ID=7259
date=73
Кано́н Кресту́, творе́ние Ио́сифово, глас 7
Песнь 1
Ирмос: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.
Распя́тие Влады́ка поноша́емь терпи́т, челове́ков оте́мля поноше́ния, я́ко Человеколю́бец: копие́м в ре́бра пробода́ется, си́м закала́я врага́ бори́теля.
Я́коже лу́к напря́г Кре́ст Тво́й, Ми́лостиве, стрела́ми уязви́л еси́ гвозде́й сопротивобо́рца, Спа́се, и от него́ дре́вле уязвле́ныя челове́ки исцели́л еси́.
Кровьми́ святы́х, ме́рзкая крове́й преста́ша скверне́ния, и́долом приноси́мая: вся́ же земля́ освяти́ся, те́х хвала́ми при́сно ублажа́ющи.
Воспе́ша си́лы небе́сныя, земны́х зря́ще в телеси́ со безпло́тными борю́щихся: отню́дуже подвигополо́жник си́х венцы́ побе́ждших венча́.
Богородичен: Раздра́ся рукописа́ние Ада́мово, вопия́ше Пречи́стая Влады́чица, копие́м Сы́не прободе́ну Ти́ бы́вшу: те́мже воспева́ю Твое́ страда́ние, все́м источи́вшее безстра́стие, Влады́ко.
Песнь 3
Ирмос: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́.
Пропны́й не́бо я́ко ко́жу, на дре́ве распросте́рл еси́ ру́це, Иису́се, руки́ неудержа́ние Ада́мова греха́ исцеля́я, я́ко ми́лостив, и исхища́я все́х от руки́ льсти́ваго борца́.
Тебе́ те́рнием, Царю́, лю́дие законопресту́пнии венчава́ют, сла́вою венча́вшаго челове́ки, и преслуша́ния Ада́мова те́рние искорени́вшаго, Христе́, и насади́вшаго все́м богоразу́мия прозябе́ние.
Естество́м су́ще сме́ртни, безсме́ртию в то́м поучи́тися изво́листе, прему́дрии: те́мже ра́ны и ско́рби, му́ченицы, гоне́ния же, бие́ния, и удо́в отсече́ния, вся́ ра́дующеся, претерпе́сте.
Тве́рдым по́мыслом, потреби́ти вся́ претя́щаго льсти́ваго врага́ вы́ страда́льцы смири́сте, смири́вшеся о Христе́, и вознесо́стеся держа́вою Боже́ственною, на того́ вооружи́вшеся.
Богородичен: Во́лею закла́наго А́гнца на стра́сть прише́дша, зря́щи Ма́ти и А́гница, сле́з исто́чники пролива́еши, глаго́лющи: что́ сие́ Ча́до Свяще́нное, ка́ко умерщвля́ешися, оживи́ти вся́ уме́ршыя промышля́я?
Песнь 4
Ирмос: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.
На земли́ челове́к я́влься, небе́сныя челове́ки соверши́л еси́, вознесе́н бы́в на дре́во, Влады́ко, вся́ совозне́сл еси́ воспева́ющыя Твоя́ страда́ния.
За сме́ртных умира́еши, Животе́, за непра́ведныя, Иису́се мо́й пра́ведный, стра́сть терпи́ши поно́сную: пое́м, Долготерпели́ве, безме́рное благоутро́бие Твое́.
Звере́й устремле́ния, вре́ния о́гненная, ру́к же и но́г отсече́ния, исторга́ния удо́в, и вся́ческую ину́ю му́ку претерпе́сте му́ченицы, хода́тайствующую Боже́ственное наслажде́ние.
От теле́сных коне́ц страда́льцы, ко Христу́ все́х Бо́гу зову́ще, услы́шани бы́сте, и на ка́мень вознесо́стеся Боже́ственнаго ны́не соверше́ния.
Богородичен: Мольбу́ о на́с к воплоще́нному из Тебе́, Богоро́дице, сотвори́, я́ко да обря́щем по́мощь во вре́мя напа́сти, и́же Того́ стра́сти сла́вящии.
