́, светода́телю Человеколю́бче, да ве́рою сла́влю Тя́.
Путие́ вси́, по ни́хже ходи́х в житии́, в про́пасть сласте́й мя́ низри́нуша: Иису́се, покая́ния ми́ Боже́ственныя пути́ покажи́.
До́блественным нра́вом сконча́вше по́двиги, венце́в сподо́бистеся небе́сных, всесла́внии му́ченицы, о все́х моля́щеся.
Тьмы́ боле́зней претерпе́вше, страстоте́рпцы, тьма́ми благи́х сподо́бистеся, тьма́м совокупля́еми безпло́тных си́л.
Богородичен: Бо́га ро́ждши небе́снаго Царя́, Де́во, во мне́ ца́рствующий гре́х низложи́, и уще́дривши спаси́ мя.
Песнь 4
Ирмос: Покры́ла е́сть Небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.
Хотя́й все́м челове́ком, Ще́дре, спасти́ся, спаси́ мя преступи́вшаго Твоя́ повеле́ния, Сло́ве, и не уничижи́ мене́.
Подклони́хся безслове́сным страсте́м, и ското́м окая́нный уподо́бихся, Ще́дре Сло́ве Бо́жий, уще́дрив спаси́ мя.
Вя́жеми, и огне́м поджига́еми, попали́сте пре́лесть, воспаля́еми ре́вностию благоче́стия му́ченицы.
Ра́й мы́сленный яви́стеся, посреде́ иму́ще дре́во живо́тное блаже́ннии, Христа́ садоде́теля вся́ческих.
Богородичен: Де́во Чи́стая богоблагода́тная, облагодати́вши у́м мо́й омраче́нный, неве́дения соверше́нно свободи́.
Песнь 5
Ирмос: У́тренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.
Ле́ностию житие́ ижди́х, и трепе́щу неизбе́жнаго Твоего́ суди́ща, на не́мже суди́тися хощу́ стра́стный а́з, уще́дри мя́, Го́споди.
И́же о́чи слепце́м просвети́вый, Сло́ве, души́ моея́ зе́ницы лю́те омраче́нныя отве́рзи, зре́ти све́т повеле́ний Твои́х.
Кре́пкою мы́слию Христа́ испове́дающе, претерпе́сте ра́ны вся́каго муче́ния, до́блественнии страда́льцы: те́мже блажи́ми есте́.
Преплы́вше все́х муче́ний треволне́ние, достиго́сте к приста́нищу вы́шняго Ца́рствия, тишины́ и́стинныя му́ченицы исполня́еми.
Богородичен: И́же хоте́нием вся́ сотвори́вый Бо́г Сло́во, па́че сло́ва, Де́во, из Тебе́ воплоти́ся: Того́ у́бо приле́жно о все́х моли́.
Песнь 6
Ирмос: Ио́на из чре́ва А́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.
Обы́де мя́ бе́здна прегреше́ний, снидо́х во глубину́ поги́бели: возведи́ мя, Сло́ве, я́коже иногда́ Ио́ну от истле́ния к жи́зни.
Обурева́ет мя́ помышле́ний треволне́ние, ко приста́нищу и́стиннаго покая́ния испра́ви мя́, Ще́дре, в тишине́ соблюда́я се́рдце мое́.
Святи́и му́ченицы защити́вшеся ве́рою, ло́жнаго мучи́телей ласка́ния уклони́шася: и стрела́ми вра́жиими не уя́звлени бы́ша.
Возноша́еми к Бо́гу в любви́, и возненави́деша мирску́ю любо́вь му́ченицы, и дру́зи вся́ческих Творцу́ яви́шася.
Богородичен: Пое́м Тя́, Препе́тая Отрокови́це, ро́ждшую пресвято́е Сло́во, Его́же вся́ си́лы небе́сныя воспева́ют немо́лчными гла́сы.
Песнь 7
Ирмос: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.
Пожри́ душе́, же́ртву хвале́ния Бо́гу, потщи́ся и пока́йся, до́ндеже то́рг е́сть жите́йский: ны́не ку́плю де́й до́брых придая́ний.
Приближа́ется душе́, сме́ртное посече́ние, плоды́ досто́йны сотвори́: да не я́ко непло́дное дре́во вве́ржешися во о́гнь гее́нский, и воспла́чешися неуте́шно.
Святи́и му́ченицы, пе́щь пре́лести угаси́вше кро́вными ту́чами, вопия́ху я́коже о́троцы: оте́ц на́ших Бо́же благослове́н еси́.
Сы́нове све́та бы́сте, све́ту жела́емому примеси́вшеся му́ченицы: и вся́ су́щая во тьме́ просвеща́ете, и пре́лести тьму́ отгоня́ете.
Богородичен: Купина́ Тя́ прообража́ше, Чи́стая, неопали́мая, о́гнь бо родила́ еси́ непостоя́нный, Де́во. Те́мже вопию́ Ти: попали́ веще́ственныя моя́ стра́сти.
Песнь 8
Ирмос: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.
Сло́во прия́х я́ко све́щник сия́ющ, но к безслове́сным преклони́хся окая́нный страсте́м, и во тьме́ зло́бней ше́ствую всегда́.
Госпо́дь бли́з, я́коже ве́руем: попецы́ся, душе́, и не уныва́й, побди́ и возопи́й бо́дренно: ще́дрый Человеколю́бче, спаси́ мя.
Вкуси́вше Боже́ственныя сла́дости, го́ресть боле́зненную претерпе́сте, и ны́не наслажда́етеся Боже́ственнейших сло́ва причаще́ний, му́ченицы.
Внидо́сте к Боже́ственному поко́ю, улучи́сте до́брых, и́хже наде́ястеся, всехва́льнии му́ченицы: сего́ ра́ди досто́йно ва́с ублажа́ем.
Богородичен: Разреши́ся от кля́твы рождество́м Твои́м, Де́во, челове́ческое смеше́ние: и́бо Всеблагослове́ннаго, благослове́ньми вся́ украша́ющаго родила́ еси́.
Песнь 9
Ирмос: Па́че естества́ Ма́терь, и по естеству́ Де́ву, еди́ну в жена́х благослове́нную пе́сньми ве́рнии Богоро́дицу велича́ем.
Се́ су́д приближа́ется, и осужде́нию дела́ име́я, са́м отчаява́юся: пра́ведный судие́ Христе́ Бо́же, не осуди́ мене́.
Я́коже ве́рная ханане́а, поми́луй мя́, вопию́ Ти́: я́коже погорбле́ную дре́вле испра́ви мя́, е́же ступа́ти пра́во к стезя́м Твои́м, Человеколю́бче.
Совлеко́стеся вся́кия с ри́зами зло́бы, и одея́ньми зе́льных муче́ний, сла́вы оде́жду себе́ страда́льцы исхода́таисте.
Боже́ственна страна́ живу́щих, Сио́н вы́шний гра́д, перворо́дныя ва́с прия́т, осиява́емых добро́тами по́двиг, страда́льцы.
Богородичен: Просвети́тельными луча́ми возсия́вшаго сло́ва из Тебе́, Де́во Чи́стая, озари́ мя, грехо́в и страсте́й во тьме́ покрыва́ема.