ID=7540
date=16
, глас
Песнь 1
Ирмос: Твоя́ победи́тельная десни́ца боголе́пно в кре́пости просла́вися: та́ бо Безсме́ртне, я́ко всемогу́щая проти́вныя сотре́, Изра́ильтяном пу́ть глубины́ новосоде́лавшая.
Врата́ сме́рти и вереи́, Твое́ю сме́ртию сокруши́л еси́ Безсме́ртне, врата́ отве́рзи Влады́ко, па́че ума́ безсме́ртия у́спшым, моли́твами страстоте́рпец Твои́х.
Да Боже́ственнаго живота́ сподо́бимся, соше́л еси́ к сме́рти, тоя́ же испрове́рг сокро́вища, на́с отту́ду извле́кл еси́: ны́не же Жизнода́вче, преста́вленныя упоко́й.
Ты́ мое́ тле́нное же и ме́ртвенное восприи́м, в нетле́ние обле́кл еси́, и к безконе́чному житию́ и блаже́нному возне́сл еси́, иде́же я́ко ще́др, и́хже прия́л еси́, упоко́й.
Богородичен: Ро́ждшую е́же от Бо́га Бо́жие Сло́во, ве́рнии воспои́м: Та́ бо Всечи́стая пу́ть жи́зни уме́ршым бы́сть, Ю́же я́ко богоприе́мницу и Богоро́дицу просла́вим.
Песнь 3
Ирмос: Еди́не Ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́ Святы́й: одушевле́нный хра́ме неизрече́нныя сла́вы Твоея́ Человеколю́бче.
Я́ко Еди́н Бла́г сы́й, я́ко Еди́н Многоми́лостив, я́же благоче́стно к Тебе́ отше́дшыя, в Небе́сных селе́ниих упоко́й, иде́же неизрече́нная ра́дость и наслажде́ние, и иде́же собо́р му́ченический весели́тся.
Ты́ еди́н яви́лся еси́ на земли́, Спа́се мо́й безгре́шен, и́же грехи́ ми́ра взе́мляй я́ко милосе́рд: от ми́ра сего́ преста́вльшихся ве́рою, ду́шы упоко́й во дво́рех святы́х Твои́х, в сла́дости ра́йстей Человеколю́бче.
Сме́рти держа́ву низло́ж, живо́т неконча́емый все́м ве́рным источи́л еси́ Влады́ко: в то́м у́бо учини́ благоче́стно отше́дшыя, презира́я безме́рная прегреше́ния, и проща́я грехи́ и́х Человеколю́бче.
Богородичен: Без се́мене зача́т Чи́стая, Сло́во присносу́щное, пло́тски к на́м прише́дшее, и сме́рти кре́пость разори́вшее, и ме́ртвым воскресе́ние и жи́знь ве́чную Свои́м милосе́рдием да́рующее.
Песнь 4
Ирмос: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.
Умертви́в а́д непобеди́мою Твое́ю си́лою, вмене́н бы́л еси́ в ме́ртвых, еди́н сы́й свобо́дь Христе́, ду́шы свободи́ благочести́вых, и е́же в не́м осужде́ния, святы́х му́ченик мольба́ми.
И́же все́х сы́й я́ко Влады́ка, противодосто́йную и́же от Ада́ма Твоего́ заколе́ния, изба́ву да́л еси́ и це́ну: те́мже мо́лимся Твои́м щедро́там, преста́вльшыяся упоко́й, согреше́ний подая́ оставле́ние.
Прия́л еси́ Спа́се мо́й, е́же во гро́бе положе́ние, и я́же во гробе́х жи́ти осужде́нныя мертвецы́, я́ко Бо́г воскреси́л еси́. Ны́не же жи́зни присносу́щныя сподо́би преста́вленныя, я́ко Еди́н Человеколю́бец.
Богородичен: Спасе́ся ро́д челове́ческий Рождество́м Твои́м: Ты́ бо родила́ еси́ на́м ипоста́сный Живо́т, сме́рти потребле́ние, и к жи́зни соде́ловающий восхо́д, Богороди́тельнице Пренепоро́чная Влады́чице.
Песнь 5
Ирмос: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.
Исцеля́яй от я́да сме́ртнаго, сме́рть прия́т, и сме́рти жа́ло притупи́л еси́: но Са́м упоко́й, и́хже прия́л еси́ жизнода́вче, му́ченик мольба́ми.
Умерщвле́ния и тле́ния челове́ки свободи́вый, ду́шы ве́рно преста́вленных учини́ во дво́рех святы́х Твои́х, отню́дуже отбеже́ вся́ка ско́рбь, и весе́лие водворя́ется.
Ра́й у́бо с Тобо́ю пове́шенному, я́ко отве́рзл еси́: ны́не приими́, ду́шы Влады́ко, к Тебе́ ве́рою преста́вльшыяся, подая́ и́м в Це́ркви пе́рвенец водвори́тися.
Богородичен: Избавля́ющи на Тя́ наде́жды держа́ву иму́щих, к приста́нищу Боже́ственныя во́ли ти́хо наста́ви, ма́терним Твои́м дерзнове́нием к Сы́ну Твоему́, Благослове́нная Всенепоро́чная.