Песнь 5
Ирмос: Го́споди, Бо́же мо́й, от но́щи у́треневав, Тебе́ молю́ся: пода́ждь ми́ оставле́ние прегреше́ний мои́х: и к све́ту Твои́х повеле́ний пути́ моя́ напра́ви, молю́ся.
Распя́тие прия́т во злы́х отя́тие, Бо́жий Сло́ве, же́лчи же вкуси́л еси́, сла́достнаго бра́шна го́рький вре́д потребля́я. Сла́ва мно́гому благоутро́бию Твоему́.
И́же на Кресте́ воздви́жением Твои́м, всю́ зе́млю поколеба́л еси́ Боже́ственною Твое́ю держа́вою, и исцеля́еши ея́, Влады́ко, сокруше́ния, и коле́блемая сердца́ к Твоему́ утвержда́еши позна́нию.
Распросте́р велиа́р всю́ду се́ти зло́бныя, но не объя́л е́сть Христо́вы му́ченики: криле́ бо прие́мше о́гненныя, ко оби́телем Боже́ственным достиго́ша.
Ма́нием неоску́дным от Бо́га обожа́еми страстоте́рпцы, боле́зненных муче́ний отню́д не устраши́стеся, я́коже ино́му стра́ждущу, си́це прему́дрии са́ми пребы́сте.
Богородичен: Ки́има очи́ма воззрю́, О́ко изсуша́ющее вся́ бе́здны, Сы́не Мо́й, угаша́емое, на Кресте́ ви́сящу Ти́? Чи́стая Де́ва вопия́ше, рыда́ньми Себе́ смуща́ющи.
Песнь 6
Ирмос: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.
Изба́вителю сы́й Еди́не, це́ну Твою́ вда́л еси́ спаси́тельную Кро́вь, и искупи́л еси́ плене́ныя ны́, Преблаги́й, и Твоему́ Роди́телю приве́л еси́, уби́в Кресто́м, Христе́, мучи́теля.
Невоздержа́нием дре́вле паде́ние лю́тое подъя́х, Христо́с же воздвиза́емь на дре́во, ру́це просте́р, па́дшаго мя́ воздви́же, и уязви́вся во́лею, вся́ моя́ я́звы я́ве исцели́.
Дрема́нием пре́лести отню́д не воздрема́вшеся, вся́ко устремле́ние успи́сте мучи́телей, му́ченицы: и и́же пра́ведным прили́чным сно́м у́спше блаже́ннии, бо́дреннии о все́х моли́твенницы бы́сте.
Утвержде́ни на ка́мени Боже́ственных Христо́вых повеле́ний, вра́жиими ко́зньми непревра́тни пребы́сте всесла́внии му́ченицы: и того́ нога́ми попра́сте богому́дренно, к Бо́гу боголе́пне ше́ствующе.
Богородичен: Ю́но отроча́ ражда́еши, Богоро́дице, пре́жде ве́к безле́тно Отцу́ сразумева́емаго, обновля́ющаго Кресто́м челове́чество, обетша́вшее грехми́ злонача́льнаго сове́том, Пренепоро́чная.
Песнь 7
Ирмос: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.
Неболе́зненную обре́те жи́знь пра́отец, Тебе́ во́лею поболе́вшу на Кресте́ и ме́ртву бы́вшу, и зми́я умертви́вшу, Иису́се Христе́ Многоми́лостиве.
Зако́нныя кля́твы изба́вихомся вси́: Законода́вец бо воздви́жеся на Кре́ст, благослове́ние приснотеку́щее и благода́ть, и ми́лость, и тле́нию источи́в потребле́ние.
Во́льными устремле́ньми приступа́юще к муче́нием му́ченицы, во́лею пострада́вшаго вообража́ху: от него́же венча́вшеся, со А́нгелы ны́не ликовству́ют.
Те́ло преда́вше разли́чным му́кам, прехва́льнии му́ченицы, кро́вными пролия́нии безпло́тныя враги́ удави́сте, и исто́чники исцеле́ний источа́ете.