Песнь 6
Ирмос: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.
Я́ко милосе́рд, преста́вленным да́руй прегреше́ний проще́ние, и ве́чное наслажде́ние подая́, иде́же сия́ет лица́ Твоего́ све́тлость, и озаря́ет страстоте́рпцы Твоя́.
И́же кро́вию от ре́бр Твои́х исте́кшею ми́р искупи́л еси́, ве́рою усо́пшыя у́бо Христе́ изба́ви честны́ми Страстьми́ Твои́ми: Ты́ бо це́ну за все́х Себе́ да́л еси́.
И́же созда́вый мя́ рука́ма пречи́стыми пе́рвее и ду́х дарова́вый, и к земли́ низпа́дша зле́, па́ки обнови́вый красне́йше, ны́не ду́шы преста́вльшихся Са́м упоко́й.
Черто́гу Твоему́ светоно́сному Го́споди, всели́ти сподо́би, я́же в ве́ре к Тебе́ усо́пшыя, те́х презира́я прегреше́ния, я́ко бла́г и милосе́рд и многоми́лостив.
Богородичен: Пое́м Тя́ Благослове́нная Чи́стая, Ея́же ра́ди на́м возсия́ су́щым во тьме́ и се́ни сме́ртней, пра́вды незаходи́мое Со́лнце: Ты́ во на́шего спасе́ния хода́таица была́ еси́.
Песнь 7
Ирмос: Тебе́ у́мную Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́, во чре́ве Твое́м Всеце́л, хва́льный отце́в Бо́г, и препросла́влен.
Сия́нии Пречи́стыя сла́вы Твоея́, озари́тися Христе́ подава́й, от бу́ри мирски́я к Тебе́ отше́дшым, и те́х сподо́би с му́ченики взыва́ти Тебе́: хвали́мый отце́в Бо́же благослове́н еси́.
Но́в Ада́м вои́стинну бы́в, Ада́мов Соде́телю, И́же кля́тву бо Ада́мову еди́н потреби́л еси́. Те́мже мо́лимся Тебе́: преста́вленныя упоко́й в сла́дости ра́йстей Христе́, я́ко еди́н милосе́рд.
И́же на́шу есте́ственную не́мощь еди́н све́дый я́ко Бо́г, бла́г же и ми́лостив, вся́ и́хже преста́вил еси́, иде́же све́т незаходи́мый присеща́ет лица́ Твоего́, учини́ Христе́, хвали́мый отце́в Бо́же и препросла́влен.
Богородичен: Зако́на се́ни, и дре́вняя гада́ния Твои́м преидо́ша Рождество́м Богома́ти, Ты́ бо на́м Боже́ственныя благода́ти Све́т возсия́ла еси́: и́мже дре́вних изба́вихомся долго́в Чи́стая, воспева́юще Бо́га препросла́вленнаго.
Песнь 8
Ирмос: В пещи́ о́троцы Изра́илевы, я́коже в горни́ле добро́тою благоче́стия чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.
Скве́рну всю́ Твои́х рабо́в усо́пших, Твоего́ человеколю́бия росо́ю отмы́в, Тя́ пе́сньми воспева́ти сподо́би: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.
Предстоя́тели Спа́се десны́я, ве́рою оправда́в моли́твами страстоте́рпец, я́же преста́вил еси́ ве́рныя, покажи́ пою́щыя: благослови́те вся́ дела́ Госпо́дня Го́спода, по́йте и превозноси́те Его́ во вся́ ве́ки.
И́же сме́рти и живота́ име́яй вся́кую вла́сть, я́же ве́рою усо́пшыя Твоего́ сия́ния улучи́ти благоволи́, взыва́ющыя: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
Богородичен: Спасе́ния хода́таица на́м была́ еси́ Всенепоро́чная, и в непреходи́мыя ве́ки пребыва́ния же и све́тлости: Тебе́ Де́во Чи́стая, при́сно вся́ дела́ благослови́м, и превозно́сим во вся́ ве́ки.
Песнь 9
Ирмос: О́браз чи́стаго Рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.
Пощади́ я́ко Бо́г человеколюби́в, и ми́лостив, Твое́ созда́ние: и упоко́й в селе́ниих святы́х Твои́х, иде́же му́ченицы вси́ веселя́тся, ве́рою преста́вленыя от вре́менных, многоми́лостиве.
Име́яй ми́лостей бе́здну, препобежда́ющую рабо́в Твои́х прегреше́ния, и́хже прие́м избра́, упоко́й в не́дрех Авраа́млих Человеколю́бче, и с Ла́зарем во све́т Тво́й всели́.
Изба́витель и Спа́с бы́в ро́ду челове́ческому, распя́тия ра́ди, я́же ны́не от на́с преста́вил еси́, я́ко Благода́тель, наслажде́ния Боже́ственнаго сподо́би, и живота́ нетле́ннаго, и весе́лия и све́тлости.
Богородичен: О я́же па́че ума́ чуде́с Твои́х! Ты́ бо Де́во еди́на все́м, и́же под со́лнцем, подала́ еси́ разуме́ти нове́йшее чу́до Пречи́стая, Твоего́ рождества́ недоуме́ннаго: те́мже Тя́ вси́ велича́ем.