Богородичен: Ка́ко не воспла́чуся, Сладча́йшее Ча́до, на Кресте́ зря́щи Тя́? ка́ко не возрыда́ю непра́ведно Тебе́ стра́ждуща, Судие́ Пра́веднейший? Де́ва Ма́ти веща́ше.
Песнь 8
Ирмос: Неопа́льная огню́ в Сина́и прича́щшаяся Купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.
Кро́вь и вода́ исте́кшая из ре́бр Твои́х, Спа́се, ми́р ве́сь обнови́ша, и нетле́ние источи́ша: же́ртвы же ме́рзкия и проли́тие скве́рных крове́й преста́ша. Те́мже Тя́ вся́ дела́ я́ко Го́спода пое́м, и превозно́сим во вся́ ве́ки.
Венце́м терно́вым увя́злся еси́, Спа́се, о́цта и же́лчи вкуси́л еси́, и оплева́н бы́л еси́, и бие́н, воздви́глся еси́ на Кресте́, гво́здие прие́м, и́миже спасе́н бы́в а́з взыва́ю Ти́: вся́ дела́ Госпо́дня Го́спода по́йте, и превозноси́те Его́ во вся́ ве́ки.
От неистощи́мых сокро́вищ и́стины, пресве́тло обогати́вшеся страда́льцы, вся́ку нищету́ оплева́сте и́дольскую, и обогати́телие ни́щих яви́стеся, вопию́ще: вся́ дела́ Госпо́дня Го́спода по́йте, и превозноси́те Его́ во вся́ ве́ки.
Законоположе́ния злочести́вых небрегу́ще, я́коже о́троцы, му́ченицы, во о́гнь горя́щ вве́ржени бы́сте, в не́мже ро́су Бо́жию прохла́ждшую ва́с обрето́сте, вопию́ще: вся́ дела́ Госпо́дня Го́спода по́йте, и превозноси́те Его́ во вся́ ве́ки.
Богородичен: Зако́нный дре́вле Тя́ ковче́г прообража́ше, Чи́стая, не скрижа́ли вну́трь нося́щ, но Христа́ Законода́вца, Его́же беззако́ннии лю́дие на Кресте́ пригвозди́ша, на́с вопию́щих спаса́юща: вся́ дела́ Госпо́дня Го́спода по́йте, и превозноси́те Его́ во вся́ ве́ки.
Песнь 9
Ирмос: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко еди́ну Бо́жиих чуде́с сподо́бльшуюся, Тя́ при́сно велича́ем.
Кре́пость вра́жия отню́д оскуде́, Тебе́ кре́пко на Дре́ве си́льне возопи́вшу к пребезнача́льному Отцу́ Твоему́, и созва́вшу расточе́нныя о́вцы Твоя́, Влады́ко Христе́, к Твоему́ позна́нию.
Я́коже А́гнец воздви́глся еси́, Влады́ко, на Кре́ст во́лею, исхища́я от во́лка слове́сныя, Спа́се, о́вцы Твоя́, и во огра́де Твои́х повеле́ний затворя́я сия́ воспева́ющыя Тя́.
Твои́х страсте́й подража́телие явля́еми благосла́внии страстоте́рпцы, многообра́зныя ви́ды му́к претерпе́ша, Человеколю́бче: отню́дуже венцы́ улучи́ша сла́вы, и Ца́рствия Твоего́, Христе́, сподо́бишася.
Со́лнечныя облистава́ют благода́ти, просвеща́юще ве́рныя, честны́х страстоте́рпец достохва́льное торжество́: отню́дуже и и́же сие́ при́сно соверша́ющии, тьмы́ прегреше́нии лю́тых избавля́емся.
Богородичен: Све́т мы́сленный на Кресте́ облиста́, Тво́й, Пречи́стая, Сы́н, и нача́льники тьмы́ обличи́, Пренепоро́чная: со́лнечный помрачи́ све́т, и ве́рных исполне́ния, Чи́стая, просвети́л е́сть.